#AddisAbaba

በአዲስ አበባ የትግራይ ተወላጅ የንግድ ማህበረሰብ አባላት ከጸጥታ አካላት እና ከአዲስ አበባ የብልጽግና ፓርቲ አመራሮች ጋር ተወያዩ።

ውይይቱ ትኩረቱ የነበረው በአ/አ ከተፈጠረው ክስተትና ከንግድ ቤት መታሸግ ጋር በተያያዘ ነበር።

የትግራይ ተወላጅ የንግዱ ማህበረሰብ አባላት የንግድ ቤቶቹ መታሸግ ከማንነት ጋር የተያያዘ አንድምታ እየፈጠረባቸው እንደሆነ ተናግረዋል፡፡

መከላከያ ሰራዊቱ መቐለ ከተማን ሰኔ 21 ቀን 2013 ለቅቆ መውጣቱን ተከትሎ በአዲስ አበባ በሚገኙ ፣ ሆቴሎች ፣ መጠጥ ቤቶች እና ምሽት ቤቶች ብጥብጥ ለማስነሳት ሲንቀሳቀሱ የነበሩ ግለሰቦችን በመደገፍ የተጠረጠሩ የንግድ ተቋማት ላይ እርምጃ መወሰዱ ተገልጿል።

እርምጃ የተወሰደባቸው ቤቶች በከተማዋ የዘር ፍጅት እንዲከሰት ፍላጎት ያላቸውን ሰዎች በሆቴል ቤታቸው በማስቀመጥ ድጋፍ አድርገዋል በሚል ሲሆን ከነበረው ክስተት ጋር በተያያዘ መንግስት ከ8 በላይ ባለ ኮከብ ሆቴሎች እና በርካታ ቁጥር ያላቸው ክለቦች እንደዚሁም ምግብ ቤቶችን ጨምሮ በድርጊቱ ተሳትፎ የነበራቸው ከረንቦላ ቤቶች ታሽገዋል።

ከትግራይ ተወላጅ የንግድ ማህበረሰብ አባላት ጋር በተካሄደው ውይይት የአዲስ አበባ ብልጽግና ፓርቲ የሴክተር ተቋማት ዘርፍ ሀላፊ የሆኑት ሰለሞን ኃይሌ ፥ ሰላማዊ የሆነው የንግዱ ማህበረሰብ እንደማንኛውም ኢትዮጵያዊ መብቱ ይጠበቃል ፤ ከንግዱ ማህበረሰብ የሚጠበቀው እራሱን ከህወሓት ቡድን ማራቅ ብቻ ነው ብለዋል፡፡

"የትግራይ ተወላጅ የሆነ በሙሉ በሀገር የተከሰተውን ህመም ሊጋራ ይገባል" ሲሉም ተናግረዋል፡፡

ያንብቡ : telegra.ph/Addis-Ababa-07-28

Credit : #ETHIO_FM

@tikvahethiopia

200 ገደማ የሚሆኑ የትግራይ ክልል ተወላጅ የወልዲያ ዩኒቨርሲቲ ተማሪዎች ነገ ወደ ሰመራ ዩኒቨርስቲ እንደሚሸኙ ተገለፀ።

ወልዲያ ዩኒቨርሲቲ ዛሬ ለኢትዮጵያ ኢንሳይደር ድረገፅ በሰጠው ቃል፥ ተማሪዎቹን ለመሸኘት የወሰነው፤ ለመጀመሪያ ዓመትና ነባር የጤና ሳይንስ ተማሪዎቹ ከትላንት ጀምሮ ላልተወሰነ ጊዜ እረፍት መስጠቱን በይፋ ማሳወቁን ተከትሎ ነው። 

የወልድያ ዩኒቨርሲቲ ፕሬዝዳንት ዶ/ር አበበ ግርማ፥ በአካባቢው ባለው ጦርነት የደህንነት ስጋት በመኖሩ ተማሪዎቹ ወደ የቤተሰቦቻቸው እንዲመለሱ ከውሳኔ ላይ መደረሱን ገልጸዋል።

