Қўлимдаги нақд пулмас деб, куюнма, дўст,
Пластикда бўлса ҳамки, бор-ку пулинг.
Қўлингдаги нақд бўлса ҳам суюнма, дўст,
У ҳам кетар, очилмасин "қаҳ-қаҳ" гулинг.

Бугун бормиз - нақдмиз, аммо бир кун тайин,
Пластик карт - тобут, унга танлар тушар.
Қабр деган терминалга солиб, кейин,
У дунёнинг ҳисобига ўтказишар.

© Ботиржон Эргашев
@Botirjon_Ergashev

ДУНЁ!

Ҳеч тушиниб бўлмайди феъл-атворингга,
Гоҳ тошқин сой, гоҳ сокин кўлдирсан, дунё.
Яраб-ярамаса ҳам бирор корингга,
Яхши-ю ёмон ўтар йўлдирсан, дунё!

Яна мезонларинг бор, ойли, йиллисан,
Ҳам меҳр ҳам қаҳрли – икки диллисан,
Бири бол, бири заҳар, икки тиллисан,
Икки юзли, найранги мўлдирсан, дунё!

Бир юзингда кулгу бор, бирисида муз,
Бир тарафинг баҳор-у, бир томонинг куз,
Баъзан шакар тутасан ва баъзида туз,
Ҳам илиқ кафт, ҳам муштли қўлдирсан, дунё!

Битта ўғлинг олимдир, золим бир ўғлинг,
Яхшиси ўнта бўлса, ёмони минг-минг,
Ҳаммасини кўриб ҳам деёлмайсан “ғинг”
Не қилишни билмаган гўлдирсан, дунё!

Қучоғинг шод этар гоҳ ғашга тегадир,
Булбуллар зор гулларга, зоғлар эгадир.
Ишларинг ҳам тескари нуқул негадир,
Сўлларга ўнг, ўнгларга сўлдирсан, дунё!

Меҳрибонми, қаҳратон сени не атай,
Бағринг турфа безакли нурсиз хонадай.
Фарзандлари кўп, бироқ, жулдур онадай –
Ярми гулзор ва ярми чўлдирсан, дунё!

✍Ботиржон ЭРГАШЕВ

@Botirjon_Ergashev

БОЛАЛИК                                        

Ўттиз саккиз йилим – ўттиз саккиз тоғ,
Ортимда қолмоқда оқлик, қоралик.
Кеча энг яқиним, бугун энг узоқ,
Йилларим болалик, йўлим – болалик.

Беташвиш боладан ғамга айландим,
Балқиган ҳилолдан шамга айландим.
Кечагина эдинг асалим, қандим –
Ширалари босган қўлим – болалик.

Остона хатласам – кўча бечора,
Ҳамма ўзи билан ўзи овора.
Бугун қурғоқ дала, кечаги бола,
Ёмғирим болалик, дўлим – болалик.

Йўқсан, узоқларга узо-о-о-қ термулиб,
Излайман, хаёллар ичра кўмилиб.
Бугун ғамларга ғарқ, кеча чўмилиб,
Уст-боши шалоббо, хўлим – болалик.

Аламлар суйкалар қучоғин очиб,
Қуёш ҳам нур эмас қаҳрини сочиб.
Офтобда қолдириб, кетдинг-а қочиб,
Салқиним болалик, сўлим – болалик.

Рости, ташвишлардан жудаям толдим,
Узр, бирозгина вақтингни олдим.
Кеча сойда эдим, саҳрода қолдим,
Дарё болалигим, кўлим – болалик.

Катта бўлмоқ завқи айлабон асир,
Улғаймоққа шошиб, елибман зир-зир,
Қадрингни билмаган Ботирни кечир.
Эҳ, ўзимнинг содда,  гўлим – болалик.

✍Ботиржон ЭРГАШЕВ

УЗОҚҚА ЕТГАЙ

Оқил инсон учун оз имкон узоққа етгай,
Ҳар доим имкони бор инсон узоққа етгай.

Эзгуликни манзил деб, пок ният-ла юрса йўл,
Ҳеч талaфот кўрмасдан карвон узоққа етгай.

Бу карвон бир омонат, минг савол-жавоби бор,
Бунда тинчидан кечган сарбон узоққа етгай.

Донони ғафлат босиб, ўйлаб босмаса қадам,
Бу ҳам битта кўргулик – нодон узоққа етгай.

