#Update

" የጤና ባለሞያ ወንጀለኛ አይደለም " - የሆስፒታሉ ሰራተኞች

በማዕከላዊ ኢትዮጵያ ክልል፣ ከምባታ ዞን አንጋጫ ወረዳ ውስጥ የሚገኘው የአንጋጫ የመጀመሪያ ደረጃ ሆስፒታል ውስጥ የሚሰሩ ከ80 በላይ የጤና ባለሞያዎች ለ6 ወራት የሰሩበት የተጠራቀመ የዲዩቲ ክፍያ ስላልተከፈላቸው ከ12/02/17 ዓ/ም ጀምሮ ስራ ማቆማቸውን መዘገባችን ይታወሳል።

የጤና ባለሞያዎቹ እስካሁን ወደ ሥራ ገበታቸው ያልተመለሱ ሲሆን ጥያቄያቸው ምላሽ ሳያገኝ የመመለስ ፍላጎት እንደሌላቸው ገልጸውልናል።

ስራ አቁመው በቆዩባቸው ቀናት ከወሊድ ጋር በተገናኘ ወደ ሆስፒታሉ መጥተው የነበሩ እናቶች ጉዳት እንዳጋጠማቸው ቲክቫህ ኢትዮጵያ ካነጋገራቸው ባለሞያዎች እና ከሆስፒታሉ አመራር ተረድቷል።

ጉዳያቹ ከምን ደረሰ ? ስንል በድጋሚ ጥያቄ ያቀረብንላቸው የጤና ባለሞያዎች " የስራ ማቆም አድማውን አስተባብራቹሃል " በሚል 14 በሚሆኑ ባለሞያዎች ላይ የእስር ማዘዣ ወጥቶ እየተፈለጉ መሆኑን እና ይህንንም ፍራቻ ከአካባቢው ርቀው መደበቃቸውን ተናግረዋል።

" እኛ ስራ ካቆምን በኋላ የምንጠብቀው የሚመለከታቸው አመራሮች ችግራቹ ምንድነው ? እንዴት ዘጋቹ ? ምንድነው ችግሩ ? ብለው መጠየቅ እና መሰብሰብ ሲገባቸው ጭራሽ ወደ ማሳደድ ገብተዋል " ሲሉ ገልጸዋል።

" ሸሽተን ነው ያለነው በፖሊስ ማዘዣ ወጥቶ በተገኙበት ይያዙ ተብሏል እየተፈለግን ነው። ለጊዜው ከአካባቢው ሸሽተናል " ሲሉ አክለዋል።

" ተቋሙ በቂ መድኃኒት እና የህክምና ግብአቶች የሉትም ለበርካታ ጊዜያት የመድኃኒት ግዢ አልተፈጸመም ሆስፒታሉን የምናገለግለው ባለው ነገር ነው " ያሉ ሲሆን ነገር ግን ስብሰባ ላይ ያለውን ችግር የሚናገሩ ሰዎች '" አድመኛ እና ሌላ አላማ ያላቸው ተብለው እየተፈረጁ ነው " ሲሉ ተናግረዋል።

ባለሙያዎቹ " ይህንን ችግር ችለን እየሰራንም የሰራንበትን የትርፍ ሰዓት ክፍያ አልተከፈለንም ደሞዛችን ለምንም የሚበቃ አይደለም ነው " ያሉት።

" ስራ በማቆማችን የኛን ችግር ከመቅረፍ ይልቅ በማህበረሰቡ ዘንድ እንድንጠላ ሥራ እየሰሩ ነው " ያሉ ሲሆን " እየተሰቃየ ቀን እና ማታ የሚሰራ ሰው የ2016 ዕዳውን ሳይከፍል ፣ የቤት ኪራይ ክፈል ወይም ልቀቅ እየተባለ በስቃይ ነው ያለው ባለሞያው ከተለያዩ የኢትዮጵያ አካባቢዎች መጥቶ ነው ስራውን የሚሰራው እረፍት ወጥቶ ሄዶ እናቱን እና አባቱን እንዳይጠይቅ የህክምና ስራ እረፍት የለውም " ብለዋል።

" ችግርህ ምንድነው ተብሎ አይጠየቅም ? ሲሪንጅ (Syringes) የለም ብለን ማውራት የለብንም እንዴ ? ማቴሪያል ለዚህ ተቋም ያስፈልጋል ህዝቡ መንገላታት የለበትም ብለን መጠየቅ የለብንም ? ይህንን ባወራን በፖሊስ መጥሪያ መውጣት የለበትም አግባብ አይደለም " ሲሉ ገልጸዋል።

" ጤና ባለሞያ ወንጀለኛ አይደለም ይሄንን ሌላ ቦታ አላወራንም ስብሰባ ላይ ነው ያወራነው " ሲሉ አክለዋል።

ባለሙያዎቹ ፥ " እኛ ስራውን ከማቆማችን በፊት ሁሉም ባለሞያ ቀደም ብሎ ተኝቶ ታካሚዎችን ወደ ሌላ ቦታ ሪፈር አድርገን ነው የወጣነው " ያሉ ሲሆን እነሱ ግን ታካሚዎችን ትተን እንደወጣን በማስመሰል በማህበረሰቡ ዘንድ የማጥላላት ሥራዎችን እየሰሩ ነው " ሲሉ ተናግረዋል።

