ውድ ቤተሰቦቻችን ፤ ትላንትና ምሽት ከላክንላችሁ የድጋሜ የጥንቃቄ መልዕክት በኃላ በርካታ ሰዎች በኦንላይን የማጭበርበር ስራ ገንዘባቸው ተዘርፎ የውሃ ሽታ መሆኑን አመልክተዋል።

ለአብነት ከ150 ሺህ ብር እስከ 300 ሺህ ብር ከዚህም ከፍ ሲል እስከ 470 ሺህ ብር በቀናት ውስጥ የተጭበረበሩ ሰዎችን መልዕክት ተቀብለናል።

አጭበርባሪዎቹ ፦
* " የኦንላይን ስራ እናሰራችኋለን፣ "
* " የፎሬክስ ትሬዲንግ ስራ እናሰራለን "
* " በትንሽ ብር ኢንቨስት በማድረግ ያለ ብዙ ድካም ትርፋማ ትሆናላችሁ "
* " ይሄን ያህል ገንዘብ ላኩና ስራ ሰርታችሁ የከፈላችሁትን በእጥፍ አግኙ " በማለት በተደራጀ መልኩ በዋትሳፕና በቴሌግራም የማጭበርበር ስራ የሚሰሩና የበርካቶችን ገዘንብ እየዘረፉ በመሆኑ በድጋሜ ከየትኛውም የማታውቁት ሰው " ስራ እናሰራችሁ " በሚል የሚመጣላችሁን የዋትስአፕና ቴሌግራም መልዕክት አትመልሱ።

ሰዎች እንዴት እየተጭበረቡ እንደሆነ በቀጣይ ይናቀርባለን።

@tikvahethiopia

" ፍርዱ ለሚዲያ 16 ዓመት ከተባለ በኃላ ወደ 10 ዓመት ዝቅ እንዳለ ሰምቻለሁ " - ጸጋ በላቸው

" ጉዳዩ ለቢሮዉም ሆነ ለኔ አዲስ ነው " - ወ/ሮ ወይንሸት ብርሀኑ

በሀዋሳ ከተማ የዳሽን ባንክ ሰራተኛ ከሆነችዉ ጸጋ በላቸዉ ጋር በተያያዘ በጠለፋና አስገድዶ መድፈር ወንጀል ተከሶ  የነበረው ኮንስታብል የኃላመብራት ወ/ማርያም " ለብዙዎች አስተማሪ ይሆናል " በተባለ መልኩ የ16 አመት ጽኑ እስራት እንደተፈረደበት ይታወሳል።

ይሁንና ይህ ለሚዲያ የተገለጸው ፍትህ ከተበዳዩዋ እውቅና ውጭ በሆነ መልኩ የእስራት ፍርዱ ከ16 አመት ወደ 10 መቀነሱን እንደሰማች በሶሻል ሚዲያ ባስተላለፈችዉ በዕንባ የታጀበ ቅሬታ ገልጻለች።

ወይዘሪት ጸጋ ፤ ጉዳዩን ለማወቅ ብዙ ድካም እንደነበረዉና በመጨረሻ የሰማችዉ ጉዳይ እጅግ እንዳሳዘናት በመግለጽ አቤቱታዋን አሰምታለች።

ጸጋ ፤ " የፍርድ ሂደቱ በጥሩ ሂደት ሄዶ ፍርድ ቤት 16 ዓመት ተፈርዶበታል በሚል ለኔ ውሳኔ ሰጥቶኝ ነበር ፤ አሁን ግን እኔ በማላውቅበት ሁኔታ የፍርዱ ውሳኔ ይግባኝ ብሎ #እንደተስተካከለ ሰምቻለሁ፤ ይህ ውሳኔ መቼ እንደተላለፈ አልተነገረኝም ለግል ጉዳዬ የውሳኔ ወረቀት እንዲሰጠኝ  በተደጋጋሚ ወደ ፍርድ ቤት በምደውልበት ጊዜ ምላሽ እየተሰጠኝ አልነበረም ጉዳዩን አጥብቄ በተደጋጋሚ ስጠይቅ ውሳኔው በይግባኝ እንደተስተካከለ ተነገረኝ " ስትል አስረድታለች።

ውሳኔው አሁን ላይ ወደ 10 ዓመት ዝቅ እንዳለ የገለፀችው ጸጋ ፤ በድርጊቱ እጅግ እንዳዘነችና ካሳለፈችው የስቃይ ሁኔታ ጋር በፍፁም እየሚገባ እንዳልሆነ በእምባ ታጅባ ገልጻለች።

ከዚህ ባለፈ ህዝብ የማያውቀው ብዙ ነገር እንደተፈፀመ ፤ ከጠለፋው እገታ ከተለቀቀች በኃላ በማታውቀው ምክንያት ታስራ እንደነበር አመልክታለች።

