"...ጠ/ሚኒስትሩ በተለያየ ግዜ የተናገሩትን በመቁረጥና በመቀጠል የተፈጠረ ሀሰተኛ መረጃ ነው" - የጠ/ሚ ፅ/ቤት

ዛሬ ምሽት መቀመጫነታቸውን ከኢትዮጵያ ውጭ ያደረጉ የማህበራዊ ሚዲያዎች ጠ/ሚ ዐቢይ በብልፅግና ፓርቲ ስብሰባ ላይ የተነናገሩት ንግግር ሾልኮ ወጣ በሚል አንድ የድምፅ ቅጂ አሰራጭተዋል።

እነዚህ ውጭ ሀገር ያሉ የማህበራዊ ሚዲያዎች ያሰራጩት ምስጥራዊ ነው የተባለው የጠ/ሚ ዐቢይ የድምፅ ቅጂ ፥ "ለ10 ዓመት ማንም ሰው መንግስት መሆን አይችልም ፣ እሞታለሁ እንጂ ስልጣን አልሰጥም ፣ ብዙ እርምጃዎች ይወሰዳሉ ለዚህ የተዘጋጀው ግብረኃይል ስራውን ጀምሯል ፣ ስለዚህም ከፍተኛ የሆነ ፍጅት ደም መፋሰስ ይፈጠራል ፣ ከወዲሁ እርግጠኛ ሆኜ የምነግራችሁ ምርጫውን አሸንፈናል" የሚሉ እና ሌሎችም ንግግሮች ያሉበት ነው።

ከዚሁ የድምፅ ፋይል ጋር በተያያዘ የጠቅላይ ሚኒስትሩ ቢሮ አስተያየት ሰጥቶበታል።

ፅ/ቤቱ ባለፈው ሳምንት በ "ብልጽግና ፓርቲ" ስብሰባ ወቅት በጠቅላይ ሚኒስትሩ የተባለ በማስመሰል የተለቀቀው የድምፅ ፋይል #በውሸት የተቀነባበረና ጠ/ሚኒስትሩ በተለያያየ ግዜ የተናገሩትን በመቁረጥ እና በመቀጠል የተፈጠረ ሀሰተኛ መረጃ መሆኑን አረጋግጣለሁ ብሏል።

ፅ/ቤቱ አክሎም ፥ በዚህ የሀሰት መረጃ ዘመን እና ምርጫው እየተቃረበ ባለበት ወቅት ዜጎች አለመግባባትን ለመፍጠር ያተኮሩ እንደነዚህ ዓይነቶቹ የማሳሳት የመረጃ ዘመቻ ዓይነቶች እንዳይታለል አሳስቧል።

ብልጽግና ፓርቲ ባወጣው መግለጫ፥ ሀሰተኛ መረጃዎች በማሰራጨት የሚታወቁ ሚዲያዎች ሾልኮ የወጣ ብለው የሚያስተላልፉት ድምጽ ሀሰት የሆነ ፣ ከስብሰባው የተወሰደ አንድም ቃል የሌለው፣ የፓርቲው ፕሬዚዳንት በተለያዩ ጊዜያት ካደረጓቸው ንግግሮች የተወሰዱ ቃላትን በመገጣጠም የተቀነባበረ ድምፅ ነው ብሏል።

@tikvahethiopia

#CISP

ትግራይ ክልል ውስጥ ህይወታቸው ያለፈ የእርዳታ ሰራተኞች ቁጥር እየጨመረ ነው ተብሏል።

ዓለም አቀፍ ኮሚቴ ለህዝቦች ልማት የሚባል የጣልያን የእርዳታ ድርጅት አንድ ሰራተኛው ቅዳሜ ዕለት ዓዲግራት ከተማ ላይ በተባራሪ ጥይት መገደሉን AFPን ዋቢ አድርጎ ዶቼ ቨለ ዘግቧል።

የሞቱት የድርጅቱ የዓዲግራት ቢሮ ኃላፊ የሆኑት ነጋሲ ኪዳኔ ሲሆኑ አርብ ምሽት ድንገት በተባራሪ ጥይት ተመተው ቅዳሜ በህክምና ተቋም ውስጥ ህይወታቸው አልፏል።

