"...በመሳሪያ እያስፈራሩ ፣ በገጀራ ፣ በሽጉጥ እያስፈራሩ መዝረፍ ይሄ ከበደልም በላይ በደል ነው" - ኮማንደር አብርሃ ጎደፋይ

የፀጥታ አካላትን ልብስ በመልበስ በመቐለ ከተማ አይደር ክፍለ ከተማ መንግስታዊ ባልሆነ ተቋም ውስጥ ባለ መጋዘን የተቀመጠ የህክምና መገልገያ መሳሪያዎችን እና መድሃኒቶችን ለመዝረፍ ሙከራ ያደረጉ ግለሰቦች በጥበቃ ሰራተኛ ጥቆማ የመከላከያ ሰራዊት እና የፌዴራል ፖሊስ በቁጥጥር አውለዋቸዋል።

የመቐለ ፖሊስ መምሪያ ኃላፊ ኮማንደር አብርሃ ጎደፋይ ፥ ግለሰቦቹ የመከላከያ ፣ የፌዴራል ፖሊስና ፀጥታ ኃይሎችን ዩኒፎርም አድርገው የመጋዘኑን በር ሰብረው ሲዘርፉና በአይሱዚ ሲጭኑ ተደርሶባቸው ነው በቁጥጥር ስር የዋሉት ብለዋል።

ግለሰቦቹ የተለያዩ መሳሪያዎችን ጩቤ፣ ገጀራ፣ ሽጉጥ ይዘው እንደነበር የሚገልፁት ኮማንደር ኣብርሃ ግብረመልስ ሲሰጣቸው እጃቸውን እንደሰጡ ገልፀዋል።

የፀጥታ ኃይሎችን ዩኒፎርም አድርገው ሲዘርፉ የተያዙት 3 ግለሰቦች ናቸው፥ ጥቆማውን የሰጠው ደግሞ የድርጅቱ የጥበቃ ሰራተኛ መሆኑ ኮማንደሩ አሳውቀዋል።

ኮማንደር አብርሃ ፥ "... እነኚህ ወጣቶች ህዝቡን ሊደግፉት እየተገባ ለህዝቡ የገባውን መድሃኒት ፣ በየመኖሪያው እየዘለሉ እየገቡ በመሳሪያ እያስፈራሩ ፣ በገጀራ ፣በሽጉጥ እያስፈራሩ መዝረፍ ይሄ ከበደል በደል ነው፤ ስለዚህ ህዝቡ ማወቅ ያለበት ማንኛውም ችግር እራሳችን ነው የምንፈታው ፥ በተለይ የፀጥታ ችግር ሺ ፖሊስ ብናሰልፍ ፖሊስ ብቻውን ሊወጣው አይችልም ህዝቡ እርስ በእራሱ ተደራጅቶ እውቅና ተሰጥቶ በየመንደሩ ተደራጅቶች መጠበቅ አለበት...የመቐለ ወጣት ከፖሊስ ጎን መቆም አለበት" ብለዋል።

@tikvahethiopia

"...በአንደኛው ሟች ኪስ ውስጥ ተጨማሪ ያልፈነዳ ቦንብ ተገኝቷል" - ፖሊስ

[አዲስ አበባ ፖሊስ ኮሚሽን]

በልደታ ክ/ከተማ ለጊዜው ምክንያቱ ባልታወቀ የቦንብ ፍንዳታ የሁለት ግለሰቦች ህይወት ማለፉን የአዲስ ፖሊስ ኮሚሽን አስታውቋል።

ዛሬ ከቀኑ 8 ሰዓት አካባቢ ነው በልደታ ክፍለ ከተማ ወረዳ 6 ልዩ ቦታው "ከሚትሮሎጂ ፊት ለፊት"ለልማት በተዘጋጀ ቦታ ላይ በተከሰተ የቦንብ ፍንዳታ የሁለት ሰዎች ህይወት ወዲያውኑ ያለፈው።

በፍንዳታው አንድ ግለሰብ በፅኑ ተጎድቶ ወደ ሆስፒታል መሄዱን ፖሊስ አሳውቋል።

በልደታ ክፍለ ከተማ ፖሊስ መምሪያ የወንጀል መርማሪ ኢንስፔክተር ዳንኤል ታፈሰ የምርመራ መዝገብ ዋቢ አድርገው ተከታዩን ማብራሪያ ሰጥተዋል ፦

"ዛሬ ከቀኑ 8 ሰዓት አካባቢ አንድ በግምት ዕድሜው ከ50 እስከ 55 የሚገመት ግለሰብ ከሁለት በተመሳይ የዕድሜ ደረጃ ላይ ከሚገኙ 2 ሴቶች ጋር እየተገፈታተረ ወደቦታው ከገባ በኋላ ፍንዳታ ተሰምቷል ጉዳት ደርሷል። የግለሰቦቹ ማንነት እና የፍንዳታው ምክንያት ለማወቅ በምርመራ ሂደት ላይ ነው።"

