#ኤርትራ #ሩስያ

የሩሲያ ፕሬዚደንት ቭላዲሚር ፑቲን #የኤርትራ ፕሬዚደንት ኢሳይያስ አፈወርቂን በክሬምሊን ቤተ መንግሥት ተቀብለው አነጋገሩ።

የኤርትራ የማስታወቂያ ሚንስትር የማነ ገብረ መስቀል በትዊተር ገጻቸው ባወጡት ቃል ፤ ፕሬዚደንት ኢሳይያስ እና ፕሬዚደንት ፑቲን ዛሬ ረቡዕ ከቀትር በኋላ ባደረጉት ቆይታ የአገሮቻቸውን የሁለትዮሽ ግንኙነት፤ ዐለም አቀፍ ጉዳዮች እንዲሁም በጋራ ትኩረት በሚሰጧቸው ሁኔታዎች ዙሪያ በስፋት መወያየታቸውን አስታውቀዋል፡፡

አያያዘውም ፤ “የኤርትራ ፕሬዚደንት ኢሳይያስ በሩሲያ ፌዴሬሽን ያደረጉት #የመጀመሪያ ጉብኝት ለሁለቱ ሀገሮች ግንኙነት ትልቅ አስተዋጽኦ እንደሚኖረው ፕሬዚደንት ፑቲን አስምረውበታል” ብለዋል፡፡

“የሁለቱ ሀገሮች ግንኙነት ርምጃ ሙሉ በሙሉ አመርቂ ደረጃ ላይ እንደሚገኝ” ፑቲን መናገራቸው አክለው “በመጪው ሐምሌ ወር ሞስኮ በምታስተናግደው ሁለተኛው የሩሲያ እና የአፍሪካ የመሪዎች ጉባዔ ላይ እንዲገኙ ጋብዘዋቸዋል” ብለዋል፡፡

የኤርትራ ፕሬዚደንት በበኩላቸው ጉብኝታቸው የሁለቱን ሀገሮች ከፍተኛ የአጋርነት እና የምክክር ግንኙነት የሚያንጸባርቅ መሆኑን መናገራቸውን የማስታወቂያ ሚኒስትሩ የማነ ገብረ መስቀል አመልክተዋል፡፡

#ቪኦኤ
ፎቶ፦ የማነ ገ/መስቀል

@tikvahethiopia

#ፀደይ_ባንክ

አማራ ብድር እና ቁጠባ ተቋም (አብቁተ) በሚል ስያሜ ከሩብ ክፍለ ዘመን በላይ ሰፊ መሠረቱን በገጠር አድርጎ ብዙኃኑን የፋይናንስ አገልግሎት ተደራሽና ተጠቃሚ በማድረግ የቆየውና በያዝነው ዓመት መጀመሪያ ላይ ወደ ግዙፍ ባንክነት ያደገው ፀደይ ባንክ አርቲስት ሰሎሞን ቦጋለን የብራንድ አምባሳደሩ አድርጎ ሰይሟል፡፡

ባንኩ በስካይ ላይት ሆቴል  ባዘጋጀው ፕሮግራም ላይ እንዳስታወቀው፥ በበርካታ ፊልሞችና ድራማዎች ላይ በመተወን ታዋቂነት ያተረፈውና በበጎ አድራጎት ሥራው ጎልቶ የሚጠቀሰው አርቲስት ሰሎሞን ቦጋለ፥ በሁሉም ቦታ፣ ሁሉንም ማኅበረሰብ በቅርበትና በልዩነት ማገልገል መለያው የሆነው ፀደይ ባንክን በትክክል የሚወክል መሆኑንና በመልካም ሥነ ምግባሩና ስብዕናው የባንኩ ብራንድ አምባሳደር እንዲሆን በሙሉ እምነት መመረጡን ገልጿል፡፡