በተጨማሪም ፥ " ለመንግስት የስራ ሰዓት ብለን ለምንሰራው ሥራ የሚከፈለን ደሞዝ ለእኛ በቂ አይደለም ኢኮኖሚውን መቋቋም አልቻልንም። " ብለዋል።

" የቆየ ችግር ነው ከ2015 ጀምሮ እየተቆራረጠ ነው የሚመጣው እያቃተን ነው ። የሚገባልን ደሞዝ እዳችንን ራሱ መክፈል አልቻለም። አሁንም ችግራችንን ከመፍታት ይልቅ ' ለሌላ ሆስፒታል ሰራተኞች ማስተማሪያ የሚሆን እርምጃ ይወሰድባቸው ' ተብሎ እየተፈለግን ነው ሲሉ ነግረውናል።

ቲክቫህ ኢትዮጵያ የሆስፒታሉን አመራር አግኝቶ ስለ ችግሩ ጠይቋል። የአመራሩ ምላሽ በቀጣይ ይቀርባል።

#TikvahEthiopiaFamilyAA

@tikvahethiopia

#Update

" ዘግተው የወጡትን ሰዎች በህግ እንዲፈለጉ እያደረግን ነው " -የሆስፒታሉ ስራ አስኪያጅ

ከክፍያ ጋር በተያያዘ የአንጋጫ የመጀመሪያ ደረጃ ሆስፒታልን ዘግተው ስለወጡና ስራ ስላቆሙ ጤና ባለሞያዎች በተመለከተ የሆስፒታሉ ስራ አስኪያጅ አቶ ተሰማ አበራ ዝርዝር ምላሽ ሰጥተዋል።

" እኔ እንደ ተቋሙ ስራ አስኪያጅ ይከፈላቸው ብዬ እየጠየኩ ነው በዕለቱም ይህንን ጉዳይ ከሚመለከተው አካል ጋር ለመነጋገር ስሄድ ነው ዘግተው የወጡት " ሲሉ ተናግረዋል።

" ስመጣ ሁሉም ክፍል ዝግ ሆኖ ነው የጠበቀኝ ታካሚው ውጪ ሲጉላላ ነው የደረስኩት " ብለዋል።

ወረዳውም የተጠየቀውን ክፍያ ለመክፈል ዝግጁ ነው ያሉት አቶ ተሰማ " ነገር ግን ' የገንዘብ እጥረት አለብኝ 'ታገሱ ' ብሏል " ሲሉ ለቲክቫህ ኢትዮጵያ ተናግረዋል።

" ጤና ጣቢያ ለአንድ ደቂቃም መዘጋት የለበትም " የሚሉት ሃላፊው " እነሱ ግን ዘግተው ወጡ እንደዚህ ሲሆን ማስታወቂያ አወጣን ' ወደ ስራቹ ተመለሱ ' የሚል አልመጡም በመሃል ወሊድ ፋታ የማይሰጥ በመሆኑ የመጡት እናቶች ሪፈር በሚደረጉ ወቅት ከፍተኛ ችግር ደርሶባቸዋል " ብለዋል።

" ላብራቶሪ ፣ ማዋለጃ ፣ መድሃኒት ክፍል ሁሉንም ዘግተው ነው የሄዱት ቁልፍ አስረክበው ቢሄዱ አንድ ነገር ነው ትልቅ ወንጀል ነው ሰርተው የሄዱት " ሲሉ ተናግረዋል።

ስራ አስኪያጁ አምናም በተመሳሳይ ከዲዩቲ ክፍያ ጋር በተያያዘ ሆስፒታሉ ተዘግቶ እንደነበር ገልጸዋል።

" ያኔ ምንም እርምጃ አልተወሰደም በዚሁ ከቀጠለ ጤና ተቋማት እየተዘጉ ህዝብ ያልቃል እርምጃ ካልተወሰደ ነገም ቢሆን እየዘጉ ይወጣሉ በዚህ መሃል ሰው ይሞታል የሞተ ሰውን ደግሞ መመለስ አይቻልም " ብለዋል።

በተቋሙ ዘግተው የወጡትን ሰዎች በህግ እንዲፈለጉ እያደረግን ነው የዘጓቸውን ክፍሎች ግን በህጋዊ መንገድ ሰብረን ገብተናል ሲሉ ገልጸዋል።

ለጊዜው ከሌሎች አካባቢዎች ባለሞያዎችን አምጥተው ሥራ ለመጀመር እንቅስቃሴዎችን እያደረጉ እንደሆነ ተናግረዋል።

ከ80 በላይ ባለሞያዎች በአንድ ጊዜ ነው ስራ ያቆሙት ምን ያህል ባለሞያዎችን አግኝታቹሃል ? ስንል ላቀረብንላቸው ጥያቄ " ባሉት ዋና ዋና ጊዜ የማይሰጡ የወሊድ እና የድንገተኛ ህክምና ቦታዎች ላይ 7 ባለሞያዎች አምጥተናል ኦፕሬሽን ላይ ግን ሰው ማግኘት አልተቻለም " ብለዋል።