በዚህም መሰረት በአሁኑ ወቅት በዩኒቨርስቲው ግቢ ውስጥ የቀሩትን የትግራይ ክልል ተወላጅ ተማሪዎችን፤ በሰመራ በኩል ወደ ትግራይ ለመሸኘት መወሰኑን አስታውቀዋል።  

ዶ/ር አበበ፥ ዩኒቨርስቲው ከሳይንስና ከፍተኛ ትምህርት ሚኒስቴር ጋር መወያየቱን ገልፀው፥ የወልድያ ዩኒቨርሲቲ ተማሪዎቹን ሰመራ ዩኒቨርስቲ ካደረሰ በኋላ የሚኒስቴር መ/ቤቱ ተወካዮች ተማሪዎቹን ለመረከብ ከስምምነት ላይ መድረሳቸውን አሳውቀዋል።

በስምምነቱ መሰረት የወልድያ ዩኒቨርስቲ ተማሪዎቹን ነገ ወደ ሰመራ ዩኒቨርስቲ ለማጓጓዝ 4 የራሱን አውቶብሶች መመደቡን ገልፀዋል።

በአካባቢ ባለው የጸጥታ ችግር ምክንያት ተማሪዎቹ በወሎ አድርገው ሰመራ እስከሚገቡ ድረስ በመከላከያ ሰራዊት እና በአማራ ክልል ልዩ ኃይል እጀባ እንደሚደረግላቸው አመልክተዋል። 

በወልድያ አካባቢ ባለ የፀጥታ ስጋት የዩኒቨርስቲው ተማሪዎች ግቢውን ለቅቀው መውጣት የጀመሩት ካለፈው ቅዳሜ ነው።

በርካታ ተማሪዎች በራሳቸው ውሳኔ ዩኒቨርስቲውን ለቅቀው ወደ ቤተሰቦቻቸው መሄዳቸው፤ የመማር ማስተማር ሂደቱን እንዳስተጓጎለው የዩኒቨርስቲው አካዳሚክ ፕሬዝዳንት ዶ/ር ሱልጣን መሐመድ ተናግረዋል።

ምንጭ፡ ኢትዮጵያ ኢንሳይደር

@tikvahethiopia

#Shebelle

ሸበሌ የምትሰኝ የኢትዮጵያ መርከብ ከ11 ሺህ ሜትሪክ ቶን በላይ ስኳርና ሩዝ ይዛ በርበራ ወደብ መድረሷን የኢትዮጵያ የባህር ትራንስፖርትና ሎጅስቲክስ አገልግሎት ድርጅት አስታውቋል።

መርከቧ ከህንድ ሀገር የጫነችውን ስኳርና ሩዝ ይዛ አሁን ላይ ኢትዮጵያ ድርሻ ባላት የበርበራ ወደበ እያራገፈች ነው።

በኢትዮጵያ የባሕር ትራንስፖርት ታሪክ የኢትዮጵያ መርከቦች ወደ በርበራ ወደብ ጉዞ ሲያደርጉ ከ20 ዓመታት በኋላ ሸበሌ መርከብ ሁለተኛ ናት።

ባለፈው ሰኔ ወር መጨረሻ ከ20 ዓመታት በኋላ ጊቤ መርከብ በበርበራ ወደብ የመጀመሪያ ጉዞ አድርጋ ነበር፤ በዚህ ጉዞም 11 ሺ 200 ሜትሪክ ቶን የፍጆታ ዕቃ ለሶማሌላንድ ገበያ አጓጉዛ ነበር።

NB : በበርበራ ወደብ፤ ዲ ፒ ወርልድ 51 በመቶ፣ ሶማሌላንድ 30 በመቶ እና ኢትዮጵያ ደግሞ 19 በመቶ ድርሻ እንዳላቸው ከዚህ ቀደም መገለፁ ይታወሳል ።

