#AmharaRegion

የአማራ ክልል ጤና ቢሮ ከዚህ ቀደም ለ631 ጠቅላላ ሃኪሞች የስራ ማስታወቂያ ማውጣቱ ይታወሳል።

ዛሬ ይፋ በሆነው መረጃ ቢሮው ለ84 ሆስፒታሎች 409 ጠቅላላ ሃኪሞችን መቅጠሩ ታውቋል።

በኢ.ፌ.ዴ.ሪ. ጤና ሚኒስቴር እና የክልሉ ጤና ቢሮ (በማችንግ ፈንድ) በመተባበር ለ631 ጠቅላላ ሃኪሞች የቅጥር ማስታወቂያ ቢወጣም ቢሮው አወዳድሮ ሊቀጥር ያቻለው 409 ጠቅላላ ሀኪሞችን ነው።

የአብክመ ጤና ቢሮ የሰዉ ሃብትና ልማት ዳይሬክቶሬት ዳይሬክተር አቶ ዳኛቸዉ ደሬ ፤ " የማችንግ ፈንድ ለ631 ጠቅላላ ሃኪሞች በጀት ቢለቅም በገባያ ላይ 409 ጠቅላላ ሃኪሞች ብቻ ነው የተገኙት " ሲሉ ገልፀዋል

የክልሉ ጤና ቢሮ በቀጣይ ጊዜ ለቀሩት 222 ጠቅላላ ሃኪሞች የቅጥር ማስታወቂያ እንደሚወጣ አሳውቋል።

ያልተቀጠሩ በተለያየ ሙያ ያሉ የጤና ዘርፍ ባለሙያዎች በነበረዉ ሃገራዊ ችግር ምክንያት ቢሮዉ " በሙሉ በጀቱን ለህልዉና ዘመቻ በማዋሉ " እደሆነ ገልፆ በቀጣይ ጊዜያት ከጤና ሚንስቴር እና ከአጋር አካላት ጋር በመነጋገር የቅጥር ማስታወቂያ እንደሚያወጣ ገልጿል።

@tikvahethiopia

#AmharaRegion

በቅርቡ በአማራ ክልል በሰሜን ሸዋ እና በኦሮሞ ብሔረሰብ ዞኖች አስተዳደር አጎራባች አካባቢዎች የፀጥታ ችግር ተፈጥሮ እንደነበር አይዘነጋም።

ይህንን ተከትሎ ዳግም ግጭት እንዳይፈጠር እና ሰላምን ለማጠናከር በአጣዬ ከተማ ትላንት የምክክር መድረክ ተካሂዷል።

መድረኩ ሰላምን ለማጠናከር የሚጠቅሙ አንኳር ሀሳቦች የተነሱበት መሆኑ የተጠቆመ ሲሆን በዋናነት ለግጭቱ መንስኤ የሆኑ አካላት በሕግ እንዲዳኙና ማኅበረሰቡም አሳልፎ እንዲሰጥ መግባባት ላይ ተደርሷል።

የሃይማኖት አባቶች ሰላም የሁሉም ነገር መሰረት የሕዝቦች ትስስር ዋልታ ነው፤ የሰው ልጅ ሁሉ ደሙ አንድ ነው፤ በሰውነቱ ሁሉም ከአንድ የተገኘ ነውም ብለዋል።

ምክክሩ የተጠናቀቀው ባለ ሰባት ነጥብ የአቋም መግለጫ በማውጣት ሲሆን የአቋም መግለጫው በዚህ ተያይዟል ፦ https://telegra.ph/Amhara-Region-04-27

ምንጭ፦ የአማራ ክልል የሰላምና የሕዝብ ደኅንነት ጉዳዮች ቢሮ

@tikvahethiopia

#AmharaRegion

የአማራ ክልል የሰላምና ጸጥታ ቢሮ ፤ በክልሉ ከ4 ሺህ በላይ ተጠርጣሪዎች በቁጥጥር ሥር መዋላቸውን አስታውቋል።

ቢሮው ዛሬ ግንቦት 15/2014 ዓ.ም. በሰጠው መግለጫ ተጠርጣሪዎቹ በቁጥጥር ሥር የዋሉት ከሰሞኑን መንግሥት ያካሄደውን የሕግ ማስከበር ዘመቻ ተከትሎ መሆኑን አመልክቷል።

