Prezident Shavkat Mirziyoyev raisligida Qashqadaryo viloyatini kompleks rivojlantirishning ustuvor vazifalariga bag‘ishlangan yig‘ilish o‘tkazildi

Davlat rahbari yig‘ilish avvalida viloyatdagi o‘zgarishlarga, xalqning turmush tarzidagi sezilarli siljishlarga alohida e’tibor qaratdi:

“Viloyatdagi o‘zgarishlarni ko‘rib, odamlar bilan gaplashib, islohotlarimiz ularning hayotiga shiddat bilan kirib borayotganiga yana bir bor amin bo‘ldim. Oldinlari bitta viloyatdagi o‘zgarishlar bilan tanishishga bir kun yetardi. Shu kunlarga yetib keldik, hozir bitta tumanga bir hafta ham kam”, —

dedi davlatimiz rahbari.

Yig‘ilishda ta’kidlanishicha, joriy yilda viloyatga 3,5 milliard dollarlik investitsiyalarni jalb qilish rejalashtirilgan. Bu raqam so‘nggi yillarda viloyat iqtisodiyotida kuzatilayotgan yuqori sur’atdagi o‘sishni yanada mustahkamlashga xizmat qiladi.

Ayniqsa, Koson, Kitob va Chiroqchi tumanlarida investitsiya hajmi oxirgi besh oyda qariyb ikki barobarga oshgani alohida qayd etildi. Bu ko‘rsatkich hududlar salohiyatini yuzaga chiqarishda amalga oshirilayotgan ishlar samarasi ekanini ko‘rsatadi.

Shu bilan birga, hali ham sanoat yetib bormagan 12 ta kon mavjudligi qayd etildi. Bugungi kunda qurilish materiallari sohasida 150 million dollarlik 16 ta loyiha tayyor holatga keltirilgan. Prezident mutasaddilarga bu kabi konlarni auksionga chiqarish bo‘yicha aniq topshiriqlar berdi.

Qiziqarli ma’lumotlardan biri shundaki, Kitob tumanidagi 100 gektar maydonda 20 tonna oltin zaxirasi aniqlangan. Bu yerda tabiatga zarar yetkazmasdan, yopiq texnologiyalar asosida oltin qazib olishga 100–150 million dollar sarmoya kiritishga tayyor investorlar borligi ma’lum qilindi. Davlat rahbari ushbu konni ham auksionga chiqarish zarurligini ta’kidladi.

Shuningdek, Kitobda yana 5 ta istiqbolli maydonda 39 tonna oltin, Chiroqchi tumanida esa 10 ming tonna noyob metallar zaxirasi aniqlangani va bu hududlarda geologiya ishlarini boshlash bo‘yicha topshiriq berilgani Qashqadaryoning kelajakdagi industrial markazga aylanish imkoniyatlarini ochib bermoqda.

#Mirziyoyev #safar #Qashqadaryo #yigilish #kongeologiya #mingeo #yer_qaridan_foydalanish #Kitob_tumani #istiqbolli_maydonlar #Chiroqchi_tumani

Сайт | Telegram | Facebook | Instagram | X | YouTube