አርቲስት ሰሎሞን ቦጋለ በሕዝብ ዘንድ ታላቅ ተወዳጅነትን ያተረፈ አርቲስት ሲሆን በተሰማራበት የጥበብ ዘርፍ ከ68 በላይ ፊልሞችን፣ ከ16 በላይ የመድረክ ቴአትሮችን፣ ከ8 በላይ ተከታታይ የቴሌቪዥን ድራማዎችን እና በርካታ የራድዮ ድራማዎችን የተጫወተ ከመሆኑም በላይ ኅብረት ለበጎ በሚል መርሕ በሚያከናውናቸው የበጎ አድራጎት ሥራዎቹ የሚታወቅና በሀገር ውስጥና በውጭ ሀገራት በተለያዩ ዘርፎች በርካታ ሽልማቶችን ያገኘ ነው፡፡

የቀድሞው አማራ ብድርና ቁጠባ ተቋም(አብቁተ)፥ የዛሬው ፀደይ ባንክ ፦

- በ3 ሚሊዮን ብር ካፒታል ነው ጉዞውን የጀመረው። ዛሬ የተጣራ ካፒታሉ ከ11.6 ቢሊዮን ብር በላይ ሆኖ ጠቅላላ ሀብቱም ከ49.7 ቢሊዮን ብር በላይ ደርሷል፡፡

- በአሁኑ ወቅት ከ13 ሚሊዮን በላይ ደንበኞችን ያፈራ ሲሆን በመላው ሃገሪቱ ከ500 በላይ ቅርንጫፎች አሉት።

- ባንኩ ፤ ከ12,270 በላይ ለሆኑ ዜጎች የሥራ እድል ለመፍጠር ችሏል።

- በአዲስ አበባ ከተማ ሰንጋ ተራ አካባቢ ባለ 39 ወለል የዋና መሥሪያ ቤቱን ትልቅና ዘመናዊ ሕንጻ አስገንብቶ በማጠናቀቅ ላይ ይገኛል።
 
@tikvahethiopia

ፎቶ፦ ቅዱስ ፓትርያርኩ ወደ ዱባይ አቀኑ።

ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት ወደ ተባበሩት ዓረብ ኢምሬቶች ሐዋርያዊ ጉዞ ማድረጋቸው ተሰምቷል።

ቅዱስነታቸው ከብፁዓን አበው ሊቃነ ጳጳሳት ጋር በመሆን በመካከለኛው ምሥራቅ የንግድ እና የቱሪዝም ማዕከል በመባል በምትታወቀው ዐረብ ኢማራት ፦

- በአገልግሎት እና በስደት የሚገኙትን ውሉደ ክህነት ለመባረክ፡

- በአቡዳቢ መንግሥት ለቤተ ክርስቲያን መሥሪያ በተፈቀደው ቦታ ላይ የተሠራውን መቃረቢያ ቤተ ክርስቲያን ቅዳሴ ቤት ለማክበር፤

- በቀጣይ ለሚገነባው አዲስ ሕንፃ ቤተ ክርስቲያንም የመሠረት ደንጊያ ለማኖር ዛሬ ረፋድ ላይ ወደ ዱባይ አቅንተዋል።

መረጃው የብፁዕ ወቅዱስ ፓትርያርክ ልዩ ፅ/ቤት ነው።

@tikvahethiopia

የሕገ መንግሥት ማሻሻል . . .

" ከ60 በመቶ በላይ ማህበረሰብ ህገ መንግስቱ ስለመሻሻሉ ፍቃደኛ ነው " በሚል በጥናት ተረጋግጧል ቢባልም በሀገራዊ የምክክር ኮምሽኑ በኩል በጥልቀት በድጋሚ እንደሚታይ ተገልጿል።

በቅርቡ የፖሊሲ ጥናት ኢንስቲቲዩት አከናወንኩት ባለው ጥናት ከትግራይ ክልል ውጪ 60 ከመቶ በላይ የሚሆነው ማህበረሰብ ህገ መንግስቱ እንዲሻሻል ፍቃደኛ መሆኑን አረጋግጫለው ብሏል።

ይህን የጥናት ውጤት ለሀገራዊ ምክክር ኮሚሽን ስራ ምን ያህል አጋዥ ነው ?