የክልሉ የሰላምና ጸጥታ ቢሮ ኃላፊ አቶ ዳሳለኝ ጣሰው የአማራ ክልል ዘላቂ ሰላም ለማስጠበቅ ሥራውን አጠናክሮ ይቀጥላል ብለዋል።

በቁጥጥር ሥር ከዋሉት ከ4 ሺ በላይ ሰዎች መካከል 40 የሚሆኑት ከዚህ ቀደም በፍርድ ቤት ጥፋተኛ ተብለው ፍርድ የተላለፈባቸው መሆናቸው የተጠቀሰ ሲሆን 210 የሚሆኑት ደግሞ በነፍስ ግድያ የተጠረጠሩ መሆናቸውን ገልፀዋል።

አቶ ዳሳለኝ ጣሰው በአሁኑ ወቅት መንግሥት ተጠርጣሪዎችን ለመያዝ ከሚደረግ ሥራ ውጭ ክልሉ አስተማማኝ ሰላም ላይ ነው ሲሉም ገልፀዋል።

" ትክክለኛውን የፋኖ ስም የማይወክሉ፣ በፋኖ ስም ተደራጅተው በሕዝብ ላይ የተለያዩ ሕገ ወጥ ድርጊት የሚፈጽሙ ቡድኖችን መንግሥት አይታገስም " ሲሉ ተደምጠዋል።

@tikvahethiopia

#AmharaRegion

በአማራ ክልል የ12ኛ ክፍል ፈተና በ10 የከፍተኛ ትምህርት ተቋማት ውስጥ በሚገኙ 31 ማዕከላት ይሰጣል፡፡

ፈተናው ያለምንም የጸጥታ ችግር እንዲጠናቀቅ እየሠራ መሆኑን የክልሉ ፖሊስ ኮሚሽን ገልጿል።

በክልሉ ሁሉም የመፈተኛ ተቋማት እና ማዕከላት በቂ የጸጥታ ቅድመ ዝግጅት መደረጉን ምክትል ኮሚሽነር እንየው ዘውዴ ገልጸዋል፡፡

በተመሳሳይ ወረዳን ማዕከል አድርጎ ተማሪዎችን ወደ ከፍተኛ ትምህርት ተቋማት በተቀመጠው ጊዜ ለማድረስ በቂ የትራንስፖርት አገልግሎት ዝግጅት ማድረጉን የትራንስፖርት እና ሎጀስቲክ ባለሥልጣን ዋና ዳይሬክተር ውቤ አጥናፉ ተናግረዋል፡፡

ተማሪዎች የወረዳ ትራንስፖርት ቢሮ በሚያወጣው መርሃ ግብር መሰረት በጊዜ እየተገኙ እንዲስተናገዱ ጠይቀዋል፡፡

ሀገራዊ ግዴታቸውን በአግባቡና በሀላፊነት የማይወጡ የትራንስፖርት ማህበራትና ባለሀብቶች በትራንስፖርት መመሪያ እና በሕግ ይጠየቃሉ ብለዋል፡፡

ተማሪዎች በሚጓጓዙባቸው ቀናት መደበኛ ትራንስፖርት ስለማይኖር ሕዝቡ ቅድመ ዝግጅት በማድረግ እንዲተባበር ጥሪ አድርገዋል፡፡

ምንጭ፦ አሚኮ

More : @tikvahuniversity

#AmharaRegion

የአማራ ክልል ትምህርት ቢሮ ተማሪዎች በራሳቸው አቅም ብቻ ተማምነው ወደፈተና ማዕከላት እንዲመጡ ጠየቀ።

በራሱ በመተማመን መፈተን ያልፈለገ ተማሪ ወደ ማእከላት ባይመጣ ይመረጣል ብሏል ቢሮው።

ከሰሞኑ በጥቂት ማእከላት የተፈጠረው ክስተት የአማራ ክልልን ህዝብና ተማሪዎችን የማይመጥን ድርጊት ነው ሲልም ገልጿል።

በቀጣይ ሳምንት ፈተና የሚወስዱት የተፈጥሮ ሳይንስ ተማሪዎች ከተጠናቀቀው የማህበራዊ ሳይንስ ፈተና ሂደት በመማር ፍጹም ለአሉባልታና ለወሬ ሳይበገሩ ፈተናቸውን በሰላም እንዲወስዱ የአማራ ክልል ትምህርት ቢሮ ጥሪ አቅርቧል።

