በኮንሶ ዞን የሰገን ዙሪያ ወረዳ ገቢዎች ፅ/ቤት ኃላፊ ተገደሉ።

በኮንሶ ዞን የሰገን ዙሪያ ወረዳ ገቢዎች ፅ/ ቤት ኃላፊ የነበሩት አቶ ገረሙ ገለቦ ትላንት መጋቢት 17/2014 ዓ/ም ሰገን ከተማ ላይ ከምሽቱ 3:20 አካባቢ ከሌሎች ጓደኞቻቸው ጋር እራት ለመብላት በተቀመጡበት ሆቴል ውስጥ በጥይት ተመተው ህይወታቸው ማለፉን የቲክቫህ ቤተሰቦች ገልጸውልናል።

በዛሬው ዕለት የወረዳው ሠላም እና ጸጥታ አስተዳደር ጽ/ቤት ባወጣው የሀዘን መግለጫ " አቶ ገረሙ ጽ/ቤቱን መምራት ከጀመሩበት ጊዜ አንስቶ ከፍተኛ ስራ በመስራት የወረዳው የገቢ መጠን እንድሻሻል አድርገዋል። በወረዳችን ውስጥ የሚገኙ የነጋዴው ማህበረሰብ የተቀላጠፈ አገልግሎት እንዲያገኝ ብሎም የሚጠበቅበትን ግብር እንዲከፍል ጠንካራ ተግባራትን በማከናወን ላይ ነበሩ " ብሏል።

ጸ/ቤቱ ጥቃቱን የፈጸሙት " ቅጥረኛ ሽፍቶች " ናቸው ሲል ገልጿል።

የጥቃቱ አድራሾች እና በጥቃቱ ላይ እጃቸው ያለበት እያንዳንዱ ግለሰብ አድኖ የመያዝ እና ለህግ የማቅረብ ስራ ከሚመለከታቸው አካላት ጋር በጥምረት እየሰራ እንደሚገኝም አሳውቋል።

'' የወንጀሉ አፈፃፀም ከመሠረቱ ጀምሮ በደንብ ተጣርቶ የወንጀሉ ፈፃሚና ተባባሪዎች ለህዝብ እናሳውቃለን " ያለው ፅ/ቤቱ መላው የወረዳው ህዝብ በተፈጠረው ችግር ሳይደናገጥ የዕለት ተእለት እንቅስቃሴውን እንዲቀጥል አሳስቧል።

በሌላ በኩል ፤ በኮንሶ ዞን ኮልሜ ክላስተር ከኧሌ ልዩ ወረዳ አዋሳኝ ቦታዎች ግጭት ማገርሸቱን የቲክቫህ ቤተሰቦች የጠቆሙ ሲሆን የሰው ህይወት መጥፋቱን እና እስከ ትላንትና ድረስ በርካታ ቤቶች መቃጠላቸውን ገልፀዋል።

(ተጨማሪ መረጃዎችን ነገ የምንልክላችሁ ይሆናል)

@tikvahethiopia

#Afar

የዓለም አቀፍ ቀይ መስቀል ኮሚቴ (ICRC) ከኢትዮጵያ ቀይ መስቀል ማህበር ጋር በመሆን ከትግራይ ክልል ተፈናቅለው በአፋር ክልል ሰመራ ከተማ ላይ ለተጠለሉ 9,000 ሰዎች የምግብ ድጋፍ አድርጓል፡፡

ድጋፉ የስንዴ ዱቄት ፣ አተር ክክ ፣ የማዕድ ጨው እና የምግብ ዘይትን ያካተተ ነው፡፡

በሌላ በኩል ፤ ዓለም አቀፍ ቀይ መስቀል ኮሚቴ በአፋር ክልል ከ500,000 በላይ እንስሳትን ከአደገኛ በሽታዎች ለመከላከል የሚረዳ የክትባት ዘመቻ እያከናወነ ይገኛል፡፡

ይህም በግጭት የተጎዱ በክልሉ የሚገኙ አርብቶ አደር ማህበረሰቦች መተዳደሪያ ዘላቂነትን ለማረጋገጥ ይረዳል ተብሏል።

#ICRC

@tikvahethiopia

" የመፈናቀል ኑሮ በጣም አስቸግሮናል " - በወለህ መጠለያ ካምፕ የሚገኙ ተፈናቃዮች

• ተፈናቃይ አቶ ግርማይ ወልደሰማዕት እና አቶ ብርሃኑ ቢሰጠኝ ፦

" በቂ የሆነ ምግብ አላገኘንም የምንለብሰው ልብስና ለምኝታ የሚሆን ነገርም አልተሰጠንም በመሆኑም ኑሮው በጣም አስቸጋሪ ሁኖብናል "

