#төрөөбүттылбытынхарыстыахха

🩸 Быйыл #төрөөбүттылбытынхарыстыахха диэн саҥа бырайыакпыт саҕаланна. Хаһыат үлэһиттэрэ буоларбыт быһыытынан, дьон сахалыы саҥарарыгар, суруйарыгар ордук ханнык тылы сыыһа туттарын, суруйарын күннэтэ бэлиэтии көрөр-билэр буолан, ийэ тылбытын харыстыырга, олохтоммут нуорманы тутуһарга бэйэбит сэмэй кылааппытын киллэрэбит.

💬 Тохсунньу устата 17 ыйытык таҕыста, биир ыйытыкка, ортотунан, 200 киһи кыттар – үгүскүт сөптөөх хоруйу биэрэргит үөрдэр👍👍👍

Ырытан көрдөххө, “дылы – диэри” (112 киһи – сөпкө, 69 киһи – сыыһа хоруйдаабыттар), “биллэн турар – биллэн туран” (99 киһи – сөпкө, 66 киһи – сыыһа), “ҥ” дуу, “н” дуу (118 киһи – сөпкө, 89 – сыыһа), “балай да – балайда” (105 киһи – сөпкө, 85 киһи – сыыһа), сир-дойду икки тылтан турар аатыгар дефистээх суруйабыт дуу, дефиһэ суох дуу (67 киһи – сөпкө, 144 киһи – сыыһа), ытыктабылы бэлиэтээн “Эн” дуу, “Эһиги” дуу диэн туһаайыыга (119 киһи – сөпкө, 76 киһи – сыыһа) уонна “маарын дуу, мааҕын дуу” (68 киһи – сөпкө, 143 киһи – сыыһа) ордук хайдыһыы буолбут

Күндү ааҕааччылар, ханныгын да иһин быраабыла, нуорма тутуһарга диэн оҥоһуллар, онон Саха Өрөспүүбүлүкэтин Бырабыыталыстыбата 2015 сыллаахха тохсунньу 22 күнүгэр бигэргэппит таба суруйуу быраабылаларын тутуһарга дьулуһуҥ, төрөөбүт тылбытын харыстыахха.

@murusahargata

#БАРЫБИИРГЭ

✊ Чэриктэйдэр мобилизацияламмыт уолаттарыгар, кинилэр дьонноругар көмө-тирэх буолаллар

💠 Украинаҕа буола турар анал байыаннай эпэрээссийэҕэ Аҕа дойдуну көмүскээһиҥҥэ улууспут Чэриктэй нэһилиэгиттэн хорсун-хоодуот уолаттар эмиэ барбыттара. Төһө да саастарынан эдэр буоллаллар, ыарахан усулуобуйаҕа эйэлээх олоҕу туруулаһыыга хорсуннук кыттан, дойдуларын чиэһин көмүскүү сылдьалларынан киэн туттабыт.

Нэһилиэккэ саҥардыы талыллыбыт эдэр баһылык Федор Карманов көҕүлээһининэн, нэһилиэк тэрилтэлэрин үлэһиттэрэ, олохтоохторо, биир дойдулаахтара уолаттарга уонна кинилэр ийэлэригэр, аҕаларыгар көмө, тирэх буолаллар.

Ол курдук, быйыл тохсунньуга нэһилиэк баһылыга ыҥырыы таһааран, Чэриктэйтэн төрүттээх биир дойдулаахтар бары биир санаанан байыаннай дьайыыларга сылдьар Айаал Гороховка, Иннокентий Сивцевкэ, Григорий Васильевка, Иван Замятиҥҥа анаан көмө харчы – уопсайа 212 тыһыынча солкуобай хомуллан, уолаттар чугас дьонноругар түҥэтилиннэ.

💬 Нэһилиэк сынньалаҥын киинин дириэктэрэ Римма Бочкарева:

– Нэһилиэк тэрилтэлэрин – оскуола, оҕо саадын, сынньалаҥ киинин үлэһиттэрэ өрөспүүбүлүкэтээҕи мобилизациялыыр ыстаап сорудаҕынан анал дьайыыга сылдьар уолаттарга саа уоһугар аналлаах хаа (чехол) үллэриллэн, ону тигэ сылдьабыт. Былырыын ахсынньыга аахсыйа кэнсиэрбитигэр 8 тыһыынча солкуобай киирбитин – Чэриктэйтэн бэбиэскэнэн барбыт уолаттар төрөппүттэригэр, алтынньыга түөлбэлэринэн хомуллубут 50 тыһыынчалаах көмө харчы кинилэр карталарыгар ыытыллыбыта. Мобилизацияламмыт Кеша Сивцев соҕотох олорор ийэтигэр биир дойдулаахтарбыт маһын, мууһун бэлэмнээн биэрбиттэрэ.

Уолаттарбыт этэҥҥэ сылдьан, ытык иэстэрин толорон дойдуларыгар доруобай, чэгиэн төннөн кэлэллэригэр нэһилиэкпит дьоно, биир дойдулаахтарбыт үтүө баҕа санааларын тиэрдэллэр, – диэн иһитиннэрдэ.

✍️ Светлана Сивцева

https://мюрюгазета.рф/article/88113