#улуустүмэлигэр

💢 Туос алгыһын иҥэрэр быыстапка арылынна

Сэһэн Ардьакыап аатынан улуус устуоруйатын, кыраайы үөрэтэр түмэл быыстапкалыыр саалатыгар СӨ норуотун маастара, "Моҕол ураһа" бырайыак кыттыылааҕа Екатерина Колодезникова төрөөбүтэ 75 сылыгар аналлаах, кини үтүө аатын үйэтитэр "Уран Иис Хотун туоһунан алгыһа" быыстапка турда.

Екатерина Колодезникова 1971-1973 сс. Ленинград куоракка тиийэ үөрэнэн модельер-закройщик идэтин ылан, төрөөбүт Мүрү нэһилиэгэр иис кэмбинээтигэр таһаарыылаахтык үлэлээбитэ. Кэлин 1996 с. биэнсийэҕэ тахсан баран туоһунан иис абылаҥар ылларан, былыргы иһиттэри сөргүтэн улахан айымньылары оҥорон хаалларбыта.

Мандар Уус аатырбыт Моҕол ураһатын оҥорууга ким хайа иннинэ баҕатын биллэрэн, бырайыакка кыттыһан сүҥкэн үлэни оҥорбута. Кини "Симэх иһит", "Сири иһит", "Кыыс хаппахчыта" улахан үлэлэрэ араас быыстапкалары, ыһыахтары кэрийэн духуобунай сайдыыбытын кэрэһэлээн кэллэ.

Быыстапка үөрүүлээх аһыллыытыгар улуус баһылыгын солбуйааччы Михаил Борисов: "Екатерина Ивановна улууска уран тарбахтаахтары түмээччи, көҕүлээччи, үүнэр маастардары таба көрөр аҕа сүбэһиппит этэ", – диэтэ, кини аатынан "Уран Иис Хотун" диэн үс сылга биирдэ бэриллэр суолталаах бэлиэ олохтоммутун, ол бэлиэ бастакы хаһаайкатынан норуот маастара Мария Атласова ааттаммытын билиһиннэрдэ. Сэһэн Ардьакыап аатынан түмэл дириэктэрэ Дьулустаан Заболоцкай быыстапка Екатерина Ивановна үлэтинэн эрэ буолбакка, кини олоҕун уонна удьуорун, оҕолорун туһунан элбэҕи кэпсиир, кинилэр талааннарын көрдөрөр сыаллаах турбутун бэлиэтээтэ.

Култуура улуустааҕы управлениетын начаалынньыга Иннокентий Аммосов "Кыыс хаппахчыта" үлэни өрөспүүбүлүкэҕэ эталоннай, соҕотох үлэ диэн сыаналаата. Итиэннэ Екатерина Ивановна өрөспүүбүлүкэҕэ төрүт ииһи сөргүтээччи эрэ буолбакка, улууска элбэх маастар айар үлэтин, буочарын буларыгар чочуйсубут сүбэһит этэ диэтэ.

Салгыыта комментарийдарга⏬⏬⏬

✍️ Мария Аргунова

@murusahargata