АММА ЭДЭР АРМЕЕЦТАРА БҮТҮН АРАССЫЫЙАТААҔЫ АКЦИЯҔА КЫТТЫСТЫЛАР

«Өйдөбүл чүмэчитэ» акция Аҕа дойду Улуу сэриитэ саҕаламмыт күнүгэр Арассыыйа бары куораттарын түмтэ. Амма эдэр армеецтара Албан аат болуоссатыгар чүмэчи уматан кыттыстылар.

1941 сыл ыам ыйын 22 күнүн сарсыарда 4 чааһа киһи аймах историятыгар хара бээтинэлээх күн. Бу кутурҕан күнүгэр, биһиги эйэлээх олохпут иһин сырдык тыыннарын толук уурбут дьоммутугар анаан, кинилэри кэриэстээн Бүтүн Арассыыйатааҕы «Өйдөбүл чүмэчитэ» акция ыытылынна. Амма эдэр армеецтара бу акцияҕа кыттыһан, Албан аат болуоссатыгар чүмэчилэри уматтылар. Оҕолор ZOOM конференциянан Сэбилэниилээх күүстэр «Патриот» Кылаабынай храмнарыттан ыытыллыбыт быһа сибээскэ холбоннулар. Эдэр армеецтар Аммаларын туһунан кэпсээтилэр, эбэлэрин, эһэлэрин хорсун быһыыларынан киэн тутталларын эттилэр. Лицей эдэр армеецтарын этэрээтэ Сэбиэскэй Союз 2 төгүллээх Дьоруойа В.Ф.Быковскай аатын сүгэр.

«Өйдөбүл чүмэчитэ» Арассыыйа эдэр ыччатын бииргэ түмэн Кыайыыны чугаһаппыт дьоммутугар дириҥ махтал бэлиэтинэн буолла. Оттон Амма оҕолоро эмиэ ытык дьоммут ааттарын үйэтитиигэ биир дьоһун хардыыны оҥордулар.

#сахапечать #улусмедиа #амгинскийулус #свечапамяти #ВОВ