" 1 ሚሊዮን ደንበኞቼን ሸልማለሁ " - ሳፋሪኮም ኢትዮጵያ

ሳፋሪኮም ኢትዮጵያ " በ14 ሳምንታት ውስጥ 1 ሚሊዮን ደንበኞቼን ሸልማለሁ " ብሏል።

ሳፋሪኮም ኢትዮጵያ ለአዳዲስ እና ነባር ለሆኑ ደንበኞቹ " ተረክ በጉርሻ " በሚል የሽልማት  መርሐግብር መጀመሩን አስታውቋል። በዚህ መርሐግብር አንድ ሚሊዮን ደንበኞችን ሸልማለው ብሏል።

የሽልማት መርሐግብሩ በየሁለት ሳምንቱ እና በየወሩ የሚካሄድ ሆኖ ከመጋቢት 27 እስከ ሰኔ 27 እንደሚቆይ ተገልጿል።

ሽልማቱ ምንድን ነው ?

ሳፋሪኮም ኢትዮጵያ አትዮጵያ 3 መኪኖች ፣ 7 ሞተር ሳይክሎች ፣ 7 ባጃጆች፣ ስማርት ስልኮችና ነጻ የአየር ሰዓት ለሽልማቱ ማዘጋጀቱን ገልጿል።

- መኪኖቹ በየወሩ ለባለ ዕድለኞች የሚተላለፉ ይሆናል።

- በየሁለት ሳምንቱ አንድ ባጃጅ እና አንድ ሞተር ሳይክል ለዕድለኞች ይደርሳል።

- በየሁለት ሳምንቱ 3 ሳምሰንግ S-21 እንዲሁም 3 ሳምሰንግ ታብ 8 ለባለ ዕድለኞች ይወጣል።

- ሳፋሪኮም በራሱ ብራንድ የሚያስመጣቸው " ቅመም " የተባሉ ስልኮችን ለሽልማቱ ያዘጋጀ ሲሆን ከቅመም ስልኮች ውስጥ " ቀረፋ " እና " ናና " የተባሉ ስልኮችን ለሽልማት አቅርቧል። እነዚህም በየሁለት ሳምንቱ ለ100 እድለኞች በሽልማትነት ይቀርባሉ፤

- በየቀኑ የ50 ብር፤ የ100 ብር፤ የ200 ብር የአየር ሰዓት ሽልማቶችም ተዘጋጅተዋል።

የዕጣው ዕድለኛ ለመሆን ምን ማድረግ ይጠበቃል ?

- በዕጣው ተሳታፊ ለመሆን ለአዲስ ደንበኞች ሲም ካርድ ገዝተው በ24 ሰዓት ውስጥ ካርድ የሚሞሉ ከሆነ 3 የዕጣ ቁጥሮችን ማግኘት ይችላሉ።

- የሳፋሪኮምን የ10 ብር አየር ሰዓት መሙላት አንድ የእጣ ቁጥር እንዲደርሶ ያስችላል። ይህም ደንበኞች በሚገዙት የአየር ሰዓት መጠን የዕጣ ቁጥሮቹ መጠን እየጨመረ ይሄዳል።

- የድምጽ፣ የአጭር መልዕክት፣ የዳታ፣ የሁሉም ኔትወርክ ወይንም የኮምቦ ጥቅሎችን መግዛት፤ በ1ዐ ብር ጥቅል አንድ ኮድ፤ በ20 ብር ሁለት ጥቅል ሁለት ኮድ ማገኘት ይቻላል ተብሏል። የአየር ሰዓት በስጦታ መልክ መላክም የዕጣ ቁጥር ያሰጣል።

በተጨማሪም ደንበኞች WhatsApp ላይ ብቻ የሚገለገሉበት የኢንተርኔት ጥቅል እያቀረበ መሆኑን የገለጸው ሳፋሪኮም የ 1GB ጥቅል ለሚገዙ ደንበኞቹ 3 የዕጣ ቁጥሮችን ማግኘት ይቻላል ተብሏል።

