#нэһилиэктэргэ

💢 Тумулга ытык дьоммутун ахтан-санаан үйэтиттибит

Тумулга А.Р. Халдеева аатынан модельнай олохтоох бибилэтиэкэҕэ Кыайыы күнүгэр сэрии, тыыл бэтэрээннэрин оҕолоро ахтыы тэрээһинигэр кыттыыны ыллылар.

Cэрии бэтэрээнэ, Европаны босхолоспут Петр Аржаков кыыһа Галина Аржакова аҕатын туһунан истиҥник-иһирэхтик ахтан кэпсээтэ. Петр 18 сааһын туола илигинэ сэриигэ ыҥырыллан барбыт, күүстээх санаатынан, чиэһинэй көнө майгытынан хорсуннук сэриилэһэн, элбэх мэтээллээх дойдутугар эргиллэн, сөбүлүүр идэтинэн кылаабынай бухгалтерынан үйэ чиэппэрин устата үтүө суобастаахтык үлэлээбитэ. Элбэх оҕолонон, сиэннэнэн дьоһун олоҕу олорбута. Сэрии сылларыгар “Көрдүгэннээх”, “Ворошилов”, ”Кылаайы”, ”Кыһыл Союз” холкуостарга бэрэссэдээтэлинэн үлэлээбит.

Сут кураан, аас-туор олоххо хоргуйууну, өлүүнү таһаарбатах, дьаһаллаах салайааччы Петр Васильев, тыыл, үлэ бэтэрээнэ Митрофан Васильев тустарынан сиэнэ, кыыһа Татьяна Неустроева-Васильева сырдатан кэпсээтэ. Аҕатын бииргэ төрөөбүт убайдара Кирилл – Украинаҕа, Гаврил – Смоленскайга, Бүөтүр– Старай Руссаҕа, Михаил Берлин таһыгар охтубуттар. Кинилэр Кыайыы туһугар олохторун толук биэрбит, хорсун быһыыларын, үйэтитэн планшет оҥотторон, үүнэр кэнчээри ыччакка сылын аайы билиһиннэрэр, сырдатар.

Тыыл бэтэрээннэрэ Татьяна, Иннокентий Васильевтар тустарынан кыыстара Ирина Черкашина сырдатта. Ийэтэ сэрии кэмигэр үлэ фронугар сылдьыбыт, аҕата уус талааннаах буолан, Бээрийэ урукку дьиэлэрин, тутууларын тутуспут киһи буолар.

Сэрии бэтэрээнэ Петр Васильев туһунан быыстапканы кыыһа Надежда Павлова-Васильева сырдатта.

✍️ Светлана Прудецкая, бибилэтиэкэр, уопсас. кэрэсп. С

Салгыы комментарийдарга⬇️⬇️⬇️

✅ t.iss.one/murusahargata @ulusmedia

#астык

💢 Өнөртөн, Дьокуускайтан, Бороҕонтон хаартыскалар кэллилэр ааҕааччыларбытыттан🤩🫰

✅ t.iss.one/murusahargata @ulusmedia

#астык

💢 Радиотумул олохтооҕо – Гуся🐦

Мүрү нэһилиэгэр Радиотумул түөлбэҕэ Гуся диэн бэрт сэдэх көстүүлээх кус олорор. Кини "индоутка" диэн боруода дьиэтээҕи кус эбит. Хаһаайката биэнсийэҕэ олорор Людмила Замятина иитэр куһун туһунан бу курдук кэпсиир:

– Гусяны ылан ииппитим үс сыл буолла. Бастаан подсадной кус этэ, сааһырда диэн тохтоппуттарын кэннэ, аһынаммын олох өлөттөрбөккө, бэйэбэр иитэ ылбытым. Кус диэтэххэ, олус өйдөөх, көрүдьүөстээх, бэрт сэргэх "киһи".

Саас эрдэ таһырдьа олбуор иһигэр босхо сылдьар, киэһэ буолла да сеткатыгар бэйэтэ киирэр. Элиэттэн наһаа куттанар: көтө сылдьарын көрдө да, террасаҕа эбэтэр көмүскэл көрдөөн ыппыт таһыгар харбыалаһар, онно саһан турар буолар.

Майгыта-сигилитэ хайдах эрэ өһүргэс киһи курдук. Анньыалаатыҥ, охсуолаатыҥ, тэбиэлээтиҥ эрэ дьэ ыарыылаах соҕустук тоҥсуйар.

Ветеринарияҕа илдьэн тыҥыраҕын кырыттарааччыбын. Биирдэ куоракка барарбытыгар бастакы хаһаайыныгар Киэсэҕэ хаалларан баран айаннаатыбыт, онуоха куспут кэннибититтэн кэлииккэ аннынан тахсан сайыспыттыы уулуссаҕа көрөн турар үһү.

Сөбүлүүр аһа балык, сибиэһэй оҕурсу, дьаабылыка, банан. Аатынан ыҥырдахха, илиигэр астаах буоллахха, сүүрэн аҕай кэлэр. Ыппыт аһын былдьаан сиэччи. Куоскабытыгар букатын киэптиир. Сороҕор мэниктиир, сүүр да сүүр буолар.

Сымыыттыыр, сымыыта бөдөҥ уонна хаҕа кытаанах буолар. Уонча күн сымыыттыыр, онтон өр баҕайы тохтуур. Ону сиибит даҕаны, аска да туттабыт.

✍️ Мария Аргунова

✅ t.iss.one/murusahargata @ulusmedia