#Update

21 የሰብዓዊ እርዳታ የጫኑ ተሽከርካሪዎች በአፋር ክልል " አብኣላ " መንገድ ወደ ትግራይ ክልል መጓዝ መጀመራቸውን የኢትዮጵያ መንግስት ዛሬ ከሰዓት አስታውቋል።

ተሽከርካሪዎቹ የእህል እርዳታ የጫኑ ሲሆን በዓለም ምግብ ድርጅት (WFP) አማካኝነት ነው በአፋር አብዓላ በኩል በየብስ ወደ ትግራይ እየሄዱ የሚገኙት።

መንግስት የሰብአዊ እርዳታ ለሚያስፈልጋቸው ዜጎች ድጋፍ እንዲደርስ ቁርጠኛ መሆኑን ገልጿል።

ከዚህ ቀደም እርዳታ የጫኑ ተሽከርካሪዎች ወደ ትግራይ ክልል መሄድ ከጀመሩ በኃላ በፀጥታ ችግር ወደ ኃላ መመለሳቸውን መግለፁ አይዘነጋም።

መንግስት ለሰብዓዊነት ሲባል ግጭት የማቆም ውሳኔ ካሳለፈ በኃላ እና በትግራይ ክልል በኩል በጎ ምላሽ ከተገኘ በኃላ በየብስ ወደ ትግራይ ክልል ምንም እርዳታ አልገባም።

ለዚህ ደግሞ መንግስት የ " ህወሓት " ን ኃይል ተጠያቂ አድርጎ ነበር።

እርዳታ ወደ ትግራይ ክልል እንዲገባ ህወሓት ከያዛቸው የአፋር ክልል ወረዳዎች ለቆ መውጣት እንዳለበት አስገንዝቦም ነበር፤ አሁን እርዳታ መጓጓዝ የጀመረው ህወሓት ከያዛቸው ቦታዎች ለቆ ነው ? ወይስ ሳይለቅ ? ስለሚለው የሚታወቅ ነገር የለም።

ትላንት ሮይተርስ የዜና ወኪል ባወጣው ዘገባ በአፋር ህወሓት ተቆጣጥሯቸው በሚገኙ አካባቢዎች ላይ ጦርነት መቀጠሉን እና ይህም ሁኔታ ለሰብዓዊነት ሲባል የታወጀውን ግጭት የማቆም ውሳኔ አደጋ እንደደቀነበት ዲፕሎማዮቶች ተናግረው ነበር።

ዛሬ እንደተሰማው ፤ 21 ተሽከርካሪዎች በየብስ በአፋር በኩል ወደ ትግራይ ክልል መንቀሳቀስ ጀምረዋል።

ትግራይ ክልል ውስጥ የተረጂዎችን ፍላጎት ለማሟላት በየዕለቱ የሰብዓዊ እርዳታ የጫኑ 100 ተሽከርካሪዎች ሊገቡ እንደሚገባ የረድኤት ድርጅቶች ከዚህ ቀደም መግለፃቸው ይታወሳል።

ፎቶ ፦ ፋይል

@tikvahethiopia

#Ethiopia #SouthSudan

በጄኔራል አበባው ታደሰ የተመራ ልዑክ ቡድን በደቡብ ሱዳን የሥራ ጉብኝት እያካሄደ ነው።

የኢትዮጵያ የጦር ኃይሎች ምክትል ጠቅላይ ኢታማዦር ሹም ጀኔራል አበባው የሚመሩት ልዑክ በደቡብ ሱዳን ጁባ የስራ ጉብኝት እያደረገ ይገኛል።

በዚህ የስራ ጉብኝት ጀነራል አበባው ታደሰ ከደቡብ ሱዳን አቻቸው ሉ/ጄኔራል ቶይ ቻኒይ ሬይት ጋር ውይይት አድርገዋል።

በሎጂስቲክስ እና በአቅም ግንባታ ጉዳዮች ለደቡብ ሱዳን ድጋፍ ለማድረግና ተሞክሮ ለማጋራት እንዲሁም የሁለቱ አገራት #የድንበር_አካባቢ ፀጥታና ደህንነትን ለማረጋገጥ በትብብር ለመሥራት ከስምምነት መደረሱ ተገልጿል።