በየሁለት ሳምንቱ የሚወጣው ዕጣ በብሔራዊ ሎተሪ አማካኝነት የሚወጣ ሲሆን አሸናፊዎች እድለኛ መሆናቸውን በ0700 700 700 ተደውሎ የሚገለፅላቸው ይሆናል ተብሏል።

ቁጥራዊ መረጃዎች እንደሚያሳዩት አሁን ላይ ሳፋሪኮም ኢትዮጵያ የደንበኞቹ ቁጥር ከ2.8 ሚሊዮን መሻገሩን አስታውቋል።

@tikvahethiopia

የነጻ ትምህርት ዕድል

በሰዎች ለሰዎች ድርጅት ወይንም Menschen für Menschen Foundation ስር የሚተዳደረው የሐረር ቴክኖሎጂ ኮሌጅ በ2015 የትምህርት ዘመን ብቁ የሆኑ የተፈጥሮ ሳይንስ ተማሪዎችን በመጀመሪያ ዲግሪ መርሐግብር ሙሉ ወጪያቸውን ሸፍኖ ማስተማር ይፈልጋል፡፡

የዚህ ዕድል ተጠቃሚ መሆን የምትፈልጉ ተማሪዎች ከመጋቢተ 18 - 30 ቀን 2015 ዓ.ም. ባሉት የስራ ቀናት በአካል ቀርባችሁ መመዝገብ የምትችሉ መሆኑን እናስታውቃለን።

የመመዝገቢያ መስፈርቶች ፦ ትምህርት ሚኒስቴር በ2014 ዓ.ም. ያወጣውን የከፍተኛ ትምህርት መግቢያ መስፈርት የሚያሟሉ ወይንም በአገር አቀፍ ፈተና 50% እና ከዚያ በላይ ያመጡ የተፈጥሮ ሳይንስ ተማሪዎች፡፡ 

የምዝገባ ቦታዎች በአዲስ አበባ ቦሌ ቡልቡላ በሚገኘው የሰዎች ለሰዎች ድርጅት ዋና መ/ቤት፤ ሐረር  በኮሌጁ ቅጥር ግቢ፤ የድርጅቱ ፕሮጄክት ጽ/ቤቶች በሚገኙባችው በተጨማሪም በድረ-ገጻችን https://www.mfmattc.edu.et ላይም መመዝገብ ትችላላችሁ፡፡

ለተጨማሪ ማብራሪያ በስልክ ቁጥር 0256663738/1139 ወይም 0114714579 ደውሎ ማንጋገር ይቻላል፡፡ 

(ሰዎች ለሰዎች ድርጅት Menschen für Menschen Foundation)

#ግዕዝ_ባንክ

ግዕዝ ባንክ ከብሔራዊ ባንክ የሚጠበቅበትን ግማሽ ቢልዮን ብር በ1 ወር ውስጥ ለመሰብሰብ ማቀዱን ገለጸ።

ግእዝ ባንክ ከመጋቢት 2012 ዓ.ም ጀምሮ ለምስረታ ሂደት የሚያበቃውን የአክሲዮን ሽያጭ ማከናወን ቢጀምርም "በሀገሪቱ በተፈጠረው ወቅታዊ ችግር ምክንያት እንቅስቃሴው ተገትቶ ቆይቷል" ብሏል።

በዛሬው ዕለትም የተፈጠረውን መረጋጋት ከግምት ውስጥ በማስገባት ዳግም የአክስዮን ሽያጭ መጀመሩን በሰጠው መግለጫ አስታውቋል።

ዳግም ሽያጭ መጀመሩንም አስመልክቶ የባንኩ መስራች የመሆን ፍላጎት ላላቸው ግለሰቦችና ድርጅቶች ከአሁን ጀምሮ በስራ ላይ ባሉ ባንኮች በተከፈተው የዝግ እና የአግልግሎት ሂሳብ ቁጥሮች የመመስረቻ አክስዮን መግዛት ይቻላል ብሏል።

