“ ወደ ትግራይ መልሱን የሚሉ ተፈናቃዮች የሉም ” - የአላመጣና አካባቢው አመራር 

ከራያ አላላማጣ ከተማ ተፈናቅለው መሆኒ ከተማ በሚገኝ መጠለያ የሚኖሩ ተፈናቃዮች፣ ወደ ትግራይ እንዲመለሱ ዛሬ (ሚያዚያ 5 ቀን 2016 ዓ/ም) ሰላማዊ ሰልፍ ማድረጋቸውን መረጃ አድርሰናችሁ ነበር።

የአላማጣ ከተማና የአካባቢው አመራር የዛሬውን ሰልፍ በተመለከተ ለቲክቫህ ኢትዮጵያ በሰጠው ቃል ፣ “ በስም የአላማጣ ተፈናቃይ ከማይጨውና መሆኒ አከባቢ ያሉ የ #TDF አባላትን ሲቪል በማስለበስ ‘ተፈናቃዮች ነን’ ብለው ከመሆኒ ወደ አላማጣ አቅጣጫ ጉዞ በማድረግ ተክላይ በር ድረስ ሰልፍ ወጥተዋል ” ብሏል።

አክለውም፣ “ ሲቪሉ ከተክላይ በር አላለፈም። የታጠቀው ኃይል ግን ከተክላይ በር ወደ ምዕራብ አቅጣጫ ከሚገኘው ጨጓራ ተራራ በመያዝ ቁልቁል ወደ ኮስምና ታኦ አቅጣጫ እየተንቀሳቀሱ ይገኛሉ ” ሲሉ ተናግረዋል። 

“ ይህ እንቅስቃሴ ሙሉ በሙሉ የፕሪቶርያውን ስምምነት የሚጥስ ነው። መከላከያ በሰጠን አቅጣጫ የራያ አላማጣና የአላማጣ ከተማ ህዝብ ወደ ግንባር ከመሄድ ተቆጥቧል ” ብለዋል።

“ ሰልፈኞቹ ከያዙት መፎክር መካከል፦
- የትግራይ ሉዓላዊ ግዛት ይከበር
- የራያ ህዝብ ትግራይ እንጂ አማራ ሁኖ አያውቅም 
- የራያ ህዝብ የማንነት ጥያቄ የለውም ” የሚል ይገኝበታል ሲሉ ገልጸዋል።

ከአላማጣ ከተማ ተፈናቅለው መሆኒ መጠለያ ጣቢያ የሚኖሩ ተፈናቃዮች አሉ ? ተብሎ ለቀረበላቸው ጥያቄ በሰጡት ምላሽ አመራሩ፣ “ ከራያ አላማጣ ተፈናቅለው የነበሩ በሙሉ ተመልሰዋል። መሆኒ ያሉ ተፈናቃዮች አመራር የነበሩ፣ ወጣት ያሳፈኑ፣ እስከ ሽዋሮቢት ድረስ የዘረፉ #ወንጀለኞች ናቸው ” ብለዋል። 

“ ወደ ትግራይ መልሱን የሚሉ የሉም። መሆኒ ውስጥ ያሉ የትግራይ ኢንቨስተሮች የአከባቢው ማህበረሰብ አላሰራ ስላላቸው ወደ መቐለ የሚሸሹ አሉ። ከዚህ ውጭ ሌላ የለም። 100% የተረጋገጠ ነው ” ሲሉ አክለዋል።

በትግራይ በኩል ያሉ ታጣቂዎች ባለፈው በነበረው ባደረጉት ተጨማሪ ትንኮሳ ተቆጣጥረውት ከነበረው "ጨጓራ" ከተሰኘው ቦታ፣ "ኮስም፣ ቡበ፣ ታኦ እና አከባቢው ተቆጣጥረዋል። መከላከያ ኃይል ለመጨመር ከላይ ካሉት አካላት እየተጻጻፈ ነው። በዚህ ሰዓት በርካታ አከባቢዎች ጦርነት ውስጥ ናቸው " ያሉት አመራሩ፣ " እኛ ፌደራል መንግሥት ባስቀመጠው አቅጣጫ መሄድ እንፈልጋለን። ጦርነትን አማራጭ አናደርግም " ብለዋል።

#TikvahEthiopiaFamilyAA

@tikvahethiopia