Иқтисодиёт ва тадбиркорлик масалаларини қамраб олган дебат

11 октябрь куни сиёсий партиялар номзодлари иштирокида навбатдаги теледебатлар бўлиб ўтди. Тўрт раунд давом этган бу галги баҳсу мунозаралар иқтисодиёт ва тадбиркорлик масалаларига бағишланди. Биринчи раундда ҳар бир партия номзоди ўз сайловолди дастуридаги муҳим ташаббусларни қисқача тушунтириб берди. Иккинчи раундда номзодлар аҳолидан берилган саволларга жавоб қайтаришган бўлса, учинчи раунд номзодларнинг ўзаро савол-жавобларига бағишланди. Айнан ушбу раунд номзодларнинг салоҳияти ва билими, шунингдек, сайловолди дастуридаги ташаббусларнинг қанчалик асосли эканлигини кўрсатди.

Мазкур раундда ЎзЛиДеПдан вакил А.Аслонов ўзининг фаол ва саволларга пухта тайёрланганлигини кўрсатишга эришди. Хусусан, ХДП вакилининг хусусий сектордаги иш берувчиларнинг меҳнат қонунчилигидаги ходим олдидаги мажбуриятларини соддалаштириш борасидаги саволига А.Аслонов томонидан берилган жавоб чуқур асослантирилганлиги билан ажралиб турди. Чунки партиямиз вакили бугунги кунда ишлаётганларнинг 60 фоизга яқини хусусий секторга тўғри келиши, партия хусусий секторнинг иқтисодиётдаги улушини 85 фоизга етказишни режалаштирганлигини аниқ рақамлар билан асослаб берди. Худди шунингдек, бошқа партия вакилларидан берилган саволларга қуруқ гаплардан қочган ҳолда ҳам ҳар томонлама асослантирилган жавоб беришга ҳаракат қилди ва буни уддалади.

Тўртинчи раунд эса, ҳар доимгидек, партия вакилларининг сайловолди чақириғига бағишланди. Бу раундда ҳам партиямизнинг ғоялари ва мақсадлари жарангдорлиги ва чуқур мазмунга эга эканлиги билан ажралиб турди.

Мухтасар қилиб айтганда, бугунги дебат ЎзЛиДеП номзодларининг салоҳияти юқори ҳамда халқ вакили бўлишга муносиб эканлигини яна бир бор намоён қилди.

#uzlidep #saylov2024

🖥 Расмий саҳифаларимизга уланинг