#уһуйааннарга

💢 “Мүрүчээнэҕэ” иитээччилэргэ күөн-күрэс буолла

"Мүрүчээнэ" уһуйааммыт иһинэн Үлэ, Педагог уонна Настаабынньык сылын чэрчитинэн идэ таһымын көрдөрөр "Иитээччи-2023" көрүү-күрэс категорията суох уонна идэтигэр сөптөөх категориялаах иитээччилэр ортолоругар ыытылынна. Манна Майя Ноговицына, Маргарита Копырина “Ымыычаан” эрдэтээҥҥи бөлөх, Пелагея Парникова (“Росточек” бэлэмнэнии бөлөх), Вероника Аммосова (“Созвездие” бэлэмнэнии бөлөх) кытыннылар.

Бастакы күн күрэхтэһээччилэр дьарыктары ыыттылар. Майя Ноговицына – кырачааннарга уруһуй, Пелагея Парникова - бэлэмнэнии бөлөххө сурук, Вероника Аммосова – бэлэмнэнии бөлөххө билэр-көрөр дьоҕуру сайыннарыы, Маргарита Копырина улахан бөлөххө ситимнээх саҥаны сайыннарыы дьарыктарын кыайа-хото тутан көрдөрдүлэр. Дьарыктар бары да оҕо интэриэһин тардар, аныгы ирдэбилэгэ эппиэттиир гына ыытылыннылар.

Иккис күн иитээччилэр бэйэлэрэ үлэлиир педагогическай бырайыактарын кэпсээтилэр. Ол курдук Майя Ноговицына – “Традиционнайа суох ньыманан уруһуйдатыы”, Пелагея Парникова – “Олоҥхонон остуол оонньуулара”, Вероника Аммосова – “Норуот тылынан уус-уран айымньытыгар оҕону уһуйуу”, Маргарита Копырина “Оҕону үлэҕэ иитии” диэн бырайыактарын көмүскээтилэр. Өрөспүүбүлүкэтээҕи күрэс ирдэбилинэн Вероника Васильевна дьарыгын, Маргарита Васильевна бырайыагын нууччалыы тылынан ыыппыттарын хайгыахха эрэ сөп.

Тыҥааһыннаах күрэхтэһии кэннэ кыайыылааҕынан Маргарита Копырина ааттанна, 2-с м. Вероника Аммосова ылла, 3-с м. Пелагея Парникова тигистэ. Онон кыайыылаах уонна 2-с миэстэлээх иитээччилэр кэлэр үөрэх сылыгар улууска кыттар чиэһи сүктүлэр. Кэллиэгэлэрбитин улахан күрэскэ бастакы хардыы оҥорбуттарынан эҕэрдэлиибит. Күрэхтэһиини дьүүллээһиҥҥэ иитээччилэр бүтүн Россиятааҕы күрэстэрин кыттыылааҕа, “Я – педагог” өрөспүүбүкэтээҕи күрэс кыайыылааҕа Александр Артамонов, өрөспүүбүлүкэтээҕи “Сыл бастыҥ иитээччитэ-2023” күрэс финалиһа Ульяна Омукчанова күүс-көмө буоллулар.

✍️ Анна Алексеева, бас иитээччи

☑️ https://мюрюгазета.рф/article/95558

✅ t.iss.one/murusahargata @ulusmedia

#кэпсиимэрэ

💢 Халандаардары мунньар кырдьаҕас Мотрена Павлова

Бүгүн Арассыыйаҕа кылаабынай буҕаалтыр күнүгэр Курбуһахтааҕы интэринээт-дьиэ олохтооҕор, 26 сыл устата буҕаалтырынан үлэлээн бочуоттаах сынньалаҥҥа тахсыбыт "Коммунистическай үлэ ударнига", Тандаттан төрүттээх Мотрена Павловаҕа үтүө бэлэх оҥоһулунна.

Ол курдук Курбуһахтааҕы участковай балыыһаҕа өр сылларга акушерынан үлэлээбит СӨ доруобуйатын харыстабылын туйгуна Тамара Егорова истиэнэ халандаардарын уура сытыарарын Мотрена Александровна кэллиэксийэтигэр бэлэхтээтэ.

"Оруобуна кэллиэксийэбэр суох халандаардар кэлбиттэр, Тамара Ивановнаҕа, улахан махталбын биллэрэбин!" – диэн Мотрена ис сүрэҕиттэн үөрэн махтанар.

Мотрена Александровна истиэнэ халандаардарын 1961 сылтан саҕалаан мунньар. Билигин кэллиэксийэтигэр 130-тан тахса араас, хатыламмат истиэнэ халандаара баар.

