#Worebabo📍

በህገ ወጥ መንገድ ሲዘዋወር የነበረ 609 የብሬን ጥይትና ሌሎችን ህገ ወጥ ቁሳቁሶችን በቁጥጥር ስር ማዋሉን የወረባቦ ፖሊስ ጽ/ቤት አስታወቀ።

ፖሊስ ፤ በወረባቦ ወረዳ በቀን 05/7/2014 ህገ ወጥ መሳሪያዎችና እቃዎች ጭኖ ከጭፉራ አቅጣጫ ወደ ሃይቅ ዋናውን መንገድ ይዞ ሲመጣ የነበረ " ኮድ 3 B38052 AA " የሆነ የጭነት አይሱዙ ቢሲቲማ ከተማ ኬላን በመጣስ ለማምለጥ የሞከረ ቢሆንም የጸጥታ ሃይሎች ባደረጉት ክትትል በ02 ቀበሌ ሃራ መገጠያ አካባቢ ከሌቱ 10:00 አካቢቢ በቁጥጥር ስር መዋሉን አስረድቷል።

መኪናው በቁጥጥር ውስጥ ሲውል ፦
👉 39 ካርቶን ጎልዴን ሲጋራ፥
👉 33 ካርቶን የሺሻ አፕል፥
👉 305 የክላሽ ጥይት፥
👉 609 የብሬን ጥይት ፥
👉 10 የቱርክ ጥይት፥
👉 22 የUNHCR የእርዳታ ኬንዳ እና 11 ብርድልሶች በጸጥታ አካሉ ተይዟል ተብሏል።

የመኪና አሽከርካሪ የተሰወረ ሲሆን 3 ተጠርጣሪዎችና መኪናው በቁጥጥር ስር መዋሉም የወረባቦ ፖሊስ ጽ/ቤት አስታውቋል።

@tikvahethiopia

#Tigray

የውጭ ጉዳይ ሚኒስቴር ዛሬ ከትግራይ የሰብዓዊ ድጋፍ ጋር በተያያዘ መግለጫ አውጥቷል።

ሚኒስቴሩ በመግለጫው የኢትዮጵያ ፌዴራል መንግስት የትግራይ ክልልን ሰብአዊ ችግር ለመፍታት በአፋር መስመር የሰብአዊ ድጋፍ የሚያደርሱ ተሽከርካሪዎች በተቀላጠፈ ሁኔታ እንዲንቀሳቀሱ በማመቻቸት ገንቢ የሆነ ሚና ሲጫወት መቆየቱን እና አሁንም ሚናውን መቀጠሉን ገልጿል።

በዚህም መሰረት ዛሬ መጋቢት 17 (እኤአ) 20 የጭነት ተሽከርካሪዎች ምግብ እና 3 ነዳጅ ጫኝ ተሽከርካሪዎች ከሰመራ ወደ መቐለ መንቀሳቀስ ጀምረዋል ሲል አሳውቋል።

የሰብዓዊ ዕርዳታውን ከፍ ለማድረግ እና የክልሉን መሰረታዊ ፍላጎቶች ለማሟላት በየቀኑ ወደ ትግራይ የሚያቀኑት የጭነት ተሽከርካሪዎች ቁጥር 40 ለማድረስ እንደሚሰራ አመልክቷል።

በተጨማሪም 17 አጋሮች መድሃኒትን (ክትባትን ጨምሮ) የህክምና ቁሳቁሶችን እና የተመጣጠነ ምግብ አቅርቦትን ወደ ትግራይ ክልል እንዲያስገቡ ፍቃድ አግኝተዋል ብሏል።

ሚኒስቴሩ በመግለጫው 11 አጋሮች 275 ሺ 192 ኪ.ግ የሚመዝኑ የህክምና ግብአቶችን በአየር በረራ ማድረሳቸውን ገልጿል።

ሚኒስቴሩ በአፋር ክልል በድጋሚ በተፈፀመው ጥቃት ከ700,000 በላይ ሰዎች መፈናቀላቸው እና በአባአላ በኩል ወደ ትግራይ የሚወስደው የሰብአዊ እርዳታ መስመር እንዲዘጋ ማድረጉን አመልክቷል። ጥቃቱ በአፋር ክልል ቂሊቤቲ ረሱ ዞን ወደ 5 ወረዳዎች ከፍ ብሎ ከ300,000 በላይ ሰዎችን እንዲፈናቀሉ ማደረጉን ገልጿል።

