#Turkiye #UK

ተርኪዬ ፤ በሰሜን ኢትዮጵያ ማርች 24 /2022 በፌዴራል መንግስት ለሰብዓዊነት ሲባል የተኩስ አቁም ከታወጀ በኃላ ዳግም ግጭት መቀስቀሱን የሚገልፁ ሪፖርቶችን በሀዘን እና ስጋት ውስጥ ሆና እየተከታተለች እንደምትገኝ ገልፃለች።

ሁሉም ወገኖች ግጭት በዘላቂነት እንዲቆም ለማድረግ እና በሀገሪቱ ሰላም እና መረጋጋት እንዲሰፍን ወደ ንግግር እንዲመለሱ ጋብዛለች።

ለዚህ አላማ ደግሞ ሁሉንም አይነት ድጋፍ ለመስጠት ዝግጁ መሆኗን በድጋሚ አረጋግጣለች።

ተርኪዬ በኢትዮጵያ ሰላምን እና መረጋጋትን ለማስፈን ባሚደረገውን ጥረት ድጋፏን አጠናክራ እንደምትቀጥል ገልፃለች።

በሌላ በኩል ፤ ዩናይትድ ኪንግደም በሰሜን ኢትዮጵያ ዳግም ግጭት መቀስቀሱን የሚገልፁ ሪፖርቶች እንደሚያሳስባት ገልፃለች።

ይህ ሁኔታ ቀድሞም አስከፊ የነበረውን የሰብዓዊ ሁኔታ ይበልጥ ያባብሰዋል ብላለች።

ዩናይትድ ኪንግደም የኢትዮጵያ መንግስት እና ህወሓት ግጭት እንዲያቆሙና የፖለቲካ መፍትሄ እንዲመጣ ያለ ምንም ቅድመ ሁኔታ ወደ ድርድር ጠረጴዛ እንዲመጡ አሳስባለች።

@tikvahethiopia

#ECSOC

የኢትዮጵያ ሲቪል ማህበረሰብ ድርጅቶች ም/ ቤት በሰሜኑ የኢትዮጵያ ክፍል ዳግም የተቀሰቀሰው ትጥቅን ያካተተ ግጭትን እንዲረጋጋ እና የተጀመረው የሰላም ሂደት በአስቸኳይ እንዲቀጥል አበክሮ ጠይቋል።

ም/ቤቱ በሰሜኑ የኢትዮጵያ ክፍል መልሶ ያገረሸው የትጥቅ ግጭት በእጅጉ እንደሚያሳስበው ገልጿጻ።

ከዚህ በፊት የተፈጠረው የትጥቅ ግጭት ተነግሮ የማያልቅ የሰው ልጅ ስቃይ እና ከፍተኛ መሰረተ ልማቶች መውደም ምክንያት መሆኑን ይታወቃል ያለው ም/ቤቱ አሁን ዳግም የተቀሰቀሰው የትጥቅ ግጭት እንዲረጋጋና ግጭቱ እንዳይባባስ አፈላጊው ሁሉ እንዲደረግ አሳስቧል።

በተጨማሪም ም/ቤቱ አስቸኳይ የሰብዓዊ ተኩስ አቁሙ መከበር ለሰብአዊ ዕርዳታ አቅርቦት ቀጣይነት እና ለሰላም ሂደቱ ስኬታማነት ወሳኝ እንደሆነ ገልጾ አለመግባባቶች በፖለቲካዊ ውይይት መፈታት እንዳለባቸው በጥብቅ እንደሚያምን ገልጿል።

ለዚህም የሰላም ማስፈን ሂደቱ በአስቸኳይ እንዲቀጥልና ሀገሪቱንና ዜጎቿን ከተጨማሪ ጥፋት ለመታደግ የሰላም ሂደቱ በቅን ልቦና እንዲካሄድ ምክር ቤቱ ጠይቋል።

