የጤና ባለሞያዋን #ገድሎ የተሰወረው የቀድሞ ፖሊስ አባል የነበረ ግለሰብ እየተፈለገ ነው።

በቋራ ወረዳ ገለጉ ዙሪያ ቀበሌ ልዩ ቦታው " ሽመል ዕግር " እየተባለ በሚጠራው ቦታ ትላንት በግምት ከረፋዱ 4:00 ላይ ወ/ሪት ቁብስ በየነ የተባለችን የጤና ኤክስቴሽን ባለሙያ ገድሎ የተሰወረ ግለሰብ እየተፈለገ ይገኛል።

ግለሰቡ ፤ በሰው መግደል ወንጀል ተጠርጥሮ የወንጀል አቤቱታ የቀረበበት ቢሆንም የመንግስትን የጦር መሳሪያ እንደያዘ ከአካባቢው የተሰወረ ሲሆን ተጠርጣሪውን በህግ ተጠያቂ ለማድረግ የማህበረሰቡ ተሳትፎ አስፈላጊ ነው ተብሏል።

አዱሱ ጌታነህ የተባለው ይኸው ተጠርጣሪ ፤ የወረዳው ፖሊስ አባል የነበረ ሲሆን በመልክ ፀይም ፤ ቁመቱ መካከለኛ ፤ ሰውነቱ ቀጭን፣ ለመጨረሻ ግዜ ለብሶ የታየው ነጭ ሸሚዝና ስማያዊ ሱሪ መሆኑን የቋራ ወረዳ ሰላምና ፀጥታ ጽ/ቤት አሳውቋል።

ተጠርጣሪውን አየሁ የሚል ወይም አድራሻውን የሚያውቅ ማንኛውም ሰው ለቋራ ወረዳ ስላምና ፀጥታ ጽ/ቤት እንዲሁም ለቋራ ወረዳ ፖሊስ ጽ/ቤት ጥቆማውን እንዲሰጡን ጥሪ ተላልፏል።

ስልክ፦ 0582710038 የቋራ ወረዳ ሰላምና ፀጥታ ጽ/ቤት / 0582710062 የቋራ ወረዳ ፖሊስ ጽ/ቤት

@tikvahethiopia

" ተዘግተዋል "

በአዲስ አበባ የሚገኙ 12 ትምህርት ቤቶች ተዘጉ።

የአዲስ አበባ ከተማ አስተዳዳር የትምህርትና ስልጠና ጥራት ቁጥጥር ባለስልጣን በአዋጅ 74/2014 በተሠጠው ተግባርና ኃላፊነት መሠረት የግል ት/ቤቶችን ለደረጃው በተቀመጠው ስታንዳርድ መሰረት ለተቋማት ፍቃድና እድሳት ይሰጣል፣ ስታንዳርዱን ያላሟሉና የህግ ጥሰት የፈጸሙ ተቋማት ላይ እርምጃ ይወስዳል፡፡

በዚህም በከተማው ውስር ያሉት ፦

1. አዲስ ተስፋ ቅድመ አንደኛ - አቃቂ
2. ዜድኤም ቅድመ አንደኛ -አቃቂ
3. ግሎው ቅድመ አንደኛ -ንፋስ ስልክ
4. ኤልሻዳይ ቅድመ አንደኛ -ንፋስ ስልክ
5. ሰቆሬብርሀን ቅድመ አንደኛ - ንፋስ ስልክ
6. ማይድሪም ላንድ ቅድመ አንደኛ -ንፋስ ስልክ
7. ቲፒፋይ ቅድመ አንደኛ -ንፋስ ስልክ
8. ሮማናት ቅድመ አንደኛ - ንፋስ ስልክ
9. አዲስ ቪዥን ቅድመ አንደኛ -ቦሌ
10. አዲስ ቪዥን የመጀመሪያ ደረጃ - ቦሌ
11. ኢልመኑር ቅድመ አንደኛ -ኮልፌ ቀራንዮ
12. ስትራይቨርስ 2ኛ ደረጃ ት/ቤት - ንፋስ ስልክ የሚገኙ ትምህርት ቤቶች ለደረጃው በተቀመጠው መስፈርት መሰረት ተመዝነው የሚጠበቀውን መስፈርት ማሟላት ባለመቻላቸውና ከደረጃ በታች በመሆናቸው መዘጋታቸውን አሳውቋል።