ከሰመራ 38 ኪሎ ሜትር ርቀት ላይ በምትገኘው ሰርዶ 43 ምግብ የጫኑ ተሽከርካሪዎች ቆመው እንደሚገኙም ሚኒስቴሩ አመልክቷል።

ሆኖም ግን ዛሬ ከተደረጉት ጥብቅ ጥረቶችና ውሳኔዎች በተጨማሪ የኢትዮጵያ መንግስት በትግራይ ያለውን የሰብአዊ ችግር ለመፍታት ቁርጠኛ መሆኑን ገልጿል።

@tikvahethiopia

ፎቶ : ኩሪፍቱ ሪዞርትስ አዋሽ ፓርክ ውስጥ ያስገነባውን አዲስ ቅርንጫፍ ከትላንትና በስቲያ አስመርቋል።

የአዋሽ ፏፏቴዎች ላይ የተገነባው ይህ የኩሪፍቱ ሪዞርት ለፓርኩ ተጨማሪ የቱሪስት መዳረሻ ይሆናል ተብሎ ይጠበቃል።

የኩሪፍቱ ሪዞርትስ ባለቤት አቶ ታዲዮስ ጌታቸው ፤ አዲሱ የአዋሽ ሪዞርታቸው እንደከዚህ ቀደሞቹ ሁሉ በአከባቢው ያሉ ተፈጥሯዊ የግንባታ ቁሶችን መጠቀሙን አስረድተውናል።

የግንባታ ሂደቱ 11 ወራት መፍጀቱንም ጠቁመዋል።

ከዚህም በተጨማሪ በሰው ኃይል ደረጃ ሙሉ ለሙሉ በሚባል መልኩ በአከባቢው ያሉ አቅሙ ያላቸውን ዜጎች መርጦ በማሰልጠን ወደ ሥራ ማስገባታቸውን አቶ ታዲዮስ ገልጸውልናል።

ኩሪፍቱ በስሩ አሁን ላይ ሦስት ሺ ለሚሆኑ ዜጎች የሥራ ዕድል መፍጠር ችሏል።

@tikvahethiopia

#ATTENTION

ከ8 ወር በላይ ወደ ቄያቸው ያልተመለሱት የገደማይቱ ተፈናቃዮች የመፍትሄ ያለ እያሉ ነው።

በገደማይቱ ሀምሌ 17 ቀን በነበረው ግጭት ምክንያት ከመኖሪያቸው የተፈናቀሉ በርካታ ዜጎች እስካሁን ወደ ቄያቸው መመለስ አልቻሉም።

እነዚህ ዜጎች በየመጠለያው ካምፕ እና በየዘመድ አዝማዶቻቸው ቤት ተጠልለው ወራት ማለፋቸውን ገልፀውልናል።

" ዞር ብሎ የሚያየን እና የሚጠይቀን አጥተናል " ያሉት እነዚሁ ወገኖች ለ20 እና 30 ዓመታት ከኖሩበት ቀያቸው ቢፈናቀሉም አሁን ድረስ ምላሽ የሚሰጥ እንዳላገኙ ተናግረዋል።

በወቅቱ በርካታ ሰዎች መገደላቸውና ሴቶችም ከፍተኛ እንግልት እና ስቃይ እንደደረሰባቸው ያስታወሱት እነኚህ ወገኖች የነበራቸው ሁሉ ንብረት እንደወደመ እና ተዘርፎ በየከተማው ሲሸጥ እንደነበር አስረድተዋል።

የፌዴራል መንግስትን መፍትሄ እንዲሰጠብ ለመጠየቅ ጥረት ብናደርግም አሁን ቆዩኝ ጦርነት ነው እያለን ለወራት በየቤተክርስቲያኑ ፣ በዘመድ አዝማድ ቤት እና በየመጠለያ ጣቢያው በየሜዳው ወድቀን ቆይተናል ብለዋል።

የተፈናቀለው ሰው ቁጥር በርካታ መሆኑን የሚገልፁት እነኚሁ ወገኖች ድምፃቸው እንዲሰማላቸው ፣ ትኩረትም እንዲሰጣቸው፣ የኢትዮጵያ መንግስትም መፍትሄ ይፈልግላቸው ዘንድ ጥሪ አቅርበዋል።

የኢትዮጵያ ሰብዓዊ መብቶች ኮሚሽን ከወራት በፊት ከነበረው ግጭት ጋር በተያያዘ ሁኔታው ሲከታተል እንደነበረ አስታውሶ ከዛ በኃላ ተፈናቃዮች ስለሚገኙበት ሁኔታ ወቅታዊ መረጃ እንደሚያደርሰን አሳውቋል።