ትላንትና የኢትዮጵያ ጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ ፤ በናይሮቢ ከኬንያ አቻቸው ከጄኔራል ሮበርት ኪቢቹ ጋር ውይይት ካደረጉ በኃላ ሁለቱ ሀገራት በሰላም እና የደህንነት ጉዳዮች ላይ ለመተባበር ስምምነት ማድረጋቸው አይዘነጋም።

@tikvahethiopia

#AmharaRegion

የአማራ ክልል ጤና ቢሮ ከዚህ ቀደም ለ631 ጠቅላላ ሃኪሞች የስራ ማስታወቂያ ማውጣቱ ይታወሳል።

ዛሬ ይፋ በሆነው መረጃ ቢሮው ለ84 ሆስፒታሎች 409 ጠቅላላ ሃኪሞችን መቅጠሩ ታውቋል።

በኢ.ፌ.ዴ.ሪ. ጤና ሚኒስቴር እና የክልሉ ጤና ቢሮ (በማችንግ ፈንድ) በመተባበር ለ631 ጠቅላላ ሃኪሞች የቅጥር ማስታወቂያ ቢወጣም ቢሮው አወዳድሮ ሊቀጥር ያቻለው 409 ጠቅላላ ሀኪሞችን ነው።

የአብክመ ጤና ቢሮ የሰዉ ሃብትና ልማት ዳይሬክቶሬት ዳይሬክተር አቶ ዳኛቸዉ ደሬ ፤ " የማችንግ ፈንድ ለ631 ጠቅላላ ሃኪሞች በጀት ቢለቅም በገባያ ላይ 409 ጠቅላላ ሃኪሞች ብቻ ነው የተገኙት " ሲሉ ገልፀዋል

የክልሉ ጤና ቢሮ በቀጣይ ጊዜ ለቀሩት 222 ጠቅላላ ሃኪሞች የቅጥር ማስታወቂያ እንደሚወጣ አሳውቋል።

ያልተቀጠሩ በተለያየ ሙያ ያሉ የጤና ዘርፍ ባለሙያዎች በነበረዉ ሃገራዊ ችግር ምክንያት ቢሮዉ " በሙሉ በጀቱን ለህልዉና ዘመቻ በማዋሉ " እደሆነ ገልፆ በቀጣይ ጊዜያት ከጤና ሚንስቴር እና ከአጋር አካላት ጋር በመነጋገር የቅጥር ማስታወቂያ እንደሚያወጣ ገልጿል።

@tikvahethiopia

ኤርትራ በኢትዮጵያ ጉዳይ አስፈፃሚ ሾመች።

አቶ ቢንያም በርሄ በኢትዮጵያ የኤርትራ ጉዳይ ፈፃሚ (Chargé d'affaire) ሆነው ተሹመዋል።

አቶ ቢንያም የሹመት ደብዳቤያቸውን ትላንት ለውጭ ጉዳይ ሚኒስቴር የፕሮቶኮል ጉዳዮች ዳይሬክተር ጀኔራል ደመቀ አጥናፉ ማስረከባቸውን በአዲስ አበባ ከሚገኘው የኤርትራ ኤምባሲ ያገኘነው መረጃ ያሳያል።

ሹመቱ አምባሳደር ሰመረ ርዕሶም የኢትዮጵያ እና ኤርትራ ግንኙነት ከተሻሻለ በኃላ በኢትዮጵያ የኤርትራ አምባሳደር ሆነው ለሶስት ዓመት ካገለገሉና የስራ ጊዜያቸውን አጠናቀው ከተሰናበቱ በኃላ የመጣ ነው።

ኤርትራ ከአምባሳደር ይልቅ ለምን የጉዳይ አስፈፃሚ (Chargé d'affaire) እንደመደበች ወይም ወደፊት አምባሳደር እንደምትልክ ግልፅ አለመደረጉን ኢትዮ ኒውስፍላሽ ዘግቧል።