ለግድያው ተጠያቂ አካል ማን እንደሆነ ድርጅቱ ያለው ነገር የለም።

የተባበሩት መንግስታት ድርጅት የሰብዓዊ እርዳታዎች አስተባባሪ ኃላፊ ማርክ ሎውኮክ ካለፈው ሳምንት ወዲህ ትግራይ ውስጥ የተገደሉ የእርዳታ ሰራተኞች 8 መድረሳቸውን አመልክቷል።

@tikvahethiopia

የUNICEF ሪፖርት #ትግራይ :

በትግራይ ግጭት ከተቀሰቀሰ 7 ወራት ገደማ እየተጠጋ ቢመጣም አሁንም በክልሉ በህፃናት ላይ የሚፈፀሙ የመብት ጥሰቶች የመቀነስ አዝማሚያ እንዳላሳዩ UNICEF አሳወቀ።

እስካሁን ድረስ ከ6,000 በላይ ከቤተሰቦቻቸው የተለያዩ ህፃናት ለደህንነት ጥበቃ እና ለእርዳታ መመዝገባቸውን ገልጿል።

UNICEF በጸጥታ ችግር ወይም በግጭቱ ተሳታፊ በሆኑ ወገኖች በተጣሉ የመዳረሻ ገደቦች ምክንያት ሊደርስባቸው ባልቻለባቸው አካባቢዎች ድጋፍ የሚፈልጉ ብዙ ልጆች ሊኖሩ እንደሚችሉ ስጋቱን አሳውቋል።

የልጆችን ቤተሰብ ማፈላለግ፣ እንደገና መገናኘት በቴሌኮሙኒኬሽን ውስንነት እንዲሁም በማኅበራዊ ጉዳይ ሠራተኞች ውስንነት ምክንያት እንቅፋቶች መኖሩን አስረድቷል።

አሁን ድረስ ሴቶችና ልጃገረዶች ለአፀያፊ እና አስደንጋጭ የፆታ ጥቃት እየተዳረጉ ነው የሚለው UNICEF በትግራይ ግጭት ከጀመረበት ጊዜ አንስቶ 540 የሚደርሱ በህይወት የተረፉ የጥቃት ሰለባዎች በUNICEF ፕሮግራም በኩል እርዳታ እንደተደረገላቸው አሳውቋል።

እንደ UNICEF ሪፖርት በትግራይ ክልል ባለው ግጭት በትንሹ ከ1.6 ሚሊዮን በላይ ሰዎች የተፈናቀሉ ሲሆን ከ720,000 በላይ የሚሆኑት ህፃናት ናቸው።

የUNICEF ሪፖርትን በዚህ ያግኙ : https://www.unicef.org/press-releases/children-northern-ethiopia-dire-need-protection-and-assistance

@tikvahethiopia

አቶ ታገሰ ጫፎ ከሴናተር ጀምስ ኢንሆፎ ጋር ተወያዩ።

ትላንት ኢትዮጵያ (አ/አ) የገቡት ሴናተር ጀምስ ኢንሆፎ ከኢፌዴሪ የሕዝብ ተወካዮች ም/ቤት አፈ ጉባኤ አቶ ታገሠ ጫፎ ጋር ተወያይተዋል።

አፈ ጉባኤ አቶ ታገሠ ጫፎና የአሜሪካ ኮንግረሰ ሴናተር ጀምስ ኢንሆፎ በቀጠናዊና ሃገራዊ ጉዳዮች ላይ ውይይት ማድረጋቸው ተገልጿል።

በውይይቱ አፈ ጉባኤ አቶ ታገሰ ፦
- በህዳሴ ግድብ ፣
- በህግ ማስከበር ፣
- በሰብአዊ እርዳታ ተደራሽነት፣
- ከሱዳን ድንበር ማስከበር ሥራ ጋር ተያይዞ ያለበት ደረጃና እየተከናወኑ ያሉትን ተግባራት ላይ ማብራሪያ ሰጥተዋል፡፡