ባንኩ እንዳስታወቀው፥ የአንድ አክስዮን መጠን 1000 ብር ሲሆን፤ አባል ለመሆን 5,000 ብር ክፍያ ይኖረዋል። መስራች አባል ለመሆን 50 አክስዮኖችን እና ከዚያ በላይ መግዛት ወይንም ደግሞ ከ50,000 ብር በላይ መክፈል ይጠበቃልም ተብሏል።

ባንኩ ከብሔራዊ ባንክ የሚጠበቅበትን ግማሽ ቢልዮን ብር በአንድ ወር ውስጥ ለመሰብሰብ ማቀዱን አሳውቋል።

አክስዮኑንም ሙሉ ክፍያ በመፈጸም ወይም 25 በመቶውን በቅድሚያ ከፍሎ ቀሪውን 75 በመቶውን ደግሞ ቀስ እያሉ ጠቅላላ ጉባኤ እስከሚጠራ ድረስ በመክፈል መግዛት እንደሚቻል ተጠቁሟል።

ዲያስፖራን በተመለከተ ባሉበት ሀገር መገበያያ ገንዘብ የሚገዙ ሲሆን አክሲዮኖችን ሲገዙ 5℅ የአገልግሎት ክፍያ እንዳለውም አስታውቋል።

በአጭር ጊዜ ሽያጩን ጨርሶ ወደ ስራ ለመግባት እንደሚሰራ ያሳወቀ ባንኩ፤ አክስዮን ሽያጩ ተቋርጦ በነበረበት ወቅት መስራች አባላትና ደንበኞቹ ላሳዩት ትእግስት ምስጋናውን አቅርቧል።

@tikvahethiopia

መንግስት " ለጎዳና ህጻናትና ወጣቶች ተገቢውን ጥበቃ አላደረገም " በሚል ክስ ቀረበበት።

በመዲናዋ በተሰራ ጥናት ፥ ወደ 66ሺህ 575 የሚጠጉ የጎዳና ተዳዳሪዎች እንደሚገኙ፤ 85 በመቶ የሚሆኑትም ከ10 - 40 ዓመት የዕድሜ ክልል ዉስጥ ያሉ መሆናቸውን ያመለክታል።

የአዲስ አበባ ከተማ አስተዳደር ሴቶች ህፃናትና ማኅበራዊ ጉዳይ ቢሮ ትላንት በሰጠው መግለጫ ከ31 ሺህ 4 መቶ 34 ውሎና አዳራቸውን በአዲስ አበባ ጎዳናዎች ላይ ያደረጉ ዜጎች ማንሳቱን ገልጿል።

የችግሩ መንስኤ በርካታ በሆንም መንግስት ችግሩን ለመፍታት ግዴታውን አልተወጣም በሚል ክስ እንደቀረበበት ሰምተናል።

ክሱን ያቀረበውም የህግ ባለሞያዎች ለሰብዓዊ መብቶች የተሰኘው ድርጅት ሲሆን በአዲስ አበባ ጎዳና ላይ በሚኖሩ ዜጎች በተለይ ህጻናት ላይ የሚደርሱ የሰብዓዊ መብት ጥሰቶችን ለማስጠበቅ ያለመ መሆኑ ተጠቅሷል።

ክሱን አስመልክቶ የህግ ባለሞያው ዶ/ር መሰንበት አሰፋ ለቲክቫህ ኢትዮጵያ ማብራሪያ ሰጥተዋል።

ቁጥራቸው ከ60 እስከ 70 ሺ የሚደርሱ የጎዳና ተዳዳሪዎች አዲስ አበባ ውስጥ የሚሉት ዶ/ር መሰንበት "ሰፊ የሆነ ማኅበራዊ ቀውስ ነው ያለው ይህ ለማንም የሚታዘበው ነው። መንግስት በህገ-መንግስቱ አንቀጽ 36 የተቀመጠውን እንዲሁም በተለያዩ አዎጆች መሰረት ኃላፊነቱን እየተወጣ አይደለም " ሲሉ ያነሳሉ።

