Toshkent viloyatida yangi bog‘cha foydalanishga topshirildi

Toshkent viloyati, Toshkent tumani “Xasanboy” MFY hududida 560 o‘rinli 9-sonli davlat maktabgacha ta’lim tashkiloti foydalanishga topshirildi.

Tashkilotning ochilish marosimida Maktabgacha va maktab ta’limi vazirining birinchi o‘rinbosari - Maktabgacha ta’lim agentligi direktori Agrippina Shin hamda Toshkent viloyati hokimi Zoir Mirzayev ishtirok etdi.

Ta’kidlash joizki, 1-iyun — Xalqaro bolalarni himoya qilish kuni munosabati bilan ushbu maktabgacha ta’lim tashkilotining ochilishi bolalar va mahalla aholisi uchun chinakam bayram sovg‘asi bo‘ldi.

Maktabgacha ta’lim tashkilotida ta’lim-tarbiya sifatini oshirish maqsadida innovatsion ta’lim metodlarining faoliyati jarayonga tatbiq etilishi ko‘zda tutilgan. Xususan, robototexnika, STEAM, ta’lim laboratoriyasi (o‘qitish metodikasi, bolalar psixologiyasi, ikkinchi til o‘qituvchilarini tayyorlash yo‘nalishlarida), nazariy va amaliy dual ta’lim yo‘nalishlari shular jumlasidandir. Shuningdek tashkilotda shaxmat-shashka to‘garaklari faoliyati ham yo‘lga qo‘yiladi.

Tashkilotda rekonstruksiya ishlari boshlangunga qadar 8 ta guruh va 43 nafar xodim faoliyat yuritgan bo‘lsa, bugungi kunda tashkilotning yangi binosida 16 ta guruh hamda 72 nafar xodim faoliyat yuritishi rejalashtirilgan.

Ma’lumot uchun: Bugungi kunda Toshkent viloyati, Toshkent tumanida jami 97 ta maktabgacha ta’lim tashkilotlari faoliyati yo‘lga qo‘yilgan bo‘lib, shundan, 37 ta davlat, 20 ta xususiy, 40 ta oilaviy-nodavlat maktabgacha ta’lim tashkilotlari mavjud.


Vazirlikning rasmiy sahifalariga ulanish
📱Telegram | 📹Youtube | 📒Facebook | 📸Instagram

“Sizlar bilan bir safda va bir jamoa bo‘lib ta’lim sifatini oshirish yo‘lida hamnafas ishlaymiz” — Maktabgacha va maktab ta’limi vaziri

Maktabgacha va maktab ta’limi vaziri Hilola Umarova bugun Toshkent shahridagi umumta’lim maktab direktorlari bilan uchrashdi.

Uchrashuvda maktab rahbarlariga Davlatimiz rahbarining maktabgacha hamda maktab ta’limini yangi bosqichga olib chiqish, uning sifatini oshirish hamda ta’lim dasturlarini takomillashtirishga doir Farmoni mazmun mohiyati, mazkur hujjat bilan sohada amalga oshirilishi ko‘zda tutilayotgan o‘zgartirishlar xususida fikr almashildi.

Jumladan, Farmon bilan maktab rahbarlarining huquqlari kengaytirilayotgani, kasbiy faoliyatiga doir qator vakolat va huquqlar amaliyotga joriy etilayotgani qayd etildi. Bu esa o‘z navbatida direktorlarning yanada rivojlanishiga ko‘mak berishi asnosida yangilik qilishlari, zamon talabiga javob beradigan rahbar bo‘lishlari uchun imkoniyat ekanligini alohida ta’kidlandi.

Shuningdek eng tajribali maktab direktorlaridan iborat “Direktorlar kengash”lari tashkil etilishi va ushbu kengashga kirgan direktorlar bevosita vazirlik bilan birgalikda faoliyatlarini yo‘lga qo‘yishlari borasida ma’lumot berildi.

Uchrashuvda maktab direktorlariga yangi o‘quv yilida ta’lim sifatini oshirish ular oldiga qo‘yilgan maqsad va vazifalar xususida atroflicha tushuntirish berib o‘tildi.

Vazir direktorlarga qilgan murojaatida Toshkent shahri ta’lim sifatini oshirish bo‘yicha lokomotiv bo‘lishi lozimligini ta’kidlar ekan, “Sizlar bilan birga bir jamoa bo‘lib ta’lim sifatini oshirish yo‘lida ishlaymiz, men sizlarga suyanaman. Butun jamoa bo‘libgina natijalarga erisha olamiz va yutuqlarimizni ko‘rsata olamiz”, — deya so‘zini yakunladi vazir.


Vazirlikning rasmiy sahifalariga ulanish
📱Telegram | 📹Youtube | 📒Facebook | 📸Instagram