🌱🌱🌱🌱🌱🌱🌱🌱

Ipak qurti boqish va parvarishlashda e’tibor berish lozim bo‘lgan jihatlar

🐛Ipakchilik O‘zbekiston qishloq xo‘jaligining muhim tarmoqlaridan biri hisoblanadi. Ipak qurti boqish va pilla yetishtirish bilan shug‘ullanuvchi fermer xo‘jaliklari soni yildan-yilga ortib bormoqda. Jahon bozorida tabiiy ipak mahsulotlariga bo‘lgan talab yuqori bo‘lib, ayniqsa Xitoy, Hindiston, Yaponiya va Italiya kabi mamlakatlarda ipak mahsulotlariga qiziqish ortib bormoqda.

Ipak qurti boqishning boshlang‘ich bosqichlari

🤔Ipak qurti o‘sishi davomida bir necha yosh bosqichlaridan o‘tadi. Har bir yosh davrida unga g‘amxo‘rlik qilish va to‘g‘ri oziqlantirish muhim hisoblanadi. Kichik yoshdagi qurtlar (1–2 yosh) mayda qilib kesilgan tut barglari bilan oziqlantiriladi. Barglar 5–7 mm kenglikda “ugra” shaklida kesilishi lozim.

➡️Barglarni maydalab berish qurtlarning barglar ostida qolib ketishining oldini oladi va ularning bir tekis rivojlanishini ta’minlaydi. 1-yosh va 2-yoshdagi qurtlarga sutka davomida har ikki soatda 8–10 marta yangi barg berish kerak. Qurtlar yoshdan-yoshga o‘tganda ularga ajratiladigan joy ham kengaytirilishi lozim.

Harorat va namlik sharoitlari

➖1–2 yoshdagi qurtlar uchun harorat 26–27°C, nisbiy namlik esa 65–75% bo‘lishi kerak.

➖3–4 yoshdagi qurtlar uchun harorat 23–25°C gacha pasaytiriladi, chunki ular kuchliroq bo‘lib, sovuqqa bardosh bera oladi.

➖5-yoshdagi qurtlar va to‘qish davrida harorat 20–22°C bo‘lishi lozim.

Shamollatish va gigiyena

❗️Qurtxonani har 2–3 soatda 15–20 daqiqa davomida shamollatish muhim. Shamollatish havo sifatini yaxshilaydi va qurtlarni turli kasalliklardan himoya qiladi. Agar havo almashinuvi yaxshi bo‘lmasa, qurtlar bakterial va virusli kasalliklar bilan zararlanishi mumkin.

Ipak qurti oziqlantirish va boqish tartibi

ℹ️Ipak qurti faqat tut bargi bilan oziqlanadi. Shu sababli barg sifati, to‘g‘ri saqlash sharoiti va muntazam berish tartibi katta ahamiyatga ega. Barglar yangi uzilgan, toza va zararkunandalardan xoli bo‘lishi kerak. Juda yosh qurtlarga namlangan barg berish tavsiya etilmaydi, aks holda ular kasalliklarga chalinishi mumkin.

📌Katta yoshdagi qurtlarga yirikroq barglar berish mumkin. Qurtlar kuniga 8–10 marta oziqlantiriladi, 5-yoshga kelib esa 5–6 martagacha kamaytiriladi. Kechasi ham oziqlantirish muhim, chunki qurtlar tunda ham faol bo‘ladi. Sug‘orish faqat toza suv bilan amalga oshirilishi kerak. Qurt boqish joyida kimyoviy moddalar va pestitsidlar ishlatilmasligi shart.

Kasalliklarning oldini olish choralari

➖Tozalik qoidalariga rioya qilish.

➖Barglarni faqat sog‘lom daraxtlardan uzish.

➖Qurtlarni quruq va shamollatilgan joyda saqlash.

➖Zararlangan qurtlarni zudlik bilan ajratish va yo‘q qilish.

🟢Ipak qurti to‘qish bosqichiga yetib kelganida o‘z atrofiga ipak iplarini chiqarib, pilla hosil qiladi. Ushbu bosqichda harorat 22–24°C bo‘lishi kerak. Xonada yetarli miqdorda havo almashinuvi ta’minlanishi lozim. Qurtlar pilla to‘qishi uchun maxsus joy ajratilishi shart. Pillalar 7–10 kun ichida tayyor bo‘ladi va ular maxsus texnologiyalar asosida yig‘ib olinadi.

🌐Website 💬Telegram 💬Facebook 📺YouTube 📷Instagram

Qishloq xo‘jaligi ekinlari navlarini sinash markazi faoliyati tahlil qilindi

🟢Bugun Toshkent davlat agrar universitetida Qishloq xo‘jaligi vazirligi markaziy apparati tarkibiy bo‘linmalari xodimlarining kasbiy bilim va malakalarini oshirishga qaratilgan navbatdagi “Kasbiy ma’rifat soati” o‘tkazildi.

🟢Unda vazirlik markaziy apparati tarkibiy bo‘linmalari, tizim tashkilotlari xodimlari hamda Toshkent davlat agrar universiteti talabalari va professor o‘qituvchilari ishtirok etdi.

🗣Tadbirda Qishloq xo‘jaligi ekinlari navlarini sinash markazi direktori Ozod Matyakubovning “Qishloq xo‘jaligi vazirligi huzuridagi Qishloq xo‘jaligi ekinlari navlarini sinash markazining 2024-yilda amalga oshirgan ishlari, 2025-yilda belgilangan vazifalar” mavzusidagi ma’ruzasi tinglandi.

🟢Ma’ruzada nav sinash stansiya hamda uchastkalarining soni, ekin va sinov maydonlarida amalga oshirilayotgan ishlar haqida batafsil ma’lumotlar berib o‘tildi. Shuningdek, erishilgan natijalar va ko‘rsatkichlar va xorijiy hamkorlik borasida qilinayotgan ishlar atroflicha tahlil qilindi.

✅"Kasbiy ma’rifat soati" yakunida sohani isloh qilish bo‘yicha yechimini kutayotgan muammolar va takliflar o‘rtaga tashlandi hamda ishtirokchilar nav sinash borasida o‘zlarini qiziqtirgan savollarga markaz direktoridan javoblar olishdi.

🌐Website 💬Telegram 💬Facebook 📺YouTube 📷Instagram