#አልአይን_ኒውስ

@tikvahethiopia

#AddisAbaba

በትግራይ ክልል ኤርትራዊያን ስደተኞች ላይ እየደረሰ ነው ያሉትን ግፍና እንግልት በመቃወም በአዲስ አበባ የሚገኙ ኤርትራዊያን ስደተኞች ሠላማዊ ሠልፍ ማካሄቸው ተሰማ።

ኤርትራዊያኑ ስደተኞች በአዲስ አበባ በሚገኘው የተባበሩት መንግስታት የስደተኞች ድርጅት መስሪያ ቤት ተገኝተው ነው ድምፃቸውን ያሰሙት።

'በኤርትራዊያን ስደተኞች ላይ የሚደረግ ጥቃት ይቁም፣ ዓለም አቀፉ ማህበረሰብ ድምፃችንን ይስማ' እና ሌሎችንም መፈክሮች በመያዝ የተቃውሞ ድምጻቸውን አሰምተዋል ተብሏል።

ዓለም አቀፉ ማህበረሰብ በትግራይ የሚገኙ ኤርትራዊያን ስደተኞችን ከሚደርስባቸው ግፍና በደል እንዲታደጋቸው ጥሪ አቅርበዋል።

ስደተኞቹ ከዚህ ቀደምም በተለያየ ጊዜያት ለዓለም አቀፉ ማህበረሰብ እንዲሁም ለተመድ የስደተኞች ድርጅት (UNHCR) በደብዳቤና በአካል በመገኘት መልዕክት ብናስተላለፍም ምላሽ አላገኘንም ብለዋል።

በትግራይ ክልል በሚገኙ ስደተኞች ላይ ግፍና እንግልቱ በከፍተኛ ሁኔታ እየጨመረ በመምጣቱ፣ ስደተኞች እየተገደሉና በየጫካው በሽሽት ላይ ያሉትም ለከፋ ችግር እየተጋለጡ በመሆኑ አፋጣኝ መፍትሄ ይሰጠን ሲሉ ጠይቀዋል። #ENA

@tikvahethiopia

"ግጭት ይብቃ፤ ሰላም ይንገስ" - የጭልጋ አባቶች

በአይከል ከተማና አካባቢዋ በአኩን ሰዓት አንፃራዊ ሰላም እንዳለ ተገልጿል።

ይህን ተከትሎ ሁሉም አካል ስለ ሰላም የበኩሉን ሃላፊነት ሊወጣ እንደሚገባ በትላትናው ዕለት የጭልጋና አካባቢዋ የሃይማኖት አባቶች በከተማዋ ጎዳናዎች በመዘዋወር ጥሪ ያቀረቡ ሲሆን የምህላ ፀሎትም በከተማዋ ተጀምሯል።

ከዚህ በፊት ተቋርጦ የቆየው የማህበራዊ፣ ኢኮኖሚያዊና ፖለቲካዊ እንቅስቃሴዎች ለማህበረሰቡ ክፍት ሁነው አገልግሎት እንዲሰጡም የሃይማኖት አባቶቹ መልዕክታቸውን አስተላልፈዋል።

በአማራ እና ቅማንት ወንድማማች ህዝቦች መካከል ልዩነት የሚሰብኩና ግጭትን ለማባባስ የሚሰሩ ሃይሎች ከድርጊታቸው እንዲታቀቡ መልዕክት ተላልፏል። ስለጭልጋና አካባቢዋ ሰላም ይመለከተኛል የሚል አካል ሁሉ ስለ አካባቢው ሰላም አብክረው እንዲሰሩ አሳስበዋል።

ከመተማ ወረዳ ኮሚኒኬሽን ቢሮ በተገኘው መረጃ የታወጀው ምህላ ፀሎት ለተከታታይ ቀናት የሚቆይ ይሆናል ተብሏል።

@tikvahethiopia