💢 Гимназия выпускнига Айтал Васильев “Муус устарга “ ситиһиитэ

"Муус устар" фестиваль иһинэн "Саас" медиа форум бырайыагын күрэҕэр Покровскай колледж хамаандата 2-с миэстэ буолары ситистэ. Бу хамаандаҕа Уус Алдан уола, “Уолан” гимназия выпускнига Айтал Васильев баар.
Айтал "Информационные системы и программирование" салаа 3-с кууруһун устудьуона. Устудьуоннар хамаандалара "Эдэр профессионаллар" компетенция "Разработка виртуальной и дополненной реальности" диэн салааҕа үс күн устата компьютернай программа оҥороннор, республикаҕа 2-с миэстэ буоллулар диэн сурутааччыбыт үөрүүлээх сонунун үллэстэр. Айталы уонна кини хамаандатын эҕэрдэлиибит, өссө да үрдүк ситиһиилэри баҕарабыт.

✅ t.iss.one/murusahargata @ulusmedia

#WorldSkills

💢 Дарыйаана Протодьяконова үрдүк ситиһиитин оскуолатын үбүлүөйүгэр анаата

Кулун тутар 20-24 күннэригэр Нерюнгри куоракка мэдиссиинэ кэллиэһин баазатыгар ВорлдСкиллс "Мэдиссиинэ уонна социальнай өттүнэн көрүү-истии" компетенциятыгар юниордар категорияҕа эрэгийиэннээҕи чөмпүйэнээт ыытылынна. Бу компетенцияҕа Үөһээ Бүлүү, Ньурба, Таатта, Уус Алдан улуустарыттан уонна Дьокуускай, Нерюнгри куораттартан бастыҥнар кэлэн, күҥҥэ иккилии муодулу ааһан, уопсайа 8 муодулга күрэхтэстилэр.

Улууспут аатын Мүрү 1-гы нүөмэрдээх орто оскуолатын 10 "б" кылааһын үөрэнээччитэ Дарыйаана Протодьяконова чиэстээхтик көмүскээтэ. Салайааччыта – оскуола биэлсэрэ, СӨ доруоуйа харыстабылын туйгуна Анастасия Жиркова.

Түөрт күннээх тыҥааһыннаах күрэхтэһии түмүгүнэн I миэстэҕэ – Нерюнгри, II миэстэҕэ – Уус Алдан, III миэстэҕэ Дьокуускай куорат оҕолоро таҕыстылар.

Кулун тутар 27 күнүгэр Дьокуускайга Ю.А. Гагарин аатынан Култуура, искусство киинигэр түмүктүүр тэрээһин өрө көтөҕүллүүлээхтик ыытылынна. Дьокуускайдааҕы мэдиссиинэ кэллиэһин дириэктэрэ Афанасий Алексеев мэдиссиинэ компетенциятыгар миэстэлэспит оҕолорго анал мэтээллэри, дипломнары туттарда.

Анастасия Жиркова бу күрэхтэһиигэ экспердээн тэрийэр хамыыһыйа, экспердэр үрдүк сыанабылларын ылла, эһиилги күрэхтэһиигэ эксперт быһыытынан ыҥырылынна, эксперт дипломунан, маны таһынан Нерюнгритааҕы мэдиссиинэ кэллиэһин махтал суругунан бэлиэтэннэ. Кэллиэс дириэктэрэ Ирина Адамова үчүгэй бэлэмнээх оҕону кытыннарбытын иһин Мүрү 1-гы нүөмэрдээх орто оскуолатын дириэктэригэр Игорь Сивцевкэ махтал суругу анаата.

Оскуола үөрэнээччитэ Дарыйаана Протодьяконова салайааччытынаан Анастасия Жирковалыын үрдүк ситиһиилэрин оскуолаларын үбүлүөйүгэр аныыллар.

✍️ Елена Сыроватская, уопсас. кэрэсп.

☑️ https://мюрюгазета.рф/article/93464

✅ t.iss.one/murusahargata @ulusmedia

#ИлТүмэҥҥэ

💢 Клавдия Васильева үс кинигэтэ Ил Түмэҥҥэ сүрэхтэннэ

Уус Алдан улууһун настаабынньык-педагога, үрдүк категориялаах иитээччи, РСФСР үөрэхтээһинин туйгуна, учууталлар Учууталлара, РФ уопсай үөрэхтээһинин бочуоттаах үлэһитэ, Уус Алдан улууһун бочуоттаах олохтооҕо, Арассыыйа суруналыыстарын Сойуустарын чилиэнэ Клавдия Васильева уонна кини уһуйбут иитээччилэрэ Наталья Сивцева уонна Саргылаана Готовцева кыра саастаах оҕолорго анаммыт кинигэлэрин сүрэхтэниитэ Ил Түмэн сэбиэтин мунньаҕын саалатыгар Педагог уонна уһуйааччы сылыгар ананан ыытылынна.