እነዚህ ባለሞያዎች ክፈተቱን ለመሸፈን የመጡ እንጂ ቋሚ ተቀጣሪዎች አይደሉም ሲሉ አስረድተዋል።

ስራ ያቆሙት ባለሞያዎች ተመልሰው ቢሙጡ ትቀበላላቹ ወይ ? ስንል ላነሳንላቸው ጥያቄ  " እስካሁን የመጣ ባለሞያ የለም " የሚል ምላሽ ሰጥተዋል።

" ' በሌሎች ተገፋፍተን አስፈራርተውን ነው ' የወጣነው የሚሉ ባለሞያዎች አሉ የሚመለሱ ከሆነ አስፈላጊውን አስተዳደራዊ እርምጃ የምንወስድ ይሆናል ነገር ግን አስቀድመን ከማህበረሰቡ ጋር ውይይቶችን አድርገን ነው የሚሆነው " ሲሉ ገልጸዋል።

ሃላፊው ፥ " ስራ በማቆማቸው ቀዳሚ ተጎጂ ማህበረሰቡ መሆኑን ጠቁመው ከሰኞ በኋላ ከሚመለከታቸው ጋር ተነጋግረን ይመለሱ አይመለሱ የሚለውን የምንወስን ይሆናል " ሲሉ አክለዋል።

ወደ አመራርነት ከመጡ 2 ወራቸው እንደሆነ የገለጹት አቶ ተሰማ " በሆስፒታሉ ውስጥ የአከፋፈል ስርዓት ችግር አለ ከታካሚው አንጻር ትርፍ ባለሞያ ነው ያለው አንዳንድ የማሻሻያ ስራዎች እየሰራን ነው ተቋሙ ላይ መድኃኒት መኖር አለበት መድሃኒት በህገወጥ መንገድ የሚወጣበት ተቋም ነው። ይህ እንዳይሆን አንዳንድ ስራዎችን መስራት ጀምረናል ይህ ያስቆጣቸው ሰዎች አሉ " ብለዋል።

ቲክቫክ ኢትዮጵያ ሰራተኞቹ የጠየቁት የተጠራቀመ እና የሰሩበትን ክፍያ ነው በምን ያህል ጊዜ ችግራቸውን ትፈታላቹ ? የሚል ጥይቄ አንስቷል።

ስራ አስኪያጁ ፤ " እኔ ያሰራኋቸውን የሁለት ወር የዲዩቲ ክፍያ ለመክፈል 1.4 ሚልዮን ብር ያስፈልጋል ይህንንም ለመክፈል ቀኑን መወሰን አይቻልም ወረዳው ' ያለውን ነገር ተነጋግረን እንፈታለን ' ብለዋል ይከፈላቸዋል " ሲሉ መልሰዋል።

" ያልተከፈላቸውን ክፍያ ሁሉ ለመክፈል ወረዳው ዝግጁ ነው " ያሉ ሲሆን ነገር ግን የበጀት እጥረት በመኖሩ ቀኑን መወሰን እንደማይቻል ገልጸዋል።

በ2016 የጥር ወር ላይ የ4 ወር የዲዩቲ ክፍያ ባለመከፈሉ በተመሳሳይ ሰራተኞች ስራ አቁመው እንደነበር መዘገባችን የሚታወስ ነው።

በወቅቱ ሆስፒታሉ ከወረዳው ከሚገኙ የጤና ጣቢያዎች 17 ያህል ባለሞያዎችን ቀጥሮ ስራ አስጀምሮ ነበር።

ከዚያ በኋላም የአንድ ወር እንዲከፈላቸው ተደርጎ ወደ ስራ ተመልሰው የነበረ ሲሆን በጊዜያዊነት ተቀጥረው የነበሩት 17 ባለሞያዎች አብረው እንዲቀጥሉ ተደርገዋል።

አቶ ተሰማ እኚህ 17 ባለሞያዎች አሁን የስራ ማቆም አድማ ካደረጉት ውስጥ እንደሚገኙ ጠቁመዋል።

ባለሞያዎች ወደመጡበት እንዲመለሱ በወረዳው አስተዳደር መወሰኑን ተናግረዋል።

ቲክቫህ ኢትዮጵያ የሆስፒታሉን ምክትል ቦርድ ሰብሳቢ እና የአንጋጫ ወረዳ አስተዳዳሪ የሆኑትን አቶ ማርቆስ ማሞን በጉዳዩ ላይ ምላሽ እንዲሰጡ ተደጋጋሚ የስልክ ጥሪ ቢያደርግም ለጊዜው አልተሳካም።

#TikvahEthiopiaFamilyAA

@tikvahethiopia

#Update

🔵 “ መምህራኑን ስምንት ቀናት አስረው ነው የፈቷቸው። በሕግ አምላክ አሁንም ደመወዛችን ይከፈለን ” - የወላይታ ዞን መምህራን

🔴 “ ከ10,500 በላይ መምህራን ደመወዝ አልተፈጸመላቸውም ” - የዞኑ መምህራን ማኀበር

በወላይታ ዞን የሚገኙ መምህራን ያልተከፈላቸውን ደመወዝ በተመለከተ ለኢትዮጵያ ሰብዓዊ መብቶች ኮሚሽን (ኢሰመኮ) አቤቱታ ለማስገባት እንቅስቃሴ ሲያደርጉ “ በፓሊስ መታሰራቸው ” ተሰምቶ ነበር።

የደመወዝ ቅሬታቸው ባለመፈታቱ የመብት ጥያቄ ለማንሳት ባደረጉት ፒቲሽን የማሰባሰብ እንቅስቃሴ ነበር ፓሊስ “ አመጽ ለመቀስቀስ ተንቀሳቅሰዋል። የዞኑን ገጽታ አጥፍተዋል ” በሚል ያሰራቸው።

ቲክቫህ ኢትዮጵያም የታሰሩት መምህራን ተፈቱ ? የደመወዝ ቅሬታችሁስ መፍትሄ አገኘ ? ሲል ዛሬ ቅሬታ ያላቸው መምህራንን ጠይቋል።

ምን መለሱ ?

