#NewsAlert

የዓለም ጤና ድርጅት ከ3 ዓመት በኃላ ኮቪድ-19 ዓለም አቀፍ አጣዳፊ የጤና ስጋት መሆን #ማብቃቱን ይፋ አደረገ።

የድርጅቱ ዋና ዳይሬክተር ዶ/ር ቴድሮስ አድሃኖም ከዚህ ቀደም አውጀውት የነበረው የኮቪድ-19 የምድራችን አጣዳፊ የጤና ስጋት አሁን ላይ ማብቃቱን አሳውቀዋል።

ይህ ውሳኔ የተላለፈው ትላንት ለዚሁ ጉዳይ የተቋቋመው ኮሚቴ ለ15ኛ ጊዜ በመገናኘት ባደረገው ስብሰባ ወቅት ባቀረበው ምክረ ሃሳብ መሆኑን ዶ/ር ቴድሮስ ገልጸው በዚህም መሰረት የኮሚቴውን ምክረ ሃሳብ በመቀበል የኮቪድ-19 ዓለም አቀፍ አጣዳፊ የጤና ስጋትነት ማብቃቱን አውጀዋል።

ይህ ማለት ግን ኮቪድ አብቅቷል ማለት እንዳልሆነ አስገንዝበዋል።

የዓለም ጤና ድርጅት እኤአ ጥር 20/2020 ላይ ነበር ኮቪድ-19 የዓለም አቀፍ የጤና ስጋት ብሎ ያወጀው።

ይኸው ወረርሽኝ በትንሹ 20 ሚሊዮን ሰዎችን ገድሏል (እንደ WHO መረጃ) ፣ በርካቶችን ቤተሰብ አሳጥቷል ፤ የዓለምን ኢኮኖሚ እንዳልነበር አድርጓል።

@tikvahethiopia

የብር የምንዛሬ ለውጥ ሊደረግ ነው ?

" የሚናፈሰው ወሬ ሁሉ ሀሰት ነው " - አቶ ማሞ ምህረቱ

በኢትዮጵያ " የገንዘብ ምንዛሬ ተመን ማስተካከያ ሊደረግ ነው " በሚል የሚናፈሰው ወሬ ሀሰት ነው ሲል የኢትዮጵያ ብሔራዊ ባንክ አሳውቋል።

የባንኩ ገዥ አቶ ማሞ ምህረቱ ለመገናኛ ብዙሃን በሰጡት ማብራሪያ ፥ " እስከዛሬ ድረስ / እስካሁን ድረስ በአንድ ጊዜ የሚደረግ የብር የምንዛሬ ተመን ለውጥ / one time devaluation / ለማድረግ የተደረገ ውይይትም፣ የተወሰነ ውሳኔ ፈፅሞ የለም " ብለዋል።

የብር የምንዛሬ ለውጥን / devaluation በተመለከተ የተደረገ ውይይት ወይም የተወሰነ ውሳኔ የለም ያሉት አቶ ማሞ ዜጎች በተረጋጋ ሁኔታ በገበያ ስርዓቱ እንዲጠቀሙ ማሳሰቢያ ሰጥተዋል።

አቶ ማሞ ምህረቱ ፥ " በማህበረሰቡ ውስጥ በማህበራዊ ሚዲያ መንግሥት የብር የውጭ ምንዛሬን ለውጥ በማድረግ devaluation ሊያደርግ ነው የሚል ብዙ ወሬ አለ ፤ ይሄን ተከትሎ ገበያ ውስጥ ስካር በሚባል ሁኔታ ሰዎች አንዳንዴ እቃ ይይዛሉ፤ አንደንዴ ደግሞ መሰረታዊ በሚባሉት እቃዎች ላይ አላስፈላጊ የሆነ ዋጋ ይጨምራሉ ከዛም አልፎ የኢኮኖሚ ጥቅም በሌለው ጉዳይ ላይ ያላቸውን ገንዘብ ኢንቨስት ያደርጋሉ ይሄ ፈፅሞ ትክልል ያልሆነና ሊስተካከል የሚገባው ጉዳይ ነው " ሲሉ ተናግረዋል።

ከሰሞኑን በተለይ በመዲናዋ መንግሥት የብር የውጭ ምንዛሬን ለውጥ በማድረግ devaluation ሊያደርግ ነው በዚህም መሰረታዊ እና ሌሎች ቁሶች ዋጋ ሊጨምር ይችላል የሚል ወሬ በስፋት እየተሰራጨ ነው።

@tikvahethiopia

ሰሞነኛው ዝናብ ...

