💠 “Күлчээнэ” туһата тахса турар! 

Кинигэ хаһан да таах айыллыбат. Суруллан тахсыбыт кистэлэҥнээх, историялаах буолар. Омук ааттаахтара ымсыыраннар, бэйэлэрин тылларыгар тылбаастаналлар. Ол иһин ханнык эрэ түҥ былыргы айымньы тарҕанар буоллаҕа эбээт!
Биһиги да оҕолорбут Шарль Перо “Күлчээнэтин” билэллэр аҕай, арай эрэ нууччалыы ааҕан буолбатах, төттөрүтүн сахалыы ааҕан бараннар, былыргы саха остуоруйатын курдук ылыммыттар үгүс буолааччылар. Табыллыбыт тылбаас күүһэ итинник.

Сордоох сүпсүлгэн!

Остуоруйа саамай чыпчаал көстүүтэ биир: түүппүлэни туппутунан хамыыһыйа Күлчээнэлээххэ тиийэн кэлэр. Чаҕар кыыһын итинник үтүөҕэ тиксэримээри маачахата-кииринньэҥ ийэтэ дьүһүлэммитин ааҕа кэлэйэбит. Ол да буоллар сокуон ирдэбилэ кытаанах. Ону тутуһаннар били сорук-боллур дьон кыыс атаҕын тэҥнээннэр, ыраахтааҕы уолугар баалга бара сылдьан ыалдьыттаабыт Күлчээнэ буолбутун дакаастыыллар. Онуоха кыыс били түүппүлэ иккис аҥаарын кистэммитин ойутан таһааран киһи бары сөҕөр.

Салгыыта комментарийга
⏬️⏬️⏬️

✍️ Анисим Неустроев

Сайыҥҥы сынньалаҥҥа оҕоҕун иит! 
 
💠 “Колобок” курдук буолбатарбыт ханнык!

Мин холобуокпун, холобуокпун,
Ампаартан сиппиллибитим,
Арыыга буспутум,
Сүөгэйгэ сөтүөлээбитим...
-дии-дии оҕоҕо кэпсээтэххэ, сонно тута нойосуус өйдөөн кэбиһээччи этэ. Билиҥҥи төрөппүт төһө ааҕара буолла?

Ол да гыннар, дьэ, бу олус бэртээхэй остуоруйа. Төһө оҕо бу Колобок диэн бурдук ас буоларын тута өйдөөбүтэ эрэ, билбэтим, ити эрээри кыра дьон кинини тыыннаах курдук ылынан, Саһыл обургу мэтиргэччи сиэбититтэн аһынан ытаабыт элбэх.

Дьэ, олоххо эмиэ итинник. Биир сырыыга сыыһа туттарбыккынан өҥнөнөн өр барбаккын. Сырыы ахсын албас уларыйара ордук. Ол аата, ыллыы-ылыы тэйэр кутталлаах. Этэргэ дылы “муора уута тобугунан, халлаан уута хабарҕатынан” диэн өс хоһооҥҥо курдук, туохха да кыһаммакка, уһуннук толкуйга түспэккэ эрэ, солуута суох төкүнүйэ-бөкүнүйэ сылдьар киһи хотуулаах тахсыбат.

Салгыыта комментарийга
⏬️⏬️⏬️

 ✍️ Анисим Неустроев
 

#бэлиэкүн

💠 “Сайылык күнэ” сэргэх тэрээһин ыытылынна

Күөх сайыны көрсө “Буксуур” ферматын сайылыгар нэһилиэк бэтэрээннэрин, настаабынньыктарын сүбэлэрин бырайыагынан "Сайылык күнэ" ыытылынна.

Тэрээһин СӨ тыатын хаһаайыстыбатын үтүөлээх үлэһитэ Светлана Кривошапкина алгыһынан, ырыатынан саҕаланна. "Коммунизм" холкуоска, "Дүпсүн", " Найахы" сопхуостарга, "Найахы" ТХПК-гар 70-с сыллартан үлэлээбит Светлана Сивцева, Александра Сивцева, Светлана Кривошапкина, Александра Кривошапкина, Федор Петров, Татьяна Гоголева, Антон Корякин, Любовь Ильина, “Буксуур” сайылыгын үлэһиттэрэ: ыанньыксыт, Кривошапкиннар үлэһит династияттан, элбэх оҕолоох ийэ Алла Арсентьева, СӨ тыатын хаһаайыстыбатын туйгуна Анна Румянцева кыттыыны ыллылар.

Олохтоох дьаһалта баһылыга Петр Слепцов, бэтэрээннэр сүбэлэрин бэрэссэдээтэлэ Светлана Петрова, настаабынньыктар сүбэлэрин салайааччы Зинаида Константинова, Оксана, Дмитрий Кривошапкиннар, Любовь Ильина пиэрмэ үлэһиттэрин эҕэрдэлээн, сэмэй бэлэхтэри туттардылар.