ለቀጣዩ ፈተና ከወረዳ ጀምሮ ያሉ አካላት ሰፊ ቅድመ ዝግጅት ማድረጋቸው ተገልጿል።

የአማራ ክልል ከፍተኛ ትምህርት ተቋማት ፎረም በበኩሉ ፤ በማህበራዊ ሳይንስ ዘርፍ በጥቂት ማእከላት የተፈጠረው ችግር የወላጆችን ፣የመምህራንን እና አጠቃላይ የማህበረሰቡን ልፋት መና ያስቀረ ፤ በቀጣይ በፍጹም መደገም የሌለበት ስህተት ነው ብሏል።

ተማሪዎች ዩንቨርስቲ የሚመጡት ፈተና ለመፈተን እንጂ ለሌላ ተልእኮ አለመሆኑን በመገንዘብ የተቀመጡትን ህግና ደንቦች አክብረው እንዲፈተኑ ጠይቋል።

የተፈጥሮ ሳይንስ ተማሪዎች የፈተና መርሐግብር ከጥቅምት 08 እስከ 11/ 2015 ዓ. ም የሚሰጥ ሲሆን በአማራ ክልል ብቻ ከ119,000 በላይ ተማሪዎች ለፈተና ይቀመጣሉ።

በዚሁ አጋጣሚ ፦

ውድ የቲክቫህ ኢትዮጵያ ቤተሰቦቻችን ከባለፈው የማህበራዊ ሳይንስ ፈተና ጋር በተያያዘ በተለያዩ ተቋማት የተፈተኑ ተማሪዎች አስተያየት፣ የወላጆችን መልዕክት ስንቀበል ውለናል አሁንም እየተቀበለን ሲሆን ተማሪዎች መረጃ ስትልኩ " ሰማሁ " ፣ " እየተባለ ነው "  እያላችሁ ሳይሆን በትክክል የምታውቁትን እና ያረጋገጣችሁትን ብቻ እንድትልኩ እንጠይቃለን።

@tikvahethiopia

#AmharaRegion

ከአዲስ አበባ ወደ ባህር ዳር ከተማ የሚወስደው መንገድ ከትላንት ከሰዓት ጀምሮ ደጀን ከተማ ላይ ተዘግቷል።

በዚህ ምክንያት የሀገር አቋራጭ ትራንስፖርት አገልግሎት ተቋርጣል።

በዛሬው ዕለት ደግሞ የንግድ እንቅስቃሴ መቆሙ እና የአገልግሎት ሰጪ ተቋማት መዘጋታቸው ተገልጿል።

ጉዳዩን በተመለከተ የከተማው የሰላም እና ጸጥታ አስተዳደር ጽህፈት ቤት ኃላፊ አቶ አንዳርጌ ዘውዱ ተከታዩን ቃል ለ " ኢትዮጵያ ኢንሳይደር " ድረገፅ ሰጥተዋል ፦

" ደጀን ከተማ የሚያስገባው መንገድ የተዘጋው ፤ የክልሉ ልዩ ኃይል መበተንን በሚቃወሙ ነዋሪዎች ነው።

ወጣቶች ተቃውሟቸውን ማሰማት የጀመሩት ከትላንት አርብ ከሰዓት ጀምሮ ነው።

ከቀኑ አስር ሰዓት ገደማ ላይ ተቃውሞ የሚያሰሙ ነዋሪዎች፤ ወደ ከተማዋ የሚያስገባው መንገድ ላይ ድንጋይ በማስቀመጥ የተሽከርካሪዎች ፍሰት እንዲቆም አድርገዋል።

በትላንቱ ተቃውሞ የፌደራል ፖሊስ ንብረት የሆነ አንድ ‘ፒክ አፕ’ ተሸከርካሪ ተቃጥሏል የሚል መረጃ እደርሶናል።

ድርጊቱን የፈጸመው አካል ማንነት ግን ገና አልተረጋገጠም። የትኛው ነው ያቃጠለው? ‘ወጣቱ ነው ወይስ ለመንግስትም ለህዝብም አልመች ያለ ጠላት ነው?’ የሚለውን ነገር አልደረስንበትም።

የሀገር ሽማግሌዎች፣ የሃይማኖት አባቶች እና ተሰሚነት አላቸው በተባሉ ወጣቶች አማካኝነት፤  የነዋሪዎችን ተቃውሞ ለማረጋጋት ጥረት እየተደረገ ነው።

የሚደረገው ንግግር፤ በከተማይቱ በተነሳው ተቃውሞ ሰዎች እንዳይጎዱ የማድረግ ዓላማ ያለው ነው። "