ተቋማቱ በእውቅና ፍቃድና እድሳት መመሪያ ቁጥር 02/2012 እና ከደረጃ በታች የሆኑ ተቋማትን ለማሸግ በወጣው መመሪያ 01/2014 መሰረት ነው እንዲዘጉ ውሳኔ የተላለፈባቸው።

ት/ቤቶቹ ለ2016 ዓ/ም ማስተማር የማይችሉ ሲሆን ትምህርት ቤቶቹ የተማሪዎችን ውጤት የሚገልጽ መረጃ ለተማሪዎችና እውቅና ፍቃድ ለስጣቸው አካል እንዲያስረክቡ ማሳሰቢያ ተሰጥቷል።

ይህ ሳይሆን ቀርቶ በተማሪዎችና በተማሪ ወላቾች ላይ ለሚፈጠር እንግልት ት/ቤቶቹ ተጠያቂ ይሆናሉ ተብሏል።

@tikvahethiopia

#ጥንቃቄ #አዲስአበባ

ከመገናኛ ወደ ላምበረት በሚወስደው መንገድ እስራኤል ኤምባሲ አካባቢ የመሬት መንሸራተት በመከሰቱ ምክንያት መገናኛ አካባቢ ጭምር መንገድ ስለተዘጋ በዚህ አካባቢ የሚጓዙ አሽከርካሪዎች አማራጭ መንገድ እንዲጠቀሙ እና እግረኞችም ጥንቃቄ እንዲያደርጉ የአዲስ አበባ መንገዶች ባለስልጣን የጥንቃቄ መልዕክት አስተላልፏል፡፡

(የአዲስ አበባ መንገዶች ባለስልጣን)

@tikvahethiopia

መግለጫ ፦ መኢአድ፣ ኢህአፓ፣ እናት ፓርቲ፣ ዐማራ ግዮናዊ ንቅናቄ እና አንድ ኢትዮጵያ ዲሞክራሲያዊ ፓርቲ በጋራ ባወጡት መግለጫ ፤ " አገራችን ኢትዮጵያን ከከፋው የህልውና አደጋ ለመታደግ ለነገ የማይባልና ቁርጠኝነትን የተላበሰ ተግባራዊ እንቅስቃሴ ያስፈልጋል " ብለዋል።

(የፓርቲዎቹ የጋራ መግለጫ ከላይ ተያይዟል)

@tikvahethiopia

#EOTC

የኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ ሐምሌ 5 እና 6 ቀን 2015 ዓ/ም አስቸኳይ ስብሰባ ማካሄዱ የታወቀ ሲሆን ይህን ከስብሰባው መጠናቀቅ በኃላ መግለጫ ሰጥቷል።

ቅዱስ ሲኖዶስ በመግለጫው :-

በትግራይ በሚገኙ አህጉረ ስብከት የተመደቡ አባቶች የቅዱስ ሲኖዶስ የሰላም ጥሪን ቸል ከማለት ባሻገር ሐምሌ 9 እናደርገዋለን ያሉት የኤጲስ ቆጶስነት ምርጫ ሕገ ቤተክርስቲያንን ያልተከተለ መሆኑን ገልጾ የሚመለከታቸው አካላት ሂደቱን በማስቆም ከቤተክርስቲያን ጎን እንዲቆሙ ቅዱስ ሲኖዶስ ጥሪውን አቅርቧል።

