🔟🔟🔟🔟

Төрөөбүт тылы харыстааһын саҥа таһымҥа тахсыахтаах

Бу дьыл олунньу 16 күнүгэр Саха Өрөспүүбүлүкэтин Ил Дархана Айсен Николаев Саха Өрөспүүбүлүкэтин Ил Түмэнин Бэрэссэдээтэлин бастакы солбуйааччы Алекандр Жиркову кытта көрсөн төрөөбүт тылы харыстааһыҥҥа өрөспүүбүлүкэҕэ ыытыллар үлэ туһунан сүбэлэстэ.

Ил Түмэн бастакы вице-спикерэ Өрөспүүбүлүкэ баһылыгар төрөөбүт тыллары харыстааһыҥҥа уонна сайыннарыыга Ил Дархан ылыммыт дьаһаллара хайдах олоххо киирэн иһэллэрин, уонна тыллары харыстааһын үлэтин инники соруктарын туһунан санаатын эттэ.

Ордук чуолаан Александр Николаевич Өрөспүүбүлүкэҕэ тыллары харыстааһыҥҥа уонна сайыннарыыга Ил Дархан ылыммыт анал бырагырааматын суолтатын, уонна бырагыраамаҕа көрүллүбүт соруктары толорууга Өрөспүүбүлүкэ Бырабыытылыстыбатын, Ил Түмэнин, туһааннаах министиэристибэлэр үлэлэрэ күүһүрүөхтээҕин бэлиэтээтэ.

Төрөөбүт тылы үөрэтиигэ уус уран литература, фольклор, олоҥхо суолталарын ыйан туран Александр Жирков Өрөспүүбүлүкэ баһылыгар өрөспүүбүлүкэҕэ Олоҥхо дьиэлэрин тиһигин тэрийии, норуот төрүт үгэстэрин харыстыы, тарҕата сылдьааччыларга Ил Дархан анал өйөбүлүн олохтооһун, оҕоҕо аналлаах сахалыы тылынан биэриилэри элбэтии, онтон да атын төрөөбүт тылы харыстаһар, өйүүр дьаһалларын иһин бу эйгэҕэ үлэлэһэ сылдьар дьон аатыттан махталын тириэртэ:

“Төрөөбүт тыл инникитин туһугар дьиксинии күүһүрэн иһэр. Тыл мөлтөөн эрэрин дьон көрө сылдьар уонна бэйэтин кыаҕынан итини утары туруулаһа сатыыр. Олору өйүүргэ сөптөөх дьаһаллары Эн ардыгар бэйэҥ да көҕүлээн ылынан, ылыннаран иһэргин дьон-сэргэ өйдүүр, ылынар”, - диэтэ Ил Дархаҥҥа туһаайан Александр Жирков.

Салгыы Александр Жирков уонна Айсен Николаев бу дьыл 22-24 күннэригэр ыытыллыбыт саха тылын, литературатын, култууратын учууталларын II сийиэһин түмүктэрин туһунан кэпсэттилэр.

Салгыы комментарийдарга⏬⏬⏬

✍️ Ил Түмэн пресс-сулууспата

Андрей Сорокин хаартыскаҕа түһэриитэ

@murusahargata

🔟🔟🔟🔟

#бырабыыталыстыбаотчуота

⏺ Дүпсүҥҥэ уонна Өнөргө успуорт саала тутулларын туруорустулар

СӨ Тыатын хаһаайыстыбатын миниистирэ Александр Атласов уонна Уус алдан дьаһалтатын баһылыгын 1-кы солбуйааччы Петр Сивцев салайааччылаах бырабыыталыстыба үлэтин отчуоттуур иккис бөлөх үлэтин Чэриктэй нэһилиэгиттэн саҕалаан Дүпсүҥҥэ, Өнөргө үлэлээтэ.

Дүпсүн нэһилиэгэр тыын боппуруоһунан – успуорт саалатын тутуута буолла. Ону кэккэ айан суолун-ииһин оҥоһуллуута, маһы кэрдэн айан суолун кэҥэтэргэ көрдөстүлэр. Итиэннэ, нэһилиэккэ медпуун тутулларын туруорустулар.

Оскуола үөрэнээччилэрэ Дайаана, Карина Сивцевалар эдэр исписэлиистэр, учууталлар кэлэллэригэр баҕаларын биллэрдилэр, онуоха: “Уопсай олорор дьиэ тутуллара буоллар кэлиэ этилэр, сайдыы барыа этэ”, – дэстилэр. Ону ситэрэн олохтоох кырдьаҕас Егор Афанасьев култуура дьиэтигэр баянист, оскуолаҕа ырыа фонограмматын оҥорор киһи суоҕун, ВИА-ҕа үөрэтэр педагог баара буоллар диэн баҕатын эттэ.

