#mening_madhiyam📚

1992-yil 10-dekabr — Oʻzbekiston Respublikasi Davlat Madhiyasi qabul qilingan kun!

"Oltmish so‘zning sohir qudratiga
maftundir qalblar"

1992-yil 10-dekabr kuni davlatimiz ramzlaridan biri O‘zbekiston Respublikasi Davlat Madhiyasi qabul qilinganligi Vatanimiz tarixi sahifalariga zarxal harflar ila bitilgan unutilmas voqeadir.
Mohir bastakor Mutavakkil Burhonov o‘zining eng buyuk asari Madhiyamizning musiqasini ya’ni, Vatanimiz ovozining dunyo sahnalarida jarangdor va ohangdorlik ila yangrashining mukammal namunasini yaratgan.
Madhiya matnini esa O‘zbekiston Qaxramoni, xalq shoiri Abdulla Oripov yozgan bo‘lib Madhiya matnida:
Birinchidan, vatanparvarlik ruhi a’lo darajada madh etilgan. Ikkinchidan, matn nihoyatda puxta – pishiq, bir so‘z kam yo ortiqcha emas.
Uchinchidan, har bir kalimaga muayyan ijtimoiy vazifa yuklatilgan.
To‘rtinchidan, qo‘shiqqa mo‘ljallangan matn bo‘lgani uchun ham, unda jarang baland, qofiyalar to‘q, ichki ohangdorlik ham juda kuchli.
Matn o‘zi jami to‘rt banddan iborat bo‘lib, naqorat ikki bor kelganini hisobga olsak, jami 12 satrda bor gap hammasi aytilgan.
So‘z uncha ko‘p emas: “To” bilan “Toki”ni qo‘shib hisoblaganda 63 ta. Lekin “To” 2 (to, toki) va “Sen” 3 (“Senga” 2 bor, “Sen” 1 bor) karra ishlatilganligini inobatga olsak jami bo‘lib 60 ta takrorsiz so‘z qo‘llanilgani oydinlashadi.
Matnning eng muhim hususiyati shundaki, xalq shoirimiz faqat qisqa-qisqa so‘zlar ishlatganligidir.
“O‘zbekiston” so‘zidan boshqa to‘rt bo‘g‘inli kalima yo‘q.
Bitta bo‘g‘inli - 16 ta
Ikkita bo‘g‘inli - 36 ta
Uchta bo‘g‘inli - 20 ta
To‘rtta bo‘g‘inli - 1 tani tashkil etadi.
Yurtimiz ahlining “Bosh qo‘shig‘i” 132 bo‘g‘indan iborat bo‘lib, quyidagi g‘oyalar ilgari surilgan:
Birinchisi – O‘zbekiston degan yurtga ta’rif berilgan;
Ikkinchisi – Xalqga ta’rif berilgan;
Uchinchisi – Istiqlolimizga ta’rif berilgan;
To‘rtinchisi – Madhiyada abadiylik ruhi kuchli singdirilgan.
Buyuk shoir asarga xalq qalbining qo‘rini to‘ka olgan. Shuning uchun ham Madhiyamiz – har bir fuqaro uchun muqaddas qadriyatdir.
Sizlarni ushbu muqaddas Madhiyamiz qabul qilinganligining
32 yilligi bilan chin qalbimizdan muborakbod etamiz.
Madhiyamiz dunyo uzra baralla yangrayversin.

Respublika Ma’naviyat va ma’rifat
markazi To‘rtko‘l tumani bo‘limi