#уһуйааннарга

💢 Бүгүн Мүрүтээҕи 15-с нүөмэрдээх "Кэскил" уһуйааҥҥа сахалыы оонньуулары тарҕатааччы, хабылык, хаамыска күрэхтэһиилэрин улууска, өрөспүүбүлүкэҕэ биллэр кыайыылааҕа – иитээччи идэлээх кэллиэгэбит Елизавета Черкашина маастар кылаас көрдөрдө.

Кини хабылык, хаамыска билиҥҥи күрэхтэһиигэ ирдэниллэр быраабылаларын, хайдах оонньонорун билиһиннэрдэ. Онтон “иэрэгэй” диэн бэрт интэриэһинэй сахалыы остуол оонньуутун көрдөрөн күрэхтэһии ыытта. Манна уһуйаан кэлэктиибин үлэһиттэрэ бары кытыннылар.

Бу оонньууга сатабыл, сымса буолуу ирдэнэр эбит. Ким иэрэгэйэ уһуннук эргийэригэр тыҥааһыннаах киирсиилэри көрдүбүт. Кыайыы өрөгөйүн физкултуура инструктора Лаврентий Тарскай биллэ. Оттон 2-с миэстэҕэ Иван Сосин таҕыста, үһүс миэстэ Нарыйаана Егорова буолла.

Кыайыылаахтар идэлээх сойуус кэмитиэтэ (бэрэсс. Е. Григорьева) бэлэмнээбит грамотатынан, мэтээлинэн наҕараадаланнылар. Хас биирдии кыттааччы маннык оонньуулар оҕолорго наадалаахтарын, өссө да сайдар кэскиллээҕин бэлиэтээтилэр.

✍️ Галина Матвеева, сэбиэдиссэй

✅ t.iss.one/murusahargata @ulusmedia

#MuusuSTAR

💢 Надежда Харитонова “Муус устар” бэстибээлгэ ситиһиитин иһин кэлэктиибигэр уонна тэрийээччилэргэ махтанар

Өрөспүүбүлүкэ саамай киэҥ далааһыннаах “Муус устар” ыччат бэстибээлигэр экология хайысхатыгар бырайыагынан кыттан ситиһиилэммит Надежда Харитонова үс күннээх тэрээһин олоҕор умнуллубат түгэннэри бэлэхтээбитин бэлиэтиир.

Кини кыттыбыт “Эко-Лидер” хайысхатыгар Саха сирин араас муннуктарыттан 27 чаҕылхай ыччат бэйэтин бырайыагын көмүскээбит. Оттон Надежда Мүрүтээҕи юннаттар станцияларын баазатыгар тэриллибит “тыыннаах муннук” холобуругар оҕолорго айылҕаҕа харыстабыллаах сыһыаны иитии туһунан бырайыагынан үһүс миэстэ буолбута.

“Бэстибээл үс күн устата биир тыынынан ааста. Түмүктүүр тэрээһини “Триумф” спортивнай комплекс киэҥ уораҕайыгар астыктык ыыттылар. Ситиһиим иһин, өрөспүүбүлүкэ таһымыгар бырайыакпын билиһиннэрэр кыаҕы биэрбиттэрин иһин үлэлиир тэрилтэм – Мүрүтээҕи эдэр натуралистар станцияларын кэлэктиибигэр уонна тэрийээччилэргэ, өрөспүүбүлүкэ экологияҕа министиэристибэтигэр улахан махталбын этэбин”, – диэн Надежда үрдүк таһымҥа ыытыллыбыт бэстибээлгэ кыттыбыт үөрүүтүн үллэстэр, махталын тиэрдэр.

✍️ Диана Седалищева

✅ t.iss.one/murusahargata @ulusmedia

#улууска

💢 “Удьуору утумнаан” фольклор улуустааҕы күрэһэ

Кулун тутарга 1 Өспөх нэһилиэгэр төрүт култуура учууталынан өр кэмҥэ үлэлээбит тойуксут, хомусчут, алгысчыт, норуот ырыаһыта уонна үлэ, тыыл бэтэрээнэ П.А.Жирков аатынан норуот айымньыларын көрүҥнэригэр улуустааҕы күрэс ыытылынна.

Күрэххэ улуус тоҕус оскуолатыттан 124 оҕо кытынна. Дьүүллүүр сүбэҕэ “Олоҥхо дьиэтин” уус-уран салайааччыта Елизавета Данилова, улуус үөрэҕин салалтатын исписэлииһэ Саина Портнягина уонна П.А. Жирков сиэнэ аан дойдутааҕы көрүүлэр лауреаттара, гран-при хаһаайыннара, аан дойду хомуһун конгреһын кыттыылааҕа Серж Соловьев үлэлээтилэр.

Күрэх түмүгүнэн, “Чугдаарар чуорааннар” (Дүпсүн) – 3-с үрдэл, тойукка, оһуохайга Сардаана Иванова 2-с үрдэл (сал. Л.П. Бурцева), Вилена Лугинова (Бээди) оһуохайга 2-с үрдэлинэн, тойукка 2 истиэпэннээх Добун суругунан, оһуохайга “Кэскиллээх этээччи” анал аатынан (сал. А.И. Лугинова) бэлиэтэннилэр.

Ангелина Решетникова (Кэптэни) оһуохайга, тойукка 1-кы үрдэл (сал. З.П. Лугинова). Мүрүтээҕи уолаттар гимназияларын “Дьүрүлгэн” хомусчуттарын бөлөҕө 1-кы үрдэл, (сал.С.Н. Сыроватская).

“Көлүкэчээн” чабырҕахсыттар бөлөхтөрө 1-кы үрдэл, норуот ырыатыгар 1-кы үрдэл. Оһуохайга Ростислав Домотов, Эрчим Афанасьев 1-кы үрдэли ыллылар (сал. Л.Ф. Жиркова).

“Сайдыы” (Тулуна) чабырҕахсыттар бөлөхтөрө 1-кы үрдэли, норуот ырыатыгар 1-кы үрдэли, “Кылыһахтаах норуот ырыата” анал ааты, тойукка Сахалина Троева 1-кы үрдэли, “Бастыҥ тойуксут” анал ааты ситистилэр (сал. И.Ф.Охлопкова).

“Оһуор” чабырҕахсыттар бөлөхтөрө 1-кы үрдэл, хомуска 2-с үрдэл, (сал. Л.И.  Жиркова), о.д.а. буоллулар.

✍️ Валентина Стрекаловская, Уһун Күөл орто оскуолатын учуутала

✅ t.iss.one/murusahargata @ulusmedia