Дон эзилиб, ун бўлар, Оллоҳ ҳукмини кўринг,
Лойга қўшилса ҳамки, сомон узоққа етгай.

Омад отига минган чавандоз мард бўлса бас,
Берилган гўзал давру даврон узоққа етгай.

Ҳар мушкулнинг йўриғи бор, уни топмоқ мушкул,
Топганлар омон қолар, омон узоққа етгай.

Ботир, тақдир синови қаттиқ бўлса сабр айла,
Камон қаттиқ тортилса, пайкон узоққа етгай.

Ботиржон Эргашев

@Botirjon_Ergashev

ҚИЗИМ

Дада, дейсан такрор ва такрор,
Эркагинам, жоним, шўх қизим.
Қандай маза сенинг даданг бор,
Менинг эса дадам йўқ, қизим.

Отасизлик хўп оғир экан,
Жон-жонимга санчилар тикан.
Мендан рози бўлдилармикан?
Булар савол эмас, ўқ, қизим.

Жон бўғзимга тиқилиб турар,
Етмиш марта йиқилиб, турар.
Фақат менга тикилиб турар -
Армонларнинг кўзи лўқ, қизим.

Тақдир дея, демагайман "ғинг"
Лек бир дардим бўлади минг-минг.
Мен шўрликка аччиқ қисматнинг
Қилганлари доим дўқ, қизим.

Соғинч ғамга аламни улар,
Тиғ панжаси юрагим тилар,
Ўлганимнинг кунидан кулар
Бу кўз, аммо бағрим чўғ, қизим.

Мен дадангман - дадамдан нишон,
Дадам - шараф, дадажоним - шон.
Тушадилар жаннатга, ишон,
Бундан жуда кўнглим тўқ, қизим.

"Дада" дейсан такрор ва такрор,
Эркагинам, жоним, шўх қизим.
Қандай маза сенга - даданг бор!
Менинг эса дадам йўқ, қизим.

2022 йил 17 июнь
жумъа, соат 09:15

https://t.iss.one/Botirjon_Ergashev

#Iqtibos

Ризқим Аллоҳдан, нега мен ташвиш қилишим керак?! Унинг ишига аралашмаймиз, ҳамма ўз ишини қилгани маъқул!

@Botirjon_Ergashev

#Iqtibos

Дунёни созламоқ бўлар
носозлар...

@Botirjon_Ergashev

БЎЛ

Донишмандлар даврасида
мулло эмас, оми бўл,
Бўлганда ҳам зўр омимас,
омиларнинг хоми бўл!

Камсуқумлик инсонга зеб,
камроқ гапир, кўп эшит,
Ман-манликнинг пойи эмас,
камтарликнинг томи бўл!

Қора кундир хира кундуз,
турсанг чарақлаб тургин,
Йўқса, бундай кун бўлгандан,
тун кирарнинг шоми бўл!

Дилозорлик қилма асло,
кўнгилларни ол мудом,
Кўнгил овлар овчи бўл, ё
шу овчининг доми бўл!

Одамларга кўрингин сен
омад бўлиб, бахт бўлиб,
Ҳузурингда ҳузур топсин,
эзгуликнинг жоми бўл!

Бироқ, ҳақни ҳақ дея ол,
ким чиқса-да қаршингга,
Сен номига Ботир бўлма,
ботирларнинг номи бўл!

Ботиржон Эргашев
@Botirjon_Ergashev

#Iqtibos

ГУМОНЛИ НИЯТ - МАҒЛУБИЯТ

Ботир Эргашев

@Botirjon_Ergashev

Бемақсаднинг юрган йўли чувалган ипдай,
У йўлларга бизнинг қадам тўғри келмайди.
Эгри жойлар букриларга бўлар қолипдай,
Қийшиқ жойга тўғри одам тўғри келмайди.

© Ботиржон Эргашев

@Botirjon_Ergashev

#Севимли

✍Ботиржон Эргашев
🎤 Озодбек Назарбеков

СЕНГА МУҲТОЖМАН

Ишқдан хаста, хор,
Талон торожман.
Кўнглим сенда ёр,
Сенга муҳтожман.

Кўксим остона,
Масту мастона.
Мен бир девона,
Сенга муҳтожман.

Кўрганлар кулар,
Ишқсиздир улар.
Бардошим қулар,
Сенга муҳтожман.

Бахт йўқ кўзимда,
Шаҳд йўқ сўзимда.
Жоним бўғзимда,
Сенга муҳтожман.

