ҮӨҺЭЭ БҮЛҮҮГЭ ТЫА ХАҺААЙЫСТЫБАТЫН ИСПИСЭЛИИСТЭРИГЭР МОТОЦИКЛЛАРЫ ТУТТАРДЫЛАР

Бүгүн киин болуоссакка Үөһээ Бүлүү улууһун бары нэһилиэктэригэр үлэлии сылдьар тыа хаһаайыстыбатын исписэлиистэригэр үлэлэригэр туһаналларыгар анаан, “Үөһээ Бүлүү улууһа” МО дьаһалтатын баһылыга В.С.Поскачин, улуустааҕы депутаттар Сэбиэттэрин бэрэссэдээтэлэ Н.Н.Николаев, улуустааҕы тыа хаһаайыстыбатын департаменын салайааччыта С.И.Иванов үөрүүлээх быһыыга-майгыга мотоцикллары туттардылар.

Урукку өттүгэр тыа хаһаайыстыбатын биригэдьиирдэрэ атынан сылдьан үлэ хаамыытын билсэр, салайар буоллахтарына, аныгы кэм исписэлиистэрэ тимир көлөнөн ходуһаларынан, бааһыналарынан, сайылыктарынан сылдьан үлэни-хамнаһы сүрүннүөхтэрэ.

Маннык өйөбүл, хамсааһын дойду үрдүнэн өссө ханна да суох. Улуустааҕы тыа хаһаайыстыбатын департаменын салайааччыта С.И.Иванов улуус дьаһалтатын салайааччыларын кытары сүбэлэһэн, тыа хаһаайыстыбатын сайыннарыыга, өрө көтөҕүүгэ көмөлөөх буолуо диэн бу саҥа сүүрээни киллэрбитэ кэрэхсэбиллээх.

Тыа хаһаайыстыбатын салаатыгар үлэһиттэргэ болҕомто ууруллан, үлэлэригэр – хамнастарыгар төһүү күүс буолуоҕа. Үрүҥ илгэ үрүлүйдүн, үүнүү-быйаҥ үксээтин, хонуу аайы хороҕор муостаах, сыһыы аайы сыспай сиэллээх элбээтин!

#сахапечать #улусмедиа #новости #верхневилюйскийлусу #сельскоехозяйство