#Update

እንደ የአዲስ አበባ ከተማ የትምህርት እና ስልጠና ጥራት ቁጥጥር ባለስልጣን መረጃ ፦

- በአዲስ አበባ ከተማ 1,558 የግል ትምህርት ቤቶች ይገኛሉ። ከእነዚህ ትምህርት ቤቶች ውስጥ 1,257 ወይም 80.6 በመቶው የክፍያ ጭማሪ ለማድረግ " ፕሮፖዛል " አቅርበዋል።

- ባለስልጣን መ/ቤቱ የክፍያ ጭማሪ ለማድረግ " ፕሮፖዛል" ካቀረቡት ውስጥ 1,031 ያህሉ ከተማሪ " ወላጆች ጋር ተስማምተዋል" ያለ ሲሆን 226 ትምህርት ቤቶች በጭማሪው መጠን ላይ እስካሁን " ከወላጆች ጋር መስማማት አልቻሉም ብሏል።

- ከወላጆች ጋር ተስማምተዋል ከተባሉት ትምህርት ቤቶች ውስጥ ሃምሳ አንዱ 20 በመቶ ጭማሪ ለማድረግ አቅደዋል። 394 ትምህርት ቤቶች ደግሞ ከ21 እስከ 40 በመቶ ጭማሪ ለማድረግ ከወላጆች ጋር መስማማታቸው ተገልጿል።

- 427 ትምህርት ቤቶች 41 እስከ 60 በመቶ ጭማሪ ለማድረግ " ፕሮፖዛል " ያቀረቡ ሲሆን  ፤ ከ61 እስከ 80 በመቶ የክፍያ ጭማሪ ለማድረግ ያቀዱት ትምህርት ቤቶች 126 ናቸው። እንዲሁም ከ81 እስከ 99 በመቶ ጭማሪ ለማድረግ ያቀዱ ትምህርት ቤቶች 24 ናቸው።

- መቶ በመቶ ጭማሪ ለማድረግ “ከወላጆች ጋር ተስማምተዋል " የተባሉ 5 ትምህርት ቤቶች ብቻ ሲሆኑ  ሌሎች 5 ትምህርት ቤቶች ደግሞ ከ100 ፐርሰንት በላይ ጭማሪ ለማድረግ አቅደዋል ተብሏል።

ሁሉም ትምህርት ቤቶች “ከወላጆች ጋር በቂ መግባባት ላይ ሳይደርሱ” ጭማሪውን መተግበር እንደማይችሉ ከባለስልጣን መ/ቤቱ ማስጠንቀቂያ ተሰጥቷቸዋል።

ምን ያህል ወላጅ በተገኘበት ነው ውሳኔ የሚተለለፈው ?

እንደ ትምህርት እና ስልጠና ጥራት ቁጥጥር ባለስልጣን አሰራር የትምህርት ተቋማት ሊያደርጉ ያሰቡትን ጭማሪ በተመለከተ ከተማሪ ወላጆች ውስጥ 51 በመቶ ያህል የሚሆኑት በተገኙበት ውይይት የማድረግ እና ተስማምቶ የመወሰን ግዴታ አለባቸእ።

የትምህርት ተቋማቱ በሚጠሩት የመጀመሪያ ውይይት ላይ የሚገኙ ወላጆች ብዛት ከ51 በመቶ በታች ከሆነ ስብሰባው ይበተናል።

ተቋማቱ ለሁለተኛ ጊዜ በሚጠሩት ስብሰባ ላይ ግን ሊደረግ የታሰበው ጭማሪ በስፍራው በተገኙት ወላጆች መጽደቅ ይችላል።

መረጃውን የአ/አ ከተማ የትምህርት እና ስልጠና ጥራት ቁጥጥር ባለስልጣንን ዋቢ በማድረግ ያሰራጨው ኢትዮጵያ ኢንሳይደር ድርገፅ ነው።

@tikvahethiopia

#Update

የአዲስ አበባ ከተማ ትምህርትና ሥልጠና ጥራት ቁጥጥር ባለስልጣን ዛሬ በሰጠው መግለጫ ፥ የግል ትምህርት ቤቶች ከመደበኛው የትምህርት ክፍያ ውጭ ማንኛውንም ወጭ ከተማሪ ወላጆች መጠየቅ እንደማይችሉ አስታውቋል።

በከተማዋ ለቀጣይ የትምህርት ዘመን የዋጋ ጭማሪ ለማድረግ 1 ሺህ 253 የግል ት/ቤቶች ጥያቄ ማቅረባቸውን ባለስልጣን መ/ቤቱ ገልጿል።

የግል ትምህርት ቤቶች ዋጋ የሚጨምሩባቸው ምክንያቶች ፦
- ግብዓቶችን ለማሟላት፣
- ለአስተዳደራዊ ወጭዎች እና የትምህርት ጥራትን አስጠብቆ ለማስቀጠል ታሳቢ ያደረጉ ናቸው ሲል አመልክቷል።