የጉዳዩን አሳሳቢነት ከግንዛቤ በማስገባት የአፍሪካ ህብረት (AU) የፌደራል መንግስትን እና ህወሃትን የማደራደር ሚናውን በእጥፍ በማሳደግ ሰላማዊ እልባት ላይ እንዲደረስ የበኩሉን እንዲወጣ ምክር ቤቱ ጥሪ አቅርቧል።

የሰላም ማስፈን ሂደቱን አስፈላጊ ሆኖ በተገኘ በማንኛውም መንገድ ለመደገፍ ያለውን ቁርጠኝነት እና ዝግጁነትም በድጋሚ አረጋግጧል።

@tikvahethiopia

#CARD

የመብቶችና ዴሞክራሲ ዕድገት ማዕከል (ካርድ) በሰሜን ኢትዮጵያ ጦርነት እንደ አዲስ ማገርሸቱ ለጥቂት ወራት ታይቶ የነበረውን የሰላም ጭላንጭል ተስፋ እንዳደበዘዘው ገልጿል።

ካርድ ፤ የግጭቱን እና የጦርነት ፕሮፖጋንዳውን ማባባስ አጥብቆ እንደሚያወግዝ ገልጾ ሁሉም ወገኖች ጦርነቱንና ግጭቱን ከሚያባብሱ ትርክቶና ድርጊቶች እንዲታቀበ ጥሪ አቅርቧል።

በተጨማሪም የዓለም ዐቀፍ ሰብዓዊነት ህግጋት እንዲያከብሩ ጥሪ አቅርቧል።

@tikvahethiopia

#WFP #UN

" ነዳጁ በቅርቡ በWFP የተገዛ እና ከመሰረቁ ጥቂት ቀናት በፊት መቐለ የደረሰ ነበር " - WFP

የዓለም ምግብ ፕሮግራም (WFP) ከመቐለ ተሰረቀ ባለው ነዳጅ ጉዳይ ላይ በዋና ዳይሬክተሩ ዴቪድ ቢዝሊ በኩል ማብራሪያ ሰጥቷል።

ዋና ዳይሬክተሩ ትላንት ጥዋት የተዘረፈው ነዳጅ ከግማሽ ሚሊዮን ሊትር  በላይ (12 ታንከር) መሆኑንና የታጠቁ ቡድኖች ወደ WFP ግቢ ገብተው መውሰዳቸውን ገልፀዋል።

ነዳጁ በቅርቡ በWFP የተገዛ እና ከመሰቀሩ ጥቂት ቀናት በፊት የደረሰ መሆኑን አስረድተዋል።

WFP ያለ ነዳጁ ምግብ፣ ማዳበሪያ፣ መድሃኒት እና ሌሎች አስቸኳይ ድጋፎችን በመላው ትግራይ ሊያደርስ እንደማይችል ገልጸዋል።

በተጨማሪም ጄነሬተሮችን እና ተሽከርካሪዎች ለማንቀሳቀስ እንደሚቸገር የገለፀው WFP 5.2 ሚሊዮን የሚደርሰውን ረሃብ የተጋረጠበትን ህዝብ ለመድረስ እንቅፋት እንደሚሆንበት አስረድቷል።

የነዳጁ መሰረቅ በግጭት ሳቢያ እየተፈተነ ያለውን በትግራይ ያለውን ማህበረሰብ ወደ ረሃብ አፋፍ ይገፋል ብለዋል።

የትግራይ ባለስልጣናት በአስቸኳይ የነዳጅ ክምችቱን እንዲመልሱ አሳስበዋል።

ህወሓት በበኩሉ " ከወራት በፊት ለዓለም ምግብ ፕሮግራም ያበደርኩትን ነዳጅ መልሼ ወስድኩ እንጂ ዘረፋ አልፈጸምኩም " ሲል መልሷል።