ስለ ክሱ ጭብጥ ሲያስረዱም፥ "መንግስት ይሄንን ቀውስ ለመፍታት በቂ አደረጃጀትም፤ ፋይናንስም፤ አሰራርም የለውም ነው የእኛ ትልቁ መከራከሪያችን... ጥያቄው በጀት መድቦ እንዲህ ያድርግ ብቻ አይደለም፤ የመንግስት አሰራር፣ ቁመና በአጠቃላይ የጎዳና ተዳዳሪዎችን ችግር በሚፈታ መልኩ [ያለ] አይደለም ነው፤ ይህንን ነው ለፍርድ ቤት ለማስረዳት እየሞከርን ያለው" ሲሉ ያስረዳሉ።

ህጻናትን በዚህ ሁኔታ መተው ከፍተኛ የሆነ የሰብዓዊ መበት ጥሰት መፈጸም ነው የሚሉት ዶ/ር መሰንበት " ወቅታዊ የሆኑ ችግሮችን ለመፍታት ካልሆነ በስተቀር መንግስት ችግሩን በዘላቂነት ለመፍታት የአደረጃጀትም የአሰራርም የፖሊሲ ማዕቀፍም የለውም። በዚያ ደረጃ ነው ትኩረት እንዲሰጠው የምንፈልገው " ሲሉ ገልጸዋል።

ከዚህ በተጨማሪ ፥ " ትልልቅ ስብሰባዎች ሲኖሩ ህጻናትን አንድ ቦታ ማጎር በፍጹም ህገወጥ ነው፤ ፍርድ ቤቱ ይሄንን የመንግስት አሰራር እና እርምጃ በፍጹም ህገ-ወጥ እንደሆነ ውሳኔ እንዲሰጥበትም እንጠይቃለን " ብለዋል።

ይህንን ክስ ለመመስረት ጥናት ተደርጓል ?

ዶ/ር መሰንበትን ስለሂደቱ ጠይቀናቸው ጥናቶች መደረጋቸውን፤ ህጻናቱ ያሉበትን ሁኔታ መመልከታቸውን፤ የመንግስት አካላትንም ማነጋገረቸውንና፣ በዚህ ዙሪያ ከሚሰሩ መንግስታዊ ያልሆኑ ተቋማቶች ጋርም መምከራቸውን ጠቅሰው ይህንን ሁሉ ጭብጥ ይዘን ነው ወደ ፍርድ ቤት ክስ የገባነው ብለዋል።

ክሱ ምን ደረጃ ላይ ይገኛል? ለሚለው ጥያቄም ክስ የቀረበባቸው የመንግስት ተቋማት መጥሪያ ደርሷቸዋል፤ ምላሽ እየጠበቅንም ነው ብለዋል።

የክስ ሂደቱ ስለሚከተለው ስልት ፦

ማኅበሩ አሁን እየተከተለ ያለው "ስልታዊ የፍርድ ቤት ሙግት" የምንለውን ዘዴ መሆኑን ባለሞያው ገልጸዋል። ይህም የመብት ጥያቄን ለመፍታት ብቻ ሳይሆን ማኅበራዊ ቀውሶች ሲኖሩ እነዛን እንዴት በህግ ማዕቀፍ ለመፍታት እንደሚያግዝ ጠቁመዋል።

ልምዱ ምን ይመስላል ?

