🎄🤩Лөгөй лицей-интернатын 75 үөрэнээччитэ олорор интернатыгар Саҥа дьылы көрсөр бырааһынньык күн олус көхтөөхтүк, сэргэхтик ыытылынна👏👍

Ырыа, үҥкүү аргыстаах оҕо аймах тэрээһинин үгэс быһыытынан интернат оҕолорун бэйэни салайыныытын түмсүүтэ — 10 кылаас үөрэнээччилэрэ ыыттылар (иитээччи Лариса Карпова).

Оҕолор Саҥа дьыл кэтэһиилээх ыалдьытын Тымныы оҕонньору долгуйа, үөрэ көрүстүлэр. Сылын ахсын Тымныы оҕонньор минньигэс бэлэхтэри оҕолорго туттарар үгэстээх.

Тымныы оҕонньор оруолун Мындаабаттан Тимур Шепелев, Хаарчаананы Хомустаахтан Ариана Попова, Саҥа дьыл уолчааны Бороҕонтон Дима Нафанаилов толордулар.

Хосторунан эмиэ куонкурус биллэриллэн, уолаттар – үс, кыргыттар сэттэ хос аанын киэргэтиигэ олус көхтөөхтүк кыттан, үс бириистээх миэстэ таҕыста.

1 м. "Гарри Поттер" тиэмэлээх 5-с хос.
2 м. Пряничнай 3-с хос.
3 м. Саҥа дьыллааҕы киэргэтиилээх 9-с хос.

Истиэнэ хаһыата:
1 м. 1 хос
2 м. 5 хос
3 м.10 хос

Итиэннэ эмиэ хоһунан эҕэрдэ нүөмэрдэр туруоруллан, бэртээхэй кэнсиэри көрдөрдүлэр. Кэнсиэри лицейгэ Өспөхтөн үөрэнэ кэлбит Камила Маглысова уонна Илья Иванов иилээн-саҕалаан ыыттылар.

Ийэлэр эмиэ куонкуруска кытыннылар. Кэлэр сыл бэлиэтин - Моҕой харыйа оонньуурдарын оҥорон тэрээһини киэргэттилэр.

Эмиэ биир аптаах, алыптаах түгэнинэн интернат үлэһиттэрэ уонна Кэптэни эрэллээх суоппардара түмсэн, хас биирдии оҕо, үлэһит, ыалдьыт илии тутуурдаах, өттүк харалаах барарын хааччыйан лотерея оонньооттулар. Оттон суоппардар Дьокуускайга, Бороҕоҥҥо барар оҕолорго бырааһынньыктааҕы үөрүүлээх түгэни бэлэхтээн, кэлэ-бара сырыыларын буор-босхо таһыаҕа. Оскуола салалтата интернаакка 15 тыһыынча солкуобайдаах сертификаты туттарда.

Онон интернат сэргэх олоҕо өссө үгүс үөрүүнэн туолла, ыалдьыттар, үлэһиттэр, оҕолор дуоһуйа сынньанан, бэртээхэй бырааһынньык ааста.

✍️Ольга Шепелева

✅@uamurusahargata @ulusmedia

🎄🤩 Ил Дархан харыйатыгар улууспутуттан 38 оҕо кытынна

Бэҕэһээ уонна бүгүн Ил Дархан үтүө үгэскэ кубулуйбут Харыйата буола турар. Манна биһиги улууспутуттан 38 бастыҥ, ситиһиилээх үөрэнээччи кыттыыны ыла сылдьар. Бу бөлөҕү үөрэх улуустааҕы салалтатын сүрүннүүр исписэлииһэ Ефросинья Слепцова уонна Тулуна орто оскуолатын биология учуутала Марина Жиркова салайан илдьэ сылдьаллар.

Икки күннээх "Дети Родины. Дети Якутии" диэн ааттаммыт тэрээһин икки блоктаах култуурунай бырагыраамата Оҕо саас сылыгар ананан, оҕону патриотическай тыыҥҥа уонна төрүт үгэскэ иитэр сыаллаах толкуйдаммыт. Ол курдук бэҕэһээ араас маастар кылаастар, быыстапкалар, аралдьытыы киэһэтэ ыытылынна. Оттон бүгүн "Саха сирин оҕолоро" блок чэрчитинэн үөрэнээччилэр остуол, өй оонньууларыгар, бириистээх куонкурустарга кытыннылар. Түмүккэ сүрүн тэрээһиҥҥэ – Саха циркэтигэр – үөрүүлээх дьоро тэрээһиҥҥэ муһуннулар.

✍️Мария Аргунова

✅ @uamurusahargata @ulusmedia

👩‍❤️‍👨 УОЛБУТ ЫАЛ БУОЛЛА!

Уус Алдан Сыырдааҕыттан тардыылаах Арассыыйа уһуҥҥа биллэр сүүрүгэ Артур Бурцев 36 сааһыгар, дьэ, ыал буолла. Аан дойду саамай тымныы уонна итии сирдэриттэн төрүттээх дьонтон күн сирин көрбүт чулуу спортсмен мэлдьи болҕомто киинигэр сылдьар.

Артур билигин Санкт-Петербурга олорор, тириэньэринэн үлэлиир. Ону тэҥэ спорт таҥаһын атыылыыр биллэр бреннэр табаардарын рекламалыыр.

Кини олоҕун аргыһа буолбут кэрэчээн Валентина Мурманскай уобаластан төрүттээх. Эмиэ сүүрүүнэн дьарыктанар. Артур суруйарынан, кыыс кини үлэлиир саалатыгар кэлэн, ''мантан кэргэн тахсар киһибин булуохпун сөп дуо?'' диэн дьээбэлээн ыйыппыт. Онуоха Артур ''ол киһи кэннигэр турар'' диэбит. Валентина кэннин хайыспыта – сиэркилэҕэ кини аттыгар Артур турар. Артур бэйэтэ билинэринэн, дьээбэлэнэр санаата суоҕа.
Биир дойдулаахпытын олоҕун кэрэ-бэлиэ күнүнэн эҕэрдэлиибит! Дьоһун, баай-талым олохтоох, элбэх оҕолоох мааны ыал буолуҥ!❤️

//Хаартыскалар Артур Бурцев страницатыттан ылылыннылар

✅@uamurusahargata
@ulusmedia