«Аан маҥнай хонтуораҕа буҕаалтырынан үлэлии сырыттахпына, арай почтаҕа (урут ааҕыныстыба диир этибит) истиэнэ халандаара атыылана кэлбитэ. Онтон хонтуорабытыгар ыламмыт бэрэссэдээтэл, исписэлиис, буҕаалтыр хосторугар ыйаабыппыт. Сыл бүппүтүн кэннэ ол халандаардары быраҕыахпын харыһыйаммын ууран кэбиспитим.

Дьэ, онтон ыла сыыйа эбиллэн, кэлин атыылаһаммын, билэр дьонум биэрэннэр халандаардарым сыл аайы элбээн испиттэрэ. Кэмиттэн кэмигэр сыымайдааммын көрдөхпүнэ, урукку кэмнэрбин санааммын көнньүөрэн ылабын», – диэн Мотрена сэһэргиир.

Интэринээт-дьиэҕэ кэлэригэр халандаардарын күндү малын тэҥэ тутан илдьэ кэлбитэ. Ону көрөммүт быыстапка тэрийбиппит. Улахан саалабытын биир гына тэлгээбиппитин үөлээннээхтэрэ, үлэһиттэр бары сэргии көрбүппүт.

✍️Мария Винокурова. Курбуһах

✅ t.iss.one/murusahargata @ulusmedia

#илгэтөрдө

💢 Дмитрий Илларионов бурдук хаһаайыстыбата ыһыы үлэтигэр тэтимнээхтик бэлэмнэнэр

Улууска туораахтаах култуураны үүннэрэр Дүпсүн нэһилиэгин бурдук хаһаайыстыбатын салайааччыта Дмитрий Илларионов сааскы ыһыы үлэтигэр бэлэмнэниини тохсунньуттан саҕалаан тэтимнээхтик бара турарын билиһиннэрдэ. Ыарахан уйуктаах тиэхиньикэлэри, "МТЗ" тыраахтардары өрөмүөннээһин түмүктэнэн эрэр. “Манна уруккуттан үлэлэһэр уолаттарбытын наймылаһан, сыл аайы кэпсэтэн өрөмүөннүүбүт”, – диир салайааччы. Маны тэҥэ өссө биир сүрүн үлэ – ыһыллар сиэмэни ыраастааһын – бу күннэргэ бүттэ.

Улуус иһигэр барыта 52 туонна, таска 75 туонна сиэмэ атыыланна. Сыл аайы улуус улахан хаһаайыстыбалара сүөһү аһылыгар эбии диэн күөх маассаны үүннэрэн хаһааналлар. Онон Дүпсүннээҕи бурдук хаһаайыстыбатын үлэһиттэрэ суолу баттаһа, бу күннэргэ атыыга барбыт сиэмэлэри таһаҕастааһыҥҥа үлэлэһэ сылдьаллар.

– Туораахтаах култуураны үүннэрээччилэргэ эппиэттээх күннэрбит. Бэлэмнэнии үлэтин тэрээһиннээхтик ыыттаххына, сиргэр уоҕурдуу киллэрдэххинэ эрэ үүнүүнү ылаҕын. 70 туонна минеральнай уоҕурдууну соҕурууттан сакаастаан, төлөһөн олоробут. Ыам ыйыгар күн-дьыл туругуттан көрөн бааһыналарга сиик саптарыытын ыытыахпыт уонна дьэ ыһыыга турунуохпут.

Буоларын курдук, үлэһит илии ахсаана тиийбэт. Маныаха тыа хаһаайыстыбатын техникумугар сааскы ыһыыга, күһүҥҥү хомуурга механизатор устудьуоннары уонна Арктикатааҕы агротехнологическай университеттан күрүө-хаһаа тутуутугар устудьуоннар этэрээттэрин үлэлэтэргэ сайаапка түһэрбиппит.
Быйыл сайын түөрт килэмиэтир уһуннаах күрүөнү-хаһааны саҥардыахпыт, – диэн Дмитрий Илларионов сүрүн үлэни-хамнаһы, баар кыһалҕалары үллэстэр.

Дүпсүннээҕи бурдук хаһаайыстыбата өрөспүүбүлүкэҕэ биир улахан, биллэр үлэлээх хаһаайыстыба. Быйыл барыта 560 гектар сиргэ туораахтаах култуураны олордор былааннаахтар. Маныаха тыа сирин үлэһиттэрэ дьылбыт туран биэрэн, саас олус эрдэ ириэрбэккэ, кэмигэр хаарын уулларан, сиигин көтүппэтэҕинэ, үүнүүлээх сайын буолуоҕа диэн эрэнэ күүтэллэр.