በሠዓቱ የአዲስ አበባ ፖሊስ እና የፌደራል ፖሊስ የቴክኒክ እና የፈንጂ አምካኝ ባለሙያዎች ቦታው ላይ ፈጥነው በመድረስ ተጨማሪ ፍንዳታ እንዳይከሰት አካባቢውን ነፃ የማድረግ ስራ መስራታቸው ተገልጿል።

ፖሊስ በአንደኛው ሟች ኪስ ውስጥ ተጨማሪ ያልፈነዳ ቦንብ መገኘቱን አሳውቋል።

@tikvahethiopia @tikvahethiopiaBOT

#FDREDefenseForce

"በሰሜን ሸዋና ደቡብ ወሎ የኦሮሞ ልዩ ዞን ወረዳዎች ኮማንድ ፖስት ተቋቁሟል" - መከላከያ ሚኒስቴር

መከላከያ ሚኒስቴር ዛሬ ማምሻውን ባወጣው መግለጫ በሰሜን ሸዋና ደቡብ ወሎ የኦሮሞ ልዮ ዞን ወረዳዎች ከተከሰተው የፀጥታ ችግር ጋር ተያይዞ ከክልል እና ከፌዴራል ፀጥታ ተቋማት ጨምሮ ሶስቱንም ዞኖች ያካተተ ኮማንድ ፖስት መቋቋሙን አስታውቋል።

* መከላከያ በወቅታዊ የሀገሪቱ የፀጥታ ሁኔታ ላይ ያወጣው መግለጫ ከላይ ተያይዟል።

@tikvahethiopia

የሚያዚያ ወር ሲታወስ ፦

የቲክቫህ ኢትዮጵያ አባላት በሀገራችን በተለይ በማህበራዊ ሚዲያ የተንሰራፋውን የእርስ በእርስ ጥላቻ በማውገዝ ፥ ከዛሬ 2 ዓመት በፊት በዚህ ወር ነው የፀረ ጥላቻ ንግግር ንቅናቄ/ የሰላም ጉዞውን አንድ ብለው የጀመሩት።

ሁሉም አባላት የሀገራቸው ሁኔታ ያሳሰባቸውና በዚሁ በቲክቫህ ውስጥ የተሰባሰቡ ነበሩ።

ያለምንም ድጋፍ ንቅናቄው ከተጀመረበት ጊዜ አንስቶ በየሳምንቱ አርብ ፣ ቅዳሜ እና እሁድ እጅግ አድካሚ የነበሩ ጎዞዎችን ወደ ትግራይ ፣ ኦሮሚያ ፣ አማራ ፣ ደቡብ ...ክልሎች በማድረግ በተለያዩ ዩኒቨርሲቲዎች የግንዛቤ ማስጨበጫ ስራዎችን በጥቂቱ ለመስራት ተችሏል።

በተጨማሪ በወቅቱ ሰፊ የማህበራዊ ሚዲያ ዘመቻ ተደርጓል።

ዛሬ የምናወጣት ክፉ ቃል ነገ የሰዎችን ህይወት ልታሳጣ ትችላለች እና ዘውትር ንግግራችን ሰዎችን ከመዝለፍ ፣ ከመስደብ ፣ ከማንቋሸሽ ፣ በማንነታቸውና በአመለከታቸው ከመሳደብ መቆጠብ እንደሚገባ ያስገነዘብንበት ነበር።

የፖለቲካ ሰዎች እና ድርጅቶች እንዲሁም አክቲቪስቶች የሚሰሯቸው ስራዎች የሚነዙት ጥላቻ ፣ የማህበራዊ ሚዲያዎች ተጠቃሚዎች በማወቅ ይሁን ባለማወቅ የሚያሰራጩት የጥላቻ መልዕክት ምንም ፖለቲካ የማያውቁ /ንቁ ተሳትፎ የሌላቸው ፣ ማህበራዊ ሚዲያ ላይ ምን እየሆነ እንዳለ እንኳን በቅጡ የማያውቁ ንፁህ ዜጎችንህ ህይወት የሚቀጥፍ እንደሆነ ለማስገንዘብ ተሞክሯል።

በእጅጉ በተበላሸው ፖለቲካ ምክንያት የሰዎች ህይወት እያለፈ እንደሆነ ለሀገሪቱ የፖለቲካ ችግር መፍትሄ ይፈለግ ዘንድ ፣ ሁሉም ወገን ቁጭ ብሎ በመነጋገር በሀገሪቱ ያንዣበበውን አደገኛ ሁኔታ እንዲቀለብሱ /ይህን ማድረግ ካልቻሉ እጃቸውን ከኢትዮጵያ ላይ እንዲያነሱ የሚያስገነዝብ ዘመቻ ነበር።

በ2012 በኮቪድ ምክንያት እንቅስቃሴ ማድረግ አልተቻለም።

@tikvahethiopia