Из тушмас йўлдай,
Гул кутган қўлдай.
Сувга зор чўлдай,
Сенга муҳтожман.

Сабримни сина,
Қилмайман гина.
Фақат биргина –
Сенга муҳтожман.

Соғинчинг дилбар,
Жонимдан ўтар.
Кел кўнглим кўтар
Сенга муҳтожман.

https://t.iss.one/Botirjon_Ergashev

Баҳрамандмиз тақдир бизга не қилса ато,
Гоҳ синовдан ўтдик гоҳо қолдик ғафлатда.
Ғафлатдандир ҳаётдаги бор ҳамма хато,
Ҳаёт бунинг жавобини сўрар албатта.

Ҳар бошда бор, турфа дарду турфа муаммо,
Баъзан кичик совғаларнинг ғавғоси катта.
Кўзларимиз пешонани кўрмайди, аммо,
Пешонага ёзилганин кўрар албатта.

© Ботиржон Эргашев

https://t.iss.one/Botirjon_Ergashev

#Tabriknoma

Каналимизнинг қадрли аъзолари, азиз кузатувчилар!
Бугун @Botirjon_Ergashev ижодий ўзанимизнинг жонсарак маъмури, завқли, зиёли ижодкор Гулнора Икром қизи ( @Gulijon_ijod ) таваллуд топган кун.
Шахсан ўзим номимдан, оилам ва сиз азизлар номингиздан Гулнора қизимизга Яратгандан узоқ, мазмунли умр, мўл ризқ, тўкис бахт сўрайман! Янги қурилган оиласи мустакам ва бекам бўлсин! Серфарзанд, ҳалолидан бой-бадавлат бўлишсин!
Бир дақиқа вақт ажратиб, сизлар ҳам изоҳларда қизимизнинг таваллуд куни билан қутлаб қўйсангиз, хурсанд бўламиз.

Чексиз ҳурмат-эҳтиром ила
@Botirjon_Ergashev

​ҲАЁТ ҚИЗИҚ...

Ҳар бир тонг ўз умрини
бошлагай отиш билан,
Кун ҳам ҳар дам ишини
якунлар ботиш билан.

Оқиллар вақт ғанимат,
дея яшарлар бедор,
Ғофиллар-чи умрини
ўтказар ётиш билан.

Кимдир уни ғафлатда
ётсин дейди бир умр,
Ва кимлардир овора
уни уйғотиш билан.

Ҳавасмандларнинг дасти
дуодадир эрта-кеч,
Ҳасадгўйнинг қўллари
машғул тош отиш билан.

Ҳаёт қизиқ, ким учун
ҳурлик хўрликдир балки,
Ўзлигини ундайлар
яшар йўқотиш билан.

Ботир, харидор бўлма
шундай кимсаларга ҳеч,
Чунки улар кун кўргай
ўзини сотиш билан.

✍️ Ботиржон ЭРГАШЕВ

Бизни қуйидаги ижтимоий тармоқларда
кузатиб боришингиз мумкин
👇👇👇👇👇👇👇👇👇👇👇
Telegram | Instagram | Facebook | Twitter

Тунлардан тонглар излаб яшамоққа не етсин,
Шод дилни шом қилмоқ бу - диёнатга қарши жанг!
Ёмонликдан омонлик топинг, у қуриб кетсин,
"Лат", "офат" сўзларидан "латофат" ясаб яшанг!

© Ботиржон Эргашев

@Botirjon_Ergashev

НЕГА БУНЧА ЧИРОЙЛИСАН?

Чиройингдан ҳурлар ҳуркар,
Нега бунча чиройлисан?
Лабларинг чўғ, олов пуркар,
Нега бунча чиройлисан?

Кўркинг гулдан юққанми, ёр,
Ва ё нурдан юққанми, ёр,
Ё сени ой туққанми, ёр,
Нега бунча чиройлисан?

Паримасми сенинг исминг,
Қуёш каби порлар ҳуснинг,
Рақибларни чорлар ҳуснинг,
Нега бунча чиройлисан?

Кўркинг гулдан юққанми, ёр,
Ва ё нурдан юққанми, ёр,
Ё сени ой туққанми, ёр,
Нега бунча чиройлисан?

Нигоҳинг гул, териб бўлмас,
Ботирманми, билиб бўлмас,
Кўркингга дош бериб бўлмас,
Нега бунча чиройлисан?

@Botirjon_Ergashev