• ወ/ሮ እንኳየሁሺ በሬ እና ወ/ሮ ታዙ ግርማይ ፦

" ጨውና በርበሬ፣ የወጥ እህል እና የምግብ ማብሰያ እቃ አልተሰጠንም ከአካባቢው ሰው አንዳንድ የማብሰያ እቃዎችን ለምነን ብናገኝም ይኸው እንደምታዩት ፀሀይ ላይ ሁነን ነው የምናበስለውና መንግስት ይህንን አይቶ ቢያስተካክልልን ጥሩ ነው "

የወለህ መጠለያ ካምፕ አስተባባሪ አቶ ወርቁ ስመኝ ፤ በአሁኑ ሰዓት በወለህ መጠለያ ካምፕ 1 ሺህ 823 ተፈናቃዮች እንደሚገኙ ገልፀዋል።

" ከተፈናቃዮቹ ቅሬታ ሊኖር ይችላል በእኛ በኩል ግን በተቻለን መጠን የሚመጣውን ማንኛውንም ነገር ትንሽም ቢሆን እንሰጣቸዋለን " ያሉት አቶ ወርቁ " እነሱ እንዳሉት ግን የሚያበስሉት ፀሀይ ላይ ነው ይህንን ለማስተካከል ደግሞ የማብሰያ ቤት እያሰራን እናገኛለን " ብለዋል።

መረጃው የዋግኽምራ ኮሚኒኬሽን ነው።

@tikvahethiopia

#Metekel

በካማሺ ዞን የተካሄደውን ባህላዊ እርቅ በመተከል ዞን ለመድገም ጥረት እየተደረገ መሆኑ ተሰምቷል።

ይህ የተሰማው በአሁን ሰዓት እየተካሄደ በሚገኘው የቤኒሻንጉል ጉሙዝ ክልል ምክር ቤት 13ኛ መደበኛ ጉባዔ ላይ ነው።

የክልሉ ፕሬዜዳንት አቶ አሻድሊ ሀሰን ፤ በካማሺ ዞን የተካሄደውን ባህላዊ እርቅ በመተከል ዞን ለመድገም በሚደረገው ጥረት ሁሉም የበኩሉን ትብብር እንዲያደርግ ጥሪ አቅርበዋል።

አቶ አሻድሊ ፤ የግማሽ በጀት ዓመት አፈጻጸም ለምክር ቤቱ ባቀረቡበት ወቅት በካማሺ ዞን የተፈጠረውን የጸጥታ ችግር በዘላቂነት ለመፍታት የአካባቢውን ህብረተሰብ ባህል መሰረት ያደረገ እርቅ መፈጸሙን ተናግረዋል፡፡

በዚህም በዞኑ የተፈጠረውን የጸጥታ ችግር ለመፍታት የተሠራው ሥራ በታጣቂ ቡድኑ እና በመንግስት መካከል ችግሮችን መፍታት የሚያስችል ድርድር ከማድረግ ባሻገር የአካባቢውን ባህል መሠረት ያደረገ እርቅ ተከናውኗል ብለዋል፡፡

በተካሄደው እርቅ አመርቂ ውጤት መመዝገቡን የተናገሩት አቶ አሻድሊ በጫካ ይኖሩ የነበሩ የህብረተሰብ ክፍሎች ወደአካባቢያቸው በመግባት ላይ መሆናቸውን ጠቁመዋል፡፡

ይህንንም ስኬት በመተከል ዞን እንዲደገም ለማድረግ የሁሉም ትብብር አስፈላጊ መሆኑን አስገንዝበዋል።

የአካባቢው ማኅበረሰብ በሀሰት ፕሮፓጋንዳ ሳይወናበድ ሠላም በማስፈኑ ሂደት ከክልሉ መንግስት ጎን እንዲሠለፍ ጥሪ ማቅረባቸውን ከክልሉ ኮሚኒኬሽን ያገኘነው መረጀ ያመለክታል።

@tikvahethiopia

#OLF

የኢትዮጵያ ብሔራዊ ምርጫ ቦርድ ኦነግን በተመለከተ ውሳኔ አስተላለፈ።

ምርጫ ቦርድ በኦነግ አመራሮች መካከል የተፈጠረውን አለመግባባት አስመልክቶ የቀረቡለትን አቤቱታዎች በማየት ውሳኔ መስጠቱን አስታውሷል።