በተለያዩ የሀገራችን አካባቢዎች ከሰሞኑን እየጣለ ያለው ዝናብ በሰው ህይወት እና በንብረት ላይ ጉዳት እያደረሰ ይገኛል።

#SNNPRS

በደቡብ ክልል ፥ ጎፋ ዞን ዑባ-ደብረፀሃይ ወረዳ ዛባ ቀበሌ በጣለው ከባድ ዝናብ በተከሰተ የጎርፍ አደጋ 21 ሰዎች መሞታቸውን ለማወቅ ተችሏል። በንብረት ላይ ከፍተኛ ጉዳት ደርሷል።

በህይወት የተረፉ ዜጎ በትምህርት ቤቶች ውስጥ እንዲጠለሉ የተደረገ ሲሆን ለችግሩ ዘላቂ መፍትሄ ለማፈላለግ ኮሚቴ ተዋቅሮ ወደ ስራ መገባቱ ተሰምቷል።

ተጎጂ ወገኖችን ለመደገፍም በዞኑ የአደጋ ጊዜ ዝግጁነት ማቋቋሚያ የባንክ ሂሳብ ቁጥር 1000511561276 ላይ ድጋፍ እንዲደረግ ተጠይቋል።

#Amhara

በአማራ ክልል፣ ደቡብ ወሎ ዞን ለገሂዳ ወረዳ 02 አዋተል ቀበሌ ሚያዚያ 27/2015 ዓ.ም ምሽት ለተከታታይ 30 ደቂቃ የጣለው በረዶ የቀላቀለ ዝናብ በእንስሳት፣ በሰብልና በመኖሪያ ቤቶች ላይ ከፍተኛ ጉዳት አድርሷል።

በረዶ ቀላቅሎ የጣለው ዝናብ ከ37 ሄክታር መሬት በላይ የደረሱ ሰብሎች ላይ ከፍተኛ ጉዳት ማድረሱ ተነግሯል።

#Gambella

በጋምቤላ ክልል ፤ በዲማ ወረዳና አጎራባች ወረዳዎች ከሚያዝያ 25 /2015 ዓ.ም ጀምሮ እየጣለ ባለው ሃይለኛ ዝናብ ምክንያት በተከሰተው ጎርፍ በሚሊየን የሚገመት ንብረት ላይ ጉዳት ደርሷል።

የጎርፍ አደጋው እስካሁን ባለው መረጃ በወረዳው ከ70 በላይ መኖሪያ ቤቶች በውሃ ያጥለቀለቀ ሲሆን በሰብል ላይም ጉዳት አድርሷል።

ጎርፉ በዲማ ከተማ ወንዝ ዳር የነበረውን የከተማ ንፁህ መጠጥ ውሃ መሳቢያ ጀነሬተርና ፖምፕ ግንብ ቤቱን ጨምሮ በሚሊዮን በሚገመት ንብረት ላይ ጉዳት ማድረሱን ታውቋል።

በዚህም ችግር ሳቢያ የከተማው ንፁህ መጠጥ ውሃ አገልግሎት መቆሙ ተነግሯል።

በተመሳሳይ በዲፕ (መርከስ) ቀበሌ የሚገኘው የእኩጉ ስደተኞች መጠለያ ጣብያና የአካባቢው ማህበረሰብ የንፁህ መጠጥ ውሃ አገልግሎት የሚሰጡ ሁለት መሳቢያ ጀነሬተሮች በጎርፍ መወሰዱ ታውቋል።

ከዚህ በተጨማሪም የአኮቦ ወንዝ እስከጫፉ ድረስ በመሙላቱ ዲማ ወረዳን ጨምሮ ሁለት አጎራባች ወረዳዎች የሚያገናኝ የአኮቦ ብረት ድልድይ ላይ ጉዳት ደርሷል።