በተጨማሪ ኢትዮጵያ ሁለተኛውን ዙር የህዳሴ ግድብ የሙሌት ሥራ ለማከናወን በዝግጅት ላይ መሆኗን አብራርተዋል።

ሙሌቱ የተፋሰሱን ሃገራት ጥቅም በማይነካ መልኩ እንደሚፈፀምም ገልፀዋል፡፡

ከ "ህግ ማስከበር" ጋር ተያይዞ የተከሰቱ ችግሮችን ደረጃ በደረጃ ለመፍታት እየተሠራ ነው ብለዋል። የሰብዓዊ እርዳታ ለሚያስፈልጋቸው ወገኖች ድጋፍ በመደረግ ላይ ነው ብለዋቸዋል።

ኢትዮጵያ ከሱዳን ድንበር ጋር ተያይዞ በየጊዜው የሚነሱ ግጭቶችን በሰላማዊ መንገድ ለመፍታት ኢትዮጵያ ዝግጁ መሆኗን ለሴናተሩ ተናግረዋል፡፡

ሴናተር ጀምስ ኢንሆፍ ምን አሉ ?

በተደረገላቸው አቀባበል ደስተኛ መሆናቸውን ገልፀዋል።

የተሰጠው ማብራሪያ በኢትዮጵያ ውሥጥ እየተደረገ ያለውን ሁለንተናዊ እንቅስቃሴ ለመረዳት እንዳስቻላቸው ተናግረዋል።

ኢትዮጵያ በምታከናውናቸው ተግባራት ሁሉ ድጋፍ ለማድረግ ቁርጠኛ መሆናቸውን ሴናተር ጀምስ አረጋግጠዋል፡፡ #FDRE_HoPR

@tikvahethiopia

#Tigray

የተባበሩት መንግስታት ድርጅት (UN) በኢትዮጵያ ትግራይ ክልል ከ90 በመቶ በላይ ህዝብ አስቸኳይ የሆነ የምግብ እርዳታ ይፈልጋል ሲል አሳወቀ።

የተባበሩት መንግስታት የዓለም የምግብ ፕሮግራም (WFP) በመጋቢት ወር በትግራይ ክልል ሰሜን ምዕራብ እና ደቡብ ዞኖች ስርጭት ከጀመረ ጀምሮ ለአንድ ሚሊዮን ሰዎች የአስቸኳይ የምግብ እርዳታ መስጠቱን ገልጿል።

በጥቅምት ወር ላይ በተነሳው ግጭት ሳቢያ በአጠቃላይ 5.2 ሚሊዮን ህዝብ (91 % የትግራይ ህዝብ ማለት ነው) አስቸኳይ የምግብ እርዳታ እንደሚያስፈልገው WFP አሳውቋል።

ለአስቸኳይ ጊዜ የምግብ እርዳታ ምላሽ የ203 ሚሊዮን የአሜሪካ ዶላር ድጋፍ ያስፈልጋል ብሏል።

የWFP ቃል አቃባይ ቶምሶን ፒሪ ፥ "በክልሉ ረሃብ ወደ ከፍተኛ ደረጃ እንዳይሸጋገር ያሳስበናል" ሲሉ ተናግረዋል።

በትግራይ እስከ 2021 መጨረሻ በረሃብ ምክንያት የሰዎች ሕይወት እንዳይጠፋ እና የተጀመረውን የምግብ ድጋፍ አጠናክሮ ለማድረስ የተጠየቀው ገንዘብ በአስቸኳይ ሊቀርብ እንደሚገባ WFP አሳስቧል።

የተመድ የዓለም ምግብ ፕሮግራም ሪፖርት : www.wfp.org/news/wfp-reaches-over-1-million-people-emergency-food-assistance-tigray

@tikvahethiopia

የጠፋች ልጃቸውን በሕይወት ለማግኘት ተስፋ ያደረጉት ቤተሰቦች አስከሬኗን ተረክበዋል !

