በግልገል በለስ ከተማ የጦር መኮንኖች እና የቤኒሻንጉል ጉሙዝ ክልል አመራሮች እየተወያዩ ነው !

በመተከል ዞን ግልገል በለስ ከተማ ያሉ መስሪያ ቤቶች በሙሉ ተዘግተው እንደሚገኙ አል ዐይን ኒውስ ዘግቧል። ከተማዋ በፀጥታ ውስጥ ነች ተብሏል።

የሀገር መከላከያ ሠራዊት ሕብረት መረጃ ዋና መምሪያ ሀላፊ ሌ/ጄ አስራት ዴኔሮ ከቤኒሻንጉል ጉሙዝ ክልል ርዕሰ መስተዳድር አሻድሊ ሀሰንና ከምክትላቸው ጌታሁን አብዲሳ ጋር በዝግ እየተወያዩ ናቸው።

በግልገል በለስ ከተማ ውስጥ ስታር ሆቴል እየተካሄደ ባለው ዝግ ስብሰባ የዞን አመራሮች እንዲወጡ መደረጉን ታውቋል።

የመተከል ዞን ዋና አስተዳዳሪ አቶ አትንኩት ሽቱን ጨምሮ ሌሎች አመራሮች ውጭ እንዲሆኑ መደረጉን ተሰምቷል።

የዞኑ ዋና አስተዳዳሪ ጠዋት ላይ የክልሉ  ከፍተኛ አመራሮች ከዞኑ አመራሮች ጋር ውይይት እንዳደረጉ አረጋግጠዋል።

አቶ አትንኩት እንዳሉት የሀገር መከላከያ ሠራዊት ሕብረት መረጃ ዋና መምሪያ ሀላፊ ሌ/ጄኔራል አስራት ዴኔሮን ጨምሮ ሌሎች ከፍተኛ የጦር መሪዎች በመተከል እየተወያዩ ነው፡፡

በመተከል ከሚፈጸመው የንጹኃን ጭፍጨፋ ጋር በተያያዘ የዞኑ ብልጽግና ፓርቲ ጽ/ቤት ኃላፊን ጨምሮ በሕግ ቁጥጥር ስር የዋሉ አመራሮች መኖራቸውን ተከትሎ ፣ ሌሎች አመራሮችስ እጃቸው የለበትም ወይ የሚል ጥያቄ የተነሳላቸው አቶ አትንኩት የተጠረጠሩት አመራሮች ተይዘዋል እኛ ስራ እየሰራን ነው ብለዋል፡፡

አሁን ላይ የመከላከያ ከፍተኛ አመራሮች ከአቶ አሻድሊ እና አቶ ጌታሁን ጋር እየተወያዩ መሆኑንም አቶ አትንኩት አረጋግጠዋል፡፡

በግልገል በለስ ስታር ሆቴል ውስጥ የሚደረገውን ውይይት ተከትሎ የተለያየ እርምጃ የሚወሰድባቸው የከፍተኛ አመራሮች እንደሚኖሩ ይጠበቃልም ብለዋል፡፡

ምንጭ፦ አል ዓይን ኒውስ
@tikvahethiopiaBOT

#BulenWoreda

ኢሰመኮ በቤኒሻንጉል ጉሙዝ ክልል ፣ መተከል ዞን፣ ቡለን ወረዳ፣ በኩጂ ቀበሌ ታኅሣሥ 13 በአሰቃቂ ሁኔታ የተገደሉ ሰዎች ቁጥር 207 መድረሱን ገልጿል።

የሟቾችን ማንነት የማጣራቱ ስራ በመታወቂያ እና ከጥቃቱ በተረፉ ሰዎች ምስክርነት አማካኝነት መጀመሩ ታውቋል።

በዚህም መሰረት፣ በጥቃቱ ሕይወታቸው ካለፉ አዋቂዎች መካከል 133ቱ ወንዶች ሲሆኑ 35ቱ ሴቶች ናቸው።

አንድ የስድስት ወር ሕጻንን ጨምሮ በጥቃቱ አስራ ሰባት ሕጻናት ተገድለዋል። ቀሪ ሃያዎቹ አዛውንቶች መሆናቸው ተረጋግጧል።

ከሟቾች መካከል ሁለቱ በቡለን ሆስፒታል የህክምና እርዳታ እየተደረገላቸው እያለ ታኅሣሥ 15 ቀን 2013 ዓ.ም. የሞቱ መሆናቸውን፣ ኮሚሽኑ አስታውቋል።

