#WOLAITA

በወላይታ ዞን በተከሰተው አለመረጋጋት በትንሹ ከ10 በላይ ሰዎች ሞተዋል። የቲክቫህ ኢትዮጵያ ኦቶና ሆስፒታል አባላት እንደገለፁት ደግሞ እስካሁን ባሉበት ሆስፒታል ብቻ ከ80 በላይ ሰዎች ተጎድተው ህክምና እየተደረገላቸው ይገኛል።

ዛሬም በወላይታ ሶዶ እንዲሁም በሌሎችም ከተሞች 'የዳታ ኢንተርኔት አገልግሎት' እንደተዘጋ ነው። ከበርካታ የወላይታ ዞን የቲክቫህ አባላት ጋር መገናኘት አልቻልንም።

የወላይታ ሶዶ፣ አረካ፣ ቦዲቲ ቲክቫህ አባላት በስልክ ደውለው ያለውን ሁኔታ ያሳወቁ ሲሆን አሁንም የትንራስፖርት ፣ የንግድ እንቅስቃሴ የለም ፤ አንዳንድ ቦታ ውስጥ ለውስጥ አልፎ አልፎ ሱቆች ክፍት ናቸው ፣ ባንክ ቤቶች ዛሬም እንደተዘጉ ናቸው ፣ የሰዎች እንቅስቃሴ ግን ይታያል ካለፈው ቀን የተሻለ መረጋጋት አለ ብለዋል።

የየከተማው ነዋሪ በተፈጠረው ክስተት ክፉኛ ልቡ ተሰብሯል ፤ በዚህ ምክንያት እንደዋዛ ህይወታቸው በተቀጠፈውና በተጎዱት ወጣቶች ምክንያትም መሪር ሀዘን ላይ ይገኛል ብለዋል።

ከሶስቱም ከተሞች (ወ/ሶዶ፣አረካ፣ ቦዲቲ) የቲክቫህ ኢትዮጵያ አባላት ማረጋገጥ እንደቻልነው አሁንም ከፍተኛ ቁጥር ያላቸው የፀጥታ አስከባሪዎች መከላከያ ሰራዊትና የደቡብ ክልል ልዩ ኃይል እየተንቀሳቀሱ ይገኛሉ።

@tikvahethiopiaBot @tikvahethiopia

የዎላይታ ሕዝብ ዴሞክራሲያዊ ግንባር (ዎሕዴግ) በወቅታዊ ጉዳይ ላይ ለቲክቫህ ኢትዮጵያ መግለጫ ልኳል!

ዎሕዴግ በላከልን ወቅታዊ መግለጫ ነሃሴ 3/2012 ዓ/ም የዞኑ ስራ ኃላፊዎች ስለአካባቢው ሰላምና መልካም አስተዳደር ጥንካሬን በማስመልከት በቁጥር 28 ከሚሆኑ አጋዥ ኃይሎች ጋር ሆነ በመመካከር ካሉበት አዳራሽ ታፍሰው እስር ቤት እንዲገቡ ተደርገዋል ብሏል።

ዎሕዴግ ከዚህ ክስተት በኃላ በዞኑ የሃያ አንድ (21) ሰዎች ህይወት እንዲቀጠፍ ተደርጓል ፤ በርካቶችም አካለ ጎዶሎ ሆነዋል ሲል በላከልን መግለጫ ላይ አስታውቋል።

የህዝቡን ተወካዮች በሐሰት የተቀነባበረ ማስረጃ እያቀረቡ መደበኛ ስራ ላይ ካሉበት ይዞ ወደ እስር ቤት ማስገባት እጅግ አሳዛኝ ተግባር ሆኖ አግኝቼዋለሁም ብሏል።

ምንም አይነት አመፅ ባልተካሄደበት ዞን ውስጥ ተደጋጋሚ ሁከት የተፈጠረ በማስመሰል ህዝቡን የሚያሸብር ገለፃ በመስጠት ሰላማዊ ሰዎችን ለእስራትና ለከፋ ጉዳት መዳረግ የልማትና የመልካም አስተዳደር እንቅስቃሴን ክፉኛ የሚጎዳ እንጂ የሚጠቅም አይደለም ብሏል ዎህዴግ።

ዎሕዴግ በመግለጫው በቁጥጥር ስር የዋሉ የዞን አስተዳደር ኃላፊዎች ፣ የተፎካካሪ ፓርቲ መሪዎች፣ የሃይማኖት መሪዎች ፣ የሀገር ሽማግሌዎች እና ሌሎችም ከእስር እንዲፈቱ ጠይቋል።

በዞኑ ከተከሰተው አስከፊ ድርጊት ጋር በተያያዙ የንፁሃን ዜጎች ህይወት ያጠፉ በአስቸኳይ ለፍርድ እንዲቀርቡ እንዲደረግ አሳስቧል።

በዎላይታ ህዝብ ላይ የሚፈፀም ጥቃት እንዲቆም እንዲሁም የዎላይታ ህዝብ በክልል የመደራጀት ጥያቄው በአስቸኳይ ተገቢው ህገ መንግስታዊ ምላሽ እንዲያገኝ ዎሕዴግ ጠይቋል።