✍️ Мария Аргунова

Салгыытын комментарийга аах
⏬️⏬️⏬️

🔟🔟🔟🔟

💢 Тирэх буолар эр дьоммутун чиэстээтибит

«Мүрүчээнэ» оҕо уһуйаанын профсойууһа улууска Аҕа сылынан уонна Аҕа дойдуну көмүскээччилэр күннэринэн тэрилтэбитигэр үлэлиир эр хоһууттарга «Чэйиҥ эрэ, уолаттар!» диэн сэргэх күрэхтэһиини тэрийдэ.

Ол курдук уһуйаан кэлэктиибин күүстээх аҥаардара араас түһүмэххэ: оҕуруот астарыттан бүлүүдэлэри киэргэтэн оҥорон көмүскээтилэр, «Иэрэгэй» диэн саха төрүт оонньуутугар кииристилэр, «Түү мээчиги» таба быраҕыыга күрэстэстилэр, бултка сыһыаннаах ыйытыктарга эппиэттээтилэр, тургутукка кытыннылар уонна аҕа да, уһуйаан да үлэһиттэрэ буолалларын быһыытынан, оҕону сөпкө уонна түргэнник таҥыннарарга күрэхтэстилэр.

Түмүккэ бэрт кыранан чорбойон, кыайыылааҕынан Степан Прокопьев таҕыста. Иккис миэстэни Михаил Гуляев, үсүһү Иван Андреев ыллылар.

Кыайыылаахтар анал бириистэринэн уонна грамоталарынан наҕараадаланнылар, оттон кыттааччыларга туоһу суруктар уонна биһирэм бириистэр туттарылыннылар.

✍️ Светлана Иванова, физкультура инструктора,
Маргарита Крылова, иитээччи

✅ @murusahargata

🔟🔟🔟🔟

#нэһилиэктэргэ

💢 Суотту Сайа саҥатынан сайа тыынна

Олунньу 21 күнүгэр Суотту модельнай бибилэтиэкэтигэр саха норуодунай суруйааччыта, поэт, суруналыыс, култуура үтүөлээх үлэһитэ Наталья Михалева-Сайалыын көрсүһүү Суотту олохтоохторун, уран тыл сүгүрүйээччилэрин түмтэ.

Дьоһун ыалдьыт кэлэрэ эрдэттэн биллэн, "Мичээр" СК үлэһиттэрэ Устинья Борисова, Наталья Степанова сахалыы сайбаччы таҥнан, тойугунан көрсөн дьоро күн быыһын сэгэттэлэр. Тоҕуоруһа мустубут дьон, саалаҕа ыга симсэн олорон истиҥ-иһирэх көрсүһүү аанын нэлэччи аһан, кэпсэтии тимэҕин сүөрдүлэр.


Сайаҕас кэпсэтиини Сайа олоҕуттан саҕалаан, айар үлэтин киһи иһиттэр истэ олоруох курдук кэпсээн, дьон кутун тутта. Сайа саҥарарын истэ олорон саха тыла баайын, сүмэтэ-сүөгэйэ хойуутун илэ истэн итэҕэйэҕин. Бары даҕаны уран тыл абылаҥар ылларан, сааскы салгыҥҥа сайа оҕустаран, санаалыын сырдаан олордубут.

Сайа ырыа буолбут хоһоонноруттан "Иэйии" ансаамбыл икки ырыаны толорон сааскы сырдык күнү түннүгүнэн сандаартылар. Аны Зоя Заровняева солота олох даҕаны халлаанынан көтүттэ.

Сайа норуот тапталлаах поэта буоларын, олохтоохтор кини хоһооннорун билэллэриттэн, өссө ноһойуус ааҕан, бэйэтин да соһуттулар быһыылаах...

Өссө да олоруох дьон, Суотту орто оскуолатыгар көрсүһүүлээх буолан, Сайа айар үлэтигэр өссө үрдүк аартыктары дабайарыгар, тус олоҕор дьолу-соргуну баҕаран алгыспытын этэн, астынан-дуоһуйан тарҕастыбыт.

✍️ Иннокентий Попов, уопсас. кэрэсп.

✅ https://мюрюгазета.рф/article/90855