#HailemariamDessalegn

የቀድሞ የኢትዮጵያ ጠቅላይ ሚኒስትር አቶ ኃይለማርያም ደሳለኝ " የታንዛኒያ ፕሬዜዳንታዊ የምግብ እና ግብርና/እርሻ አቅርቦት ምክር ቤት " አባል ተደርገው መሾማቸውን ገለፁ።

አቶ ኃይለማርያም የምክር ቤቱ አባል ተደርገው የተሾሙት በታንዛኒያ ፕሬዜዳንት ሳሚያ ሱሉሁ ነው።

አቶ ኃይለማርያም ደሳለኝ በተረጋገጠ የማህበራዊ ትስስር ገፃቸው የምክር ቤቱ አባል ተደርገው በፕሬዜዳንት ሳሚያ ሱሉሁ በመሾማቸው ክብር እንደተሰማቸው ገልጸዋል።

ታንዛኒያ የግብርና ውጤቶቿን / ምርቷን ለገበያ ለማቅረብ እንዲሁም አነስተኛ እርሻን ለመለወጥ ያላት አቅም በጣም ትልቅ መሆኑን አቶ ኃይለማርያም ደሳለኝ  አመልክተዋል።

#ምክርቤቱ : ከጥር 25 እስከ 27 ቀን 2023 በሴኔጋል ዳካር የአፍሪካ የምግብ ምርትን አስመልክቶ በተካሄደው የአፍሪካ መሪዎች ጉባኤ (የዳካር 2ኛው የምግብ ጉባዔ - አፍሪካን መመገብ ፣ የምግብ ሉዓላዊነት እና ፅናት) ላይ የተላለፈውን የውሳኔ ሃሳብ ማለትም  እያንዳንዱ ሀገር ግብርናን ለማስፋፋት እና የምግብ አቅርቦትን ለማሳደግ የስትራቴጂዎችን አፈፃፀም የሚመራ ም/ቤት ለማቋቋም በተወሰነ ውሳኔ መሰረት ነው ይህንን ተግባራዊ ለማድረግ ፕሬዜዳንቷ ምክር ቤቱን ያቋቋሙት።

አቶ ኃይለማርያም ደሳለኝ በገዛ ፍቃዳቸው ከኢትዮጵያ ጠቅላይ ሚኒስትርነት ስልጣናቸውን ከለቀቁ በኃላ ከባለቤታቸው የቀድሞ ቀዳማዊት እመቤት ሮማን ተስፋዬ ጋር በመሰረቱት " ኃለማርያም እና ሮማን ፋውንዴሽን " እንዲሁም አፍሪካ ውስጥ በተለያዩ ተቋማት በመሪነት እየሰሩ ይገኛሉ።

@tikvahethiopia

#አየር_ኃይል

በሀገር መከላከያ ሚኒስቴር የኢፌዴሪ አየር ኃይል በአውሮፕላን ቴክኒሻንነት ሙያ ፍላጎት ያላቸውን ወጣቶች ለማሰልጠን ዛሬ ይፋዊ ጥሪ አቅርቧል።

አየር ኃይል ፤ የአውሮፕላን ቴኪኒሻንነትን ሙያ መሰልጠን የሚፈልጉ ወጣቶች የወጡትን መስፈርቶች ሊያሟሉ እንደሚገባ አመልክቷል።

ከመስፈርቶቹ አንዱ የሆነው " የትምህርትና ሌሎች መመዘኛ " ሲሆን በዚህም በአየር ኃይል በአውሮፕላን ቴክኒሻንነት ለመሰልጠን ፦

- የተፈጥሮ ሳይንስ ተማሪ የሆኑ በሂሳብ ፣ ፊዚክስ ፣ እንግሊዘኛ ትምህርቶች አማካኝ ውጤህ ከ50% እና ከዚያ በላይ ያላቸው ሊሆኑ ይገባል።