ምላሹ እንደደረሰን የምንልክላችሁ ይሆናል።

@tikvahethiopia

የፕሬዜዳንቱ ማስጠቀቂያ 🍱

የፈረንሳዩ ፕሬዜዳንት ኢማኑኤል ማክሮን በዩክሬን ጦርነት የተከሰተው አለመረጋጋት በሚቀጥሉት ከ12-18 ወራት ውስጥ በአፍሪካ እና በመካከለኛው ምስራቅ ያሉ ሀገራትን ወደ ከፍተኛ የምግብ ቀውስ ሊያስገባ ይችላል ሲሉ አስጠነቀቁ።

ፕሬዜደንቱ ይህን ማስጠንቀቂያ የሰጡት ለሁለተኛ የስልጣን ዘመን በስልጣን ላይ ለመቆየት ከሚያደርጉት የምርጫ ውድድር ጋር በተያያዘ በፓሪስ ከተማ የፖለቲካ ፕሮግራማቸውን ባሳወቁበት ወቅት ለጋዜጠኞች በሰጡት ቃላቸው ነው።

ማክሮን ፤ " በዩክሬን ጦርነት ምክንያት በሚቀጥሉት ከ12-18 ወራት ውስጥ በተለይም በሩሲያ ላይ በጣም ጥገኛ በሆነ ሀገሮች [ በአፍሪካ እና በመካከለኛው ምስራቅ ] ከፍተኛ የምግብ ቀውስ ያጋጥመናል " ያሉ ሲሆን አውሮፓ ለዚህ ፈተና ዝግጁ መሆን አለባት ለራሷ ለአውሮፓ እና ለአጋሮቿ " ብለዋል።

@tikvahethiopia

" ...ትምህርት ሚኒስቴር ለዩኒቨርሲቲ መግቢያ የወሰነው ማለፊያ ነጥብ በዞኑ ያለውን ሁኔታ ከግምት ያስገባ አይደለም " - የሰሜን ወሎ ዞን ትምህርት መምሪያ

በአማራ ክልል በሰሜን ወሎ ዞን ለዩኒቨርሲቲ መግቢያ ካስፈተኑ 42 ትምህርት ቤቶች በስድስት ትምህርት ቤቶች የተፈተኑ 679 ተማሪዎች የዩኒቨርሲቲ መግቢያ ውጤት አላመጡም፡፡

ጊራና ፣ ቃሊም ፣ ኩል መሰክ ፣ ጉርጉር ደብረሮሀ ፣ ሀናመኳት ደብረሲና እና ክበበው 2ተኛ ደረጃ ትምህርት ቤቶች መኾናቸው ተገልጿል፡፡

የሰሜን ወሎ ዞን ትምህርት መምሪያ የፈተና ዝግጅትና አስተዳደር ባለሙያ ወይዘሮ ሙሉ አዳነ ዞኑ ከ5 ወራት በላይ ጦርነት ሲካሄድበት በመቆየቱና አሁንም ቀጣናው ሙሉ በሙሉ ሰላሙ ባልተረጋገጠበት ተማሪዎች ለፈተና በቂ ዝግጅት ሳያገኙ ፈተና መውሰዳቸውን አስረድተዋል፡፡

አክለው " በጦርነቱ ምክንያት ከደረሰው ሥነ ልቦና ጉዳት ሳያገግሙ ተማሪዎች ፈተና መውሰዳቸው ተገቢ አለመኾኑን የገለጹት ወይዘሮ ሙሉ ትምህርት ሚኒስቴር ለዩኒቨርሲቲ መግቢያ የወሰነው ማለፊያ ነጥብ ይኸንን ግምት ውስጥ ያላስገባ ነው " ብለዋል፡፡

በዞኑ 9 ሺህ 710 ተማሪዎች ተፈትነው 3 ሺህ 657 ተማሪዎች ብቻ ናቸው የዩኒቨርሲቲ መግቢያ ማለፊያ ነጥብ ያመጡት።

ምንጭ፦ አሚኮ

@tikvahethiopia

''...በውጤት እና መቁረጫ ነጥቡ ዙሪያ አስፈላጊው ማብራሪያ እንዲሰጥ ለሚኒስቴር መስሪያቤቱ ጥያቄ አቅርቤ ምላሽ እየጠበኩ ነው'' የአበክመ ት/ቢሮ

የአማራ ክልል ትምህርት ቢሮ የ2013 ዓ/ም የትምህርት ዘመን የ12ኛ ክፍል ብሔራዊ የፈተና በውጤት እና መቁረጫ ነጥቡ ዙሪያ አስፈላጊው ማብራሪያ እንዲሰጥ ለሚኒስቴር መ/ቤቱ ጥያቄ አቅርቤ ሚኒስቴር መ/ቤቱ ዛሬ ተገቢው ማብራሪያ እንደሚሰጥ ገልጾልኛል ሲል አስታውቋል።