ዋና ዳይሬክተሩ መሰል አስተያየት ከመስጠታቸው በፊት ዝርዝር ሁኔታውን ማጣራት ነበረባቸው ብሏል።

ከ600 ሺ ሊትር በላይ ነዳጅ ለWFP አበድርያለሁ ያለው ህወሓት " በነበረን ስምምነት መሠረት ያበደርነውን ነዳጅ ተመላሽ እንዲሆን ነው የጠየቅነው " ሲል ገልጿል።

የወሰድነው ነዳጅ እንደ ሆስፒታል ፣ ክሊኒክ እና ሌሎች የጤና ማዕከላትን ለማንቀሳቀስ ጥቅም ላይ ይውላልም ሲሉ የዓለም ምግብ ፕሮግራም ዳይሬክተርን ክስ አጣጥሏል።

@tikvahethiopia

#SNNPRS #SouthWestEthiopia

የ8ኛ ክፍል ፈተና ውጤት ይፋ ሆነ።

የደቡብ ክልል እና የደቡብ ምዕራብ ኢትዮጵያ ክልል የ8ኛ ክፍል ፈተና ውጤት ይፋ መሆኑ ዛሬ ተገልጿል።

በሁለቱ ክልሎች ውሳኔ መሰረት የማለፊያ ነጥብ ፦

👉 ለወንዶች 41፣
👉 ለሴቶች 40 እና
👉 ለአይነ ስውራን 39 ሆኖ ተወስኗል።

በዚህ መሰረት ፦ በ2014 ዓ.ም የትምህርት ዘመን በሁለቱም ክልሎች ለፈተና ከተቀመጡ ከ257 ሺህ በላይ ተማሪዎች 187 ሺህ 500 በላይ ተማሪዎች ወደቀጣይ ክፍል የሚያሳልፋቸውን ውጤት አምጥተዋል።

ለፈተና ከተቀመጠው አጠቃላይ ተማሪ ቁጥር ሲታይ ከ73 በመቶ በላይ ተማሪዎች አልፈዋል።

በተለየ መልኩ ከጸጥታ ጋር በተያያዘ በአሉታዊ ጫና ውስጥ ሆነው የተማሩና ለፈተና የተቀመጡ የደራሼ ልዩ ወረዳ ተማሪዎችን ውጤት በተለየ መልኩ ታይቷታ።

በዚህም መሰረት ፦

👉 ለወንዶች 39፣
👉 ለሴቶች 38 እና
👉 ለአይነ ስውራን 37 ሆኖ ተወስኗል።

የሁለቱ ክልሎች ተማሪዎች ውጤታቸውን ከነገ ጀምሮ መውሰድ ይችላሉ ተብሏል።

የደራሼ ልዩ ወረዳ ተማሪዎች ግን ውጤታቸው በእጅ የሚሰራ በመሆኑ የ1 ሳምንት ጊዜ ዘግይቶ ይደርሳል እስከዛው በትዕግስት እንዲጠባበቁ መልዕክት ተላልፏል።

#ENA

@tikvahethiopia

#USAID

" ... ኢትዮጵያውያን ሲቪሎችን ለመመገብ የሚደረገውን ጥረት ማደናቀፍ እጅግ የጭካኔ ተግባር ነው። የተዘረፈውን ነዳጅ መልሱ  " - ሳማንታ ፓወር

የአሜሪካ ህዝብ ተራድኦ ድርጅት (USAID) አስተዳዳሪ ሳማንታ ፓወር ፤ ህወሓት (TPLF) የዓለም ምግብ ፕሮግራም ለስራ የሚጠቀምበትን 150,000 ጋሎን ነዳጅ መዝረፉን በመግለፅ ድርጊቱን አጥበቀው አውግዘዋል።

በተጨማሪም በእርዳታ ሰራተኞች ላይ እንግልት መድረሱን በመጠቆም ፤ ህወሓት (TPLF) በእርዳታ ሰራተኞች ላይ ያደረሰውን እንግልት ድርጅታቸው አጥብቆ እንደሚያወግዝ ገልፀዋል።