ይደረጋል የተባለው የኤጲስ ቆጶሳት ምርጫ ከቀኖና ቤተ ክርስቲያን አንጻር ተገቢ ያልሆነ የቤተ ክርስቲያንን ማዕከላዊነት የሚጥስ፣ የቤተ ክርስቲያንን አንድነት የሚጎዳና በጦርነት የተጎዳውን ሀብት ንብረቱ የወደመበትን ገዳማቱና አብያተ ክርስቲያናቱ የተጎዱበትን ሕዝብ የማይጠቅም ተገቢነት የሌለው በመሆኑ እንዲቆም ቅዱስ ሲኖዶስ ወስኗል፡፡

በትግራይ ክልል ተከስቶ የነበረውን ችግር የፌዴራል መንግሥትና የትግራይ ክልል ጊዜያዊ አስተዳደር ችግሩን በውይይት የፈቱት መሆኑ እየታወቀ የሰላም ባለቤት የሆነችው ቤተ ክርስቲያን እስካሁን ሰላም መፈለጓ ያልተቋረጠ ቢሆንም አለመሳካቱ የሚያሳዝን በመሆኑ ለሰላም የሚደረገው ጥረት ዘላቂ መፍትሔ እስከሚገኝ ድረስ የማይቋረጥ መሆኑን ቅዱስ ሲኖዶስ ገልጿል።

የኢፌዲሪ ጠቅላይ ሚኒስትር ዶ/ር ዐቢይ አህመድ እና ክቡር አቶ ጌታቸው ረዳ የትግራይ ክልል ጊዜያዊ አስተዳደር ፕሬዝዳንት እንዲሁም የፌዴራልና የክልሉ መንግሥት የሥራ ኃላፊዎች እየተደረገ ያለውን ሕገ ቤተ ክርስቲያንን ያልተከተለ የኤጲስ ቆጶሳት ምርጫ እንዲያስቆሙ ብሎም ሰላም ለማስፈን የሚደረገውን ጥረት በመደገፍ ችግሮቹ በውይይት እንዲፈቱ መንግሥታዊ እገዛ በማድረግ የውይይት መድረክ እንዲያመቻቹ የቅዱስ ሲኖዶስ ምልዓተ ጉባኤ ጥሪውን አቅርቧል።

ቅዱስ ሲኖዶስ፤ " በመላው ዓለም የምትገኙ ሊቃውንተ ቤተ ክርስቲያንና ሕዝበ ክርስቲያን እናት ቤተ ክርስቲያናችሁ ያስተላለፈችውን የሰላም ጥሪ ተግባራዊ ሆኖ አንድነቷ ጸንቶ ይኖር ዘንድ በጸሎት ተግጋችሁ ከቤተ ክርስቲያናችሁ ጎን እንድትቆሙ " ሲል ጥሪ አስተላልፏል።

(ሙሉ መግለጫው ከላይ ተያይዟል)

@tikvahethiopia

#ኢትዮጵያ #ግብጽ

ዛሬ ሐምሌ 6 ቀን 2015 ዓ.ም የዓረብ ሪፐብሊክ ግብፅ ፕሬዝዳንት አብዱልፈታህ አልሲሲ የኢትዮጵያ ፌደራላዊ ዲሞክራሲያዊ ሪፐብሊክ ጠቅላይ ሚኒስትር ዐቢይ አሕመድን (ዶ/ር) ተቀብለው አነጋግረዋል።

መሪዎቹ ባደረጉት ምክክር የሁለቱን ሀገራት ሕዝቦች የጋራ ጥቅም ባስጠበቀ እና ሁለንተናዊ ብልፅግናን ለማረጋገጥ በሚያስችል መልኩ በግብፅና በኢትዮጵያ መካከል ያለውን የፖለቲካ፣ የኢኮኖሚ እና የባህል የሁለትዮሽ ግንኙነት ለማሻሻል ያላቸውን ቁርጠኝነት አረጋግጠዋል።