ኮሚሽኑ ፤ የማህበረሰብ ጥያቄዎች እና አስፈላጊ ጉዳዮችን በተመለከተ በ3 መንገዶች ማለትም ከታች ወደ ላይ፤ ከላይ ወደ ታች እንዲሁም ወደ ጎን መረጃ የማሰባሰብ ስራ እንደሚያከናውን አሳውቋል።

" ከ60 በመቶ በላይ ማህበረሰብ ህገ መንግስቱ ስለመሻሻሉ ፍቃደኛ ነው " በሚል የፖሊሲ ጥናት ኢንስቲቲዩቱ ሰራሁት ባለው ጥናት ቢያሳውቅም በስፋት እና በጥልቀት በሀገራዊ የምክክር ኮምሽኑ በድጋሜ እንደሚታይ ገልጿል።

ሳይንሳዊ ምርምሮችና ጥናቶች እየተጠኑ ለማህበረሰቡ ይፋ መደረጋቸው ጠቃሚ መሆናቸው የገለፀው ኮሚሽኑ ጥናቱን እንደ ግበዓት እንደሚጠቀምበት ገልጿል።

Credit : #አሐዱ

@tikvahethiopia

#Update #የመሬት_ሊዝ_ጨረታ

" በ7 ክ/ከተሞች የመሬት ሊዝ ጨረታ አሸናፊዎች ከአፍታ ቆይታ በኃላ ይለያሉ " - የአ/አ መሬት ልማትና አስተዳደር ቢሮ

በአዲስ አበባ ከተማ አስተዳደር መሬት ልማትና አስተዳደር ቢሮ ላለፉት አምስት ዓመታት ተቋርጦ የነበረውን የመሬት ሊዝ ጨረታ ዛሬ አስጀምሯል።

ይህንንም ተከትሎ ቢሮው በሁሉም ክፍለ ከተሞች 14 ነጥብ 13 ሄክታር መሬት በሊዝ ለማጫረት ማዘጋጀቱን ገልጿል።

በጨረታ የቀረበው መሬት አገራዊ ፋይዳ ላላቸው ለተለያዩ ዓላማዎች የሚውል ነው ተብሏል።

በአስራ አንዱ ክፍለ ከተሞች 24 ሺህ የጨረታ ሰነዶችን በማዘጋጀት ባለፋት አስር ቀናት 21 ሺህ 636 የሚሆኑት የጨረታ ሰነዶች መሸጥ መቻሉም ተጠቁሟል።

የመጀመሪያው ጨረታ #በዛሬው ዕለት በ7 ክፍለ ከተሞች ፦
👉 በቦሌ፣
👉 በንፋስ ስልክ ላፍቶ፣
👉 በልደታ፣
👉 በአዲስ ከተማ፣
👉 በቂርቆስ፣
👉 በጉለሌና በየካ ክፍለ ከተሞች ተጀምሯል።

በእነዚህ ክፍለ ከተሞች 2 ሺህ 852 ተጫራቾች የጨረታ ሰነዶቻቸውን ወደ ጨረታ ሳጥኑ አስገብተዋል።

የጨረታ ሂደቱ አሁን በመካሄድ ላይ ሲሆን አሸናፊዎች ከአፍታ ቆይታ በኋላ የሚለዩ ይሆናል።

በቀጣዮች ቀናት የጨረታ ሒደቱ በሌሎች ክ/ከተሞች እንደሚቀጥል ታውቋል።

#ኢዜአ

@tikvahethiopia

#Update

" የኦሮሚያ መንግስት ኮሚኒኬሽን ቢሮ ያወጣውን መግለጫ ፍፁም ሙስሊሙን ማህበረሰብ የማይመጥን ስለሆነ አንቀበለውም " - ጠቅላይ ምክር ቤቱ