የዋጋ ጭማሪው ተግባራዊ የሚሆነው ግን ወላጆች እና ትምህርት ቤቶች ተወያይተው ሲስማሙ መሆኑንም ባለስልጣኑ አስታውቋል።

ትምህርት ቤቶች የወላጆችን የመክፈል አቅም ያገናዘበ ክፍያ እንዲያቀርቡ እና ወላጆችም ሁኔታውን አይተው ተግባብተው ሰላማዊና ስኬታማ የመማር ማስተማር ሂደት እንዲቀጥል ባለስልጣን መ/ቤቱ ጥሪ አቅርቧል።

በሌላ በኩል አንዳንድ የግል ትምህርት ቤቶች በዓይነትም በገንዘብም ግብዓቶችን ለማሟላትና ለተለያዩ ጉዳዮች ተጨማሪ እንደሚጠይቁ ነገር ግን ከዚህ በኋላ ከመደበኛው የትምህርት ክፍያ ውጭ ምንም አይነት ተጨማሪ ጥያቄ ማቅረብ እንደማይቻል ማሳሰቢያ ተላልፏል።

የተማሪዎች የምዝገባ ጊዜም የአዲስ አበባ ትምህርት ቢሮ በሚያወጣው ጊዜ #ከሐምሌ ወር በኋላ መሆኑን ማመልከቱን ኢብኮ ዘግቧል።

@tikvahethiopia

#AdigratUniversity

የዓዲግራት ዩኒቨርሲቲ በዛሬው ዕለት በላከልን መልዕክት ፦

1. የዓዲግራት ዩኒቨርሲቲ መደበኛ ተማሪዎች ሆናችሁ ላላፉት ሁለት ዓመታት በሌሎች ዩኒቨርሲቲዎች ተመድባችሁ የመማር እድል ያላጋጠማችሁ፤

2. በዓዲግራት ዩኒቨርሲቲ የተከታታይ መርሃ ግብር ተማሪዎች፤

3. በሌሎች ዩኒቨርሲቲዎች በመደበኛነት ስትማሩ ቆይታችሁ፣ ላለፉት ሁለት አመታት አቛርጣችሁ አሁን ዓዲግራት ዩኒቨርሲቲ ለመመዝገብ የምትፈልጉ ተማሪዎች፤

በዚህ ማስፈንጠሪያ https://197.156.104.178/ በኦንላይን የቅድመ ምዝገባ ቅፅ ከግንቦት 03 አስከ 15/2015 እንድትሞሉ ጥሪ አቅርቦላችኃል።

ዩኒቨርሲቲው ትምህርት የሚጀመርበት ቀን በቅርቡ እንደሚያሳውቅ ገልጿል።

@tikvahethiopia

" ፈተናው የሚሰጥበት ቀን ይስተካከል " - የአዲስ አበባ እስልምና ጉዳዮች ከፍተኛ ም/ቤት

የአዲስ አበባ እስልምና ጉዳዮች ከፍተኛ ም/ቤት ፤ ከተማ አቀፉ የ8ኛ ክፍል ፈተና መስጫ ቀን እንዲስተካከል ለከተማው ትምህርት ቢሮ በፃፈው ደብዳቤ አሳስቧል።

የከተማው ትምህርት ቢሮ የ2015 ትምህርት ዘመን የ8ኛ ክፍል ከተማ አቀፍ ፈተና ሰኔ 19-20/2015 ለመስጠት መታቀዱን ማሳወቁ ይታወሳል።

ነገር ግን ይህ ቀን በካላንደር ዝግ የሆኑ የህዝብ በዓላትን ባገናዘበ መልኩ የወጣ እቅድ እንዳልሆነ የአዲስ አበባ እስልምና ጉዳዮች ከፍተኛ ም/ቤት አስገንዝቧል።

ምክር ቤቱ ፤ " በካላንደር ዝግ የሆኑ የህዝብ በዓላትን ባገናዘበ መልኩ እቅድ ማዘጋጀት የቢሮው ሃላፊነት ቢሆንም ሰኔ 21 እና 22/2015 የአረፋና የዒድ አልአድሀ በዓል ቀን እና ዋዜማ ፈተና ለመስጠት ማቀድ አግባብነት የለውም " ብሏል።

እቅዱ ተማሪዎች ተረጋግተው ፈተና ላይ እንዳይቀመጡ የሚያደርግ ተግባር ነው ሲልም ኮንኖታል።

የፈተናው ቀን ከዒድ አልአድሐ በዓል ከ3 ቀናት በፊት ወይም ከ3 ቀናት በኃላ እንዲሆን ይህም በአንድ ሳምንት ጊዜ ውስጥ ለህዝብ ይፋ እንዲደረግ አሳስቧል።