- በ2013 ዓ/ም ሀገር አቀፍ የ12ኛ ክፍል ፈተና አጠቃላይ ውጤት 300 እና ከዚያ በላይ ያላቸው መሆን አለባቸው።

- በ2014 ዓ/ም ሀገር አቀፍ የ12ኛ ክፍል ፈተና ደግሞ አጠቃላይ ውጤት 250 እና ከዚያ በላይ ማስመዝገብ አለባቸው።

አየር ኃይል የሚያመለክቱ ወጣቶች የ8ኛ ክፍል መልቀቂያ ፈተና የወሰዱበትን ኦርጂናል ሰርተፊኬት እንዲሁም የኮሌጅ / ዩኒቨርሲቲ ተማሪ ከሆኑ ከሚማሩበት ተቋም የመጨረሻ አመት የውጤት ሪፖርት ማቅረብ አለባቸው ብሏል።

ከዚህ ባለፈ አየር ኃይል አካዳሚ የሚቀበላቸው በራሱ በአካዳሚው የሚሰጠውን #የመግቢያ_ፈተና ማለፍ የሚችሉትን እንደሆነ ገልጿል።

የምዝገባው ቦታዎች ከላይ ተያይዟል ።

የምዝገባው ቀን ከመጋቢት 18 ቀን 2015 ዓ/ም እስከ መጋቢት 29 ቀን 2015 ዓ/ም ለተከታታይ 10 የስራ ቀናት እንደሆነ አየር ኃይል አሳውቋል።

(ተጨማሪ ከላይ ተያይዟል)

@tikvahethiopia

#ኬንያ

በጎረቤት ኬንያ በተቀሰቀሰ ተቃውሞ አንድ ሰው ተገደለ።

የኬንያ ተቃዋሚው ፖለቲከኛ ራይላ ኦዲንጋ የኑሮ መወደድን እና ፖለቲካዊ ጥያቄዎችን መሠረት አድርገው ደጋፊዎቻቸው ዛሬ ሰኞ መጋቢት 11/2015 ዓ.ም. ለተቃውሞ አደባባይ እንዲወጡ ጠርተው ነበር።

የኬንያ መንግሥት የተቃውሞ ሰልፉ ሕገወጥ እና ያልተፈቀደ ነው ቢልም፣ በተለያዩ የከተማዋ ክፍሎች ውስጥ በአንስተኛ ደረጃ ወደ ጎዳና የወጡ ተቃዋሚዎች ታይተዋል።

ፖሊስም ተቃዋሚዎችን ለመበተን ከፍተኛ ኃይል ያለው ውሃ እና አስለቃሽ ጋዝ የተጠቀመ ሲሆን፣ እስካሁን አንድ ሰው ከፖሊስ በተተኮሰ ጥይት መሞቱ ተዘግቧል።

የተቃዋሚ ፓርቲው መሪ ራይላ ኦዲንጋ ምንም እንኳን ፍርድ ቤት ክሳቸውን ውድቅ ቢያደርገውም ባለፈው ዓመት ነሐሴ የተካሄደው ምርጫ ተሰርቋል የሚለውን ክሳቸውን አሁንም እያቀረቡ ነው።

በተጨማሪም ሥልጣን ከያዘ ስድስት ወራትን ያስቆጠረው የዊሊያም ሩቶ መንግሥት ከጊዜ ወደ ጊዜ እየተባባሰ ያለውን የኑሮ ውድነት መፍትሄ ሊያበጅለት አልቻለም በማለት ደጋፊዎቻቸውን ለአደባባይ ተቃውሞ ጠርተዋል።

በተለይ ኦዲንጋ ከፍተኛ ደጋፊ ባላቸው የናይሮቢ የድሆች መኖሪያ በሆነው ኪቤራ አካባቢ ፖሊሶች ከተቃዋሚዎች ጋር ተጋጭተዋል።

በማዕከላዊ ናይሮቢ የሚገኙ የንግድ ተቋማትም የፀጥታ ችግሩን በመፍራት ዝግ ሆነው አስከ እኩለ ቀን ድረስ የቆዩ ሲሆን፣ ፖሊስ ለተቃውሞ የወጡ ሰልፈኞችን በአስለቃሽ ጋዝ በትነዋል።

በማዕከላዊ የከተማዋ ክፍል ውስጥ በሚገኘው የኬንያታ ጎዳና ላይም አንዳንድ ተቃዋሚዎች በፖሊሶች ላይ ድንጋይ ሲወረውሩ መታየታቸውን #ቢቢሲ ዘግቧል።