በደረሰው አደጋ ድጋፍ የሚያስፈልጋቸው ወገኖች ለማገዝ የክልሉ መንግሥትን ጨምሮ መንግስታዊ ያልሆኑ ድርጅቶች የበኩላቸውን ድጋፍ እንዲያደርጉ ጥሪ ቀርቧል።

መረጃ ምንጮች ፦ የጎፋ ዞን ፣ የለገሂዳ እና የዲማ ወረዳ ኮሙኒኬሽን ጉዳዮች ጽህፈት ቤት ናቸው።

@tikvahethiopia

መንግሥት የከለከለው ሰልፍ ...

በሳምንቱ መጀመሪያ ሰኞ በአደባባይ ሊከበር የነበረው የሰራተኞች በዓል (ሜይዴይ) በመንግስት መከልከሉ ይታወሳል።

በዚህ ዙርያ የኢትዮጵያ ሠራተኞች ማኅበራት ኮንፌደሬሽን ፕሬዝዳንት አቶ ካሳሁን ፎሎ ምን አሉ ?

አቶ ካሳሁን ፎሎ ፦

" የእኛ አላማ የነበረው የሰራተኛውን ጥያቄ ይዘን በመላው ከተማ ሳይሆን በመስቀል አደባባይ ብቻ ማክበር እና ጥያቄዎቻችንን በሰላም ማቅረብ ነበር።

የአዲስ አበባ ሰላምና ፀጥታ ቢሮ ሀላፊዋ ግን ከበአሉ አንድ ቀን በፊት እሁድ ምሽት ይህን ማድረግ እንደማንችል ነገሩን፣ የሰራተኞች ቀንን ልታከብሩ ሳይሆን መንግስትን ልትጠይቁ አስባችኋል፣ ይህን ጥያቄ ይዛችሁ አደባባይ አትወጡም ተብለናል። እንዲህ ብለው ተቆጡ፣ መጥቼ በአካል ላስረዳ ብልም አልቻልኩም፣ ደንብ እናስከብራለን ከፈለጋችሁ ሚሊኒየም አዳራሽ ሂዱ አሉኝ።

ልናቀርባቸው የነበሩት ሶስት ጥያቄዎች ፦

1. በከፍተኛ የኑሮ ውድነት ሰራተኛው እየተቸገረ ነው፣ በተለይ ደግሞ ደሞዝ ተከፋዩ። መንግስት መፍትሄ ይስጠን። አብዛኛው ሰራተኛ በቀን አንዴም ለመብላት እየተቸገረ ነዉ።

2. የስራ ግብር ይቀነስልን።

3. የዛሬ አራት አመት ወጥቶ የነበረው የዝቅተኛ ደሞዝ ማስተካከያ አዋጅ እስካሁን ደንብ ሳይወጣለት ቆይቷል። ይህም ትኩረት ይሰጠው፣ በ600 ብር እየኖረ ያለ ሰው አለ፣ ኢንደስትሪ ፓርኮች ውስጥ ደሞዝ በአማካኝ ከ800 - 1,200 ብር ነው።

4. የአሰሪና ሰራተኛ ኤጀንሲዎች ከደምበኛቸው ከሚቀበሉት ክፍያ ለሰራተኛው 80 ፐርሰንት ከፍለዉ ቀሪውን 20 ፐርሰንት እንዲወስዱ በሚል የወጣዉ መመሪያ አለመከበር በኤጀንሲ በተቀጠሩ  ሰራተኞች ላይ ተመልካች ያጣ የጉልበት ብዝበዛ እየተካሄደ ነው፣ መንግስት ትኩረት ያርግበት የሚል ነው።

እነዚህን ህገ-መንግስታዊ እና የመብት ጥያቄዎች ለማቅረብ ብንፈልግም ተከልክለናል። "