@tikvahethiopia

" የተከፋፈለ ሲኖዶስ የለም "

የ2015 ዓ.ም የቅዱስ ሲኖዶስ ርክበ ካህናት የሁለተኛው ቀን ጉባኤ ዛሬ ሲካሄድ ውሏል።

ይህ አስመልክቶ ብፁዕ አቡነ ጴጥሮስ (ዶ/ር) የቅዱስ ሲኖዶስ ዋና ጸሐፊ እና የኒውዮርክና አካባባቢዋ አኅጉረ ስብከት ሊቀ ጳጳስ ማብራሪያ ሰጥተዋል።

ብፁዕነታቸው በሁለተኛው ቀን በነበረው የቅዱስ ሲኖዶስ ምልዓተ ጉባኤ ሁለት ርዕሰ ጉዳዮች መወያያየቱን ገልጸዋል።

ቅዱስ ሲኖዶስ በቀዳሚነት በሀገር ሰላም ዙሪያ በተነሳው ርዕሰ ጉዳይ ጉባኤው ብዙ ሲወያይ ከቆየ በኋላ በመጨረሻም " ቅድስት ቤተ ክርስቲያን ሁሉን ማድረግ ትችላለች ፤ ምእመናንም የቅድስት ቤተ ክርስቲያንን ድምጽ ይሰማሉ " የሚለው ሐሳብ አሸንፎ በዚህ ጉዳይ ላይ ቅዱስ ሲኖዶስን ወክለው የሚሰሩ ሦስት ብፁዓን አባቶች ተመርጠው የሀገር ሰላምን በተመለከተ ረዥም ርቀት በመሔድና ከሚመለከተው አካል ጋር ሁሉ በመነጋገር በሀገር ሰላም ዙሪያ ከፍተኛ እንቅስቃሴ እንዲያደርጉና አሁን ካለንበት መከራ የምንወጣበትን መፍትሔ እንዲያመጡ ተመርጠዋል።

በቀጣይነት በወቅታዊ የቅድስት ቤተ ክርስቲን ችግር አስመልክቶ በትግራይ እና በኦሮሚያ አህጉረ ስብከት የነበሩትን ችግሮች መነሻ በማድረግ ፦

ሀ/ በክልል ትግራይ የተፈጠረውን ችግር ለመፍታት የትግራይ አባቶችና አባላቱን በአካል ለማነጋገር በቋሚ ሲኖዶስ የተመረጠውን ኮሚቴ ምልዓተ ጉባኤው ተቀብሎ የጀመረውን ሥራ እንዲቀጥል ወስኗል።

በተጨማሪም ፦

👉 ተቋርጦ የነበረው በጀት እንዲለቀቅ፤

👉 የማጽናኛ መርሐ ግብር እንዲካሄድና በተቻለ መጠን አስቸኳይ እርዳታ እንዲደረግ በጉባኤው ተወስኗል።

ለ/ በጥር 14 ቀን 2015 ዓ.ም የተከሰተውን የቤተ ክርስቲያን ፈተና በተመለከተ ሰፊ ውይይት ከተደረገ እና ወደ መግባቢያ ሐሳቦች መደረሱ ተገልጿል።

በስድስት አኅጉረ ስብከቶች ምንም ዓይነት የቤተ ክርስቲያን አገልግሎት እየተሰጠ አለመሆኑን ቅዱስ ሲኖዶስ የደረሰውን መረጃ መነሻ በማድረግ
የማያዳግም የመፍትሔ ለመስጠት ጉዳዩ በቀጥታ ከሚመለከታቸው ከሦስቱ ብፁዓን አባቶች ጋር አራት ብፁዓን አባቶችን ተጨማሪ በማድረግ
በቀጥታ የነበረው ችግር ሙሉ በሙሉ መቀረፉንና ከአንድ ሲኖዶስ ውጪ ሌላ አለመኖሩን ለመንግሥት አካላት በጋራ ሔደው የተደረሰበትን ስምምነት ተገቢውን መረጃ እንዲሰጡ ፦
- ብፁዕ አቡነ ኤርሚያስን
- ብፁዕ አቡነ ሩፋኤልን
- ብፁዕ አቡነ ናትናኤልን
- ብፁዕ አቡነ ጎርጎርዮስን
- ብፁፅ አቡነ ሳዊሮስን
- ብፁዕ አቡነ ዜና ማርቆስን እና ብፁዕ አቡነ ኤውስጣቴዎስን
በመመደብ እነዚህ ሰባት ብፁዓን አባቶች በአንድ ላይ ከመንግሥት ጋር በመነጋገር ፍጹም በሆነ የመግባባት ስምምነት መፈጠሩን ገልጸው ከእንግዲህ በኋላ የተከፋፈለ ሲኖዶስ እንደሌለ እና ከዚህ ሐሳብ ውጪ የሆነ አካል ከቅድስት ቤተ ክርስቲያን ሕግና ሥርዓት ውጪ የሆነ መሆኑን በአንድነት ለመንግሥት እንዲያሳውቁ መወከላቸው ተገልጿል።

