Сарсыарда уһуктан чэй иһэ олордохпутуна звонок: "Дорообо, мин Вилюйскай пер баарбын. Сотору көтөр үһүбүт, спортивнайынан сылдьабын. Манна өссө биир уол баар, эмиэ туга да суох".

Ыксал, борт кэллэ да бу уолаттар көтөллөр. Биир уол улууһун, иккис уол нэһилиэгин баһылыктарыгар эрийдим. Салгыы "Илии Сылааһа", "Якутия с тобой" салайааччыларын кытта кэпсэттим.

Ити курдук кыл тыынынан "Якутия с тобой" тиийдим. Рюкзакка харысхал, сып-сылаас флисовай көстүүм, бэргэһэ, повязка, наскы, халыҥ наколенник.

Технопаркаҕа баар "Илии Сылааһа" сыахха биир уол эрдэ кинилэргэ суруйтарбыт эбит, онон комплект таҥаһа баар. Иккис уолга бэрт түргэнник хомуйдулар. Фирменнай рюкзактарыгар икки көстүүм, нательнай белье, футболка, бэргэһэ, наскы, дождевик, шеврон, харысхал, саха эмчиттэрэ оҥорбут маастарын уктулар. Оо, уолаттар төһө эрэ үөрэллэр!

Ол кэмҥэ дойдуларын администрацияларыттан төлөһөр харчыбын ыыттылар. Санаа хоту барытын атыыластым, халыҥ сонноох, ыстааннаах көстүүм, атах таҥаһа, бэргэһэ, балаклава, бэрчээккэ, улахан рюкзак. Кытай атыыһыта уолаттарга диэн халыҥ наскы бэлэх биэрдэ. Бу сылдьан ийэлэри кытта сибээстэһэ сылдьабын. Маннык ситуацияны кинилэр эрэ сүрэхтэринэн өйдүүллэр. Лена Семеновна Егорова бэрт түргэнник алаадьы астыы оҕуста. Аны Марина Николаевна Федорова-Тимофеева үлэтигэр тиийэн бурдук ас уонна Дьокуускай куорат 7 оскуолатыттан бытовой мал ыллым.

Уолаттар көрүстүлэр, соһуйан үөрүү бөҕө буоллулар. Таҥаспыт барыта сөрү-сөп! Көмө буолбут волонтердарга, Кэбээйи улууһун баһылыгын солбуйааччы Александр Сивцевка, Уус-Алдан Суотту нэһилиэгин баһылыгар Василий Ивановка, ийэлэргэ махтал буолуохтун.

Балыыһабар кэлбитим кэннэ уолаттар: "Аэропортка киирэн иһэбит, кыл мүччү успейдаатыҥ", - диэн ватсабтаатылар.

Этэҥҥэ эрэ сылдьыҥ, эргиллэн кэлэргитин күүтэбит. Маннык ыксаллаах кэмҥэ төһө кыалларынан көмөлөһөр буолуҥ, уолаттарбыт дойдубут туһугар сылдьалларын умнумаҥ.

Светлана Диодорова-Лаврентьева. 22.10.2024 сыл.