የ16 ዓመቷ ተማሪ ፌቨን ዳዊት ከጠፋች ከ4 ቀናት በሗላ አስክሬኗ በሀዋሳ ሀይቅ ተገኘ።

ፌቨንና ጓደኛዋ ትዕግስት ዘወትር እንደሚያደርጉት ሀዋሳ ሀይቅ ዳርቻ እየተዝናኑ ነበር በድንገት 2 ወጣቶች ካልተቀላቀልናችሁ ብለው አብረዋቸው የሆኑት።

ጥቂት ደቂቃዎችን አብረዋቸው ከቆዩ በሗላ በጀልባ ሀይቁ ላይ እንዝናና የሚል ጥያቄን ወጣቶቹ ያነሳሉ። 2ቱ ታዳጊ ሴቶች አለመፈለጋቸውን ቢገልፁም የወጣቶቹ ጉትጎታ የሚቻል ስላልነበር እሺ ለማለት ተገደዱ።

ጏደኛዋ ትዕግስት እንደምትለው የታዳጊ ሴቶቹ ቀጣይ ፈተና የነበረው የጀልባ ጉዞው ለየብቻ ነው የሚል ትዛዝ አዘል መመሪያ ከወንዶቹ ሲመጣ ነው።

ብዙ አታስቡ ተከታትለን ስለምንሄድ የሚል የማሳመኛ ቃል ሲደጋገም እሺታን መርጠው ጉዞ ጀመሩ።

አላማቸው 2ቱን ታዳጊ ሴቶች መነጠል እንጂ መዝናናት ስላልነበር አንደኛው ወጣት ፌቨንን ይዞ ጉዞ ይጀምራል..ጥቂት እንደተጓዙ ፌቨን የነ ትዕግስትን ጀልባ መመልከት ስላልቻለች ከወዴት ናችሁ የሚል ተደጋጋሚ የስልክ ጥሪ ለጓደኛዋ ታደርጋለች።

ከቆይታ በሗላ የት ናችሁ የሚል ጥያቄ ሳይሆን ለጓደኛዋ የድረሽልኝ መማፀኛ መልዕክት መላክ ጀመረች።

አሳዛኙ እውነታ ግን ፌቨን ከሀይቁ ሰምጣለች። ወጣቶቹ ከአካባቢው ተሰውረዋል።

ከ4 አስጨናቂ ቀናት በኋላ ቤተሰብ የ16 አመት ልጃቸውን አስክሬን ተረክበዋል።

የፌቨን አስክሬን ሲገኝ እጇ መጠምዘዙን ዓይኗ በቦክስ የመመታት ምልክት እንደነበረው በቦታው ቤተሰቦቿ ይናገራሉ።

2ቱን ወጣቶች ፖሊስ በቁጥጥር ስር አውሎ ምርመራ እያደረገ ይገኛል።

ህይወትን አይታ ያልጠገበችው የ16 ዓመቷ ፌቨን ቤተሰቦች ፈጣሪ እውነቱን ያሳየን የፍትህ ያለህ ይላሉ!

(#በጋዜጠኛ_አዳነ_አረጋ)

@tikvahethiopia

#AddisAbaba

በአዲስ አበባ ጎዳና ተዳዳሪ በመምስል ልዩ ልዩ ወንጀሎችን በመፈፀም ለፀጥታ ስጋት የሆኑ 1 ሺ የሚጠጉ ግለሰቦች በቁጥጥር ስር ዋሉ።

ፖሊስ የምርመራ ስራ እየሰራ ይገኛል።

ተጠርጣሪዎቹ ከህዝብ በደረሰ መረጃ መነሻ በማድረግ በ7 ክፍለ ከተሞች በተመረጡ 20 ቦታዎች ላይ ግንቦት 22 ቀን 2013 በተከናወነ የኦፕሬሽ ስራ የተያዙ ናቸው።

አጠቃላይ ቋሚ አድራሻ የሌላቸውና በዋና ዋና አደባባዮች እና በምሽት በሰዋራ ቦታዎች የተለያዩ ወንጀሎችን ሲፈፅሙ የነበሩ 999 ግለሰቦች ናቸው የተያዙት።