ብፁዕነታቸው " በቀጣይ ያሉንን የመወያያ ርዕሰ ጉዳዮች በዚህ መልኩ በመግባባትና በመተማመን በመፍታት በሀገርና በቅድስት ቤተ ክርስቲያንን ሰላምና አንድነትን በማያዳግም ሁኔታ የሚያውጅ ቆይታ ይሆን ዘንድ መላው ሕዝበ ክርስቲያን በጸሎት አስቡን " ሲሉ አባታዊ መልእክታቸውንና ቡራኬአቸውን ሰጥተዋል።

ምንጭ፦ EOTC TV

@tikvahethiopia

ዘማሪት ሂሩት በቀለ ከዚህ ዓለም በሞት ተለየች።

ዘማሪት ሂሩት ዘማሪ ከመሆኗ በፊት በህዝብ ዘንድ ዛሬም ድረስ የሚደመጡና የሚወደዱ እጅግ በርካታ የዘፈን ስራዎች ነበሯት።

ከዘፈን ዓለም ወጥታ ወደ መንፈሳዊ ዓለም ከገባች በኃላ የተለያዩ የመዝሙር አልበሞችን ሰርታ ለአድማጭ አቅርባለች።

ዘማሪ ሂሩት ዛሬ በ80 ዓመቷ ከዚህ ዓለም በሞት የተለየች ሲሆን ፤ የ7 ልጆች እናት ፣ የ10 ልጆች አያት እና የ7 ልጆች ቅድመ አያት ነበረች።

@tikvahethiopia

#SUDAN

" ወደ ተኩስ አቁም ለማምራት መደላደል ነው " የተባለ ስምምነት በሱዳን ጦር እና ፈጥኖ ደራሽ ኃይል (RSF) መካከል ተፈረም።

በሱዳን ወጊያ ላይ የሚገኙት ሁለቱ ተፋላሚ ኃይሎች ሳዑዲ አረቢያ ፣ ጅዳ ሄደው ባካሄዱት ድርድር የመጀመሪያ ስምምነት ላይ መድረሳቸው ተነግሯል።

" የቅድሚያ ስምምነት መርሆች " መፈራረማቸውን የዘገበው አል አረቢያ  ሁለቱም ወገኖች ለሱዳን ሉዓላዊነትና አንድነት ያላቸውን ቁርጠኝነት ገልጸዋል ብሏል።

ሁለቱ ኃይሎች የሱዳን ወዳጆች የሚያደርጉትን ጥረት በደስታ እንቀበላለን ማለታቸውንም ተነግሯል።

በመጀመሪያው ስምምነት መሰረት ፤ በሰላማዊ ሰዎች ላይ ጉዳት ከሚያደርሱ ጥቃቶች እንደሚታቀቡ ፤ በሱዳን ያሉ ሲቪሎች ያሉባቸውን አካባቢዎች ለቀው እንዲወጡ ያስገድዳል።

ተፋላሚ ኃይሎቹ በሱዳን የመንግስትና የግል ተቋማትን ለቆ ለመውጣት፣ የህክምና ባለሙያዎችን እና የህዝብ ተቋማትን መጠበቅ፣ የሰብዓዊ እርዳታ አቅርቦት መፍቀድ ያላቸውን ቁርጠኝነት ገልጸዋል።

የሳዑዲ አረቢያ የውጭ ጉዳይ ሚንስቴር ስምምነቱን በደስታ መቀበሉን ገልጾ፤ የጅዳ ድርድር በሁለቱ ወገኖች መካከል እስከ 10 ቀናት የሚቆይና የተኩስ አቁም ስምምነት ላይ ለመድረስ እንደሚያተኩር አስታውቋል። 

" የደህንነት እርምጃዎቹ በአሜሪካ፣ በሳዑዲ አረቢያ እና በዓለም አቀፉ ማህበረሰብ የሚደገፍ የተኩስ አቁም ቁጥጥር ዘዴን ያካትታል " ብሏል።

የአሜሪካ መንግስት በሰጠው መግለጫ ስምምነቱ የተኩስ አቁም ስምምነት እንዳልሆነ ተናግሯል። የጂዳ ስምምነት ወደ ተኩስ አቁም ስምምነት እንዲያመራ መደላደል እንደሆነም ተነግሯል።

መረጃው የአል አረቢያ ቴሌቪዥን እና አል አይን ኒውስ ነው።

@tikvahethiopia