#USA

የአሜሪካ ህዝብ ተራድኦ ድርጅት (USAID) አስተዳዳሪ ሳማንታ ፓወር ፤ የድርጅታቸው አጋር የሆነው የዓለም ምግብ ፕሮግራም ኮንቮይ ከመቶ ሺህ በላይ ለሆኑ የትግራይ እና አፋር ነዋሪዎች ሰብዓዊ እርድታ ማጓጓዙን ገልፀዋል።

በየብስ ወደ ትግራይ የገባው ሰብዓዊ እርዳታ ከ3 ወር በላይ ከሆነ ጊዜ በኃላ ለመጀመሪያ ጊዜ ነው ሲሉም ገልፀዋል።

በሌላ በኩል ፥ የአሜሪካ ውጭ ጉዳይ ሚኒስትር አንቶኒ ብሊንከን በትግራይ እና አፋር ላሉ ዜጎች በቅርብ ቀናት የተደረገው ሰብአዊ እርዳታ በአወንታ የሚታይ ነው ብለዋል።

አንቶኒ ብሊንከን ፤ አስተማማኝ፣ የተረጋጋችና የበለፀገች ኢትዮጵያ ሂደትን ለማረጋገጥ ሁሉም ወገኖች ባሳዩት አውንታዊ እርምጃ እንዲቀጥሉ አስገንዝበዋል።

@tikvahethiopia

#የዩኒቨርሲቲ_መውጫ_ፈተና

የኢ.ፌ.ዴ.ሪ ትምህርት ሚኒስቴር ፤ ከሁሉም መንግስት ዩኒቨርሲቲዎች የሚመረቁ ተማሪዎች በሰለጠኑባቸው ሙያዎች ብቁ መሆናቸውን ለማረጋገጥ እንዲወስዱ የሚጠበቀውን የመውጫ ፈተና ወደ ተግባር እንዲገባ ዝግጅት መደረጉን አስታውቋል።

የመውጫ ፈተናውን በተመለከተ የመንግስት ከፍተኛ ትምህርት ተቋማት ፕሬዝዳንቶች በተገኙበት በአዲስ አበባ ዩኒቨርስቲ ምክክር እየተደረገ ይገኛል።

የመንግስት ዩኒቨርሲቲዎች የምክክር መድረክ ባዘጋጀው ውይይት የመውጫ ፈተናው አስፈላጊነት፤ የፈተናው አወጣጥና አፈታተን እንዲሁም በተያያዥ ጉዳዮች ዙሪያ ምክክር እየተደረገበት ነው።

የትምህርት ሚኒስትር ዴኤታ ዶክተር ሳሙኤል ክፍሌ ፤ መንግስት በመጪዎቹ አምስት ዓመታት የትምህርት ጥራትን ለማሻሻል ጠንካራ ትግበራ እና ርምጃዎችን እንደሚወስድ አንስተዋል።

በቀጣይ አምስት ዓመታት አዲስ የመንግስት ዩኒቨርሲቲ እንደማይኖር የገለጹት ሚኒስትር ዴኤታው፤ ይልቁንም የከፍተኛ ትምህርት ተቋማት አቅም እና ጥራት ማሻሻል ላይ በትኩረት ይሰራል ብለዋል።

በሁሉም የመንግስት ዩኒቨርሲቲዎች የሚገኙ ተመራቂ ተማራዎች ፈተናዉን እንዲወስዱ በቂ ዝግጅት መደረጉን ጠቁመዋል።

የመውጫ ፈተናው በእያንዳንዱ ዩኒቨርሲቲ በየሙያው እና ትምህርት ዘርፍ ተዘጋጅቶ የሚሰጥ ሲሆን ለዚህም ትግበራ ፖሊሲና ዝርዝር ማስፈፀሚያ መመሪያ መዘጋጀቱን ገልጸዋል።

በህግና በህክምና ሙያ የሚሰጠው የመውጫ ፈተናና የብቃት ማረጋገጫ ፍተሻ እንደ ልምድ ይወሰዳል ተብሏል።

ምንጭ፦ አዲስ ሚዲያ ኔትዎርክ

@tikvahuniversity

#Alert

የጤና ሚኒስቴር የትዊተር አካውንት ተጠለፈ።

ከ204 ሺ በላይ ተከታዮች ያሉት የሚኒስቴሩ የትዊተር አካውንት ተጠልፏል።

የኢ.ፌ.ዴ.ሪ. ጤና ሚኒስቴር ይፋዊ የትዊተር አካውንቱ #FMoHealth ዛሬ መጋቢት 24 መጠለፉን (ሃክ መደረጉን) አስታውቋል።

ሚኒስቴሩ ችግሩ እስኪቀረፍ ድረስ በትዊተር ገጹ ላይ የሚለቀቁ ማንኛውም መረጃዎች እንደማይወክሉት ገልጿል።

@tikvahethiopia

#DireDawa

1443 ኛው የረመዳን ፆም ወር የአፍጢር መርሀ-ግብር በአሁን ሰአት በለገሀር አደባባይ እየተካሄደ ይገኛል።

በዚሁ የአፍጢር መርሀ-ግብር ላይ በርካታ የእምነቱ ተከታዮች ፣ የሀይማኖት አባቶች እና ከፍተኛ የመንግስት አመራሮች ተሳታፊ ሆነዋል።