Клавдия Васильева суруналыыс быһыытынан оҕо сахалыы сөпкө суруйар, саҥарар уонна сиэр-майгы өттүнэн сайдарыгар аналлаах бэчээккэ таһаарыы сэдэҕин, иитии-үөрэтии эйгэтигэр аналлаах литература хайаан да наадалааҕын этэр.

Кини ити кыһалҕаны туоратыыга айымньылаахтык ылсан үлэлээтэ. Кини уопсайа 13 кинигэ ааптара. Оттон быйыл бэчээттэнэн тахсыбыт “Айылҕа азбуката” диэн сиэдэрэй ойуулаах-бичиктээх, тэттик кэпсээннэрдээх кинигэтин тыла-өһө оҕоҕо тиийимтиэтинэн умсугутуулаах. “Толкуйдуу үөрэнэбит” кинигэтэ төрөппүт, иитээччи оҕолордуун бииргэ үлэлииллэригэр анаммыт. Кинигэ 6-7 саастаах оҕо тарбаҕын былчыҥын, тылын, толкуйдуур дьоҕурун сайыннарарга анаммыт. Үһүс “Толкуйдатар таайбараҥнар” кинигэтигэр таайбараҥ арааһа төрөөбүт тыл баайын, араас тыл суолтатын билэргэ туһуламмыт.

✍️ Наталья Попова

☑️ Сиһилии: https://мюрюгазета.рф/article/93470

✅ t.iss.one/murusahargata @ulusmedia

💢 Кэскиллээх худуоһунньук Ангелина Осипова айар быыстапкатын тэрийдэ

Мүрү 2-с №-дээх орто оскуолатын 10 “а” кылаас үөрэнээччитэ, Бороҕоннооҕу оҕо искусствотын оскуолатын выпускницата Ангелина Осипова бэйэтин уруһуйдарын быыстапкатын улуустааҕы оҕо бибилэтиэкэтигэр туруорда.

Ангелина кыра сааһыттан уруһуйдуурун сөбүлүүр, кини бу сатабылыгар үөрэтэн, быыстапкатыгар кэлбит оҕолорго маастар кылаастары көрдөрдө. Талааннаах кыыска ситиһиилэри баҕарабыт!

✅ t.iss.one/murusahargata @ulusmedia

#БАРЫБИИРГЭ

⏺ Василий Даниловка "Арассыыйа Дьоруойа" ааты иҥэрэргэ көрдөһүү сурукка 48,5 тыһыынча киһи илии баттаата

Украинаҕа буола турар байыаннай дьайыыларга хорсуннук өлбүт гвардия старшай сержана, разведчик Василий Даниловка “Арассыыйа Дьоруойа” ааты иҥэрэр туһунан көрдөһүү сурукка илии баттааһыны хомуйарга уус алданнар саҕалаабыт аахсыйабытын өрөспүүбүлүкэ олохтоохторо, Василий Данилов Хабаровскайга бииргэ сулууспалаабыт доҕотторо, кинилэр дьиэ кэргэттэрэ, байыаннай дьайыылар кыттыылаахтара уонна Москва, Санкт-Петербург куораттарга олорор биир дойдулаахтарбыт өйөөтүлэр.

Онон 48,5 тыһыынча киһи илии баттааһыннаах суругу дойду бэрэсидьиэнэ Владимир Путиҥҥа уонна оборона миниистирэ Сергей Шойгуга ыыппыттарын туһунан актыбыыстар иһитиннэрдилэр.

Итини таһынан сурук өрөспүүбүлүкэ Ил Дархана Айсен Николаевка, Федерация Сэбиэтин чилиэннэригэр Вячеслав Штыровка, Егор Борисовка, Судаарыстыбаннай Дуума депутаттарыгар Галина Данчиковаҕа уонна Федот Тумусовка уопсастыбаннай көҕүлээһини өйүүргүтүгэр диэн көрдөһүүлээх тиксэрилиннэ.

✅ t.iss.one/murusahargata @ulusmedia