@tikvahethiopia

" የተዘረፍነው ካሜራን ጨምሮ ሙሉ ንብረቶቻችንን ነው " - ጋዜጠኛ ሙልጌታ አንበርብር

ከኢትዮጵያ መገናኛ ብዙኃን ባለስልጣን ህጋዊ ፍቃድ አግኝቶ በኦንላይ ሚዲያ እየተንቀሳቀሰ የሚገኘው " ኢትዮ 251 " ሚዲያ ካሜራን ጨምሮ ሙሉ ንብረቶቹን እንደተዘረፈ ለቲክቫህ ኢትዮጵያ አሳውቋል።

ሚዲያው ዘረፋው የተፈጸመው ትናንት ዕሁድ መጋቢት 10/2015 ዓ/ም መሆኑን ገልጿል።

የኢትዮ 251 ሚዲያ ባለቤትና ስራ አስኪያጅ ጋዜጠኛ ሙሉጌታ አንበርብር ለቲክቫህ በላከው መልዕክት " ዘረፋው ጠንካራ ጥበቃ ባለውና መሐል አራት ኪሎ ድንቅ ሥራ ኮምፕሌክስ ላይ በሚገኘው የድርጅቱ ስቱዲዮ ነው የተፈፀመው። " ብሏል።

በዘረፋው የድርጅቱ መገልገያ የነበሩ ፦
- አራት ዘመናዊ ካሜራዎች፣
- ኔክማይክ፣
- ዙመር እና ሌሎችም መገልገያ ቁሳቁሶች ተዘርፈው ተወስደዋል ሲል አመልክቷል።

ቁሳቁሶቹ ከ "ኢትዮ 251" በተጨማሪ፤ " አራት ኪሎ ሚዲያ " እና "ነገረ ወልቃይት "ን የመሳሰሉ ሚዲያዎች የሚገለገሉባቸው እንደነበረም ገልጿል።

" የፕሮዳክሽን እቃዎቹን ትናንት እሁድ ዕኩለ ቀን ድረስ ስንሰራባቸው ነበር " ያለው ጋዜጠኛ ሙሉጌታ " የተዘረፉት ንብረቶች አጠቃላይ ዋጋ ከአንድ ነጥብ ሰባት ሚሊዮን (1,700,000) ብር በላይ የሚገመት ነው " ሲል አስረድቷል።

" የተከራየንበት ህንፃ ድንቅ ሥራ ኮምፕሌክስ ላይ ሁለት ባንኮችን ጨምሮ ሌሎች ታላላቅ ድርጅቶች ለዓመታት እየሠሩ ያለ ቢሆንም አንዳቸውም ሊዘረፋ ቀርቶ ሙከራ እንኳ ተደርጎባቸው እንደማያውቅ ባደረግነው ማጣራት አረጋግጠናል " ያለው ጋዜጠኛው " ስምንተኛ ፎቅ ድረስ በመውጣት የሚዲያ ተቋምን መዝረፍ የሕዝብ ድምፅ በሆኑ በሚዲያ ላይ የተቃጣ ጥቃት በመሆኑ፣ እንደ ቀላል የሚታይ ጉዳይ አይደለም " ብሏል።

@tikvahethiopia

#ጥንቃቄ

ከሰሞኑን በአዲስ አበባ ከባድ ያለ ዝናብ የጣለ ነው።

ዛሬም በረዶ የቀላቀለ ዝናብ ጥሏል።

ውድ የቲክቫህ ኢትዮጵያ ቤተሰብ አባል የሆናችሁ አሽከርካሪዎች በዚህ ወቅት ስታሽከረክሩ የአየር ሁኔታውን ታሳቢ አድርጋችሁ እንዲሆን አደራ እንላለን።

ወላጆችም ልጆቻችሁን ጠብቁ። በተለይም ደግሞ ወቅቱ የትምህርት ሰዓት እንደመሆኑ ከቤት ወደ ከትምህርት ቤት ሲሄዱና ሲወጡ ከፍተኛ ጥንቃቄ እንዲያደርጉ ልጆቻችሁን አሳስቡ። የአየር ሁኔታውን ታሳቢ በማድረግ የሚደረብ ልብስም እንዲይዙ አድርጉ።

