🔈 #የመምህራንድምጽ

" መምህራን እየተራቡ ስለትምህርት ጥራት ማዉራት አግባብ አይደለም " - የደቡብ ኦሞ ዞን መምህራን

" በዚህ ደረጃ ክፍያ ይዘገያል ብለን ባናስብም ችግሩ ካለ በቅርብ ይፈታል " - የዞኑ ትምህርት መምሪያ ሀላፊ

ከሰሞኑ በተደጋጋሚ በደረሰን የቅሬታ መልእክት በደቡብ ምእራብ ኢትዮጵያ ክልል የደቡብ ኦሞ ዞን መምህራን ላለፉት ሁለት ወራት ደሞዝ እንዳልተከፈላቸዉ በመግለጽ በተለያዩ ፕሮግራሞች ውስጥ መሳተፍ እንዳልቻሉ ነግረዉናል።

መምህራኑ እንደሚሉት አሁን ላይ ከፊሉ በመንግስት አቅም ማሻሻያ ፕሮግራሞች ግማሹ ደግሞ በራሱ ፍላጎት ወደተለያዩ ዩኒቨርሲቲዎች ቢያቀናም ደሞዝ አለመለቀቁን ተከትሎ ግን ችግር ላይ ወድቀዋል።

አሁን ላይ በገቡባቸዉ ዩኒቨርሲቲዎች ዉስጥ አላማቸዉን ካለማሳካታቸዉ ባለፈ ጥለዋቸዉ የመጡ ቤተሰቦቻቼዉ ረሀብ ላይ መዉደቃቸዉን ተከትሎ የሄዱበትን የትምህርትና ስልጠና ፕሮግራሞች ጥለዉ ለቀን ስራ መዳረጋቸዉን ይገልጻሉ።

ከዚህ በተጨማሪ በትራንስፖርት ችግር ምክኒያት ብዙ መምህራን በሚያስተምርበት አካባቢ ቢቀሩም በእንቅርት ላይ እንዲሉ ባሉበት አካባቢም የወባ ወረሽኝ አስቸጋሪ ሆኖባቸዋል።

ችግሩን የመንግስት አካላት ያዉቁታል የሚሉት የጎሪጌሻ የሜኒት ማጅና ቱም የጎልዲያና ሻሻ እንዲሁም የጋቺት እና ሱርማ ወረዳ  ቅሬታ አቅራቢዎች " መምህራን እየተራቡ ስለትምህርት ጥራት ማዉራት አግባብ አይደለም " ብለዋል።

በጉዳዩ ላይ ከቀናት በፊት ያነጋገርናቸዉ የዞኑ ትምህርት መምሪያ ሀላፊዉ አቶ  በበኩላቸዉ በዚህ ደረጃ ክፍያ ይዘገያል ብለን ባናስብም ችግሩ ካለ በቅርብ ይፈታል ብለዋል።

ሀላፊዉ አክለዉም ምናልባትም ችግሩ የበጀት ከሆነ አሁን ላይ በየወረዳዉ ግብር እየተሰበሰበ በመሆኑ በተቻለ ፍጥነት ችግሩ  ይፈታል በማለት የደሞዝ ችግሮ በቅርቡ እንደሚፈታ ገልጸዉልናል።

#TikvahEthiopiaFamilyHW

@tikvahethiopia

🔈 #የአርሶአደሮችድምጽ

ሲዳማ !