" ኢትዮጵያውያን ሲቪሎችን ለመመገብ የሚደረገውን ጥረት ማደናቀፍ እጅግ የጭካኔ ተግባር ነው " ያሉት ፓወር ህወሓት (TPLF) የዘረፈውን ነዳጅ እንዲመልስ እና የሰብዓዊ ድጋፍ ስራዎችን እንዲያከብር በድርጅታቸው ስም ጥሪ አቅርበዋል።

ከነዳጅ ዝርፊያ ጋር በተያያዘ አሁንም ዓለም አቀፍ ተቋማት ድርጊቱን እያወገዙ ሲሆን ህወሓት (TPLF) በሰጠው ምላሽ " ከወራት በፊት ለዓለም ምግብ ፕሮግራም (WFP) ያበደርኩትን ነዳጅ መልሼ ወስድኩ እንጂ ዘረፋ አልፈጸምኩም " ብሏል።

ነዳጁን ለድርጅቱ ያበደርኩት ከጥቂት ወራት በፊት በነዳጅ እጥረት ምክንያት የምግብ እርዳታ ማከፋፈል ባለመቻሉ ነው ያለው ህወሓት ድርጅቱ ነዳጅ መበደሩንና እንደሚመልስ ግንዛቤ ነበር ሲል ገልጿል፤ " ስምምነታችን በጽሁፍ ተሰንዶ ተቀምጧል " ሲል እየቀረበበት ላለው ክስ ምላሽ ሰጥቷል።

@tikvahethiopia

#EthiopianAirlines

በአፍሪካ ግዙፉና በደህንነቱ አስተማማኝ የሆነው የኢትዮጵያ አየር መንገድ ሽልማት ተበረከተለት።

አየር መንገዱ " Global Travel Magazine " ከመንገደኞች ባሰባሰበው ድምፅ መሰረት " የ2022 ዓ.ም ምርጥ የአፍሪካ አየር መንገድ " ሽልማትን ማሸነፍ ችሏል።

@tikvahethiopia

#እንድታውቁት

ለቀጣይ 6 ወራት ተከራይ ማስወጣት ፤ ኪራይ መጨመር አይቻልም !

በአዲስ አበባ የመኖርያ ቤት ኪራይ መጨመርም ይሁን ተከራይን ማስወጣት የሚከለክለው ደንብ ለሚቀጥሉት #ስድስት ወራት ተራዝሟል።

ይህንን ክለከላ በመተላለፍ ተከራዮችን የሚያስወጡ እና የኪራይ ዋጋን የሚጨምሩ አካላት ላይ ማህበረሰቡ በሚከተሉት የስልክ ቁጥሮች ጥቆማውን ለከተማ አስተዳደሩ ማድረስ እንደሚችል ተገልጿል።

👉 አጭር ቁጥር ፡- 9977

👉 የሞባይል ስልኮች 09-00640830 ፣ 09-00640789

@tikvahethiopia

#UNHCR

የተመድ ከፍተኛ የስደተኞች ኮሚሽን ኮሚሽነር ፍሊፖ ግራንዴ በኢትዮጵያ የቆመው ግጭት መቀጠሉ ስጋት እንዳሳደረ እና አሳሳቢ እንደሆነ ገልፀዋል።

የተመድ ዋና ፀሀፊ አንቶኒዮ ጉተሬዝን መልዕክት እጋራለሁ ያሉት ግራንዴ አዲስ ግጭት መቀስቀሱ በሲቪሎች ላይ የበለጠ ስቃይን እንደሚያስከትልና በሀገሪቱ ውስጥ እና በድንበር የተፈናቃዮችን ቁጥር እንደሚጨምር ገልፀዋል።