@tikvahethiopiaBot @tikvahethiopia

#SputnikV

የሩስያ ጤና ሚንስትር ሚካኤሊ ሙራሽኮ በዛሬው ዕለት ሀገራቸው ይፋ ያደረገችው ክትባት “በጣም ውጤታማና ደህንነቱ የሚያስተማምን” ነው ብለዋል።

ሚኒስትሩ ክትባቱ የሰው ልጆች ኮቪድ-19ን ድል የሚነሱበት እርምጃ እንደሆነም መግለፃቸውን BBC ዘግቧል።

ባለፈው ሳምንት፤ የሩስያ መንግሥት ክትባቱ ላይ ስኬታማ ምርምር እንዳካሄደ አስታውቆ ፤ በጅምላ ክትባቱን መስጠት እንደሚጀምር ይፋ አድርጎ ነበር።

በመላው ዓለም ወደ 100 የሚጠጉ ክትባቶች ላይ ምርምር እየተደረገ ይገኛል። ከነዚህ መካከል በሰው ላይ ሙከራ የተካሄደባቸውም አሉ።

ክትባት የማግኘት ሂደት ፈጣን ቢሆንም በርካታ ባለሙያዎች እስከ ቀጣዩ ዓመት አጋማሽ ድረስ ክትባት በስፋት አይዳረስም ይላሉ።

የዓለም ጤና ድርጅት ቃል አቀባይ ክርስቲያን ሊንድሜር “አንዳንዴ በግላቸው ምርምር የሚያካሂዱ ሰዎች ውጤታም እንደሆኑ ይናገራሉ። ይህም እጅግ መልካም ዜና ነው” ብለዋል።

ቃል አቀባዩ አያይዘው፤ ውጤታማ ክትባት በማግኘት እና በምርምር ደረጃዎች በማለፍ መካከል ሰፊ ልዩነት እንዳለ አስምረውበታል - #BBC

@tikvahethiopiaBot @tikvahethiopia

ምክክር ለአንድነትና ለዴሞክራሲ ፓርቲ /ምክክር/ በ6ኛው ብሔራዊ ምርጫ የሚታገልባቸው የምርጫ ማኒፌስቶ 132 ገፅ የያዘ እና 70 አንቀፆች ያሉትን በማዘጋጀት ከነሀሴ 02 እስከ ነሀሴ 04 ቀን 2012 ዓ.ም (ለ3 ተከታታይ ቀናት) ከፍተኛ አመራሩ ውይይት አድርጎ ማሻሻያዎችን በማድረግ አፅድቋል በዚህ ጉዳይ ፓርቲው ለቲክቫህ ኢትዮጵያ መግለጫ ልኳል።

@tikvahethiopiaBot @tikvahethiopia

"በወላይታ ዞን የጸጥታ ኃይሎች በተቃውሞ ሰልፈኞች ላይ ተመጣጣኝ ያልሆነ ኃይል ከመጠቀም ሊቆጠቡ ይገባል!" - ኢሰመኮ

በወላይታ በዞን አንዳንድ አከባቢዎች ነሐሴ 4 ቀን 2012 ዓ.ም. በተደረጉት ተቃውሞዎች የፀጥታ ኃይሎች በተቃውሞ ሰልፈኞች ላይ የወሰዱት እርምጃ ተመጣጣኝነት አጠያያቂ መሆኑን የሰብዓዊ መብት ኮሚሽን ገለጸ፡፡

ኮሚሽኑ ለሰልፍ ወጥተው ሞቱ ባላቸው 6 ሰዎችን አስመልክቶ ፈጣን ምርመራ የሚያስፈልግ መሆኑን በመግለጫው ጠቅሷል፡፡

የኢትዮጵያ ሰብዓዊ መብቶች ኮሚሽን ቃል አቀባይ፣ አቶ አሮን ማሾ እንደገለጹት “የፀጥታ ኃይሎች ሰላማዊ ሰልፎችን በሚቆጣጠሩበት ወቅት የሞት አደጋን የሚያስከትል የኃይል እርምጃ ከመውሰድ ሊቆጠቡ ይገባል፤ እንደነዚህ ያሉ እርምጃዎች ቀድሞውኑን የነበረ ውጥረትን ያባብሱ እንደሆን እንጂ መፍትሔ አይሆኑም” ብለዋል፡፡

በሰኞው እስር ወቅት በጠቅላላው 178 ሰዎች የተያዙ ሲሆን ከነዚህም ውስጥ 28ቱ የዞኑ ከፍተኛ ባለስልጣናት መሆናቸው እና በወላይታ ሶዶ የቴክኒክና ሙያ ትምህርትና ሥልጠና ኮሌጅ ውስጥ በቁጥጥር ስር የሚገኙ መሆኑን ለማወቅ ተችሏል፡፡

ኢሰመኮ የታሳሪዎችን መብቶች ማክበርና በአፋጣኝ ወደ ፍርድ ቤት መቅረብ ማረጋገጥ ያስፈልጋል ብሏል፡፡

@tikvahethiopiaBot @tikvahethiopia

ጫልቱ ታከለ ከእስር ተፈታች!

በዋስ እንድትፈታ ፍርድ ቤት ወስኖላት ከእስር ሳትፈታ የቆየችው ጫልቱ ታከለ በዛሬው ዕለት ከእስር ተፈታ ከቤተሰቦቿ ጋር መቀላቀሏ ተሰምቷል።

@tikvahethiopiaBot @tikvahethiopia