ГОРНАЙ ОҔУНАН ЫТЫЫ ОСКУОЛАТЫН ИИТИЛЛЭЭЧЧИЛЭРЭ ҮӨРТҮЛЭР

Соторутааҕыта оҕунан ытыыга “Россия Күнэ-2020” диэн Бүтүн Россиятааҕы онлайн-күрэхтэһии буолла. Спортсменнар ытыылара инстаграм быһа эпииригэр таҕыста. Манна, дьахтарлларга, Горнай улууһун оҕунан ытыы оскуолатын иитиллээччилэрэ, пьедестал бары үктэлигэр тахсан, оройуон аатын дуорааннаахтык ааттаттылар.

Кыһыл көмүс мэтээл иһин киирсиигэ эдьиийдии-балыс Горнайтан Розалина Тимофеева уонна Кристина Устинова көрүстүлэр. Сүрүн серияҕа кыргыттарбыт 5:5 ахсаанынан тэҥнэһэн хааллылар. Хардарыта ытыыларга иккиэн оноҕосторун мишень “тоҕуһугар” түһэрдилэр. Судьуйалар бэркэ кичэйэн көрүүлэригэр, Розалина оноҕоһо 1 мм “10-тан” чугас буолан, кыайыылааҕынан таҕыста. Айыына Романова Бурятияттан Сайылма Цыренованы эрэллээхтик хотон боруонса мэтээли ылла.

Турнирга Бурятияттан, Байкал уҥуордааҕы кыраайтан, Волгоградтан, Краснодартан, Москубаттан, Санкт-Петербургтан, Калининградтан, Дагестантан барыта 94 киһи кытынна.

Күрэхтэһиигэ Саха сирин охчуттара алта мэтээли ылан инники күөҥҥэ таҕыстылар. Эр дьоҥҥо Михаил Симушин финалга Иван Кузнецовы (Москуба уобалаһа) кыайда.

Охчуттарбыт төһө да күрэхтэһии тэрээһиннэригэр хааччах баарын үрдүнэн, “быар куустан” олорботтор. Билигин кинилэр сүүмэрдиир дьарыктарга күүскэ үлэлэһэ сылдьаллар.

#горныйрайон #стрельбаизлука ###

ОДУНУГА САХА ЫНАҔЫН МААНЫЛААН ИИТЭЛЛЭР

Саха сүөһүтүн анаан-минээн иитэр Горнай улууһун Одуну нэһилиэгин Кылыс сайылыгар сарсыардааҥҥы ыам ортолосто. Манна 108 хороҕор муостаах баарыттан, 32-тэ ыанньык. Күөх мэччирэҥнээх сайылыкка холбоон сүүсчэкэ лиитэрэни ыыллар.

Саха ынаҕа кыра үүттээх диэн мыынар табыллыбат, хойуута бэрт, ыаммытынан бэйэтэ чөчөгөй. «Кылыс» сайылык үрүҥ илгэтэ «Горнай-ас» тэрилтэҕэ утааарыллан, амтаннах ас эгэлгэтэ буолар. Быйыл ыанньыксыттар 10 туонна үүтү туттарыахпыт диэн мас-таас курдук сорук ылыммыттар.

Күн бүгүн сайылыкка биэс киһи түбүгүрэр. Үлэһиттэр бары сүөһүлэрин атаахтата былаастаан көрөллөр. “Саҥарбат эрэ буруйдаахтар, сымнаҕастар, эгэ муостарынан силэйиэхтэрэ дуо. Олус иччимсэхтэр, аны туран бытарҕан тымныыны тулуйаллар, дуона суох аһылыктаахтар, ыарыыга ылларбаттар», –  диэн хайгыыллар. Ынахтарын күһүн эрдэ уоллараллар, муус устартан ыам саҕаланар. Быйыл хаһаайыстыбаҕа туҥуй бургунастары ыан эрэллэр, сорохторо аҕыстыы лиитэрэҕэ тиийэ биэрэллэр.

«Саха ынаҕа» тэрилтэ бу Горнайдааҕы салаатыгар сайылыктарын саҥалыы оҥорон, тулата сэргэхсийбит. Кэҥэс титиик, күрүө-хаһаа, олорор дьиэ-уот тутуллубут. Үчүгэй усулуобуйаны сүөһүлэр кытары билэр курдуктар, сайылыктарыттан соччо ырааппаттар, дал таһыгар сүүнэ оҕус айаатаан лоҥкунатар.