“ ምህራኑን ስምንት ቀናት አስረው ነው የፈቷቸው። ሦስቱም መምህራን ተፈትተዋል። በሕግ አምላክ አሁንም ደመወዛችን ይከፈለን። 

‘ መንግስትን ከሕዝብ አጣልታችኋል ’ የሚለው ክስ በፍርድ ቤት ሲቀርብ ምንም መረጃ የላቸውም። ከዚያ ጋር ተያይዞ ነው ፍርድ ቤት በዋስ የለቀቃቸው።

የመማር ማስተማር ሥራ ተጀምሯል።

አሁንም ደመወዝ እንዲከፈለን እንፈልጋለን።

መምህራን ከአዕምሮ ጋር የተያያዘ ሥራ ስለሚሰሩ የመማር ማስተማር ሂደቱን በትክክል እንዲተገብሩ ደመወዝ መከፈል አለበት።

የሐምሌ ደመወዝ እስካሁን አልተከፈለም። ለመምህራንና ለጤና ባለሙያ 40 በመቶ፣ ለፓሊስ 20 በመቶ እንጂ ከዚህ ውጪ ደመወዝ አልተከፈለም።

አሁን እንደገና አጠቃላይ የትምህርት ባለሙያም ወደታች ወርዶ ‘የሐምሌን ደመወዝ እንከፍላለን’ በማለት አመራርም በአጠቃላይ ተረባርቦ መምህራን ወደ ስራ አስገብተዋል።

ፍርድ ቤትም ገና የራሱን ቀጠሮ እየሰጠ ነው የሐምሌ ደመወዝ ባለመከፈሉ ምክንያት ” ብለዋል።

ደመወዛቸው በወቅቱ አለመፈጸሙ ትልቅ ጥፋት ሆኖ እያለ ይህንኑ ቅሬታ መምህራን ታስረው መቆዬታቸው ግፍ መሆኑን ያስረዱ ሲሆን፣ ቲክቫህ ኢትዮጵያም በዚሁ ቅሬታ ላይ ምን እየሰሩ እንደሆነ የክልሉና የዞኑን መምህራን ማኀበር ጠይቋል።

የክልሉ መምህራን ማኀበር የመምህራንን መታሰር በተመለከተ እስካሁን ሪፓርት እንዳልተደረገለት/ቅሬታ ያደረሰው አካል እንደሌለ ገልጾ፣ በይበልጥ የዞኑ መምህራን ማኀበር እንዲጠየቅ አሳስቧል።

ተመሳሳይ ጥያቄ ያቀረብንላቸው የወላይታ ዞን መምህራን ማኀበር ሊቀ መንበር መምህርት ባዩሽ ዘውዴ፣ “ በቅርቡ ታስረዋል ስለተባሉት መምህራን ለኛ ኦፊሻሊ የቀረበልን ምንም መረጃ የለም ” የሚል ምላሽ ሰጥተውናል።

“ ያመለከተልን አካል የለም። ከውጪ ወሬ ነው እየሰማን ያለነው። ወደ አክሽን እንዳንገባ የመጣልን መረጃ የለም ” ያሉት ሊቀመንበሯ፣ “ እንነጋገርበት ወደኛ መምጣት ይችላሉ ” ብለዋል።

የደመወዝ ክፍያን ቅሬታ በተመለከተም በሰጡን ምላሽም፣ ከ10 ሺህ 500 በላይ መምህራን ደመመወዝ እንዳልተፈጸመላቸው ገልጸው፣ ማኀበሩ ለሚመለከታቸው አካላት ሁሉ እንዳሳወቀ አስረድተዋል።

የክፍያ አለመፈጸምን በተለመከተ ምላሽ እንዲሰጡ ከዚህ ቀደም የጠየቅናቸው የወላይታ ዞን ትምህርት መምሪያ ኃላፊ አቶ ጎበዜ ጎደና፣ “ አራት ወረዳዎች ላይ መሉ ደመወዝም ሳይሆን የተወሰነ እየተከፈለ ነው። የሐምሌ ወር ክፍያ ላልተፈጸመላቸውም ወረዳዎች ገቢ ሰብስበው እንዲከፍሉ እየተደረገ ነው ” ብለው ነበር።

#TikvahEthiopiaFamilyAA

@tikvahethiopia

#Update

ከ1997 የጋራ መኖሪያ ቤት ተመዝጋቢዎች ጉዳይ ጋር በተያያዘ የአዲስ አበባ ቤቶች ልማት እና አስተዳደር ቢሮ ከደቂቃዎች በፊት ማብራሪያ ሰጥቷል።

ቢሮው እየተሰራጨ ያለው መረጃ ከአውድ ውጪ በተተረጎመ መንገድ እንደሆነ ጠቁሟል።

" የ1997 የጋራ መኖርያ ቤት ተመዝጋቢዎችን በተመለከተ ሰሞኑን በተለያዩ ሚዲያዎች እየተሰራጨ ያለው የተሳሳተ መረጃ ትክክል ባልሆነ መልኩ  ከአውድ ውጪ ተተርጉሞ የቀረበ ነው " ብሏል።

ቢሮው በሰጠው ማብራሪያ ምን አለ ?