ቢሮው ''ብሔራዊ ፈተና በሁለቱም ዙር በሰላማዊ መንገድ እንዲሰጥ የሚፈለግብንን ሁሉ አድርገናል። ከ12ኛ ክፍል ፈተና አኳያ የክልሉ ድርሻም ይሄው ነው።'' ሲል ነው በማኅበራዊ ትስስር ገጹ ያሰፈረው።

''የአንደኛው ዙር ፈተና እንደተጠናቀቀ በሚቀጥለው ቀን ለሀገር አቀፍ ፈተናዎች ድርጅት በወቅቱ ፈተና ተሰርቋል እየተባለ በማህበራዊ ሚዲያ ሲስራጭ በነበረው የተለያየ መረጃ ምክንያት የፈተና ውጤት ትንተናው በጥንቃቄ እንዲታይ በፅሁፍ ጥያቄ አቅርበናል። ሌሎች ጠቃሚ ሀሳቦችንም በወቅቱ አቅርበናል።'' ሲል ገልጿል።

አክሎም በሚኒስቴር መስሪያ ቤቱ በኩል አስፈላጊው ማብራሪያ ከተሰጠ በኋላ በትምህርት ቢሮው በኩል የሚፈለጉ መረጃዎች ካሉ መረጃዎችን ሳልደብቅ ገልጻለሁ ብሏል።

''የተማሪዎች ውጤት ለዞኖች፣ ወረዳዎች እና ትምህርት ቤቶች በግልፅ የተላለፈ ስለሆነ ለመሸፋፈን የሚፈልግ አካልም የለም መሸፋፈንም አይቻልም።'' ማለቱን ከቢሮው ገጽ ተመልክተናል።

@tikvahethiopia

" ከ20 ሺህ በላይ የተማሪዎች ቅሬታዎች ላይ ምላሽ ተሰጥቷል " - የትምህርት ምዘናና ፈተናዎች አገልግሎት

የፈተናዎች አገልግሎት ምክትል ዋና ዳይሬክተር አቶ ተፈራ ፈይሳ ከፈተና እርማት እና ቅሬታዎች ጋር በተያያዘ መግለጫ ሰጥተዋል፡፡

ም/ዋ/ዳይሬክተሩ በመግለጫቸው የፈተናው እርማት ከሰው ንክኪ ነፃ በሆነ መልኩ በጥንቃቄ የተከናወነ ቢሆንም በሁለተኛው ዙር ፈተና እርማት ላይ የቴክኒክ ችግር ማጋጠሙን እና እርማት መደረጉን ገልፀዋል፡፡

የእርማት ችግሩ የተፈጠረው በ 559 ባልበለጡ ተማሪዎች ላይ እንደሆነ እና ዳግም ምልከታ ተደርጎ መሰተካከል እንደተደረገም ጨምረው ገልፀዋል፡፡

የፈተና እርማት ችግር ማጋጠሙ የተገኘውም የፈተናዎች አገልግሎት ባደረገው ምርመራ እንደሆነም ተናግረዋል፡፡

ቅሬታዎችን በተመለከተም ተማሪዎች ሳይጉላሉ ባሉበት ቦታ ሆነው ቅሬታቸውን ለመፍታት የ ሚያስችል ስርዕት ተዘርግቶ መሰራቱን ገልፀዋል፡፡

በስርዓቱም ከ 20ሺህ በላይ ተማሪዎች ቅሬታቸውን አቅርበው ምላሽ መሰጠቱንም ነው የተናገሩት፡፡

በተደጋጋሚ የሚነሱ የፆታ እና የስም ስህተቶች በትምህርት ቤቶች አካባቢ የተፈጠረ ክፍተት እንጂ የፈተናዎች አገልግሎት ክፍተት አለመሆኑን ም/ዋ/ዳይሬክተሩ ገልፀዋል፡፡

በዘንድሮው አመት የተፈታኝ ተማሪዎች መብዛት እና በአገራችን ውስጥ ካሉት 47 ከፍተኛ ት/ት ተቋማት ውስጥ አሁን 43 ቱ ከፍተኛ የት/ት ተቋማት ብቻ የሚቀበሉ ስለሆነ ይህም የዩኒቨርስቲ ቅበላ አቅም አነስተኛ እንዲሆን በማድረጉ መግቢያ ነጥቡን ከፍ እንዳደረገውም ተገልጿል፡፡

በዚህ ምክኒያት በዘንድሮው አመት ፈተናውን ከወሰዱት ውስጥ 25 ፐርሰንት ተማሪዎች ወደ ዩኒቨርስቲ እንደሚገቡ ተነግሯል፡፡

ምንጭ፦ ትምህርት ሚኒስቴር

@tikvahethiopia