ልምዱ ብዙ አይደለም። ዜጎች መብታችን ተነክቷል ሲሉ የሚከሱት በዋናነት የመንግስት ተቋማትና የመንግስት መስሪያቤቶችን ነው ህገመንግስቱም፤ የህግ ማዕቀፋችንም ይህንን ይፈቅዳሉ። ፍርድ ቤቶች እዚህ ላይ ብዙ ደፍሮ ያለመወሰን አለ፤ ግን ቀስ እያለ የህግ ግንዛቤ እየሰፋ ሲሄድ ይሻሻላል ብለን ነው የምናስበው ሲሉ አስረድተዋል።

@tikvahethiopia

የኢትዮጵያን ስም ያስጣራው የ23 ዓመቱ አባስ ሐዲ ዑመር !

ዱባይ በተካሄደ የቁርኣን ውድድር ኢትዮጵያዊው አባስ ሐዲ ዑመር ከባንግላዴሽ ተወካዩ በመከተል ውድድሩን ሁለተኛ በመሆን አጠናቋል።

አባስ ሐዲ ዐመር #ለ26ኛ ጊዜ በዩናይትድ አረብ ኤምሬት ዱባይ ሲካሄድ በቆየው ዓለም አቀፉ የቁርኣን ወድድር ላይ ኢትዮጵያን በመወከል ተወዳድሮ 2ኛ አሸናፊ መሆን የቻለ ሲሆን ዛሬ ረቡዕ ወደ ሐገሩ ተመልሷል፡፡

ቃሪዕ አባስ ሐዲ ዑመር ዛሬ ቦሌ አለም አቀፍ አየር ማረፊያ ሲደርስ አቀባበል ተደርጎለታል፡፡

በቅርቡ 24ኛ ዓመቱን የሚደፍነው አባስ በዓለም አቀፍ የቁርኣን ውድድር ላይ ሲሳተፍ ለሁለተኛ ጊዜ ነው ተባቧል።

ከዚህ ቀደም በቱርክ በተካሄደ ውድድር ተሳታፊ ነበር።

#ሀሩንሚዲያ

@tikvahethiopia

" ኢፍጣራችን ለወገናችን "

ሶስተኛው ታላቁ የጎዳና ላይ ኢፍጧር የፊታችን ቅዳሜ ዕለት / ረመዳን 17 ይከናወናል ተብሏል።

የዘንድሮው ኢፍጧል " ኢፍጧራችን ለወገናችን " በሚል መሪ ቃል ነው የሚካሄደው።

የቅዳሜው ታላቁ የጎዳና ላይ ኢፍጣር በተለያዩ የሀገሪቱ ክፍሎች በሰዉ ሰራሽና በተፈጥሮ ምክንያት ጉዳት ያደረሰባቸዉና የተቸገሩ ወገኖቻችን ታሳቢ ባደረገ መልኩ እንደሚካሄድ አዘጋጆቹ ዛሬ በሰጡት መግለጫ አስታውቀዋል።

በዕለቱ ለተቸገሩ ወገኖች የሚሆን ፦
- እንደ ፉርኖ ዱቄት፣
- ሩዝ ፣
- ፓስታ፣
- መኮረኒ፣
- ዘይት፣
- የበቆሎ እህል፣
- ምስር፣
- የህፃናት የታሸጉ ብትን ወተቶች፣
- የሕፃናት አልሚ ምግቦች
- የንጽህና መጠበቂያ፣
- አልባሳት ሙስሊሙ ህብረተሰብ ይዞ መምጣት እንደሚችል ተገልጿል።

በረመዷን 17 ዕለት የሚከናወነው ታላቁ የጎዳና ላይ ኢፍጣር በኢትዮጵያ ዘንድሮ በበላይነት የአዲስ አበባ ከተማ መጅሊስ ከሀላል ፕሮሞሸን እና ከነጃሽ በጎ አድራጎት ድርጅት ጋር በመተባበር እንደሚያዘጋጁት መገለፁን ሀሩን ሚዲያ ዘግቧል።