በቁጥጥር ስር ከዋሉት መካከል ፦

- አብዛኞቹ ማስቲሽና ቤንዚን በመጠቀም እራሳቸውን በማደንዘዝ የትራፊክ እንቅስቃሴዎችን ሲያውኩ እነደነበሩ

- የትራፊክ መብራት ካስቆመው ተሽከርካሪ ላይ ስፖኪዮ ገንጥለው እንደሚወስዱ፣

- ከአሽከርካሪ ወይም ከተሳፋሪ ላይ ሞባይል ስልክ፣ የአንገት ሃብል፣ ቦርሳ እና ልዩ ልዩ ንብረቶችን ቀምተው እንደሚሰወሩ

- በተለይ ሴት አሽከርካሪዎች አደጋ ሳያደረሱባቸው አደጋ እንዳደረሱባቸው በማስመሰልና በማዋከብ ገንዘብ እንደሚቀበሉ፣

- የትራፊክ አደጋ ሲያጋጥም ልዩ ልዩ ስልቶችን በመጠቀም ንብረቶችን እንደሚሰርቁ በጥቅሉ ትኩረታቸውን በዋና ዋና አደባባይ የትራፊክ መብራት በያዘው ተሽከርካሪ ላይ አድርገው ወንጀል ሲፈፅሙ እንደነበር ተረጋጧል።

በሌላ በኩል ግለሰቦቹ በምሽት የቅሚያ ወንጀል ሲፈፅሙ እንደነበር የተረጋገጠ ሲሆን በተለይ ደግሞ የውጪ ሀገር ዜጎችንና የዲፕሎማቲክ ማህበረሰቡን በማዋከብና በማስጨነቅ በከተማዋ መልካም ገፅታ ላይ አሉታዊ ተፅእኖ ሲፈጥሩ ነበር።

የተሰወኑት ግለሰቦች ደግሞ የጎዳና ተዳዳሪ በመምስል የሽብር ተግባር ለማስፈፀም ተልዕኮ ተቀብለው ሲንቀሳቀሱ መገኘታቸውን የአ/አ ፖሊስ በይፋዊ ፌስቡክ ገፁ አሳውቋል።

@tikvahethiopia

#Update

ከቀናት በፊት በዋግኽምራና አካባቢው ላይ የኤሌክትሪክ አገልግሎት መቋረጡን የሚገልፅ መረጃ ተለዋውጠን ነበር።

አካባቢው አሁንም ድረስ የኤሌክትሪክ ኃይል እንዳላገኘ ተሰምቷል።

በዋግ ኽምራ በሚገኙ አብዛኛዎቹ አካባቢዎች የተቋረጠው ኤሌክትሪክ አገልግሎት መልሶ ለማገናኘት ጥረት እየተደረገ መሆኑን የሰሜን ምስራቅ ሪጅን ትራንስሚሽንና ሰብስቴሽን ኦፕሬሽንና ጥገና ቢሮ አስታውቋል።

ቢሮው በአካባቢው ካለፈው ቅዳሜ ጀምሮ ኤሌክትሪክ የተቋረጠው በ3 የኃይል ተሸካሚ ምሰሶዎች ላይ ስርቆት በመፈፀሙና በመውደቃቸው ነው ብሏል።

ወደስፍራው ለጥገና የተንቀሳቀሰው ቡድን የወደቁትን ምሰሶዎች መልሶ ለመትከል ከእሁድ ጀምሮ እንቅስቃሴ መጀመሩ ተገልጿል።

ከአንድ ወር በፊት ከአላማጣ እስከ ሰቆጣ በሚገኙት 269 ምሰሶዎች ላይ የፍተሻ ስራ መከናወን መጀመሩን የተገለፀ ሲሆን በስምንት የብረት ምሰሶዎች ላይ የስርቆት ሙከራ መፈፀሙን በማረጋገጥ ምሰሶዎቹ ከመውደቃቸውና ኤሌክትሪክ ከመቋረጡ በፊት መስተካከሉ ተነግሯል።

በአሁኑ የተፈፀመው ስርቆት በመስመሩ ውስጥ በሚገኙትና የፍተሻ ስራ ባልተካሄደባቸው 47 ምሰሶዎች ውስጥ በሶስቱ ነው።

በምሰሶዎቹ መውደቅ ሰቆጣን ጨምሮ አምደወርቅ፣ ዳህና ፣ በአበርገለ፣ በሰሀላ፣በዝቋላና በአካባቢያቸው ኤሌክትሪክ ተቋርጧል።

የዋግ ኽምራ አብዛኛዎቹ አካባቢዎች ኃይል የሚያገኙት ከአላማጣ ባለ 66 ኪሎቮልት ማከፋፈያ ጣቢያ ከሚወጣ መስመር ነው።

#EthiopianElectricPower

@tikvahethiopia