#нэһилиэктэргэ

💠 "Улуу киһи суолунан" бырайыак: Кулантай түмэлигэр уус-уран ааҕыыга улуустааҕы күөн-күрэс буолла

Сарсыардаттан көҕөрө симэнэн чэлгийбит түмэл тэлгэһэтин сахалыы таҥастаах үөрбүт-көппүт оҕолор чэпчэкитик үктэнэн киирэн кэрэ күлүүнэн толордулар. Тэрээһини түмэл салайааччыта Клара Крылова иилээн-саҕалаан ыытта.

Бабаарына киэҥ-куоҥ уораҕайыгар үс бөлөҕүнэн ааҕыылары истии саҕаланар. Бииртэн биир айымньы ааҕыллан, истээччигэ тиэрдиллэн оччотооҕу кэм, атын эйгэ көрөөччү хараҕар көстөрдүү арыллан истэ. Аныгы оҕолор дорҕоону таһаарыылара, хоһоону ааҕыылара уруккуга холоотоххо уратылаах буолла.

Дьүүллүүр сүбэ быһаарыытынан түмүккэ кыра бөлөххө Валера Ханчаев (Чараҥ, сал. М. Федосеева) бастакы, Егор Боярскай (Бэйдиҥэ, сал. И. Окоемов) иккис, Карина Сысолятина (Бороҕон, сал. З. Сивцева) үһүс үрдэли, Максим Боярскай (Бэйдиҥэ, сал. Н. Портнягина) биһирэбил бирииһи ыллылар. Орто бөлөххө Айдын Крылов (Бэйдиҥэ, сал. А. Варламова) бастакы, Ксения Находкина (Бороҕон, сал. Ю. Бурцева) иккис, Ариан Олесов (Бороҕон, сал. Е. Максимова) үһүс үрдэл буоллулар. Оҕолор барахсаттар үөрүүлэрэ үрдээн сирэйдиин-харахтыын сырдаатылар.

Улахан дьоҥҥо Анна Готовцева бастакы, Юлия Татаринова иккис, Татьяна Бурцева үһүс үрдэли ыллылар.

Айдын Крылов анаан-минээн таҥнан уобараһын арыйыыта уонна Анна Готовцева хоһоону умсугутуулаахтык, ис хоһоонноохтук ааҕыыта бүгүн көрбүт-истибит оҕолорго үтүө холобур буолан үрдүккэ уһуйуоҕа дии саныыбын.

Күөн-күрэскэ Уус Алданнааҕы оҕолорго аналлаах социальнай-реабилитационнай киин көхтөөх кыттыыны ылбытын бэлиэтиир тоҕоостоох. Атын нэһилиэктэртэн эрдэ элбэх оҕо кыттабыт диэн баран буолар күнүгэр кэлбэтэхтэрэ олус хомолтолоох. Тэрээһин маннык күөн-күрэс аны күһүн өссө биирдэ буолара буоллар диэн баҕа санаалаах түмүктэннэ.

✍️ Светлана Бурцева, уопсас. кэрэсп.

☑️ Сиһилии: https://мюрюгазета.рф/article/99253

✅ t.iss.one/murusahargata @ulusmedia

#астык

💠 Улууспут историческай суолталаах кэрэ бэлиэ сирдэринэн экспедиция саҕаланна

Улууска биир биллэр кыраайы үөрэтээччи, Окоемовка сүрүн оскуолатыгар история учуутала Геннадий Пестряков көҕүлээһининэн «Уус Алдан улууһун биллэр историческай сирдэринэн» диэн улуустааҕы бастакы туристическай кыраайы үөрэтэр экспедиция бастакы күнэ бүгүн, бэс ыйын 6 күнүгэр, Окоемовка – Уус Күөлэ хайысхатынан саҕаланна. Үлэ сылыгар Курбуһах нэһилиэгин аар-саарга аатырдыбыт биллэр дьонун билиһиннэрии оруннаах, онон бу экспедиция онно ананар, сүрүн сыалынынан оҕо төрөөбүт дойдутун историятын билиэхтээх, харыстабыллаахтык сыһыаннаһыахтаах диэн буолар.

Экспедиция биэс күннээх буолуохтаах, Курбуһахтан саҕаланан Бороҕон Томторунан түмүктэниэхтээх. Онуоха 12-тэн 15 сааһыгар диэри барыта улуус иһиттэн 15 оҕо кыттарга сөбүлэспит. 

✍️ Мария Аммосова, уопсас. кэрэсп., экспедицияны сырдатыы эппиэттээҕэ

☑️ Сиһилии: https://мюрюгазета.рф/article/99256

✅ t.iss.one/murusahargata @ulusmedia