የኢትዮጵያ እስልምና ጉዳዮች ጠቅላይ ም/ቤት ወቅታዊ ጉዳይን አስመልክቶ ዛሬ መግለጫ ሰጥቷል።

ም/ቤቱ በኦሮሚያ ክልላዊ መንግስት በሸገር ከተማ አስተዳደር የፈረሱ 19 መስጂዶች አስመልክቶ ግንቦት 19/2015 ባደረገው አስቸኳይ ስብሰባ በጉዳዩ ዙሪያ በሰፊው በመወያየት ውሳኔ ማስተላለፉን አስታውሷል።

ከውሳኔዎቹ አንዱ የነበረው ከፌ/እ/ጉ/ጠ/ም/ቤት ፣ከኦሮሚያ እ/ጉ/ከ/ም/ቤት እና ከአዲስ አበባ እ/ጉ/ከ/ም/ቤት የተውጣጡ 9 ዓባላት ያሉት ኮሚቴ ማዋቀር ሲሆን ጠቅላይ ም/ቤቱ በተዋቀረው ኮሚቴ አማካኝነት ከፌደራል መንግስት ከፍተኛ አመራሮች ጋር በተጠናከረ ሁኔታ እየተወያየ መሆኑን ለህዝበ ሙስሊሙ አስገዝንቧል።

ህዝበ ሙስሊሙ ፤ የተጀመረው ውይይት እልባት እስከሚያገኝ በትእግስት እንዲጠባበቅ ጥሪ ቀርቧል።

ጠቅላይ ምክር ቤቱ ፤ ከቀናት በፊት የኦሮሚያ መንግስት ኮሚኒኬሽን ቢሮ ያወጣውን መግለጫ ፍፁም ሙስሊሙን ማህበረሰብ የማይመጥን ስለሆነ እንደማይቀበለው ገልጷል።

በአሁኑ ወቅት የተከሰተውን የመስጂዶች መፍረስ ለመፍታት ጥረት እየተደረገ ባለበት  ሁኔታ አንዳንድ አካላት ጉዳዩን ለፖለቲካ አላማቸው መጠቀሚያ ለማድረግ እየሞከሩ ነው ያለው ጠቅላይ ምክር ቤቱ " ህዝበ ሙስሊሙ ይህንን በመገንዘብ አላማቸው በመጥፎ ጎኑ እንዳይጠቀሙበት ሰላሙን አጠናክሮ የጠቅላይ ም/ቤታችንን ውሳኔ እንዲጠባበቅ እንጠይቃለን " ብሏል።

ህዝበ ሙስሊሙ ከእንደዚህ ዓይነት ችግሮች እራሱንና ተቋሞቹን እንዲከላከል  በተለመደው ጨዋነትና እስላማዊ አደብ በተላበሰ መልኩ ከማንኛውም ህገ-ወጥ እንቅስቃሴ ተቆጥቦ የጠቅላይ ም/ቤቱንና የ9ኙን ኮሚቴ ውጤት እንዲጠባበቅ ጥሪ ቀርቧል።

@tikvahethiopia

ፀጋ ወደ ቤተሰቦቿ ብትመለስም አጋቿ ግን አልተያዘም።

ፀጋ በላቸው ከቀናት በኃላ ከታገተችበት ነፃ ወጥታ ከቤተሰቦቿ ጋር መቀላቀሏን ለማወቅ ተችሏል።

የቅርብ ቤተሰቧ እንደሆኑ የገለፁልን የቲክቫህ ቤተሰብ አባል ፤ ፀጋ በላቸው በህይወት መገኘቷን እና ከቤተሰቦቿ ጋር መቀላቀሏን በመግለፅ ድምፅ ለሆኑ ለመላው የኢትዮጵያ ህዝብ እና ለማህበራዊ ሚዲያዎች ምስጋና አቅርበዋል።

