Оҕону эбии үөрэхтээһин киинин иһинэн үлэлиир "Өркөн" сайыҥҥы лааҕырын оҕолорун, төрөппүттэрин,
Саха сирин бастыҥ ырыаһыттарын иитэн таһаарбыт, үгүс көлүөнэ ыччаты музыка кэрэ эйгэтигэр уһуйбут, республикабыт киэн туттар, холобур оҥостор кэргэнниилэр, Светлана уонна Егор Неустроевтар, Россияҕа дьиэ-кэргэн күнүнэн эҕэрдэлээтилэр.

"Мин дьиэ-кэргэним гиэрбэтэ” диэн Бүтүн Россиятааҕы акцияҕа кыттаннар, оҕолор дьиэлэригэр уруһуйдаан аҕалбыт гиэрбэлэрин ис сүрэхтэн долгуйан туран, кэпсээтилэр, уруһуйдарын тутан туран уопсай хаартыскаҕа түһэн үөрүүлээх тэрээһини түмүктээтилэр.

Бүгүн, Чурапчы улууһугар, тыа хаһаайыстыбатыгар сүөһүгэ аһылыгы бэлэмнээһиҥҥэ Саха Өрөспүүбүлүкэтин Бырабыыталыстыбатын Бэрэссэдээтэлэ Андрей Тарасенко кыттыылаах мунньах ыытылынна.

Манна улуус баһылыгын эбээһинэһин толорооччу Петр Сивцев уонна улуустааҕы тыа хаһаайыстыбатын начальнига Степан Бочкарев кыттыыны ыллылар. Петр Степанович бэйэтин этиитигэр быйылгы сылга от былаана 33 478 туонна, ону таһынан 1500 туонна күөх массаны, 500 туонна сиилэһи бэлэмниир сорук турарын, от ыйын 6 күнүнээҕи туругунан 429 га сир охсуллубутун, 39,5 туонна от бэлэмнэммитин, манна 69 хаһаайыстыбаҕа 158 киһи, 100 сельхозтехника үлэлиирин туһунан сиһилии билиһиннэрдэ. «Россельхозцентр» Уус Алданнааҕы филиалын сир баайын харыстыыр салаата аһыҥаны утары үлэҕэ хаһаайыстыбалар сайаапкаларынан 730 га оттуур ходуһаны эмтээтилэр. Үүт былаана 3004,9 туонна, билиҥҥи туругунан 743.85 туонна, уопсай былаантан 24.75 % үүт соҕотуопкаланна.

Мунньахха Петр Степанович ыраах оттуур сирдэргэ мобильнай биригээдэлэр үлэлэрин тэрийиигэ, ону сэргэ хаһаайыстыбаларга оҕуруот аһын, бурдугу харайар ыскылааттары, итиэннэ производственнай эбийиэктэри тутууга, өрөспүүбүлүкэ бюджетыттан сөптөөх үбүлээһини көрөргө туруоруста.

Улуус дьаһалтатын пресс-сулууспата.

Улууска тутулла турар эбийиэктэр үлэлэрин хаамыытын хонтуруоллуур суһал штаб тэрилиннэ.

Улуус баһылыгын солбуйааччы Семен Бурнашев салайааччылаах улуустааҕы суһал штаб, тутулла турар эбийиэктэргэ тахсар кыһалҕалары туоратыыга тус болҕомтотун ууруоҕа.

Үлэлиир бөлөх Тумул бөһүөлэгэр сылдьан, 90 оскуола оҕотугар, 40 оҕо уһуйаанын иитиллээччитигэр ананан тутулла турар саҥа таас оскуола-сад тутуутун көрдө. Манна сүрүн тирэхтэри түһэрии, ититиитин ситимин тардыы үлэлэрэ ыытыллаллар. Ону сэргэ хаарбах дьиэттэн көһөрүү программанан тутулла турар 24 квартиралаах олорор дьиэ эбийиэгин көрөн, үлэ хаамыыта былаан быһыытынан сөпкө ыытылла турарын бэлиэтээтилэр, эбийиэк бу сыл бүтүүтэ үлэҕэ киирэрэ былааннанар.

Улуус дьаһалтатын пресс-сулууспата.