ፎቶ ፦ የድሬዳዋ ኮሚኒኬሽን

@tikvahethiopia

#Tigray , #Mekelle 📍

የዓለም ምግብ ፕሮግራም ከ8 ወር በኃላ ለመጀመሪያ ጊዜ ዛሬ የነዳጅ ቦቴ ትግራይ መገባቱን አስታውቋል።

ዛሬ 47,000 ሊትር ነዳጅ መቐለ የደረሰ ሲሆን ፤ ድርጅቱ በክልሉ ያለውን የሰብዓዊ ፍላጎት ለማሟላት በየሳምንቱ 200,000 ሊትር ነዳጅ ያስፈልጋል ብሏል።

ከትላንት አርብ ጀምሮ ወደ ትግራይ ክልል ሰብዓዊ ድጋፍ በየብስ እየገባ ይገኛል።

የዓለም ምግብ ፕሮግራም ከዚህ ቀደም በክልሉ ያለውን የሰብዓዊ ፍላጎት ለማሟላት በየቀኑ 100 ሰብዓዊ ድጋፍ የጫኑ ተሽከርካሪዎች መግባት እንዳለባቸው መግለፁ ይታወሳል።

የኢትዮጵያ ፌዴራል መንግስት ለሰብዓዊነት ግጭት የማቆም ውሳኔ ማሳለፉ ፤ ከትግራይ ክልል በኩልም በጎ የሆነ ምላሽ መሰጠቱን ተከትሎ በችግር ላይ ለሚገኙ በሚሊዮን ለሚቆጠሩ ዜጎች ሰብዓዊ ድጋፍ መግባት መጀመሩን የተለያዩ ሀገራት፣ የተለያዩ ረድኤት ድርጅቶች እያበረታቱ ይገኛሉ።

@tikvahethiopia

#Tigray

የዓለም አቀፍ ቀይ መስቀል ኮሚቴ የህክምና፣ ምግብ እና የውሃ ማጣሪያ ግብዓቶችን ያካተተ ድጋፍ ዛሬ መጋቢት 24 ቀን 2014 ዓ.ም ትግራይ ክልል ደርሷል፡፡

ይህም እ.ኤ.አ ከመስከረም 2021 በኋላ በየብስ ትራንስፖርት ወደ ክልሉ የደረሰ የመጀመሪያው የዓለም አቀፍ ቀይ መስቀል ኮሚቴ ድጋፍ ነው፡፡

https://www.icrc.org/en/document/ethiopia-icrc-resumes-aid-convoys-tigray-after-six-months-0

@tikvahethiopia

#AutismDay

" ምሉዕ ፋውንዴሽን " የኦቲዝም ቀንን ትላንት ከተለያዩ አጋር ድርጅቶች ጋር በመተባበር አከበረ። የትላንቱ መርሐግብር '' ተለየው እንጂ አላነስኩም '' በሚል መሪ ቃል ነው የተከበረው።

በ2013 ዓ/ም የተመሰረተው የበጎ አድራጎት ማኅበሩ ፤ በኦቲዝምና ሌሎች ልዩ ፍላጎት የሚያስፈልጋቸው ልጆች፤ ታዳጊዎች እና ወላጆቻቸው ያማከለ የልህቀት ማዕከል ሲሆን በውስጡም ቤተመጻሕፍት ፣ የክህሎት ማስጨበጫ ፣ የልዩ ፍላጎት ልጆች ወላጆች ውይይት የሚያደርጉበትና ሌሎች ማኅበረሰብ ተኮር ስራዎችን የያዘ ነው።

በወ/ሮ ትዕግስት ኃይሉና አቶ ክንፈ ፅጌ የተመሰረተው ማኅበሩ የበኩር ልጃቸው በኦቲዝም ጥላ ስር የሚኖር ታዳጊ በመሆኑ በየትምህርት ቤቱ፣ በህጻናት መጫወቻ ስፍራዎች እንዲሁም በተለያዩ የህዝብ ተቋማት ላይ ያጋጠማቸውን ውጣ ውረዶች ሌሎች እንዳይጎዱበት ለማገዝ መቋቋሙን ሰምተናል።

በተጨማሪም በልጆቻቸው አካላዊ፣ አዕምሮአዊ እና ስነ-ልቦናዊ እድገት ላይ የነበረውን ውስንነት ለመቅረፍ የተጠቀሙባቸውን መንገዶች እና በዘርፉ ያካበቷቸውን ልምዶች ለሌሎች ለማጋራት በማሰብ የመኖሪያ ቤታቸውን ክፍት በማድረግ ሁሉም የማህበረሰብ ክፍሎች እንዲገለገሉበት በማድረግ ላይ ይገኛሉ፡፡

ኦቲዝም የአዕምሮ ዕድገት መዛባት መንስዔ በውል ባይታወቅም የልጆቹን ዕምቅ አቅም በመፈለግና በማውጣት የተሻለ ዜጋ እንዲሆኑ ማስቻል ይቻላል።

በአፍሪካ የኦቲዝም የአዕምሮ መዛባት ችግር ስርጭት በስፋት ባይጠናም ከሰሀራ በታች ባሉ የአፍሪካ ሀገራት በዕድገት ችግር ውስጥ ካሉ ከመቶ ልጆች ውስጥ ከ 11 -33 የሚሆኑት በኦቲዝም የአዕምሮ ዕድገት መዛባት ውስጥ እንደሚኖሩ ግን አንዳንድ ጥናቶች ይጠቁማሉ።

@tikvahethiopia