" ከተማ አስተዳደሩ የጋራ መኖሪያ እና ንግድ ቤቶች ለማስተላለፍ ባወጣው መመሪያ ቁጥር 3/2011 መሰረት ክፍል 3 አንቀፅ 13 ንኡስ አንቀፅ 1 እና 2 መሰረት ብቁ እና ንቁ ማለትም ' የቤት ፈላጊዎች በገቡት ግዴታ መሰረት የቁጠባ መጠን በኢትዮጵያ ንግድ ባንክ በትክክል ተቀማጭ ማድረጋቸውን ከእጣ በፊት ያረጋግጣል ' ይላል።

ስለሆነም የ1997 ተመዝጋቢዎች በወቅቱ በመረጃ ቋት ውስጥ ንቁ እና ብቁ  የነበሩ ተመዝጋቢዎችን ከተማ አስተዳደሩ ሙሉ በሙሉ አስተናግዶ ያጠናቀቀ ሲሆን ነገር ግን በወቅቱ ብቁ ያልነበሩትን የ1997 ተመዝጋቢዎች እና ሌሎች የ2005 እጣ ያልደረሳቸው የቤት ፈላጊዎች እየተተገበሩ ባሉ የተለያዩ የቤት ልማት አማራጮች እያስተናገደ ይገኛል፡፡

ስለሆነም በወቅቱ ብቁ እና ንቁ  ያልነበሩ የ1997 ተመዝጋቢዎች ከየትኛውም የቤት ልማት መርሃ ግብር ውጪ እንደተደረጉ ተደርጎ የተሰራጨው የሀሰት መረጃ ተገቢ እንዳልሆነ ህብረተሰቡ እንዲገነዘብ እና ይህንን ሀሰተኛ መረጃ የሚያሰራጩትን ከተማ አስተዳደሩ በህግ የሚጠይቅ ይሆናል።

ከተማ አስተዳደሩ ተመዝግበው የሚጠባበቁትን ሆነ ሌሎች የከተማችዋን የቤት ፈላጊዎች ቤት ተደራሽ ለማድረግ የተለያዩ አዳዲስ የቤት ልማት አማራጮችን በመቀየስ እየተገበረ ይገኛል " ብሏል።

NB. ቢሮው ስለ 1997 ተመዝጋቢዎች የትኛው ሚዲያ ከአውድ ውጭ የተተረጎመ ሀሰተኛ መረጃ እንዳሰራጨ በግልጽ ያለው ነገር የለም። ነገር ግን መረጃውን የሚያሰራጩትን በህግ እጠይቃለሁ የሚል ማስጠንቀቂያ አስተላልፏል።

#AddisAbabaHousingDevelopmentandAdministrationBureau

@tikvahethiopia

#Update

" ጥያቄያችን ፖለቲካዊ ይዘት እንዲኖረው ተደርጓል " - ቅሬታ አቅራቢ የጤና ባለሙያዎች

በማዕከላዊ ኢትዮጵያ ክልል፣ የአንጋጫ የመጀመሪያ ደረጃ ሆስፒታል ውስጥ የሚሰሩ ከ80 በላይ የጤና ባለሞያዎች ለ6 ወራት የሰሩበት የተጠራቀመ የዲዩቲ ክፍያ ስላልተከፈላቸው ከ12/02/17 ዓ/ም ጀምሮ ስራ ማቆማቸውን መግለጻችን ይታወሳል።

የሆስፒታሉ ሰራተኞች ከተጠቀሰው ቀን ጀምሮ ለስድስት ቀናት ማለትም 12/02/17 እስከ 18/02/17 ድረስ ስራ ሳይገቡ ቆይተው ማክሰኞ በ19/02/2017 ዓ.ም ከአካባቢው ሽማግሌዎች ጋር የወረዳው ባለሥልጣናት በተገኙበት በተደረገ ውይይት ሽማግሌዎች ከወረዳው ሃላፊዎች ጋር ለማደራደር በመስማማታቸው ወደ ስራ ገበታቸው ተመልሰዋል።

ይሁን እንጂ ከስብሰባው ማብቃት በኋላ " አድማውን አስተባብራቹሃል " በሚል 14 የሚሆኑ ባለሞያዎች ለእስር ተዳርገዋል።

በተለያየ ቀናት ለእስር የተዳረጉት እነዚህ ባለሞያዎች ከ 2 እስከ 6 ቀናት ለሚሆን ጊዜ ታስረው በዋስ ከእስር ተፈተው ወደ ስራ ገበታቸው ተመልሰዋል።

ቲክቫህ ኢትዮጵያ ለእስር ከተዳረጉት ባለሞያዎች መካከል የተወሰኑትን አነጋግሯል።

ባለሙያዎቹ  " ጥያቄያችን ፓለቲካዊ ይዘት እንዲኖረው ተደርጓል " ብለውናል።

" የጠየቅነው የሰራንበትን ክፍያ ሆኖ ሳለ ፍርድ ቤት ስንቀርብ ' ህዝብ በመንግስት ላይ እንዲነሳ አድርጋቹሃል፣ ሰዎችን ወደ ሥራ እንዳይጋቡ አስፈራርታቹሃል ' የሚል ክስ ተነቦልናል " ነው ያሉት።