✍️ Екатерина Захарова

✅ t.iss.one/murusahargata @ulusmedia

#үйэтитии

💢 «Победа-2023» байыаннай-спортивнай күрэс кыайыылааҕа – «MYPY» БПК

Өрөспүүбүлүкэттэн мустубут сэттэ хамаанда илин-кэлин түсүһэн бастыҥнары тургуттулар. Кыайыылаах үрдүк аатын Мүрү 1-гы №-дээх орто оскуолатын «MYPY» БПК ситистэ. Оттон «MYPY-2» БПК хамаандата төрдүс миэстэҕэ таҕыста. Оҕолорбут ОБЖ биридимиэтин учуутала, байыаннай-патриотическай кулууп салайааччыта Александр Николаев салалтатынан утумнаахтык бэлэмнэммиттэрэ көстөн, кыайыы өрөгөйүн биллилэр.

Бүгүҥҥү «Победа» күрэспит оскуолабыт выпускнига, Украинаҕа байыаннай дьайыыларга кытта сылдьан сырдык тыына быстыбыт гвардия старшай сержана Василий Данилов сырдык кэриэһигэр ананна. Онон Василий чугас дьоно, однополчаннара кыттыыны ыланнар, бириис туруораннар тэрээһиммит ураты тыыннаах ааста.

✍️ Дайаана Степанова, Ньургуйаана Бурнашева, Мүрү 1-гы №-дээх орто оскуолатын юнкордара

☑️ Сиһилии Үрүйэчээҥҥэ: https://vk.com/wall-219778198_20

✅ t.iss.one/murusahargata @ulusmedia

#бэлиэтүгэн

💢 Улууска олохтоох бэйэни салайыныы киирбитэ 20 сылын бэлиэтээтилэр

Дойду президенэ Владимир Путин 2012 сыл бэс ыйын 12 күнүнээҕи ыйааҕынан сыл ахсын муус устар 21 күнэ Арассыыйаҕа Бэйэни салайыныы күнүнэн бэлиэтэнэр. Бүгүн «Өркөн» киинигэр Арассыыйаҕа олохтоох бэйэни салайыныы күнүн уонна өрөспүүбүлүкэҕэ олохтоох бэйэни салайыныы киирбитэ 20 сылын үөрүүлээх быһыыга-майгыга бэлиэтээтилэр.

Уус Алдан улууһа Лөгөй тойон саҕаттан өрөспүүбүлүкэҕэ биллэр-көстөр салайааччылардааҕынан биллэр. Кинилэр үрдүк ааттарын ааттаан туран күн бүгүн улууспутугар салайар үлэҕэ сыралаһа сылдьар улууспут дьаһалтатын баһылыга Алексей Федотов, Ил Түмэн депутата Геннадий Васильев, депутаттар сэбиэттэрин салайааччыта Иван Колодезников, 2003-2012 сс. Хоро нэһилиэгин баһылыгынан үлэлэбит, муниципальнай сулууспа бэтэрээнэ Василий Бурцев, улуус бастакы ыҥырыылаах мунньаҕын депутата Алексей Заровняев, эдэр көлүөнэ салайааччыларын аатыттан Чэриктэй нэһилиэгин баһылыга Федор Карманов эҕэрдэ тылы эттилэр.

Алексей Федотов байыаннай дьайыы кыттыылаахтарыгар уонна кинилэр дьиэ кэргэннэригэр көмөҕө тус кылаатын иһин Ил Дархан Айсен Николаев махтал суругун уонна олохтоох бэйэни салайыныыга өр кэмнээх үлэтин үрдүктүк сыаналаан туран Иван Колодезниковка ытык чороону дохсун ытыс тыаһыгар бэлэх туттарда. Эмиэ байыаннай дьайыы кыттыылаахтарыгар, дьиэ кэргэттэригэр көмөҕө кылаатын иһин СӨ Бырабыытылыстыбатын махтал суругунан улуус дьаһалтатын успуорка, дьиэ кэргэн уонна ыччат дьыалаларыгар салаатын сүрүннүүр исписэлииһэ Наталья Охлопкова, өрөспүүбүлүкэ сайдыытыгар сүрүн кылаатын иһин «100-летие Якутской АССР» үбүлүөйдээх бэлиэнэн улуус дьаһалтатын социальнай үлэҕэ исписэлииһэ Елена Константинова, о.д.а наҕараадаланнылар.

✍️ Мария Аргунова

☑️ Сиһилии: https://мюрюгазета.рф/article/95622

✅ t.iss.one/murusahargata @ulusmedia