የትምህርት ተቋማት በዚህ በዝናብ ወቅት ለልጆች ደህንነት ተገቢውን ጥንቃቄ አድርጉላቸው።

በአጠቃላይ ውድ የአ/አበባ ቤተሰቦቻችን በተለይ ለጎርፍ ተጋላጭ በሆኑ ቦታዎች ያላችሁ ከፍተኛ ጥንቃቄ እንድታደርጉ እንላለን።

በአዲስ አበባ ከትናንት በስቲያ ምሽት በጣለው ዝናብ እናት እና ልጆችን ጨምሮ አራት ሰዎች በጎርፍ ተወስደው ህይወታቸው ማለፉ ይታወቃል።

ፎቶ፦ ከማህበራዊ ሚዲያ

@tikvahethiopia

ሌላ ዝርፊያ ...

" ከድርጅታችን 250 ሺህ ብር የሚገመት ንብረት ተዘርፏል " - ጋዜጠኛ ሚኪያስ ጌታቸው

ከኢትዮጵያ መገናኛ ብዙኃን ባለስልጣን ህጋዊ ፍቃድ አግኝቶ በኦንላይን የሚንቀሳቀሰው " ዩሪካ ቲቪና ሬድዮ " ከቢሮው 250 ሺህ ብር የሚገመት ንብረት እንደተዘረፈ ለቲክቫህ ኢትዮጵያ አሳውቋል።

ድርጅቱ ዝርፊያው የተፈፀመበት አራት ኪሎ ከሚገኘው " ተስኒም ህንፃ " 5ኛ ፎቅ መሆኑን አመልክቷል።

ዩሪካ ቲቪና ሬድዮ ባለቤት እና ስራ አስኪያጅ ጋዜጠኛ ሚኪያስ ጌታቸው  " ሁለት Canon Camera Body ፣  ሶስት Canon Camera Lens እና አንድ laptop አሁን ባለው የገበያ ዋጋ አጠቃላይ ግምታቸው 250ሺህ ብር የሚደርስ ንብረት አራት ኪሎ ከሚገኘው ተስኒም ህንፃ 5ኛ ስቱዲዮችን ተዘረፏል " ብሏል።

ዘረፋው እንደ ተፈጸመው የታወቀው ትናንት ዕሁድ መጋቢት 10 ቀን 2015 ዓ.ም ከቀኑ ከቀኑ 7:20 ሰዓት ላይ እንደነበር ገልጾልናል።

" አርብ መጋቢት 8 የዕለቱን ስራችን አጠናቀን ከቢሮ ወጣን። በንጋታው ቅዳሜ ስለሆነ ስራም ስላልነበረን ቢሮ አልገባንም። ከአርብ 11:00 ጀምሮ እስከ እሁድ 7:00 ድረስ እኔም ሆንኩ ባልደረቦቼ ቢሮ አልገባንም። እሁድ ዕለት ግን ለሰኞ ማስረከብ ያለበትን ስራ ለማጠናቀቅ አንደኛው የኤዲቲንግ ባለሙያ ቢሮ በገባበት ወቅት ነው ዝርፊያ መፈፀሙን ያወቅነው " ሲል ሁኔታውን አስረድቷል።

ጋዜጠኛ ሚኪያስ ጌታቸው በነገው ዕለት በራሱ " ዩሪካ ቲቪና ሬድዮ " የዩትዩብ ገፅ ላይ ማብራሪያ እንደሚሰጥ ገልጿል።

በዛው 4 ኪሎ አካባቢ ከኢትዮጵያ መገናኛ ብዙኃን ባለስልጣን ህጋዊ ፍቃድ አግኝቶ በኦንላይ ሚዲያ እየተንቀሳቀሰ የሚገኘው " ኢትዮ 251 " ሚዲያ ካሜራን ጨምሮ ሙሉ ንብረቶቹን (ከ1.7 ሚሊዮን ብር በላይ የሚገመት) እንደተዘረፈ ለቲክቫህ ኢትዮጵያ ማሳወቁ ይታወሳል።

@tikvahethiopia