በተጨማሪም ባለሞያዎች ወደ ሆስፒታል ሲመለሱ ከአሁን በኋላ ተመሳሳይ የሆነ የስራ ማቆም አድማ ውስጥ ቢገቡ አስፈላጊውን አስተዳደራዊ እርምጃ እንደሚወሰድባቸው የሚገልጽ ደብዳቤ ላይ እንዲፈርሙ ተደርጓል ብከዋክ።

ሰራተኞቹ ከተመለሱ በኋላ BPR የተሰኘ በየስምንት ሰዓቱ በሺፍት የሚቀያየሩበት አሰራር እንዲዘረጋ መደረጉን ተናግረዋል።

በአዲሱ አሰራር መሰረት ጠዋት 12 ሰዓት ወደ ስራ የገባ ሰራተኛ 8 ሰዓት ከስራ የሚወጣ ሲሆን 8 ሰዓት የገባው ምሽት 4 ሰዓት ከስራ ይወጣል።

ይሁን እንጂ ይህ አሰራር " ሆስፒታሉ ለሰራተኞች ሰርቪስ የሌለው በመሆኑ እና በምሽት ሺፍት ከስራ ስንወጣ እና ስንገባ ለጅብ እየተጋለጥን ነው " በሚል ቅሬታ አቅርበዋል።

" ይህ አይነቱ አሰራር የተዘረጋው የወረዳው አስተዳደር ለመቀጣጫ እንዲሆን በሚል ነው " ያሉት ቅሬታ አቅራቢዎቹ " የትርፍ ሰዓት ሥራ ለማስቀረት የተደረገ ነው " ብለዋል።

ቲክቫህ ጉዳዩ በዋናነት የሚመለከታቸውን የአንጋጫ ወረዳ ዋና አስተዳዳሪ እና የሆስፒታሉ ምክትል ቦርድ ሰብሳቢ የሆኑትን አቶ ማርቆስ ማሞን ቅሬታውን ከተቀበለበት ቀን ጀምሮ ለማናገር ተደጋጋሚ የሆነ የስልክ ሙከራ ቢያደርግም ስልካቸውን ለማንሳት ፈቃደኛ አልሆኑም።

የሆስፒታሉ አስተዳዳሪ አቶ ተሰማ አበራ አዲሱ  አሰራር ለአደጋ አጋልጦናል የሚለውን የሆስፒታሉን ባለሞያዎች ቅሬታ አይቀበሉም።

" የትርፍ ሰዓት ስራ ሲሰሩ ያልነበረ ጅብ ዛሬ ከየት መጣ " የሚል ምላሽ ሰጥተዋል።

ይህ አይነቱ አሰራር ያልነበረና አዲስ ተደርጎ መወሰድ የለበትም ብለዋል።

አክለውም " ይህን ጭቅጭቅ የሚያመጣው ወረዳው የመክፈል አቅም የሌለው በመሆኑ ነው በቀጣይም መጋጨት የለብንም " በማለት አሰራሩ በገንዘብ እጥረት ምክንያት የተዘረጋ መሆኑን ጠቁመዋል።

ባለሞያዎቹ የሰሩበት ገንዘባቸው ሳይከፈላቸው ወደ ስራ እንዲመለሱ ተደርጓል መቼ ክፍያቸው ይፈጸማል ስንል በድጋሚ ላነሳንላቸው ጥያቄም "አሁንም እየተነጋገርን ነው ከወረዳ መንግሥት ጋር የገንዘብ ክፍተት ስላጋጠመ እንጂ መከፈል እንዳለበት ተግባብተናል" የሚል ምላሽ ሰጥተዋል።

#TikvahEthiopia

@tikvahethiopia

#Update

" ግለሰቦቹ ከአንዳንዶቹ ነጋዴዎች ባዘጋጁት ተሽከርካሪ እቃዎችን ጭነው ሄደዋል " - ቢሮው

ሰኞ ዕለት በመርካቶ ያሉ ነጋዴዎች " ከአዲስ አበባ ገቢዎች ቢሮ ነው የመጣነው " ያሉ ሰዎች ያለ ደረሰኝ ለምን ሸጣችሁ በሚል እቃችንን ወርሰውብናል ብለዋል።

በዚህና ተያያዥ ምክንያቶች በእለቱ በመርካቶ ያሉ በርከት ያሉ ሱቆች ዝግ ሆነው ውለዋል፡፡

የአዲስ አበባ ገቢዎች ቢሮ ፥ የተባለው ችግር በመርካቶ እንደተፈጠረ አምኖ ነገር ግን የነጋዴዎችን እቃ ወርሰዋል የተባሉት ግለሰቦች ከገቢዎች ቢሮም ይሁን ከየትኛውም የመንግስት አካል ያልተወከሉ ህገ ወጦች ናቸው ሲል ማመልከቱን ሸገር ኤፍ ኤም 102.1 ሬድዮ ዘግቧል።

