#Аҕадойдунукөмүскээччикүнүгэр

🪖💢 Өнөргө Евдоким Ушницкай сырдык кэриэһигэр күрэхтэһии үгэскэ кубулуйарыгар баҕардылар

Өнөр нэһилиэгэр Аҕа дойдуну көмүскээччи күнүгэр Украинаҕа буола турар анал байыаннай дьайыы кыттыылааҕа, дойду туһугар олоҕун толук уурбут бастыҥ ыччаппыт Евдоким Ушницкай – Кимчик аата үйэтиллэ, холобур буола турдун диэн, Өнөр аҕыс кылаастаах оскуолатын 1972 сыллааҕы выпусниктарын көҕүлээһиннэринэн, Кимчик төрөөбүт дьиэтэ турар уулуссатыгар кини аата иҥэрилиннэ.

Кимчик аатынан уулуссаны арыйыы чааһыгар нэһилиэк баһылыга Николай Лукачевскай, бэтэрээннэр ааттарыттан Любовь Борисова, аймахтарыттан Татьяна Эркинова, аҕатын бииргэ төрөөбүттэриттэн Иннокентий Ушницкай, Өнөр аҕыс кылаастаах оскуолатын 1972 сыллааҕы выпусниктарыттан Петр Протопопов, Евдоким бииргэ үөрэммит оҕолоруттан Харысхаан Афанасьев тыл эттилэр. Аал уоту оттон, айах тутан төрөппүт аҕата Семен Ушницкай сиэри-туому толордо.

Киэһэ "Тускул" сынньалаҥ киинигэр Евдоким Ушницкай сырдык кэриэһигэр анаан күрэхтэһии буолла. Манна араас сылларга аармыйа кэккэтигэр сулууспалаабыт күүстээх аҥаардар күрэхтэстилэр. Бэрт сэргэх тыҥааһыннаах киирсии буолан ааста. Уолаттарбыт бары даҕаны ох курдук оҥостон кэлэн кытыннылар. Бэл соторутааҕыта 50 сааһын туолбут Эдуард Федоров эдэрдэри кытта тэбис-тэҥҥэ илин-кэлин түһүстэ.

Дьүүллүүр сүбэ быһаарыытынан муҥутуур кыайыыны Петр Лыткин ситистэ, иккис бочуоттаах миэстэҕэ Иван Сыроватскай таҕыста, үһүс миэстэни Николай Лыткин ылла.

Кыайыылаах “Бэргэн” маҕаһыынтан 10 000 солкуобай суумалаах сертификатынан наҕараадаланна, бу бирииһи Ивановтар аймах абаҕаларын – Аҕа дойду Улуу сэриитин кыттыылааҕа, взвод хамнадыыра, лентенант Тимофей Иванов аатынан туруордулар.

Күрэхтэһээччилэр даҕаны көрөөччүлэр даҕаны тэрээһинтэн астынан, үгэскэ кубулуйан сыл аайы ыытылларыгар баҕа санааларын эттилэр.

✍️ Варвара Парникова – Үүйэ, уопсас. кэрэсп. Өнөр

✅ https://мюрюгазета.рф/article/91167

🔟🔟🔟🔟

#нэһилиэктэргэ

💢 Тумулга күүстээх аҥаардар күрэстэрэ буолла

Тумул бөһүөлэгэр Аҕа дойдуну көмүскээччи күнүгэр анаммыт бэрт сэргэх тэрээһин бастакы чааһыгар анал байыаннай эпэрээссийэ кыттыылааҕа Георгий Прокопьевы уонна Чечня сэриитин бэтэрээнэ Константин Тимофеевы кытта көрсүһүү буолла.

Нэһилиэк баһылыга Василий Алексеев биир дойдулаахтарбытыгар махтал суруктары уонна саха быһаҕын бэлэх уунна.

Тэрээһин иккис чааһыгар көлүөнэлэр икки ардыларыгар военизированнай күрэхтэһии буолла.

Манна түөрт хамаанда биэс түһүмэххэ кытынна. Уопсай баалынан 1-кы миэстэҕэ Тумул орто оскуолатын "Сокол" хамаандата, 2-с миэстэҕэ "Сэһэн сиэннэрэ" ыччат хамаандата, 3-с миэстэҕэ "Барс" орто саастаахтар хамаандалара, 4-с миэстэҕэ Тумул орто оскуолатын "Карбышевецтар этэрээттэрэ" хамаандата таҕыстылар.

Кыайыылаахтар бары мэтээллэринэн, бириистэринэн наҕараадаланнылар.
Күрэхтэһиигэ бэйэтин анал бирииһин Георгий Прокопьев 10 кылаас үөрэнээччитигэр Владьяна Алексееваҕа туттарда.

✍️ Виктория Петрова. Тумул

🔟🔟🔟🔟

#бэлиэкүҥҥэ

💢 Аҕа дойдуну көмүскээччи күнүгэр аармыйа туһунан билиһиннэрдилэр
 
Уус Алданнааҕы социальнай-реабилитационнай кииҥҥэ “Мы – будущие защитники Отечества” диэн тэрээһин буолан ааста.

Тэрээһин маршировкаттан саҕаланна. Онтон Павел Саввин “Дойдум миэнэ – Уус Алдан” ырыаны бэркэ ыллаата уонна биһиги, оҕолор бары, “Эйэ, дьол иһин” ырыаны ансаамбылынан ыллаатыбыт.

Реабилитационнай киин үлэһитэ Сергей Рощин оҕолорго анаан бэйэтин ырыатын бэлэхтээтэ. Ол кэнниттэн полиция сотруднига Алгыс Михайлов аармыйа туһунан олус интэриэһинэйдик кэпсээбитэ.

Салгыы иитээччилэрбит икки хамаандаҕа арааран алта түһүмэҕинэн күрэхтэһиннэрдилэр. Түмүккэ очукуобут тэҥнэһэн, бары грамотанан, бирииһинэн наҕараадаланныбыт.

Бу үөрүүлээх күҥҥэ полиция үлэһитин кэпсээнин олус сөбүлээбитим, онтон бэйэбит ыллаабыппыт уонна минньигэс астаах бырааһынньыктааҕы остуолга мустубуппут.

✍️ Ваня Егоров, 8 кылаас үөрэнээччитэ

✅ @murusahargata