" የማዳበሪያ ችግር የለም ተብሎ በሚዲያ ቢነገርም በቂ ማዳበሪያ እየደረሰን አይደለም " - የሀዋሳ ዙሪያ ወረዳ አርሶ አደሮች

ከሰሞኑ " ዘር ካልገዛችሁ ማዳበሪያ አይሰጣችሁም ተባልን " ያሉ የሀዋሳ ዙሪያ አርሶ አደሮች ቅሬታ ማቅረባቸዉን ዘግበን ነበር።

በወቅቱ  የማዳበሪያ ችግር እንደሌለና ወደግብርና ቢሮ በመምጣት መዉሰድ እንደሚቻል ከምርጥ ዘር ጋር በተያያዘ አርሶአደሩን የሚጠቅም አካሄድ መሆኑን ይሁንና ገበሬዉ የራሱ ዘር ካለዉ እንደማይገደደ ተገልጾም ነበር።

ይሁንና ከመረጃዉ በኋላ " የማዳበሪያ ችግር የለም " ተብሎ በሚዲያ ምላሽ ከመሰጠቱ በላይ በስብሰባ ወቅት " መጋዝናችን ሙሉ ነዉ " ብንባልም በአግባቡ እየተሰጠን አይደለም ሲሉ በድጋሜ የአካባቢዉ አርሶአደሮች ቅሬታ አቅርበዉልናል።

" አሁን ላይ የዘር ወቅት እያለፈ በመሆኑ ከፍተኛ ስጋት ዉስጥ ገብተናል " የሚሉት አርሶ አደሮቹ " አራትና አምስት  ኩንታል ለሚያስፈልገዉ አምስት ሄክታር የለሰለሰ ማሳ አንድ ኩንታል ብቻ ስለምን እንደሚሰጠን አይገባንም " በማለት ቅሬታቸውን ገልጸዋል።

" ማዳበሪያዉ በቂ አለመሆኑን የአካባቢዉ የግብርና ባለሙያዎች ያውቃሉ። እንደኛ ከማዘን ዉጭ መፍትሄ መስጠት አልቻሉም " ሲሉ ገልጸዉ ጉዳዩ በአመራሩ እጅ መያዙን አስረድተዋል።

ከዚህ በተጨማሪም ፥ " ቀኑን ሙሉ ስራ በመፍታት መጋዝን በር ላይ የሚዉለዉ አርሶ አደር ሀያ ሰላሳ ሰዎች ከተስተናገዱ በኋላ ወደቤታችሁ ሂዱ ይባላል በማለት መጋዝኑን የሞላዉ ማዳበሪያ ለማን ነዉ ? " በማለት ጠይቀዋል።

ከሳምንት በፊት ለቲክቫህ ኢትዮጵያ " የማዳበሪያ ችግር የለም ከአካባቢዉ አርሶ አደር ጋርም የጋራ መግባባት ላይ ተደርሷል " ያሉት የወረዳዉ አስተዳዳሪ  " መሬቱን ያዘጋጀ ገበሬ የፈለገዉን ያክል ማዳበሪያ መዉስድ ይችላል " በማለት አንዳች ቅሬታ ያለበት አርሶ አደር ካለ ሊያናግረን ይችላል ማለታቸዉ ይታወሳል።

#TikvahEthiopiaFamilyHW

@tikvahethiopia

🔈#Konso

" ታጣቂዎቹ ተመልሰው ይመጣሉ በሚል አሁንም በፍርሀት ውስጥ ነን " - የሰገን ዙሪያ ወረዳ ነዋሪዎች

ከሰሞኑ በወረዳው ዋና ከተማ ሰገን በድንገት ከወደደራሼ አቅጣጫ ተነስተው መጥተዋል ከባሉ ታጣቂዎች በፖሊስ ፣ በከተማው አስተዳደርና ፣ በንጹሀን ዜጎች ላይ በከፈቱት ጥቃት ከ10 በላይ ሰዎች ሲገደሉ በርካቶች መቁሰላቸዉን ተሰምቷል።

ቅዳሜ አመሻሽ ጀምሮ ጥቃቱ መከፈቱን የገለጹት ነዋሪዎች በከተማዉ ውስጥ የነበሩ ፖሊሶችና የአስተዳደር ቢሮ የጥቃቱ ኢላማና ቀዳሚ ሰለባ ከመሆናቸው በላይ የመጀመሪያ ዙር ጥቃት እንደተፈጸመ ድጋፍ የሚሰጥ ሀይል ከተለያዬ ቦታ ወደስፍራዉ በፍጥነት አለመላኩን ተከትሎ ሁለተኛ ዙር ጥቃት በበነጋታዉ ጠዋት መከፈቱን አስረድተዋል።