@tikvahethiopia

#UN #ETHIOPIA

ኢትዮጵያ የተመድ የሰብዓዊ መብቶች ም/ቤት ኢትዮጵያ ውስጥ ተፈፅመዋል ለተባሉ የሰብዓዊ መብት ጥሰቶች እንዲያጣራ ባቋቋመው ገለልተኛ ዓለማቀፍ መርማሪ ኮሚሽን ዙሪያ የውሳኔ ሃሳብ አቅርባ ድምጽ እንዲሰጥ አድርጋለች።

ኢትዮጵያ ለጠቅላላ ጉባዔው ያቀረበችው የውሳኔ ሃሳብ የተመድ ሰብዓዊ መብቶች ም/ቤት ላቋቋመው መርማሪ ኮሚሽን ጠቅላላ ጉባዔው የስራ ማስኬጃ በጀት #እንዳይፈቅድ የሚጠይቅ ነው።

በዚህም ዛሬ ምሽት በ193 አባል ሀገራት ባሉት የጠቅላላ ጉባኤው በጀት ኮሚቴ ድምፅ የተሰጠ ሲሆን ፦

👉 27 ሀገራት ደግፈዋል።

👉 66 ሀገራት ተቃውመዋል።

👉 39 ሀገራት ድምፅ ከመስጠት ታቅበዋል።

በአብላጫ ድምፅ የውሳኔ ሃሳቡ [ ኢትዮጵያ የጠየቀችው የስራ ማስኬጃ በጀት እንዳይፈቀድ የሚለው የውሳኔ ሃሳብ ] #ውድቅ ሊሆን ችሏል።

የኢትዮጵያን የውሳኔ ሀሳብ ደግፈው ከቆሙ ሀገራት መካከል ኤርትራ፣ ኬንያ፣ ጅቡቲ፣ አልጄሪያ፣ አንጎላ ፣ኩባ ፣ ቻይና ፣ ሌሴቶ፣ ማሊ፣ ጋቦን፣ አንጎላ፣ ኢኳቶሪያል ጊኒ፣ ኡጋንዳ ፣ ብሩንዲ፣ ሩስያ ፣ ኢራን ይገኙበታል።

ተቃውሞ ካደረጉት መካከል ደግሞ አሜሪካ ፣ ዩናይትድ ኪንግደም፣ ኖርዌይ፣ ኒውዝላንድ ፣ ፖላንድ ፣ ሮማኒያ፣ ዴንማርክ፣ ፈረንሳይ፣ ፊንለንድ ፣ ቤልጂየም፣ ጀርመን፣ ጃፓን ፣ ጣልያን፣ ሞናኮ፣ ሜክሲኮ ፣ ካናዳ ይገኙበታል።

ድምፀ ተአቅቦ ካደረጉት መካከል ቦትስዋና ፣ ግብፅ ፣ ኮትዲቯር ፣ ኩዌት ፣ ሌባኖስ ፣ማሌዥያ፣ ህንድ፣ ኢንዶኔዥያ ፣ ሞሮኮ ፣ ሳዑዲ አረቢያ ፣ ሴኔጋል ፣ ደ/አፍሪካ፣ ሱዳን፣ ቶጎ፣ ሲንጋፖር፣ ዩናትድ አረብ ኤሜሬትስ ይገኙበታል።