Оттон Горнай улууһа үрэх сирдээх буолан, мас-от эрдэ хагдарыйар, курас тыал курдат ааһар. Оттоммут от онон барыта күөхтүү күрүөлэммэт. Ити иһин ынахтарын эбии аһаталлар, оччоҕуна үүттэрэ өссө хойдор. Уопсайынан даҕаны ынахтан элбэх бородууксуйаны ылыы аһылыгыттан тутулуктаах буоллаҕа.

Бу күннэргэ Горнайтан алта саха ынаҕын Москваҕа ыыттылар. 700 көс усталаах уһун айаны этэҥҥэ аһардыннар диэн үлэһиттэр аал уоту айах тутан, үтүө тылынан алҕаан атаардылар. Саха ынахтара дойду тэбэр сүрэҕэр тиийдэхтэринэ учуонайдар үөрэтиэхтэрэ, киһи аймаҕы уонна атын боруода сүөһүнү харыстыыр генетическэй кыаҕын быһаарыахтара.

#Улусмедиа #Горныйрайон #сельскоехозяйство #коровы #разведениекоров #якутскиекоровы

ГОРНАЙГА ҮРҮҤ ТЭЛЛЭЙ ДЭЛЭЙДИК ҮҮММҮТ

Бу күннэргэ Горнай улууһугар ардахтаах күннэр турдулар. Уһун ардах түһэн отчуттарга күчүмэҕэйдэри үөскэттэ. Хата манньатын киһи сөҕүөх курдук тэллэй бөҕө үүннэ. Ол иһин бу күннэргэ хаһаайкалар ойуурга сылдьаллар.

Инники сылларга үүммэт үрүҥ тэллэй элбэҕин тэллэйдьиттэр сөҕөллөр. Үгүстэр тоҥорон, маринадтаан хаһааналлар, сибиэһэй хортуоппуйу кытта бустаҕына остуол маанылаах аһа буолар. Кэнники сылларга тэллэйи иккис эт аһынан билинэллэр.

#улусмедиа #новоси #горныйрайон #белыйгриб

ГОРНАЙ МААЙЫГАР ӨКҮЛҮҮНЭ СИЭННЭРЭ ХАРТЫЫНАЛАРЫ ТИЛИННЭРДИЛЭР

Сайыҥҥы былдьаһыктаах күннэри дьон-сэргэ хайдах сатыырынан атаарар. Дьиэҕэ олоруу эрэсиимэ саҕаланыаҕыттан бириэмэлэрин туһалаахтык, көдьүүстээхтик, умнуллубаттык атаарарга кыһаллар дьон элбээбитэ үөрдэр. Горнай улууһугар тыыл, үлэ бэтэрээнэ, Маай сайылыгар олорбут Өкүлүүнэ Семеновна Прокопьева сиэннэрэ өбүгэлэрин сирдэригэр сайылыкка тахсан, ураты көрүүлээх, саха талааннаах худуоһунньугун Андрей Чикачев хартыыналарын тилиннэрдилэр.

“Биһиги дьиэ кэргэн ийэбит Надежда Ивановна Иванова Андрей Чикачев хартыыналарын олус сөбүлүүр. Уһун кыһын устата оллоонноон олорон алмаас мозаиканан оҥорбут хартыыналарын истиэнэтигэр ыйаан турар. Онтон сиэттэрэн биир күн Чикачев хартыыналарын дьоруойдарын уобарастарыгар киллэрэн, сиэн оҕолору сайылыкка таһааран, хартыыналары хаартыскаҕа түһэрэн тилиннэрдилэр. Олус кырдаайылаах куйаас күҥҥэ оҕолорбут хас биирдии уобараһы арыйарга кыһаллан туран түстүлэр, тулуурдаахтарын сөхтүбүт”, – дииллэр төрөппүттэр.

Тыа сирин олоҕун көрдөрөр, истиҥ, иһирэх хартыыналарын саха дьоно бары да сөбүлүүбүт. Хартыыналары маннык тилиннэрэр оҕолорго, сиэннэргэ үтүө эрэ өйдөбүл хаалара саарбахтаммат.

Күндү ааҕааччыларбыт, эһиги эмиэ боруобалаан көрүөххүтүн сөп.

#улусмедиа #новости #горныйрайон #картины

⚡️❗️Глава Горного улуса Никита Андреев о возникновении задымления в городе Якутске

❗️Сегодня в Горном районе проводятся работы по встречному отжигу близ Одунунского наслега, взрывные работы у местности Улуу Сыһыы, Октябрьского и Атамайского наслегов.

«Просим отнестись граждан с пониманием. Вместе мы сможем победить лесные пожары», - заключил Никита Андреев.

#Якутия #ЛесныеПожары #Горныйрайон #НикитаАндреев