የወረዳው ነዋሪዎች " የሰው ነፍስና በርካታ ንብረት መዳን ሲችል ጉዳት ደርሷል " ሲሉ ገልጸዋል።

እስከእሁድ ጠዋት በቀጠለዉ ተኩስ ሱቆች መዘረፋቸውን ፣ ቤቶች መቃጠላቸዉና አካባቢው አስፈሪ መልክ መያዙን ተከትሎ አሁን ላይ በርካታ ሴቶችና ህጻናት ወደአጎራባች መንደሮች እየተሰደዱ መሆናቸውን ተናግረዋል።

" ከሀይቤና ቀበሌ በመነሳት የተለመደ የከብት ዘረፋና የነብስ ማጥፋት ወንጀሎች ነበሩ " ያሉት ነዋሪዎቹ " ካሁን በፊት ሁኔታውን መንግስት ይቆጣጠረዉ ዘንድ ጥያቄ ማንሳታቸውን ለአብነት እንኳን ከሳምንት በፊት በወረዳው አስተዳደር ከማህበረሰቡ ጋር በነበረው ስብሰባ መነሳቱን " ገልጸዋል።

አሁንም ቢሆን ድንገት በመምጣት ጥቃት ያደርሳሉ የሚል ግምት እንዳላቸው ተናግረዋል።

" ሁኔታዉ ከቁጥጥር ዉጭ ከመሆኑ በፊት ከወረዳው ባለፈ የዞንና የክልል አመራሮች ጣልቃ መግባት አለባቸው " በማለት " ቤታቸዉ ለተቃጠለባቸውና ንብረታችዉ ለወደመባቸው ግለሰቦች ዝናብ ላይ በመሆናቸው አፋጣኝ ድጋፍ እንፈልጋለን " ሲሉ ጥሪ አቅርበዋል።

" ነዋሪዎቹ የመንግስት ኃይሎች ለእርምጃ መዘግየት ዋጋ አስከፈለን ሲሉም " አክለዋል።

ግጭቱን አስመልክተዉ የሰገን ዙሪያ አስተዳዳሪ አቶ ኡርማሌ ኡጋንዴ ለ " ኢትዮጵያ ኢንሳይደር " ድረገጅ በሰጡት ቃል አስራ አንድ ሰው መሞቱን ጠቁመዋል።

ነዋሪዎቹ ግን የሟቾቹን ቁጥር አስራ ሶስት በማድረስ ስምንቱን ነዋሪ አምስቱ ደግሞ ፖሊስ መሆናቸዉን ገልጸዉ ከዚህም ሊያልፍ ይችላል ብለዋል።

አሁን ላይ ከወረዳዉ ባለፈ በዞኑ ደረጃ የኮንሶ ዞን የሀዘን መግለጫ በማዉጣት ሁኔታዉን ለመቆጣጠር እንቅስቃሴ ላይ መሆኑን የገለጸ ሲሆን የዞኑን ህዝብ ግንኙነት ቢሮና የፖሊስ መምሪያ ለማነጋገር ያደረግነዉ ጥረት አልተሳካም።

ዞኑ " ጽንፈኛ እና አሸባሪ " ያላቸው ኃይሎች በኮንሶ ዞን የሰገን ዙሪያ ወረዳ በፈጸሙት ጥቃት ንጹሃን ሰዎችና የፖሊስ አባላት መገደላቸውን አረጋግጧል።

ምን ያህል ሰው እንደተገደለ የሰጠው ቃል የለም።

#TikvahEthiopiaFamilyHW

@tikvahethiopia