ምንጭ፦ ጋዜጠኛ ኤልያስ መሰረት
ምስል /ተ.ቁ. 2 - አዲስ ማለዳ ጋዜጣ/ 

@tikvahethiopia

" እየተከናወነ የሚገኘው የአማራን ሕዝብ ትጥቅ ማስፈታት አይደለም " - የአማራ ክልላዊ መንግሥት

የአማራ ክልላዊ መንግሥት ፤ ዛሬ በወቅታዊ ጉዳዮች ዙሪያ መግለጫ አውጥቷል።

የክልሉ መንግሥት ባወጣው መግለጫ፥ በክልሉ የተወሰኑ አካባቢዎች በተመረጠ ሁኔታ የህግ የበላይነትን የማረጋገጥ ስራ እየተሰራ ነው ብሏል።

" ይህ የህግ ማስከበር ስራ እየተሰራ ያለውም የሰላም አማራጭ ገፍተው መንግሥትን ደካማ ለማድረግ እና ለመገዳደር የሞከሩ ቡድኖች ላይ ነው " ብሏል።

የክልሉ መንግሥት ፤ የሕግ ማስከበር እርምጃው በጣም ውስን በሆነ የክልሉ አካባቢዎች የሚደረግ እንጂ ሁሉንም የክልሉ አካባቢዎች የሚመለከት አይደለም ሲል አስገንዝቧል።

የአማራ ክልል መንግሥት ፤ ጽንፈኛ ናቸው ያላቸው የማኅበራዊ ሚዲያ አንቂዎች እንደሚሉት የክልሉ ሕዝብ " በሕዝባዊ እምቢተኝነት ውስጥ እንዳልሆነ መታወቅ አለበት " ብሏል።

" እንደውም ሕዝባችን በሰላም ወጥቶ እንዳይገባ፤ ሠርቶ እንዳይበላ ለማድረግ የሚሞክሩትንና ከሰላማዊ አማራጮች ጋር የተፋቱትን ቡድኖች እንድናስታግስለት አበክሮ ሲጠይቅ የቆየ መሆኑን ራሱ ሕዝባችን የሚመሰክረው ሐቅ ነው " ሲል ክልሉ በመግለጫው ገልጿል።  

የአማራ ክልላዊ መንግሥት በዚህ መግለጫው ፤ እየተከናወነ የሚገኘው የሕግ ማስከበር ሥራ የአማራን ሕዝብ ትጥቅ ማስፈታት አይደለም ያለ ሲሆን ይህንንም ደጋግመን ለሕዝባችን አሳውቀናል ብሏል።

የሕግ ማስከበር ስራው የክልሉ፥ ሕዝብ ወደ ዘላቂ ሰላም በማስገባት የሕዝቡን የትግል ዓላማ ፣ ሰላም፣ ፍትሐዊ ልማት እና ተጠቃሚነትን እውን ለማድረግ ነው ሲል ገልጿል።

በዚህ ሥራ የትኛውም በክልሉ የሚኖር ሰላማዊ ዜጋ ሠርቶ የሚለወጥበት፤ በሰላም ወጥቶ የሚገባበት አውድ የሚፈጠርበት ነው ብሏል።

የክልሉ መንግሥት ዛሬም ሰላም የሁልጊዜም ብቸኛው አማራጩ እደሆነ አመልክቷል።

በሌላ በኩል ክልላዊ መንግሥቱ  አንዳንድ " ጽንፈኛ " ሲል የጠራቸውን የማኅበራዊ ሚዲያ ተጠቃሚዎች አስጠንቅቋል።

ከሕግ ማስከበር ዓላማ ውጭ የሆነ፤ የሕዝብን ኢኮኖሚያዊ፣ ፖለቲካዊ እና ማኅበራዊ ጥቅሞች የሚያሳጣ እና የሕዝቡን መሠረታዊ ችግሮች የሚፈቱበትን ስልቶች የማይደግፍ እንዲሁም ሀገርን ወደ ትርምስ የሚመራ የሁከት እና የብጥብጥ ቅስቀሳ ሁሉ ፈጽሞ ስህተት እና ክልሉን እና ሕዝቡን ዋጋ የሚያስከፍል በተጨማሪ ለተራዘመ ጊዜ የሚያጎሳቁል መሆኑን መረዳት ከዚህ ድርጊት እንዲቆጠቡ ሲል አስጠንቅቋል።

(ሙሉ መግለጫው ከላይ ተያይዟል)

@tikvahethiopia