የክቡር ዶ/ር አርቲስት አሊ ቢራ ቤተሰቦች ስለ አንፋጋው የኢትዮጵያ የሙዚቃ ሰው ምን አሉ ?

ፍርድዮስ ዩሱፍ ለኤፍ ኤም 97.1 ሬድዮ የተናገሩት ፦

" ... አሊ በራ ሞተ ምናምን እያሉ በየጊዜ ያወጣሉ። ነገር ግን የትላንትናው በጣም እኛንም የጎዳ ያሳዘነን ነው።

ከትላንት ወዲያ ነው ከሆስፒታል የወጣው ፤ በጤንነት ጥዋት ላይ ደግሞ የሚገርመው በእግሩ እኔ ሄዳለሁ አብራችሁኝ ሂዱ ብሎ በመኪና ይዘነው ሄደን ባንክ ሄዶ ለእራሱ የሆነ ትራስዛክሽን ሰርቶ ነው የመጣው።

እንግዲህ ይህ ሰው ዊልቸር ላይ የለም፤ ወይም ደግሞ አልጋ ላይ የለም። በእግሩ ጥዋት ሄዶ ነው የተመለሰው።

እዛው ነው ያደርነው (የአሊ መኖሪያ ቢሾፍቱ) ። ለሊት ላይ ብቻ ስልክ ይጮሃል ምንድነው የተፈጠረው ? እንደተለመደው ሞተ ሊሉኝ ነው ስል በጣም በጣም ከማልጠብቀው ሰው ነው ፌስቡክ ላይ ፖስት ሲያደርግ ሳይ ለማን ነው RIP የምትሉት ኧረ ባካችሁ አንሱ እሱ በጤና ነው ያለው እያልኩኝ ለሊት ሙሉ አልተኛሁም።

ይሄ ነገር ተደጋገመ ፤ ያልተጣራ መረጃ እየለጠፉ ቤተሰብን ያሳዝናሉ ፣ ይሄነገር ባህል ሆነብን እንዴ ? ብቻ አላውቅም በጣም ተደጋጋመ ነገር ግን የትላንት ማታው በጣም ያሳዘነን ነው። ከዚህ ቢቆጠቡ ይሻላል በጣም ደስ የማይል ነገር ነው እያደረጉ ያሉት።

...አሊ ቢራ እጅግ በጣም ጥሩ ሁኔታ ላይ ጥሩ ጤንነት ላይ ነው ያለው። ፀልዩለት ! ሰው ሲፖስት ደግሞ ዝም ብለው ከእስር እያነሱ የሚፖስቱት ደግሞ ቢቆጠቡ። ቤተሰብ አለ፣ ስንት የሚሰማው ሰው አለ ስለዚህ በዚህ ላይክ እና ሼር ለማግኘት ብላችሁ እንዲህ አይነት ነገር የምታደርጉ ብትቆጠቡ እላለሁ። "

@tikvahethiopia

#Update

እድሳት ሲደረግለት የቆየው የአዲስ አበባ ማዘጋጃ ቤት ህንፃ ከንቲባ ወ/ሮ አዳነች አበቤ፣ ከፍተኛ የመንግስት ባለስልጣናት እና ተጋባዥ እንግዶች በተገኙበት ዛሬ ተመርቋል።

ለእድሳቱ ከ2.2 ቢሊዮን ብር በላይ በሆነ ወጪ መሆኑ ተሰምቷል።

ህንፃው ከ57 ዓመታት በኋላ ነባር ገፅታውን ሳይለቅ ነው መሰረታዊ እድሳት የተደረገለት።

ህንፃው አዳዲስና ደረጃቸውን የጠበቁ አገልግሎቶችን በውስጡ ያካተተ ሲሆን ከነዚህም ውስጥ ፦
- የህፃናት መዋያ፣
- ቤተ-መፃሕፍት፣
- የስልጠናና የምርምር ክፍሎች፣
- ክሊኒክ፣
- የቴአትር አዳራሽ፣
- የስብሰባ አዳራሾች፣
- የመኪና ማቆሚያ፣
- አረንጓዴ ስፍራዎችና የከተማ ግብር ናሙናዎች ይገኙበታል።

የከተማዋ ከንቲባ ወ/ሮ አዳነች አቤቤ ከነገ ሰኞ ጀምሮ ለህዝብ ክፍት እንደሚደረግ እና መጎብኘት እንደሚቻል አሳውቀዋል።

ፎቶ : አ/አ ከንቲባ ፅ/ቤት

@tikvahethiopia

#ONLF

ኦብነግ ከሶማሊያ የሽብርተኛ ድርጅት ዝርዝር ውስጥ ተሰረዘ።

የሶማሊያ ካቢኔ እ.ኤ.አ. በ2017 ( የቀድሞው ካቢኔ ) የኦጋዴን ብሄራዊ ነፃነት ግንባር (ኦብነግ) ን “አሸባሪ ድርጅት” ሲል ያሳለፈው ውሳኔ ዛሬ ባካሄደው ስብሰባ ሽሮታል።

ኦብነግ ከ5 ዓመት በኃላ ከሽብረተኛ ድርጅትነት ተሰርዟል።

ካቢኔው የኦብነግ ኮማንደር አብዲከሪም ሼክ ሙሴን ወደ ኢትዮጵያ ተላልፎ መሰጠትንም “ህገወጥ” ሲል ገልጿል።

አብዲከሪም ሼክ ሙሴ እ.ኤ.አ. በ2018 በኢትዮጵያ ከመጣው ለውጥ ጋር ተያይዞ በኢትዮጵያ መንግስት ከእስር ነፃ መደረጋቸው ይታወሳል።