ቱርክ ፣ ሱማሊያ ፣ ደቡብ ሱዳን ፣ ሩዋንዳ ፣ ጋምቢያ ... ሌሎችም በርካታ ሀገራት ሙሉ በሙሉ በድምፅ አሰጣጡ አልተሳተፉም።

@tikvahethiopia

#ETHIOPIA

ከጂዳ እና አካባቢ ባሉ እስር ቤቶች እና ማቆያ ማዕከላት ውስጥ ያሉ ኢትዮጵያዊያንን ወደ ሃገር ቤት መመለስ ዛሬ ይጀመራል።

ዛሬ 1831 በሳኡዲ አረቢያ እስር ቤቶች እና ማቆያ ማዕከላት ውስጥ የነበሩ ዜጎች ኢትዮጵያ ይገባሉ ተብሎ ይጠበቃል ።

ከሳኡዲ አረቢያ ወደ ሀገር ቤት ለመመለስ ከታቀደው 102 ሺህ ዜጎቻችን መካከል ከ80,000 የማያንሱት የሚገኙት በጄዳ አካባቢ በሚገኙ እስር ቤቶች እና የማቆያ ማዕከላት መሆኑ ተገልጿል።

ዛሬ በሚደረጉ አራት በረራዎች ከጅዳ 1438 በሳኡዲ አረቢያ በእስር ቤቶች እና ማቆያ ማዕከላት ውስጥ የነበሩ ዜጎች ኢትዮጵያ ይገባሉ።

ከትላንት በስቲያ በጀመረው በሳኡዲ አረቢያ እስር ቤቶች በአስቸጋሪ ሁኔታ ውስጥ የነበሩ ዜጎችን የመመለስ ስራ በአንድ ቀን ከሪያድ 936 ኢትዮጵያዊን ማምጣት የተቻለ ሲሆን ዛሬ ማለዳም 393 ዜጎች ወደ ሀገራቸው ተመልሰዋል።

ምንጭ፦ የውጭ ጉዳይ ሚኒስቴር

@tikvahethiopia

#ETHIOPIA

የኢትዮጵያ ጠ/ሚ ዶ/ር ዐቢይ አህመድ ፤ " የብሔራዊ ምክክሩ " ን በተመለከተ በማህበራዊ ትስስር ገፃቸው መልዕክት አስተላልፈዋል።

በመልዕክታቸው፤ አካታች ብሔራዊ ምክክሩ ስኬታማ እንዲሆን ሒደቱ ተቀባይነት ያለው ሆኖ መከናወን አለበት ብለዋል።

" ይኽም የሚሆነው ሁላችንም የምክክር ሂደቱን በበላይነት የሚመራውን የምክክር ኮምሽን በተለያዩ መንገዶች መደገፍ፣ ማትጋትና ማጽናት ስንችል ነው። " ያሉት ጠቅላይ ሚኒስትሩ " በዚህ ጉዳይ ዳር ቆሞ መገኘት በታሪክ ፊት የሚያስወቅስ ተግባር ነው። " ብለዋል።

ጠ/ሚ ዶ/ር ዐቢይ ፥ ሁሉም አካል በባለቤትነት ስሜት ለምክክር ሂደቱ አስተዋጽዖ በማድረግ ተሳትፎውን ያረጋግጣል እንጂ አንዱ ጋባዥ ሌላው ተጋባዥ እንደሆነ አድርጎ መቁጠር ከታሪክ ተጠያቂነት ነጻ አያደርግም ሲሉም አስገንዝበዋል።

በመንግሥት በኩል እስከ ታችኛው የአስተዳደር መዋቅር ድረስ የተቋቋመው የምክክር ኮሚሽን በቅልጥፍና መሥራት እንዲችል አስፈላጊውን ሁሉ ድጋፍ ከማድረግ ወደ ኋላ እንደማይልም ገልፀዋል።

የክልል መስተዳደሮች ቀናነት፣ ባለቤትነትና ታሪካዊ ኃላፊነት በተሞላበት ሁኔታ ለኮሚሽኑ ሥራ አስፈላጊ የሆነውን ግብአት በማቅረብ ለሥራው ምቹ ሁኔታ ሊፈጥሩ ይገባል ሲሉም አሳስበዋል።

ጠቅላይ ሚኒስትሩ ፥ ተፎካካሪ ፓርቲዎች በውይይቱ እንደሚሳተፍ ብቻ ሳይሆን እንደ ሂደቱ ባለቤት ለሂደቱ ቅልጥፍናና ስኬት አስፈላጊውን ሁሉ እንዲያደርጉ ጥሪ አቅርበዋል።