በውሳኔው ቅር የተሰኙት የፓርቲው ምክትል ሊቀመንበር እነ አራርሶ ቢቂላ ጉዳዮን ወደፍርድ ቤት በመውሰዳቸው ክርክር ሲደረግበት ቆይቶ የሰበር ሰሚ ችሎት የሁለቱንም ወገኖች የመሰማት መብት በመጠበቅ አስተዳደራዊ ውሳኔ እንዲሰጥበት ወደቦርዱ መመለሱ ተገልጿል።

በዚህም መሰረት ምርጫ ቦርድ የተለያዩ ምርመራዎችን በማድረግ የፍርድ ቤቱን ትእዛዝ ተከትሎ ውሳኔ አሳልፏል።

ፓርቲው ጠቅላላ ጉባኤ መጥራት እንደሚገባው ቦርዱ የገለፀ ሲሆን ፓርቲው እስካሁን ካለበት የአመራር ችግር አንጻር፣ ጉባኤ ከመደረጉ በፊት የጉባኤው አጠራር ደንብ እና የምርጫ ህጉን የተከተለ መሆኑን ማረጋገጥ ማስፈለጉን አስታውቋል።

በዚህም የጉባኤ አጠራር ዝርዝር ዕቅድ፣ የጉባኤውን አጠራር በተመለከተ በተገቢው የፓርቲው አካል የተሰጠ ውሳኔ እና የውሳኔው ቃለጉባኤዎች እስከ ሚያዚያ 16 ቀን 2014 ዓ.ም እንዲቀርብ ወስኗል።

(የቦርዱ ውሳኔ ከላይ ተያይዟል)

@tikvahethiopia

#OFC

የኦሮሞ ፊዴራላዊ ኮንግረስ (ኦፌኮ) ሁለተኛው መደበኛ ጉባዔ ተሳታፊዎች ባለ 5 ነጥብ የአቋም መግለጫ አውጥተዋል።

በዚህ መግለጫ ላይ ፤ ባለፉት 3 ዓመታት በሀገራችን የተከሰቱ ለአያሌ ንፁሃን ህይወት መቀጠፍ፣ ለከፍተኛ ንብረት ውድመትና ፣ ለዜጎች ክብር ውርደት የዳረጉ የርስ በርስ ጦርነቶች ማዘናቸውን ገልፀዋል።

ከጥቂት ወራት ወዲህ ለእርስ በእርስ ጦርነቶቹ ሰላማዊ መፍትሄ ለመፈለግ መንግስት ያደረገውን የአካሄድ ለውጥ በበጎ እንመለከታለን ብለዋል።

በቅርቡ የፌዴራሉ እና የትግራይ ክልላዊ መንግስት ጦርነት ለማቆም ያሳለፉት ውሳኔ በፍጥነት ወደ ተግባራዊ እንቅስቃሴ እንዲለወጥ ፣ ያልተገደበ እርዳታ ለህዝቡ እንዲደርስ ፣ ግጭትም መልሶ እንዳይቀሰቀስ የሚደረጉ ስራዎች እንዲሰሩ በአፋጣኝ ስምምነት ላይ እንዲደርሱ ጥሪ አቅርበዋል።

በሌላ በኩል ፤ በሰሜን የሀገራችን ክፍል ያለውን ጦርነት ለማስታቆም እየተደረጉ ያሉ ጥረቶች ቢደነቁም ባለፉት 3 ዓመታት ኦሮሚያን እያመሰ ያለው የእርስ በእርስ ጦርነት የሚገባውን ትኩረት ያለማግኘቱ እንዳሳዘናቸው ጉባኤተኞች ገልፀዋል።

ስለዚህም የፌዴራል መንግስት የሰላም እጁን ለትግራይ ኬ እንደዘረጋ ሁሉ ከኦሮሞ ነፃነት ሰራዊት ጋር የገባበትን ጦርነት በሰላማዊ መንገድ ለመፍታት ቁርጠኛ አቋም ላይ ሳይዘገይ እንዲደርስ አሳስበዋል።

ጉባኤተኞቹ በመግለጫቸው ፤ ሰላማዊ ኦሮሚያ ሳትኖር አስተማማኝ ሰላም እና መረጋጋት ያላትን ኢትዮጵያ ማሰብ አይቻልም ብለዋል።

(ሙሉ መግለጫቸው ከላይ ተያይዟል)

@tikvahethiopia