የከተማዋ ኮሚዩኒኬሽን ቡድን መሪ አቶ ሞኙ ሆዴ አሳየ በበኩላቸው ተከታዩን ብለዋል ፦

" ከደጀን ከተማ መግቢያ በተጨማሪ በከተማው የሚያልፈው መንገድ ተዘግቷል።

በደጀን በየሳምንቱ ይካሄድ የነበረው የቅዳሜ ገበያ በዛሬው ዕለት ሳይከናወን ቀርቷል።

ገበያ የመጣውም ህዝብ እንዲመለስ ተደርጓል። ሱቅም ተዘግቷል። የሰው እንቅስቃሴ አለ፤ ወጣቱ ላይ ታች ይላል። የንግድ እንቅስቃሴ ግን የለም።

ቅዳሜ በርካታ ህዝብ ገበያውን የሚያሳልጥበት ቀን ነው። ግን ዛሬ አንድም የለም። "

በደጀን ከትላንት አንስቶ በተነሳው ተቃውሞ ምክንያት ዛሬ ቅዳሜ ወደ ከተማዋ የመጣ ሀገር አቋራጭ ተሽከርካሪ አለመኖሩ ተነግሯል።

ሀገር አቋራጭ የህዝብ ትራንስፖርት አገልግሎት ሰጪዎችም መንገድ በመዘጋቱ ምክንያት ዛሩ ወደ ባህር ዳር አውቶብሶችን አለማሰማራታቸውን አስታውቀዋል።

Credit : Ethiopia Insider

@tikvahethiopia

#AmharaRegion

በአማራ ክልል በሲቪል ሰዎች ላይ የሞት፣ የአካልና የንብረት ጉዳት የደረሰ መሆኑን እንዲሁም ከደሴ - አ/አ መንገድ በተለያየ ጊዜ መዘጋቱን የኢትዮጵያ ሰብዓዊ መብቶች ኮሚሽን ገለፀ።

የኢትዮጵያ ሰብአዊ መብቶች ኮሚሽን (ኢሰመኮ) በአማራ ክልል የተወሰኑ አካባቢዎች እየተካሄደ ያለው “ የሕግ ማስከበር ዘመቻ ” በሰብአዊ መብቶች ላይ ያለውን አንድምታና ተጽእኖ በቅርበት እየተከታተለ እንደሚገኝ ዛሬ ባወጣው መግለጫ አሳውቋል።

ኮሚሽኑ ፤ በሰሜን ጎንደር፣ ሰሜን ወሎ እና ሰሜን ሸዋ ዞኖች አንዳንድ አካባቢዎች ግጭት ያለ መሆኑን፤ በተለይም ሸዋ ሮቢት፣ አርማኒያ፣ አንጾኪያ፣ ገምዛ እና ማጀቴ በመከላከያ ሰራዊት እና በአካባቢው ታጣቂዎች መካከል የተኩስ ልውውጥና በከባድ መሣሪያ ጭምር የታገዘ ጥቃት መኖሩን ገልጿል።

በዚህም ምክንያት በሲቪል ሰዎች ላይ የሞት፣ የአካልና የንብረት ጉዳት የደረሰ መሆኑን እንዲሁም ከደሴ ወደ አዲስ አበባ የሚወስደው መንገድ በተለያዩ ጊዜያት የተዘጋ መሆኑን ለማረጋገጥ መቻሉን ኢሰመኮ አሳውቋል።

በተጨማሪም በክልሉ ያሉ የተወሰኑ ተቃዋሚ ፖለቲካ ፓርቲ አባላት፣ የክልል ልዩ ኃይሎችን እንደገና የማዋቀር ውሳኔን በመቃወም የተካሄዱ ሰልፎችን መርተዋል/አስተባብረዋል የተባሉ የተወሰኑ ወጣቶች እና ከፋኖ ቡድን ጋር ግንኙነት አላቸው ተብለው የተጠረጠሩ የተወሰኑ ሰዎች እንደታሰሩ ኢሰመኮ ተረድቻለሁ ብሏል።

ኢሰመኮ ፤ ባለፉት ሁለት ዓመታት በሰሜን ኢትዮጵያ የተካሄደው ጦርነት በሲቪል ሰዎች ላይ መጠነ ሰፊ የሰብአዊ መብቶች ጥሰትና ጉዳት ማድረሱን በተደጋጋሚ መግለፁን ያስታወሰው ኢሰመኮ ፤  በየትኛውም የሀገሪቱ ክፍሎች የሚፈጠሩ ተጨማሪ ግጭቶች ሰብአዊ መብቶች ላይ አስከፊ/ከባድ ጥሰቶች የሚያስከትሉ መሆኑን በመገንዘብ ሁሉም የሚመለከታቸው ወገኖች ችግሩን በሰላማዊ መንገድና በውይይት እንዲፈቱ፣ ግጭቱን ከሚያባብሱ ድርጊቶችና ንግግሮች እንዲቆጠቡ ጥሪ አቅርቧል።