የሃይማኖት አባቶች እና የሀገር ሽማግሌዎችም ሀገር ስምምነትን በምትፈልግበት በዚህ ወቅት አማካይ ሆነው ሁሉን የማስማማት አደራ ስላለባቸው የመቀራረቢያውን መድረክ በማገዝ ሀገራዊ ግዴታቸውን እንዲወጡ ጠቅላይ ሚኒስትሩ ጠይቀዋል።

(ሙሉ መልዕክታቸው ከላይ ተያይዟል)

@tikvahethiopia

#USA

የአሜሪካ ፕሬዝደንት ጆ ባይደን አሜሪካ " ለችግር ጊዜ " በሚል ካከመቻችው ነዳጅ በገፍ እንዲቀዳ አዘዋል።

ፕሬዝደንቱ ይህን ትዕዛዝ ያስተላለፉት እየናረ የመጣውን የነዳጅ ዋጋ ለመዋጋት መሆኑ ተገልጿል።

ባይደን እንዲወጣ ያዘዙት 180 ሚሊዮን በርሜል ነዳጅ በማከማቻው ታሪክ ትልቁ ነው።

ዩክሬን ባለው ጦርነት ምክንያት ጣራ እየነካ የነበረው የነዳጅ ዋጋ ከባይደን ትዕዛዝ በኋላ ትንሽ ረገብ ማለቱ ተነግሯል።

በዘርፉ ላይ ያሉ ሰዎች ግን አሜሪካ በየቀኑ ለመከራ ጊዜ ካስቀመጠችው ነዳጅ አንድ ሚሊዮን በርሜል ብትቀዳም ችግሩን ሙሉ በሙሉ አይቀርፈውም ብለዋል።

ጆ ባይደን፤ ከማከማቻው እንዲቀዳ የታዘዘው ነዳጅ አሜሪካ "የራሷን የነዳጅ ምርት እስክታሳልጥ ድረስ" እንዲያግዝ በሚል ነው ብለዋል።

ፕሬዝደንቱ ኩባንያዎች ነዳጅን ከመንግሥት መውሰድ የመጨረሻ አማራጭ እንዲያደርጉ ጠይቀዋል። የአረንጓዴ የኃይል ምንጭ የሚከተሉ ኩባንያዎችንም እንዲበረታቱ መክረዋል።

የዩክሬን እና ሩስያ ጦርነት ባመጣው መዘዘ አሜሪካን ጨምሮ የዓለም ሃገራት የኑሮ መወደድ እያማረራቸው ነው።

ባይደን፤ " ስትራቴጂክ ፔትሮሊዬም ሪዘርቭ " ከተሰኘው የችግር ቀን ገንዳ ነዳጅ ለመቅዳት የወሰንነው " ያለዕቅዳችን " ነው ብለዋል።

አሜሪካ ከሳዐዲ አረቢያ ቀጥሎ ሁለተኛዋ ግዙፍ የነዳጅ አምራች ከሆነችው ሩሲያ ነዳጅ አልገዛም ካለች ወዲህ የነዳጅ እጥረት እያንገላታት ይመስላል ሲል ቢቢሲ በድረገፁ አስነብቧል።

@tikvahethiopia

#እገዳው_ተነስቷል !

ለትንሳኤ በዓል ወደ እስራኤል በሚሄዱ ኢትዮጵያዊያን ላይ ተጥሎ የነበረው የቡድን ጉዞ እገዳ መነሳቱ ተገልጿል።

የእስራኤል የአገር ውስጥ ጉዳይ ሚኒስቴር ከኢትዮጵያ ለሚመጡ ጎብኚዎች የቡድን ቪዛ እገዳ ጥሎ ነበር።

ሚኒስቴሩ ውሳኔውን አሳልፎ የነበረው በኢትዮጵያ ያለው የእርስ በእርስ ጦርነት ምክንያት ተጓዦች ወደ እስራኤል ከመጡ አይመለሱም በሚል ስጋት ነበር።