@tikvahethiopia

" በፌዴራል ፖሊስ ቁጥጥር ስር የዋሉት በሙስና ወንጀል ተጠርጥረው ነው " - የፍትህ ሚኒስቴር

ትላንት ያለመከሰስ መብታቸው የተነሳው የፓርላማ አባሉ ዶ/ር ጫላ ዋታ ዛሬ በፖሊስ ቁጥጥር ስር መዋላቸው ታውቋል።

የቀድሞው የቡሌሆራ ዩኒቨርሲቲ ፕሬዝዳንት ዶ/ር ጫላ ዋታ፤ #ዛሬ_ረቡዕ ረፋድ በፖሊስ ቁጥጥር ስር መዋላቸውን የፍትሕ ሚኒስቴር የህዝብ ግንኙነት ዳይሬክቶሬትን ዋቢ በማድረግ " ኢትዮጵያ ኢንሳይደር " ድረገፅ ዘግቧል።

ዶ/ር ጫላ በፌደራል ፖሊስ አባላት በቁጥጥር ስር የዋሉት #በሙስና_ወንጀል_ተጠርጥረው መሆኑን ዳይሬክቶሬቱ ለድረገፁ በሰጠው ቃል ገልጿል።

ማስታወሻ ፦ ዶ/ር ጫላ ዋታ የተጠረጠሩባቸው የሙስና ጉዳዮች ምንድናቸው ? እሳቸውስ ትላንት ለህ/ተ/ም/ቤት ምን አሉ ? መለስ ብለው በዚህ ያንብቡ : https://t.iss.one/tikvahethiopia/77517

@tikvahethiopia

#እንድታውቁት

ከአዲስ አበባ - ሙከጡሪ አለም ከተማ - ደጎሎ መስመር ከሙከጡሪ 72.3 ኪ.ሜ. እርቀት ላይ የሚገኘው ሀገር አቋራጩ የጀማ ወንዝ ድልድይ ጉዳት ደርሶበታል / ተሰብሯል።

የኢትዮጵያ መንገዶች አስተዳደር ዛሬ ምሽት ባሰራጨው የማሳሰቢያ መልዕክት ድልድዩ ጉዳት የደረሰበት ከተወሰነላቸው የክብደት መጠን በላይ በጫኑ ከባድ ተሽከርካሪዎች ሳቢያ እንደሆነ ገልጿል።

ድልድዩ በአሁኑ ወቅት ለተሽከርካሪዎች አገልግሎት መስጠት የማይችልበት ደረጃ ላይ እንደሚገኝም አመልክቷል።

ይህንን ድልድይ በአጭር ጊዜ ውስጥ ለአገልግሎት ለማብቃት እንዲያስችል አስፈላጊውን የጥገና ሰራ በኢትዮጵያ መንገዶች አስተዳደር የሚከናወን አሳውቋል።

የዚህ መስመር ተጠቃሚዎች ለድልድዩ አስፈላጊውን የጥገና ስራ ተከናውኖ ለአገልግሎት እስኪበቃ ድረስ ሌሎች አማራጮችን እንዲጠቀሙ መልዕክት ተላልፏል።

የእንሳሮ ወረዳ ኮሚኒኬሽን ጉዳዩን በተመለከተ ባሰራጨው መልዕክት ፥ " የጀማ ድልድይ ዛሬ ሁለት ሲኖ ትራክ ተከታትለው ሲሆዱ አንዱ ሲኖ ትራክ የውሃ መያዣ ቦቴ የጫነ ሲሆን አደኛ አፈር ጭኖ ሲጓዝ ባልታወቀ ምክንያት ድልድዩ ሊደረመስ ችላል ፤ በሰው ላይ የደረሰ ጉዳት የለም " ብሏል።

የፎቶ ባለቤት ፦ የእንሳሮ ወረዳ ኮሚኒኬሽን

@tikvahethiopia