Настаабынньыктар, РФ үөрэҕириитин туйгуна Матрена Сивцева, ЫБСЛКС 17 сийиэһин дэлэгээтэ Федор Петров, дэгиттэр талааннаах Анатолий Свинобоев ылбаҕай ырыаларын, РФ үөрэҕириитин туйгуна Вера Мухина “Буксуур” олоҕун туһунан ахтыытын сэргээтибит.

Алта түһүмэхтээх күрэхтэһии бэрт көхтөөхтүк ыыттыллан, кыайыылаахтары Мария Лебедкина минньигэс аһынан күндүлээтэ.

"Ааспыты ахтыһан, үтүөнү түстэһэн" остуол тула оонньоон, ыллаан, бэтэрээннэр сүбэлэрин кыттыылаахтарын бириистэрин туттардыбыт. Эдэр сааһы ахтыһан, күлэн-үөрэн, өйдөбүнньүк хаартыскаҕа түһэн, алаас ыраас салгынынан тыынан дуоһуйа сынньанньыбыт.

Бары көхтөөх кыттыыны ылбыт, тэрийсибит бэтэрээннэргэ, кэлиини-барыыны хааччыйбыт Оксана Яковлевнаҕа, Семен Семеновичка, Федор Дмитриевичка махтанабыт. Уйгулаах сайыҥҥа өлгөм үүнүүнү, илгэ быйаҥы, чэгиэн туругу, бары үтүөнү баҕарабын.

✍️ Светлана Петрова, бэтэрээннэр сүбэлэрин бэрэссэдээтэлэ, уопсас. кэрэсп.

✅ t.iss.one/murusahargata @ulusmedia

#нэһилиэктэргэ

💠 "Улуу киһи суолунан" бырайыак: Кулантай түмэлигэр уус-уран ааҕыыга улуустааҕы күөн-күрэс буолла

Сарсыардаттан көҕөрө симэнэн чэлгийбит түмэл тэлгэһэтин сахалыы таҥастаах үөрбүт-көппүт оҕолор чэпчэкитик үктэнэн киирэн кэрэ күлүүнэн толордулар. Тэрээһини түмэл салайааччыта Клара Крылова иилээн-саҕалаан ыытта.

Бабаарына киэҥ-куоҥ уораҕайыгар үс бөлөҕүнэн ааҕыылары истии саҕаланар. Бииртэн биир айымньы ааҕыллан, истээччигэ тиэрдиллэн оччотооҕу кэм, атын эйгэ көрөөччү хараҕар көстөрдүү арыллан истэ. Аныгы оҕолор дорҕоону таһаарыылара, хоһоону ааҕыылара уруккуга холоотоххо уратылаах буолла.

Дьүүллүүр сүбэ быһаарыытынан түмүккэ кыра бөлөххө Валера Ханчаев (Чараҥ, сал. М. Федосеева) бастакы, Егор Боярскай (Бэйдиҥэ, сал. И. Окоемов) иккис, Карина Сысолятина (Бороҕон, сал. З. Сивцева) үһүс үрдэли, Максим Боярскай (Бэйдиҥэ, сал. Н. Портнягина) биһирэбил бирииһи ыллылар. Орто бөлөххө Айдын Крылов (Бэйдиҥэ, сал. А. Варламова) бастакы, Ксения Находкина (Бороҕон, сал. Ю. Бурцева) иккис, Ариан Олесов (Бороҕон, сал. Е. Максимова) үһүс үрдэл буоллулар. Оҕолор барахсаттар үөрүүлэрэ үрдээн сирэйдиин-харахтыын сырдаатылар.

Улахан дьоҥҥо Анна Готовцева бастакы, Юлия Татаринова иккис, Татьяна Бурцева үһүс үрдэли ыллылар.

Айдын Крылов анаан-минээн таҥнан уобараһын арыйыыта уонна Анна Готовцева хоһоону умсугутуулаахтык, ис хоһоонноохтук ааҕыыта бүгүн көрбүт-истибит оҕолорго үтүө холобур буолан үрдүккэ уһуйуоҕа дии саныыбын.

Күөн-күрэскэ Уус Алданнааҕы оҕолорго аналлаах социальнай-реабилитационнай киин көхтөөх кыттыыны ылбытын бэлиэтиир тоҕоостоох. Атын нэһилиэктэртэн эрдэ элбэх оҕо кыттабыт диэн баран буолар күнүгэр кэлбэтэхтэрэ олус хомолтолоох. Тэрээһин маннык күөн-күрэс аны күһүн өссө биирдэ буолара буоллар диэн баҕа санаалаах түмүктэннэ.

✍️ Светлана Бурцева, уопсас. кэрэсп.

☑️ Сиһилии: https://мюрюгазета.рф/article/99253

✅ t.iss.one/murusahargata @ulusmedia