ፍርዱ ለሚዲያ 16 ዓመት ከተባለ በኃላ ወደ 10 ዓመት ዝቅ እንዳለ ገልጻ ፤ " ይህ አይነት ተግባር ለቀጣይ ምን እንደሚያስተላልፍ አላውቅም " ብላለች።

ውሳኔው ተግቢና ትክክል እንዳልሆነ ፤ በድብቅ ሊሆን እንደማይገባው፣ እንዲከላከሉም ሊደረጉ እንደሚገባ አስገንዝባለች።

ቲክቫህ ኢትዮጵያ ጉዳዩን በተመለከተ ጥያቄ ያቀረበላቸዉና የጸጋን ጉዳይ ሲከታተለዉ በነበረዉ የሀዋሳ ከተማ ሴቶችና ህጻናት ቢሮ ውስጥ የሴቶችና ህጻናት መብትና ደህንነት ማስጠበቅ ቡድን መሪ የሆኑት ወይዘሮ ወይንሸት ብርሀኑ ጉዳዩ ለቢሮዉም ሆነ ለእርሳቸዉ አዲስ መሆኑን ገልጸዋል።

ወይዘሮ ወይንሸት ፤ ጉዳዩን እንደሚከታተሉትና የተፈጠረዉን ጉዳይ እንደሚያጣሩ በመግለፅ ለቲክቫህ ኢትዮጵያ ቃል ገብተዋል።

መረጃዉን አጠናቅሮ የላከዉ የሀዋሳዉ ቲኪቫህ ኢትዮጵያ ቤተሰብ አባል ነዉ።

@tikvahethiopia

ለጨረታ የቀረቡ በአቃቂ ቃሊቲ ክ/ከተማ ወርቁ ሰፈር ሳይት የሚገኙ ቤቶች ተሰረዙ።

የተሰረዙት ጠቅላላ በሳይቱ ለጨረታ የቀረቡ ቤቶች ናቸው።

የአ/አ/ዲ/ግንባታ ሥራዎች ቢሮ እና የአ/አበባ ቤቶች ልማት ኮርፖሬሽን በመንግስት በጀት የተገነቡ የመኖሪያና የንግድ ቤቶችን በጨረታ ለተጠቃሚዎች ለማስተላለፍ በጨረታ አውጥቶ ነበር።

ይሁን እንጂ ለጨረታ ከወጡት ቤቶች ለልማት ተነሺዎች የተፈለጉ እንዳሉ ተመላክቷል።

በዚህም በአቃቂ ቃሊቲ ክ/ከተማ ወርቁ ሰፈር ሳይት የሚገኙ ጠቅላላ ከጨረታ ተሰርዘዋል።

በዚህ ሳይት ብቻ የተወዳደሩም ከመጋቢት 9/7/2016 ጀምሮ ማንነታቸውን የሚገልፅ መታወቂያ በመያዝ ከፋይናንስ ክፍል сро መውስድ እንደሚችሉ ተነግሯል።

@tikvahethiopia

#UK

" ማንም ሰው ወደ #ሩዋንዳ ለመሄድ 3 ሺህ ፓውንድ ለማግኘት ብቻ ወደዚህ ለመምጣት የሚሞክር አይመስለኝም " - የገንዘብ ሚኒስትር ኬቨን ሆሊንራክ

ዩናይትድ ኪንግደም  (ዩኬ) በአገሯ የጥገኝነት ጥያቄያቸው ተቀባይነት ያላገኙ ስደተኞችን እስከ 3 ሺህ ፓውንድ በመክፈል ወደ ሩዋንዳ ልትልክ መሆኑን እንዳስታወቀች ቢቢሲ ዘግቧል።

ይህ አዲስ የስደተኞች ዕቅድ የጥገኝነት ጥያቄያቸው ያልተሳካላቸው ስደተኞች በበጎ ፈቃደኝነት ወደ አገራቸው እንዲመለሱና ለዚህም የሚሆን ገንዘብ ይሰጣቸዋል ተብሏል።

የጥገኝነት ጥያቄያቸው በዩናይትድ ኪንግደም ውድቅ ለተደረገባቸው ለማንኛውም ስደተኞች ክፍት ይሆናል ተብሏል።

ይህ ዕቅድ በተለይም ወደ አገራቸው መመለስ በማይችሉ ስደተኞች ላይ ያነጣጠረ ነው።

የዩናትድ ኪንግደም የገንዘብ ሚኒስትር ኬቨን ሆሊንራክ ምን አሉ ?