ያሉ ችግሮች እንዳይባባሱ የተኩስ አቁም ማድረግ እንደሚያስፈልግ አስገንዝበዋል።

@tikvahethiopia

#UN_OCHA

" ውጤቱ እስከፊ ሊሆን ይችላል " - ማርቲን ግሪፊትስ

የተባበሩት መንግስታት ድርጅት የሰብአዊ ጉዳዮች ረዳት ዋና ጸሃፊና የአስቸኳይ ድጋፍ አስተባባሪ ማርቲን ግሪፊትስ በትላንት በስቲያ በትግራይ ክልል፣ መቐለ ከሚገኘው የዓለም ምግብ ፕሮግራም መጋዘን በኃይል የነዳጅ ታንከሮች መወሰዱን መስማታቸው እጅግ እንደረበሻቸው ገልፀዋል።

የነዳጅ ታንከሮቹ 12 መሆናቸውን ያመለከቱት ግሪፊትስ 570,000 ሊትር ነዳጅ መያዛቸውን ገልፀዋል።

ነዳጁ ተመድ እና አጋሮቹ በከፋ ሁኔታ ውስጥ ላሉ ሰዎች አስፈላጊ ድጋፍ ለማድረግ የሚረዳ መሆኑን አመልክተዋል።

ያለዚህ ነዳጅ ሰዎች ያለ ምግብ፣ ያለ ድጋፍ ሰጪ ንጥረነገሮች፣ ያለ መድሃኒት እና ያለሌሎች ወሣኝ አስፈላጊ ነገሮች ይቀራሉ ብለዋል።

የተመጣጠነ ምግብ እጥረት እና የምግብ ዋስትና እጦት እየተባባሰ ባለበት በዚህ ወቅት #ውጤቱ_አስከፊ_ሊሆን_ይችላል ሲሉም አስጠንቅቀዋል።

ይህን መሰሉን ድርጊት አወግዛለሁ ያሉት ግሪፊትስ " የሰብአዊ እርዳታ አቅርቦቶች በመላው ኢትዮጵያ ሊጠበቁ ይገባል። የሰብዓዊ ዕርዳታ ማደናቀፍ መቆም አለበት " ብለዋል።

ከዚህ በተጨማሪ በትግራይ የባንክ ፣ የመብራት እና ሌሎች መሰረታዊ አገልግሎቶች እንዲመለሱ የጠየቁ ሲሆን ይህ በክልሉ ያለውን የሰብዓዊ ሁኔታ ለማሻሻል አስተዋፆ እንዳለው አስረድተዋል።

@tikvahethiopia

#KonsoZone

በኮንሶ ዞን ፤ ካራት ዙሪያ ወረዳ ታችኛው " ሶሮቦ ቀበሌ " አንድ አይን ብቻ ያላት የበግ ግልገል ተወለደች።

የካራት ዙሪያ ወረዳ እንሰሳት ሃኪም ዶ/ር ኢሳያስ እስጥፋኖስ በኮንሶ ዞን አከባቢ ታይቶ የማይታወቅ ክስተት መሆኑን ገልፀው ክስተቱ ከብዙ ሺህ ውልደቶች መካከል ሊከሰት የሚችል እንደሆነ ገልፀዋል።

ዶክተሩ እንደዚህ አይነት ክስተቶች ያልተለመዱ መሆኑና " ኮንጄንታል ማልፎርመሽን " የሚባል ተፈጥሯዊ ክስተት መሆኑን አስረድተዋል።

በአንድ አይን የተወለደችው የበግ ግልገሏ የላኛው መንጋጋ እና አፍንጫ እንደሌላት በዚህም በአፏ እንደምትተነፍስ የእንስሳት ሃኪሙ ገልፀዋል።

ነሐሴ 20 ቀን 2014 ዓ.ም ማታ የተወለደችው ግልገሏ እስካሁን በሙሉ ጤንነት ላይ ትገኛለች ተብሏል።

መረጃው ፦ የኮንሶ ዞን መንግሥት ኮሚኒኬሽን ጉ/መምሪያ ነው።

@tikvahethiopia