ይህ የመሪዎቹ ቁርጠኝነት በቀጠናው ሰላም እና ደኅንነትን ለማስፈን እና መረጋጋትን ለማስጠበቅ ከሚያበረክተው አስተዋፅኦ ባሻገር ሀገራቱ የሚያጋጥሟቸውን የጋራ ፈተናዎች ለመሻገርም ያስችላል።

ሁለቱ መሪዎች ባደረጉት ምክክር እልባት ያላገኘውን የታላቁ የሕዳሴ ግድብ ድርድርን በተመለከተም በተከታዮቹ ሁለት ነጥቦች ላይ ተስማምተዋል።

1) የታላቁ የኢትዮጵያ ሕዳሴ ግድብ የውኃ ሙሌትን እና የአሠራር ደንቦችን በተመለከተ በግብፅ በኢትዮጵያ እና በሱዳን መካከል የሚካሄደውን ንግግር በፍጥነት ለማስጀመር እንዲሁም ንግግሩን በአራት ወራት ውስጥ አጠናቆ ከመግባባት ላይ ለመድረስ አስፈላጊውን ሁሉ ጥረት እንደሚያደርጉ ተስማምተዋል።

2) ንግግሩ በሚካሄድበት ጊዜ ውስጥ ኢትዮጵያ በ2015-2016 ዓ.ም የግድቡ የውኃ ሙሌት ወቅት ግብፅ እና ሱዳን ከወንዙ በሚያገኙት የውኃ አቅርቦት ላይ የጎላ ችግር እንዳያጋጥም ለማድረግ ኢትዮጵያ ያላትን ቁርጠኝነት አረጋግጣለች።

(ኢዜአ)

@tikvahethiopia

#UPDATE

" የትግራይ ኦርቶዶክስ ተዋህዶ ቤ/ያን የመንበረ ሰላማ ከሳቴ ብርሃን ከፍተኛ ቤተ ክህነት " በሚል እየተንቀሳቀሱ ያሉ በትግራይ የሚገኙ አባቶች ለሃምሌ 9/11/2015 ዓ.ም በርእሰ አድባራት ወ ገዳማት ቅድስት ከተማ አክሱም  ፅዮን ለሚያካሂደው የኤጲስ ቆጶሳት ምርጫ ቅድመ ዝግጅት ማጠናቀቃቸውን ገልጸዋል።

በኤጲስ ቆጶሳት ምርጫ ከየሃገረስብከቱ 12  ፤ ከካሳቴ ብርሃን መንበረ ሰላማ መንፈሳዊ ኮሌጅ 5  ታዳሚያን ተሳታፊ ይሆናሉ የተባለ ሲሆን እነዚሁ በካርድ የሚመርጡ ታዳሚያን ናቸው ፤ ለኤጲስ ቆጶሳት ከሚቀርቡት እጩዎች 10 ጳጳሳት ይመረጣሉ ተብላል።

የትግራይ ሊቃነ ጳጳሳት የኤጲስ ቆጶሳቱ ምርጫ ለመታደም በአድባራት ወገዳማት አክሱም ጽዮን ቤተክርስትያን በፀሎተ ሱባኤ እንደሚገኙ ተነግሯል።

የኢትዮጵያ ኦርቶዶክዋስ ተዋህዶ ቤተ ክርስትያን ቅዱስ ሲኖዶስ ሃምሌ 6 /2015 ዓ.ም በሰጠው ይፋዊ መግለጫ ኢ-ህጋዊና ኢ-ቀኖናዊ ነው ያለው የትግራዩ የጳጳሳት ምርጫ እንዲቆም የፌደራል መንግስትና የትግራይ ጊዚያዊ አስተዳደር  እንዲተባበሩ  መጠየቁ ይታወሳል።

ቅዱስ ሲኖዶስ ፤ ይደረጋል የተባለው የኤጲስ ቆጶሳት ምርጫ ከቀኖና ቤተ ክርስቲያን አንጻር ተገቢ ያልሆነ የቤተ ክርስቲያንን ማዕከላዊነት የሚጥስ፣ የቤተ ክርስቲያንን አንድነት የሚጎዳና በጦርነት የተጎዳውን ሀብት ንብረቱ የወደመበትን ገዳማቱና አብያተ ክርስቲያናቱ የተጎዱበትን ሕዝብ የማይጠቅም ተገቢነት የሌለው በመሆኑ እንዲቆም ማሳሰቡ የሚዘነጋ አይደለም።