የዛሬው የሶማሊያ ካቢኔ ውሳኔ በ23 ድምጽ ድጋፍ ፣ በ1 ተቃውሞ እና በ1 ድምፀ ተአቅቦ ነው የፀደቀው።

ኦብነግ በትዊተር ገፁ በጠቅላይ ሚኒስትር መሀመድ ሁሴን ሮብሌ እና በካቢኔያቸው ዛሬ የተላለፈውን ውሳኔ በደስታ መቀበሉን ገልፆ ውሳኔውን " ታሪካዊ ነው " ብሎታል።

ኢትዮጵያ እንደ እ.ኤ.አ. በ2018 የኦጋዴን ብሄራዊ ነፃነት ግንባር (ኦብነግ)ን ከሽብርተኛ ድርጅቶች ዝርዝር መሰረዟ ይታወሳል።

@tikvahethiopia

#ይበቃል

ሳዑዲ አረቢያ ውስጥ ያሉ ዜጎቻችን ፍትህን እንዲያገኙ የሚጠይቅ የማህበራዊ ሚዲያ ዘመቻ እየተካሄደ መሆኑን ተመልክተናል።

ዘመቻው ሳዑዲ ያሉ ዜጎቻችን እምነበረድ ላይ ለብሰው የሚተኙትን ጥቁር ፌስታል በመልበስ አጋርነት የሚገለፅበት ነው።

ሳዑዲ አረቢያ ውስጥ በርካታ ዜጎቻችን እጅግ አስከፊ በሆነ ሁኔታ ውስጥ እንዳሉ ይታወቃል።

የሳኡዲ አረቢያ መንግስት መሰረታዊ የእስረኛ አያያዝ ህግን እንዲተገብር፣ ፍትሃዊ የሆነ ምላሽም እንዲሰጥ የሚጠየቅበት የማህበራዊ ሚዲያ ዘመቻ ነው እየተካሄደ ያለው።

#ይበቃል
#ጥቁር_ፌስታል

#الحرية_للسجناء_الاثيوبيين
#العدالة_للسجناء_الاثيوبيين

Credit : Ali Amin & Social Media

@tikvahethiopia

" መኪናው በግምት 200 ሜትር ከሚሆን ገደል ውስጥ ነው የገባው። ... በደረሰው አደጋ 20 ሰዎች ህይወታቸው ሲያልፍ 6 ሰዎች ቆስለዋል " - ኢንስፔክተር ሲሳይ አበራው

ከባሕር ዳር ከተማ ወደ ሰቆጣ ሲጓዝ በነበረ የሕዝብ ማመላለሻ አውቶብስ በደረሰ የትራፊክ አደጋ የ20 ሰዎች ሕይወት አልፏል፡፡

ለግዳጅ ከባሕር ዳር መነሻውን ያደረገው የሕዝብ ማመለሻ አውቶብስ በደረሰበት አደጋ ሰዎች ህይወታቸው ሲያልፍ፣ ከፍተኛ ጉዳት የደረሰባቸው እንዳሉም ታውቋል፡፡

የድሃና ወረዳ ፖሊስ ጽሕፈት ቤት የመንገድ ትራፊክ ደኅንነት ክፍል ኃላፊ ምክትል ኢንስፔክተር ሲሳይ አበራው ለአሚኮ በሰጡት ቃል ፥ ለግዳጅ ከባሕር ዳር የወጣው የሕዝብ ማመላለሻ አውቶብስ በመንገድ ላይ ያገኛቸውን ሰዎች ጭኖ ሲጓዝ አደጋው እንደደረሰ ተናግረዋል።

አደጋው የደረሰው መለያ ቁጥሩ 11300፣ የጎን ቁጥሩ 2527 የሆነ የሕዝብ ማመላለሻ አውቶብስ መሆኑንም አስታውቀዋል፡፡

ጉዳቱ የደረሰው ከአምደወርቅ ወጣ ብሎ አቦ መገጠንያ መንገድ በምትባል ሥፍራ እንደሆነ ገልጸዋል፡፡

በግምት 200 ሜትር ከሚሆን ገደል ውስጥ መግባቱንም ተናግረዋል፡፡ በደረሰው አደጋም 20 ሰዎች ህይወታቸው ሲያልፍ 6 ሰዎች ደግሞ መቁሰላቸውን ነው የተናገሩት፡፡

ከአደጋው ከተረፉ ሰዎች ጋር ቆይታ እንዳደረጉ የተናገሩት ኃላፊው ከእብናት ወደ አምደ ወርቅ ሲጓዝ ብዙ ሰው እንደነበርና ከአምደወርቅ ሲያልፉ ግን ሰው ያልነበረባቸው ወንበሮች እንደነበሩ ነግረውኛል ነው ያሉት፡፡

ለአደጋው ምክንያት ፍጥነት እና የመንገዱ መጎዳት ሳይሆን እንዳልቀረም ተናግረዋል፡፡ ጉዳቱ ከፍተኛ መሆኑንም አስታውቀዋል፡፡

ምንጭ፦ አሚኮ

@tikvahethiopoa