የታክስ ኢንቴሌጀንስና ምርመራ ዳይሬክቶሬት ዳይሬክተር የሆኑት አቶ ተስፋዬ ነጋሽ " እኛ ምንም አይነት ንብረት የመውረስ መብት የለንም መወረስ ካለበትም ይህንን የሚሰራው የጉምሩክ ኮሚሽን ነው " ብለዋል፡፡

" ግለሰቦቹ ከአንዳንዶቹ ነጋዴዎች ባዘጋጁት ተሽከርካሪ እቃዎችን ጭነው ሄደዋል፤ ከአንዳንዶቹ ነጋዴዎች ደግሞ ገንዘብ ተቀብለው ተሰውረዋል " ሲሉ ገልጸዋል።

ግለሰቦቹ በቁጥጥር ስር እንዲውሉ ነጋዴዎቹ ለፀጥታ አካላት መረጃዎችን በመስጠት ተባባሪ እንዲሆኑ ጠይቀዋል፡፡

በማህበራዊ ሚዲያ ላይ " መንግስት ከመርካቶ ገበያ የነጋዴዎችን እቃ መውረስ ጀመረ " ተብሎ የተሰራጨው መረጃ ግን ከእውነት የራቀ ነው ሲሉ ገልጸዋል።

ውዥምብሩ የተፈጠረው በዚህ ምክንያት መሆኑን ጠቅሰዋል፡፡

የከተማዋ ገቢዎች ቢሮ ከዚህ ቀደም ይሰራ እንደነበረው ያለ ደረሰኝ ግብይት እንዳይፈፀም ለማድረግ ያለመ የቁጥጥር ስራ እነደሆነ ኃላፊው ጠቁመዋል።

ከህዳር 1 2017 ዓ.ም ጀምሮ በዘመቻ መልክ ነው እየተሰራ ያለው።

ከዚህም በተጨማሪ ቢሮው በአዲስ አበባ ገቢዎች ቢሮ የመርካቶን የንግድ እንቅስቃሴ የሚቆጣጠሩ ባለሙያዎች " ያለ እጅ መንሻ " የማይሰሩ መሆኑን አረጋግጫለሁ ብሎ ሁሉንም የመርካቶ ተቆጣጣሪዎችን በማንሳት በአዲስ መተካቱንም ተናግሯል።

ያለ ደረሰኝ ሲገበያይ የተገኘን ማንኛውም ሰው 100 ሺህ ብር እንደሚቀጣም አሳውቋል።

ቢሮው መርካቶን ጨምሮ በሁሉም የከተማዋ አካባቢዎች ያሉ አምራቾች፣ አስመጪዎችና ቸርቻሪዎች የትኛውንም ግብይት በደረሰኝ እንዲፈፅሙ ይገደዳሉ ማለቱን ሸገር ኤፍ ኤም 102.1 ሬድዮ ገልጿል።

ነጋዴዎች ምን ይላሉ ?

በመርካቶ ያለው ችግር ውስብስብ ያለና ከላይ ጀምሮ መጥራት ያለበት ነው።

በተለይ ደግሞ የገቢዎች ተቆጣጣሪ የሚባሉት ያለ ገንዘብ ያለ ሙስና አይሰሩም።

ሆን ብለውም የማስጨነቅ ስራ በመስራት ከነጋዴው ገንዘብ የመቀበልን ተግባራ ስራቸው ያደረጉ እንዳሉ ይገልጻሉ።

ያለ ደረሰኝ ግብይት ተደረገ ተብሎም የገንዘብ ድርድር የሚያደርጉ ተቆጣጣሪዎችም አሉ።

ደረሰኝን በተመለከተ ቸርቻሪው ላይ ጣትን ከመቀሰር ከላይ ጀምሮ ያለውን ነገር ማጥራት እንደሚገባ ነጋዴዎች ጠቁመዋል።

#AddisAbaba #Merkato

@tikvahethiopia

#Update

ሲጠበቁ የነበሩ ሁለት መመሪያዎች ፍትህ ሚኒስቴር ማጽደቁ ተሰምቷል።

መመሪያዎቹ " የሰነደ ሙዓለ ነዋይን ለህዝብ የማቅረብ ግብይት መመሪያ " እና "ራሳቸውን በራሳቸው የሚያስተዳድሩ ድርጅቶች ቁጥጥር መመሪያ  "  ናቸው።

ሁለቱን መመሪያዎች ሚኒስቴር መስሪያ ቤቱ  በትላንትናው ዕለት መዝግቦ አጽድቋቸዋል።

የሰነደ ሙዓለ ነዋይን ለህዝብ የማቅረብ ግብይት መመሪያን በሚመለከት የኢትዮጵያ የካፒታል ገበያ ባለሥልጣን ዋና ዳይሬክተር ሃና ተልህኩ ዝርዝር ማብራሪያ ሰጥተዋል።

ሰነደ ሙዓለ ነዋይን በሚመለከት ከዚህ ቀደም የተማከለ እና ሂደቱን የሚቆጣጠር ህግ እና ተቆጣጣሪ አካል ያልነበረ በመሆኑ የሰነደ ሙዓለ ነዋዮችን ማውጣት እና ግብይት በርካታ ችግሮች እንደነበሩበት ገልጸዋል።