በቡለን ከሚገኙ አራት ቀበሌዎች (ጭላንቆ ፣ በኩጂ ፣ ዲሽባኮ እና ባር) የተፈናቀሉና ቁጥራቸው ከ500 የሚበልጡ ሰዎች በጋሌሳ ቀበሌ በሚገኝ የአውቶቡስ መናኃሪያ እንዲሁም በአስር ሺዎች የሚቆጠሩ ሰዎች ቀበሌውን ጥለው ከ40 ኪ.ሜ. በላይ በእግራቸው በመጓዝ ወደ ቡለን ከተማ በመግባት ላይ ይገኛሉ ሲል ገልጿል።

የቡለን ከተማ ነዋሪዎች እንዲሁም በጎ ፈቃደኛ ወጣቶች ተፈናቃዮችን እየመገቡ ነው።

ተፈናቃዮች ወደ ቀዬአቸው እስከሚመለሱ ድረስ የሚቆይ አፋጣኝ ድጋፍ እንደሚያስፈልግ ኢሰመኮ ያስታወቀ ሲሆን ተፈናቃዮች እና ተጎጂዎች በሰብአዊ እርዳታ እጥረት ምክንያት ለተጨማሪ አደጋ እንዳይጋለጡ ለመከላከል የሚመለከታቸው አካላት ለጉዳዩ ትኩረት እንዲሰጡ አሳስቧል።

@tikvahethiopia

#BONGA

ትላንት የብሔራዊ ምርጫ ቦርድ የደቡብ ምዕራብ ኢትዮጵያ ህዝቦች ህዝበ ዉሳኔ መስጫ ቀን መግለጹን ተከትሎ ምሽቱን በቦንጋ ከተማ የሚገኙ ወጣቶች እንዲሁም የከተማይቱ ነዋሪዎች ደስታቸውን አደባባይ ወጥተው ሲገልፁ አምሽተዋል።

የደቡብ ምዕራብ ህዝበ ውሳኔ ድምፅ መስጫ ግንቦት 28 ቀን 2013 ዓ/ም እንዲሆነ የምርጫ ቦርድ ረቂቅ የጊዜ ሰሌዳ ይጠቁማል።

Via Kafa Zone Communication
@tikvahethiopia @tikvahethiopiaBOT

* የደቡብ ክልል ትምህርት ቢሮ !

የትምህርት ቤቶችን ድጎማ በጀት (school grant) ለግል ጥቅማቸው ያዋሉ የትምህርት ር/መምህራን፣ መምህራንና በጽ/ቤት ባለሙያዎች ላይ ህጋዊ እርምጃ መወሰዱ የደቡብ ክልል ትምህርት ቢሮ ገለፀ፡፡

በባስኬቶ ልዩ ወረዳ ትምህርት ጽ/ቤት በዳብፃ የመጀመሪያ ደረጃ ትምህርት ቤት ር/መምህር፣ ሁለት መምህራን፣ የወረዳው ት/ጽ/ቤት ልማት ዕቅድ አስተባበሪያ፣ የአንድ መምህር ባለቤትን ጨምሮ 5 አምስት ግለሰቦች ምናባዊ ትምህርት ቤት በመፍጠርና የሌለ ተማሪ በመመዝገብ ህገ-ወጥ የባንክ አካውንት በመክፈት 237,680.00 ለግል ጥቅማቸው ማዋላቸውን ከወረዳው ፀረ-ሙስና በደረሰን ጥቆማ መሰረት የክልሉ ትምህርት ቢሮ ግለሰቦቹን ለህግ እንዲቀርቡ አድርጓል፡፡

በተደረገው የህግ ማጣራት ሥራ የባስከቶ ልዩ ወረዳ ከፍተኛ ፍርድ ቤት ወንጀለኛ ሆነው በተገኙ ግለሰቦች ላይ በ25/03/2013 ዓ.ም በዋለው ችሎት በእያንዳንዳቸው ላይ ከአንድ ዓመት ተኩል እስከ አራት አመት ጽኑ እስራትና የገንዘብ መቀጮ እንዲቀጡና የወሰዱትን ገንዘብ ለመንግስት ተመላሽ እንዲያደርጉ መወሰኑን የደቡብ ክልል ትምህርት ቢሮ አስታውቋል፡፡