በተላለፈው ውሳኔው ላይ ቅሬታ የተሰማቸው የተለያዩ አካላት በተለይ በእየሩሳሌም የኢ/ኦ/ተ/ቤተክርስቲያን ገዳም አባቶች ባቀረቡት አቤቱታ መሠረት፣ በእስራኤል የኢፌዴሪ ኤምባሲ ከእስራኤል ጠቅላይ ሚኒስትር ጽህፈት ቤት፣ ከእስራኤል የውጭ ጉዳይ ሚኒስትር ፣ ከሕዝብና ኢሚግሬሽን ጉዳይ የሥራ ኃላፊዎች እና ከሌሎችም ጉዳዩ ከሚመለከታቸው ከተለያዩ አካላት ጋር በተደረገው ተደጋጋሚ ምክክር ውሳኔው የሁለቱን አገራት ወዳጅነት አንጻር ተገቢ አለመሆኑን አሳውቋል።

በመቀጠልም ፤ የእስራኤል የፓርላማ አባል የሆኑት ጋዲ ይባርከን ጋር በመሆን ከእስራኤል ከሕዝብና ኢሚግሬሽን ባለስልጣን ኃላፊዎች ጋር በተደረገው ውይይት ተጥሎ የነበረው የጉዞ ገደብ የተነሳ መሆኑን በእስራኤል ከሚገኘው የኢትዮጵያ ኤምባሲ የተገኘው መረጃ ያሳያል።

@tikvahethiopia

#Ukraine #Russia

የሩስያን ድንበር ጥሰው ገቡ የተባሉ ሁለት የዩክሬን ጦር ሂሊኮፕተሮች የነዳጅ ማከማቻ ላይ ጥቃት መፈፀማቸው ተሰማ።

ሁለት የዩክሬን ሄሊኮፕተሮች የሩሲያን ድንበር ጥሰው በሀገሪቱ ምዕራባዊ ከተማ ቤልጎሮድ የነዳጅ ማከማቻ ቦታ ላይ ጥቃት ማድረሳቸውን የአከባቢው አስተዳዳር ዛሬ አስታውቋል።

የአካባቢው አስተዳዳሪ የሆኑት ቫያቼስላቭ ግላድኮቭ በቴሌግራም ቻናላቸው ላይ ሁለት የዩክሬን ጦር ሄሊኮፕተሮች በፈፀሙት የአየር ጥቃት በሚያስተዳድሩት አካባቢ ባለ የነዳጅ ማከማቻ ላይ የእሳት ቃጠሎ መነሳቱን ጽፈዋል።

በቃጠሎው ምክንያት በነዳጅ ማከማቻው ውስጥ የነበሩ ሁለት ሰራተኞች መቁሰላቸው ተገልጿል።

የዩክሬን እና ሩስያ ጦርነት ከተጀመረበት ጊዜ አብስቶ ሩስያ ፤ ዩክሬን ድንበሯን አልፋ ጥቃት ፈፀመችብኝ ብላ ሪፖርት ስታደርግ ይህ የመጀመሪያ ነው።

የ2ቱ ሀገራት ጦርነት እስካሁን ድረስ ይህን ነው የሚባል መፍትሄ ሳይገኝለት ከወር በላይ ተቆጥሯል።

አሁንም ጦርነቱ እንዲቆም ለማድረግ ንግግሮች ቢኖሩም ከዚህ በተቃራኒ ደግሞ ግጭት እንዲቀጥል የሚያደርጉ ወታደራዊ ሁኔታዎች እንደሚስተዋሉ እየተነገረ ነው።

በሀገራቱ ጦርነት ምክንያት ከሚጠፋው የሰው ህይወት ፣ ከሚሰደደው ሰው ባለፈ በዓለም ኢኮኖሚ እና በሀገራት የኑሮ ውድነት ላይ በየዕለቱ እያሳደረ ያለው ግልፅ ተፅእኖ እየከፋ ነው።

@tikvahethiopia