@tikvahethiopia

" ፈተናው መቼ እንደሚሰጥ አልተወሰነም ፤ ነገር ግን ፈተናው ይሰጣል " -የቴክኒክና ሙያ ስልጠና ኢንስቲትዩት

የቴክኒክና ሙያ ስልጠና ኢንስቲትዩት ዕጩ ተመራቂ ተማሪዎች የመውጫ ፈተና ሳንወስድ ግቢ ለቃችሁ ውጡ ተብለናል ሲሉ ቅሬታቸውን አቀረቡ።

ኢንስቲትዩቱ በበኩሉ ለተቋሙ የሚሆን የመውጫ ፈተና ፖሊሲ እየተዘጋጀ ነው፤ ለተማሪዎቹም የመውጫ ፈተና ወደፊት ይሰጣል ብሏል።

የኢንስቲትዩቱ ዕጩ ተመራቂዎች "የመውጫ ፈተና ሳንወስድ ግቢ ለቃችሁ ውጡ መባላቸውን" ለቲክቫህ ዩኒቨርሲቲ ተናግረዋል።

ዕጩ ተመራቂዎቹ ላለፉት አራት ዓመታት ትምህርታቸውን የተከታተሉና የማጠቃለያ ፈተና የወሰዱ እንዲሁም የመመረቂያ ፕሮጀክት የሠሩ መሆናቸውን የተመራቂዎቹ ተወካዮች ነግረውናል።

በዋናው ግቢ 500 የሚሆኑ ተማሪዎች እንዲሁም 1,500 የሚሆኑ የሳተላይት ካምፓሶች ዕጩ ተመራቂዎች መኖራቸውን ተወካዮቹ ገልጸዋል።

የመውጫ ፈተና ሳንወስድ ግቢውን ለቃችሁ ውጡ መባሉ ተገቢ አይደለም ያሉት ዕጩ ተመራቂዎቹ፤ ጥያቄያቸውን ለሚመለከታቸው አካላት ማቅረባቸውን ይገልጻሉ። ምንም እንኳን በቂ ምላሽ ባያገኙም።

በጉዳዩ ዙሪያ ያነጋገርናቸው የኢንስቲትዩቱ የሕዝብ ግንኙነት ዳይሬክተር መኩሪያ ንጋቱ፤ ተማሪዎቹ ጥያቄያቸውን ለሥራና ክህሎት ሚኒስቴር ኃላፊዎች ጭምር ማቅረባቸውን አረጋግጠዋል።

"ተማሪዎቹ የመውጫ ፈተና ወደፊት ይወስዳሉ" ያሉት ዳይሬክተሩ፤ ፈተናው መቼ እንደሚሰጥ አለመወሰኑን ተናግረዋል።

"ከሚመለከታቸው አካላት ጋር በመሆን የመውጫ ፈተና ፖሊሲ እየተዘጋጀ መሆኑን" ገልጸዋል።

ኢንስቲትዩቱ የሚሰጠው የሙያ ስልጠና በመሆኑ ያንን ታሳቢ ያደረገ የመውጫ ፈተና ነው የሚዘጋጅ መሆኑን ኃላፊው አስረድተዋል።

ተማሪዎቹ ትምህርታቸውን ተከታትለው የጨረሱ መሆኑን የሚያሳውቅ ደብዳቤ ከተቋሙ ሬጅስትራር እንደሰጣቸው ለማወቅ ችለናል።

በጉዳዩ ዙሪያ የትምህርት ሚኒስቴር የሚለውን በቀጣይ የምናቀርብ ይሆናል።

@tikvahuniversity @tikvahethiopia