@tikvahethiopia @tikvahethiopiaBOT

#Tigray

• የኮሪያ ሪፐብሊክ ምስራቅ ሱዳን ውስጥ ለሚገኙ የኢትዮጵያ ስደተኞች የ300 ሺ ዶላር ድጋፍ ማድረጓን የሱዳን ዜና አገልግሎት በድረገፁ አስነብቧል።

የኮሪያ ሪፐብሊክ መንግስት የሱዳን ህዝብ እና የሱደን መንግስት ኢትዮጵያውያን ስደተኞችን ተቀብሎ ስላስተናገደ ምስጋናውን አቅርቧል።

• የስዊድን መንግስት በትግራይ ክልል ለሰብዓዊ ድጋፍ የሚውል 6 ሚሊዮን ዶላር ድጋፍ ማድረጉን አሳውቋል።

ድጋፉ በIOM ፣ WFP፣ ICRC አማካኝነት ለተጎጂዎች እንደሚደርስ እንደሆነ የስዊድን ኤምባሲ ገልጿል።

@tikvahethiopiaBOT

#FDREDfeneseForce

መከላከያ በወሰደው እርምጃ የተደመሰሱ ከፍተኛ የሕወሓት አመራሮች መኖራቸውን ጄኔራል ብርሃኑ ጁላ አስታወቁ፡፡

ጄኔራል ብርሃኑ ጁላ የሞቱ አመራሮች መኖራቸውን ተናግረው ይህም ወደፊት ለሕዝብ ይፋ እንደሚደረግ አስታውቀዋል፡፡

በመተከል ዞን ውስጥ በተደጋጋሚ እያጋጠመ ያለውን የዜጎች ጭፍጨፋ ለማስቆም የመከላከያ በሽፍታዎች ላይ ጠንካራ እርምጃ እየወሰደ ነው ብለዋል፡፡

እንደ ጄኔራል ብርሃኑ ገለጻ ሌ/ጄኔራል አስራት ዴኔሮም ወደ መተከል የሄዱት ለዚሁ ተግባር ነው፡፡

እስካሁንም ሀገር መከላከየ በርካታ ጸረ ሰላም ኃይሎች ላይ እርምጃ እንደወሰደ ጄኔራሉ ገልጸዋል፡፡ ይሁንና ይህ ሥራ በጸጥታ ኃይል ብቻ የሚሰራ እንዳልሆነና የፖለቲካ ስራ እንደሚጠይቅ ነው ያብራሩት፡፡

በአመራሮች መካከል ያለው የፖለቲካ ሽኩቻ፣መሬትህ ሊነጠቅ ነው በማለት ሽፍቶችን ማደራጀት እንዲሁም የውጭ ኃይሎች ተሳትፎ ለአካባቢው ቀውስ ዋነኛ ምክንያቶች እንደሆኑም አንስተዋል፡፡

ይህም ነገሮችን እንዳወሳሰበ ነው ጄኔራሉ ያነሱት፡፡ ሽፍቶቹ እርምጃ ሲወሰድባቸው ጎረቤት ሀገር ጭምር እየሄዱ እንደሚሸሸጉም ጄኔራል ብርሃኑ ተናግረዋል፡፡

ነባሩ (Indigenous) ማሕበረሰብ እንዲሁም ‘ደገኛው’ የየራሳቸው ችግር እንዳለባቸውም የተናገሩ ሲሆን ‘ደገኛው’ መተከል የኛ ነው የሚል ፖለቲካ የማራመድ ከነባር ብሔረሰቦች ደግሞ የጉሙዝ ሽፍቶች ንጹኃንን የመግደል ተግባሮች እንደሚፈጸሙ ገልጸዋል፡፡

ዋናው የፖለቲካው መበላሸት ስለሆነ ለዘላቂ መፍትሔ ፖለቲካዊ ሥራ መስራት እንደሚያስፈልግ ነው የተናገሩት፡፡

ምንጭ፦ የኢትዮጵያ ሳተላይት ቴሌቪዥን (አል ዓይን ኒውስ)
@tikvahethiopia @tikvahethiopia