በዚህ መሃል ለህዝብ የሚቀርቡ መረጃዎች ምንነት ፣ ለሚቀርቡ መረጃዎች ሃላፊነት የሚወስዱ ሰዎች ማንነት፣ ሃላፊነት እና ግዴታቸው ምን ድረስ ነው፣ ሰነደ ሙዓለ ነዋይ ከወጣ በኋላ በዛ መንገድ የሚገኘው ገንዘብ ለምን ዓላማ እንደሚውል፣ አውጪዎች የሚኖርባቸው ተግባር እና ሃላፊነት ምንድነው የሚለውን ማወቅ ላይ ከዚህ ቀደም በነበሩ ህጎች ያለተዳሰሱ ስለነበር ገበያው በርካታ ችግሮች እንደነበሩበት ዳይሬክተሯ ተናግረዋል።

ይህንን ችግር ለመቅረፍም የካፒታል ገበያ አዋጅን መሰረት በማድረግ አዲሱ መመሪያ መዘጋጀቱን ጠቁመዋል።

መመሪያው በአጠቃላይ በኢትዮጵያ ውስጥ የሰነደ ሙዓለ ነዋይ ለሽያጭ የሚቀርብበትን እና የሰነደ ሙዓለ ነዋይ ግብይት የሚገዛበት ዝርዝር የያዘ የህግ ማዕቀፍ ነው።

በአዲሱ መመሪያ መሰረት ከአሁን በኋላ ሁሉም ሰነደ ሙዓለ ነዋዮች በኢትዮጵያ ካፒታል ገበያ ባለሥልጣን ቀርበው መጽደቅ አለባቸው።

በዚህ ሂደት ላይ የሚሳተፉ አካላት የምዝገባ ሰነዳቸውን ለባለሥልጣኑ አቅርበው ማጸደቅ የሚጠበቅባቸው ሲሆን የምዝገባ ሂደቱም ዝርዝር ሂደቶችን የያዘ ነው።

በአዲሱ መመሪያ መሰረት ከሰነደ ሙዓለ ነዋይ ጋር የተያያዙ ማስታወቂያዎች የሚተላለፉት ይዘታቸው እና ለህዝብ ይፋ የሚደረጉበት መንገድ ባለሥልጣኑ ተመልክቶ ሲያጸድቀው ብቻ ይሆናል።

መመሪያው ካካተታቸው እና ከዘረዘራቸው ጉዳዮች መካከል ዋና ዋናዎቹ :-

1. የሰነደ ሙዓለ ነዋይ ምዝገባ

2. ለኢንቨስተሮች መቅረብ ስላለበት የደንበኛ ሳቢ መግለጫ ይዘት እና የአቀራረብ መንገድ ሂደት እንዲሁም ተያይዞ ስለሚመጣ ሃላፊነት።

3. ስለ ሰነደ ሙዓለ ነዋይ ማስታወቂያ ይዘት እና አቀራረብ እንዲሁም ስለሚያስፈልገው ፍቃድ።

4. የሰነድ ሙዓለ ነዋይ ሽያጭ እና ድልድል
አጠቃቀሙ እና ስራ ላይ ስለሚውልበት አካሄድ እና ሁኔታ።

5. አንድ የሰነደ ሙዓለ ነዋይ አውጪ ሰነደ ሙዓለ ነዋይ ለህዝብ ሽጦ እንደ ህዝብ ኩባንያ በሚንቀሳቀስበት ጊዜ በቀጣይነት ስለሚኖርበት ሃላፊነት እና የዚህ የህግ ጥሰቶች በቀጣይነት ስለሚያስከትሉት አስተዳደራዊ እርምጃዎች ይገኙበታል።

በዚህ መሰረት ከዚህ በኋላ የሰነደ ሙዓለ ነዋዮች በኢትዮጵያ ካፒታል ገበያ ባለሥልጣን ካልተመዘገቡ ወይም በአዋጁ እና በመመሪያው ከዚህ ምዝገባ ነጻ ካልተደረጉ በቀር በኢትዮጵያ ውስጥ ለሽያጭ መቅረብ አይችሉም።

በተጨማሪም ማንኛውም ሰነደ ሙዓለ ነዋዮችን ለህዝብ ለማቅረብ የሚፈልግ ኩባንያ ሰነዶችን ለህዝብ ከማቅረቡ በፊት ዝርዝር መረጃዎችን ያካተተ የደንበኛ ሳቢ መግለጫ ለባለሥልጣኑ ማቅረብ እና ማጸደቅ የሚጠበቅበት ሲሆን ይህንን ከማድረጉ በፊት ማስታወቂያ ማሰራትም ሆነ ከኢንቨስተሮች ጋር ግንኙነት ማድረግ አይችልም።

መመሪያው በባለሥልጣኑ ገጽ ላይ ከተጫነበት ጊዜ ጀምሮ ተግባራዊ መሆን ይጀምራል።

በመመሪያው የመሸጋገሪያ ድንጋጌ መሰረትም አሁን ላይ ሰነደ ሙዓለ ነዋዮችን እያቀረቡ ያሉ ኩባንያዎች እና አስቀድመው ተሽጠው በአክስዮን ባለድርሻዎች እጅ ላይ የሚገኙ ሰነደ ሙዓለ ነዋዮችን በሚመለከት በአንድ አመት ጊዜ ውስጥ መመዝገብ እንዳለባቸው አስቀምጧል።

#TikvahEthiopia

@tikvahethiopia