የፀጋ በላቸውን ነፃ መሆን የከተማው አስተዳደርም ማረጋገጫ ሰጥቷል።

የከተማው ከንቲባ ረ/ፕሮፌሰር ፀጋዬ ቱኬ ፤ በተቀናጀ ኦፕሬሽን ነፃ ወጥታ ወደ ሀዋሳ በሰላም ገብታለች ብለዋል።

ከንቲባው ፀጋ በላቸውን ያፈናት ተጠርጣሪ ግለሰብ አለመያዙን አመልክተው ፤ ግለሰቡን በቁጥጥር ስር ለማዋል የፀጥታ ኃይሎች ርብርብ እያደረጉ ነው ብለዋል።

ግለሰቡ ተይዞ ለፍርድ እንደሚቀርብ እምነታቸው መሆኑን ገልጸዋል።

የሲዳማ ሰላም እና ፀጥታ ቢሮ በሰጠው መግለጫ ደግሞ ተጠርጣሪው ግለሰብ ወደ #ጫካ መግባቱ በመግለፅ ለመያዝ ክትትል እየተደረገ ነው ብሏል።

ፀጋ በላቸው ፤ ግንቦት 15 ቀን 2015 ከስራ ስትወጣ በወቅቱ የከተማው ከንቲባ የግል ጠባቂ በነበረው ግለሰብ ኮንስታብል የኃላመብራት ወ/ማርያም በመኪና ታግታ መወሰዷና አድራሻዋም ሳይታወቅ በመቅረቱ ቤተሰቦችን ከፍተኛ ጭንቀት ላይ ጥሎ ነበር።

@tikvahethiopia

#AddisAbaba

በአዲስ አበባ ከተማ በተመረጡ የመንግስት መስሪያ ቤቶች #ቅዳሜ እና #እሁድን ጨምሮ #በበዓላት ቀናት መስራት ግዴታ ሊደረግ መሆኑን ተዘግቧል።

ኢትዮ ኤፍ ኤም 107.8 ሬድዮ ፤ በምክትል ከንቲባ ማዕረግ የአዲስ አበባ ከተማ አስተዳደር ዋና ስራ አስኪያጅ አቶ ጥራቱ በየነ ፤ " የአገልግሎት መስጫ ጊዜን በተመለከተ አዲስ አበባ ላይ የተለየ ትኩረት ይፈልጋል የሚል እምነት አለን " ማለታቸውን ዘግቧል።

በከተማው የ24 ሰዓት አገልግሎት መስጠት የሚያስችል አቅም መፈጠር አለበት ብለዋል።

አቶ ጥራቱ የቅዳሜ እና እሁድ እንዲሁም የበዓላት ቀን አገልግሎት በአሰራር ተዘርግቶ መተግበር አለበት ሲሉ አስገንዝበዋል።

እንደ ከተማ አስተዳደር ከመደበኛዉ 8 ሰዓት ተጨማሪ መስራት ያለባቸዉ መስሪያ ቤቶች የትኞቹ ናቸዉ ? የሚለዉ ላይ ጥናት እየተደረገ መሆኑን አሳውቀዋል።

በከተማዋ ባለዉ የትራንስፖርት መጨናነቅ እና በተለያዩ ጉዳዮች ሰራተኛዉ ቢሮ ገብቶ የሚሰራበት ሰዓት ዉስን በመሆኑ ሰዉ ማግኘት ያለበትን ተገቢዉን አገልግሎት እንዲያገኝ ለማድረግ የ24 ሰዓት አገልግሎት መስጠት መጀመር አስፈላጊ መሆኑን ማንሳታቸውን የሬድዮ ጣቢያው ዘገባ ያሳያል።

@tikvahethiopia