- ወደ ሩዋንዳ ለመሄድ ለተስማሙ ስደተኞች የሚከፈለው ክፍያ የህዝብን ገንዘብ በአግባቡ መጠቀም ይሆናል።

- እነዚህን ሰዎች ያለ ምንም ጥቅም እዚህ ማቆየት ከዚያ የበለጠ ገንዘብ ያስወጣናል።

- " እዚህ በህገወጥ መንገድ ከመጣችሁ በዚህች አገር መቆየት አትችሉም " የሚለውን መልዕክት ያስተላልፋል። መሰረታዊ ነጥብ ይህ ነው።

- ማንም ሰው ወደ ሩዋንዳ ለመሄድ 3 ሺህ ፓውንድ ለማግኘት ብቻ ወደዚህ ለመምጣት የሚሞክር አይመስለኝም።

የዩናይትድ ኪንግደም መንግሥት " በህገወጥ መንገድ ገብተዋል " የተባሉ ስደተኞችን ወደ ሩዋንዳ ተልከው ጥያቄያቸው ከዚያ የሚታይበትን የተለየ እቅድም ለመተግበር መንግሥት እየሞከረ ይገኛል ተብሏል።

ይህ እቅድ ከሩዋንዳ የደህንንት ስጋት ጋር በተገናኘ በፍርድ ቤቶች ታግዶ ነበር።

እነዚህን ሙግቶች ለማሸነፍ መንግሥት የምስራቅ አፍሪካዊቷን አገር አስተማማኝ አድርጎ የሚፈርጃት ‘የሩዋንዳ ሴፍቲ ቢል’ (የሩዋንዳ የደህንነት ረቂቅን) ለማጽደቅ እየሞከረ ይገኛል።

አዲሱ ዕቅድ ከዚህ ከነበረው የተለየ እንዲሁም በፈቃደኝነት ላይ የተመሰረተ እና በፓርላማው በሚጸድቀው ረቂቅ ላይ የተመሰረተ አለመሆኑንም ቢቢሲ ዘግቧል።

መረጃው የቢቢሲ እና ታይምስ ሬድዮ ነው።

@tikvahethiopia

#HoPR

በእስር ላይ የሚገኙት የሕዝብ ተወካዮች ምክር ቤት አባሉ አቶ ክርስቲያን ታደለ ያለመከሰስ መብት ተነሳ።

የሕዝብ ተወካዮች ምክር ቤት ዛሬ እያካሄደ ባለው ስብሳባ የአቶ ክርስቲያን ታደለን ያለመከሰስ መብት አንስቷል።

ዛሬ ያለ መከሰስ መብታቸው የተነሳው የተወካዮች ምክር ቤት አባል እና በምክር ቤቱ የመንግሥት ወጪ፣ አስተዳደር እና ቁጥጥር ጉዳዮች ቋሚ ኮሚቴ ሰብሳቢ አቶ ክርስቲያን ታደለ ከወራት በፊት ከቤታቸው ተወስደው መታሰራቸው የሚዘነጋ አይደለም።

እስሩ በአማራ ክልል በመንግሥት የፀጥታ ኃይል እና በፋኖ ታጣቂዎች መካከል የትጥቅ ግጭት ከተጀመረ በኃላና የአስቸኳይ ጊዜ አዋጅ ከታወጀ በኃላ የተፈፀመ እንደነበር ይታወሳል።

አቶ ክርስቲያን ታደለ የሕዝብ ተወካዮች ምክር ቤት አባል የሆኑት በአማራ ክልል ምዕራብ ጎጃም ዞን ቋሪት ምርጫ ክልል የአማራ ብሔራዊ ንቅናቄ (አብን) ፓርቲን ወክለው ተወዳድረው በማሸነፍ ነበር።

@tikvahethiopia

#ተጠንቀቁ⚠️

በምስሉ የተያያዙት በኦንላይን " ቀላል በሆነ ስራ ብዙ ትርፍ ታገኛላችሁ " በሚል #የማጭበርበር ስራ ተታለው ገንዘባቸውን የላኩ ሰዎች ለቲክቫህ ኢትዮጵያ የላኩት ማስረጃ እና ያጨብረበሯቸውን አካላት የቴሌግራምና የዋትአፕ አድራሻ የሚያሳይ ነው።

" ቀላል ስራ፣ ብዙ ትርፍ የሚያስገኝ ስራ " በሚል ከ65 ሺህ ብር እስከ 600 ሺህ ብር የተበሉ አሉ።

ምንም እንኳን አጨብረባሪዎቹ በውጭ ሀገር ስልክ የሚያጭበረብሩትን ሰው ቢያናግሩም የገንዘብ ልውውጡ እንዲደረግ የሚያደርጉት እዚሁ ኢትዮጵያ ውስጥ ባለ አካውንት ነው።

ገንዘብ የሚያስልኩትም የሚልኩትም እጅግ በጣም በበዙ አካውንቶች ነው። (ይህም በኦንላንይ የክሪፕቶ ግብይት ሊሆን እንደሚችል አንድ ባለሞያ ለቲክቫህ ጠቁመዋል)

ማሳሰቢያ ፦ በተለያዩ የማጭበርበሪያ ግሩፕ ውስጥ ያሉት ሰዎች ለማጭበርበር የተሰማሩ አልያም በሆነ ቡድን የሚመሩ ሲሆን ፕሮፋይል ምስላቸው የታወቂ ሰዎች / ዝም ብሎ ከኢንተርኔት የተገኙ የሴቶች / የወንዶች ፎቶ ናቸው።

@tikvahethiopia