ኮሚሽኑ ፤ ስለደረሰው ጉዳት ሁሉ አስፈላጊውን ምርመራ በማድረግ ተጠያቂነት እንዲረጋገጥ፣ እንዲሁም በማናቸውም ሁኔታ የሚፈጸሙ እስራቶች ሕግን መሠረት ያደረጉ በተለይም “የጥብቅ አስፈላጊነት፣ ተመጣጣኝነትና ከመድልዎ ነጻ መሆን” የሚሉትን የሰብአዊ መብቶች መርሆችን ያከበሩ መሆናቸውን መንግሥት እንዲያረጋግጥ ጠይቋል።

@tikvahethiopia

#AmharaRegion

የኢትዮጵያ ሰብዓዊ መብቶች ጉባኤ ፤ መንግስትና የሚመለከታቸው አካላት ሁሉ በአማራ ክልል ላሉ ውጥረቶች በቂ ትኩረት እንዲሰጡ ጥሪ አቀረበ።

ይህ ጥሪ ያቀረበው ዛሬ አርብ ባወጣው አስቸኳይ ጋዜጣዊ መግለጫ ነው።

(ሙሉ መግለጫው ከላይ ተያይዟል)

@tikvahethiopia

#AmharaRegion

" 522 ቢሊዮን ብር ያስፈልጋል ፤ የተገኘው ሀብት ግን ዝቅተኛ ነው " - የአማራ ክልል ገንዘብ ቢሮ

በአማራ ክልል ፤ #በጦርነት ጉዳት የደረሰባቸውን አካባቢዎች መልሶ ለመገንባት 522 ቢሊዮን ብር ያስፈልጋል ሲል የአማራ ክልል ገንዘብ ቢሮ አሳውቋል።

ይህን ያሳወቀው የአማራ ክልል ገንዘብ ቢሮ የመንግሥትና የሲቪል ማኅበረሰብ ድርጅቶች ዓመታዊ የአጋርነት የምክክር መድረክ በተካሄደበት ወቅት ነው።

ባለፉት ዓመታት በሀገሪቱ በተከሰተው ችግር 1 ነጥብ 1 ሚሊዮን ዜጎች ከተለያዩ የሀገሪቱ ክፍሎች ተፈናቅለው በክልሉ እንደሚገኙ የገለፀው ቢሮው ፤ 11 ነጥብ 4  ሚሊዮን ሕዝብ  ደግሞ በጦርነቱ ምክንያት በከፍተኛ  የኢኮኖሚና ማኅበራዊ ጫና ውስጥ እንደሚገኙ ጠቁሟል።

ሰባት ዞኖችና ሶስት ሜትሮፖሊታንት ከተሞች በጦርነት ምክንያት ከፍተኛ ጉዳት እንደደረሰባቸእ የተገለፀ ሲሆን እነዚህን ዞኖች መልሶ ለማቋቋም እና  መልሶ ለመገንባት ከ522 ቢሊዮን ብር በላይ ወጪ ይጠይቃል ብሏል።

ጉዳት የደረሰባቸውን ዞኖች  መልሶ ለመገንባት ጥረት ቢደረግም  የተገኘው ሀብት ዝቅተኛ በመኾኑ የተፈለገውን ውጤት ማምጣት አለመቻሉን ቢሮው አመልክቷል።

ቢሮው ፤ መንግሥት ከሚያደርገው ሥራ ባለፈ የሲቪል ማኅበረሰብ ድርጅቶች በተለያዩ የልማት ሥራዎች እና በመልሶ ግንታ ሥራ ላይ እየተሳተፉ መሆኑ የተገለፀ ሲሆን በዚህ ዓመትም በሲቪል ማኅበረሰብ ድርጅቶች 374 ፕሮጀክቶች በክልሉ እየተከናወኑ ነው ተባቧል።

ድርጅቶች በቀጣይም የጀመሩትን ሥራ አጠናክረው እንዲቀጥሉ ጥሪ ቀርቧል።

#AMC

@tikvahethiopia