#OFC

“ አሁንም ቢሆን ሀገራዊ ምክክሩ በሚሄድበት አቅጣጫ እርካታ የለንም ” - ኦፌኮ

ከዚህ ቀደም በምክክሩ እንደማይሳተው ገልጾ የነበረው የኦሮሞ ፌደራሊስት ኮንግረንስ (ኦፌኮ) አሁንም እየተሳተፈ እንዳልሆነ፣ ኮሚሽኑ በሚሄድበት አቅጣጫ እርካታ እንደሌለው ለቲክቫህ ኢትዮጵያ ገለጿል።

ፓርቲው ከዚህ ቀደም በሀገራዊ ምክክሩ እንዲሳተፍ ቢጋበዝም በምክክሩ እንዳልተገኘ አስታውሷል።

ቲክቫህ ኢትዮጵያ በበኩሉ፣ የኢትዮጵያ ሀገራዊ ምክክር ኮሚሽኑ ሥራውን መቀጠሉን እየገለጸ ነው፤ አሁንስ ፓርቲው ከኮሚሽኑ ጋር ተቀራርቦ ለመስራት አላሰበም ? ከምክክሩ የወጣበት ምክንያትስ ምንድን ነው ? ምላሽስ አላገኘም ? ሲል ጥያቄ አቅቧል።

ፓርቲው ምን ምላሽ ሰጠ ?

“ በእርግጥ ከዚህ ቀደምም ጥሪ ተደርጎልን ነበር። ችግሩ ከዝግጅት ጀምሮ ያለው እንቅስቀሴ አሳታፊ አልነበረም።

ሲጀመር የሀገራዊ ምክክር ኮሚሽኑ ተጠሪነቱ 'ለጠቅላይ ሚኒስቴር ጽሕፈት ቤት ይሆናል’ ተባለ፣ ከዚያ ተመልሶ ‘ለሕዝብ ተወካዮች ምክር ቤት ይሆናል’ ተባለ። 

ይሄ ልዩነቱም አልታየንም። ምክንያቱም የሕዝብ ተወካዮች ምክር ቤትም በገዢው ፓርቲ የተሞላ ስለሆነ ገልተኛነቱ ያን ያክል አስተማማኝ እንዳልሆነ ነው የምንረዳው። 

ምክንያቱም የሌሎች ተሳትፎ ወይ የለም ወይ በጣም አናሳ ነው፤ ኢንሲግኒፊካንት የሚባል ደረጃ ማለት ነው።

የኛ ሀሳብ ፓለቲካዊ ውይይቶች በፓለቲካ ኃይሎች መካከል መካሄድ ይኖርባቸዋል፣ ሁሉንም ኃይሎች አካታች መሆን አለበት የሚል ነው።

እኛ ሕዝብ ማወያየትን አንጠላም ወይም አናናንቅም ነገር ግን ከሕዝብ ጋር ከመድረሱ በፊት ወይም እየደረሰም እያለ ሌሎች የፓለቲካ ኃይሎች ሊነጋገሩበትና ሊፈቷቸው  የሚገቡ ነገሮች አሉ። 

ለምሳሌ በተለያዩ አካባቢዎች የኛ ፅሕፈት ቤቶች ተዘግተው ባሉበት፣ አባሎቻችንን ሰብስበን ማነጋገር ባልቻልንበት ሁኔታ፣ ለሀገራዊ ምክክሩ አጀንዳ መፍጠር የሚባለው ነገር ውስጥ መሳተፍ አስፈላጊ አይደለም።

እንደገናም ጦርነት እየተካሄደ ሀገራዊ ምክክር ብሎ ነገር ምንድን ነው? ይሄ እርስ በእርሱ የሚጋጭ ነገር ነው።

ይሄን እርስ በእርስ የሚጋጨውን ነገር የሆነ ጋፕ ስጡት፣ ለመነጋገር፣ ለመወያየት እድል ይሰጠው አገር እየተጠበቀ አገር ቢነጋገርበት ጥሩ ይሆናል በሚል ጥያቄ አቅርበን ነበር።

ይሄን የኛን ሀሳብና ጥያቄ ምንም ከዚህ ግባ አላሉትም። ምናልበት የተሻለ ነገር ቢያመጡ እኛም አጨብጭበን እንቀበላቸዋለንና እንዲሄዱ ነው የተውናቸው።

ኦፌኮ ብቻ ሳይሆን ሌሎች ፓርቲዎች አሉ እንደዚህ ያደረጉ። ጊዜና መነጋገር የሚፈልጉ፣ አንድ ወገንን ብቻ ተጠያቂ ከማድረግ እንድንቆጠብ የሚያደርጉ ነገሮች አሉ።

ስለዚህ ነገሮቹ መፍትሄ ካላገኙና የተወሰነ አቅጣጫ ካልተቀመጠላቸው እንዲያው ለመሳተፍ ተብሎ የምንሳተፍበት ምክንያት አይኖርም። 

አሁንም ቢሆን ሀገራዊ ምክክሩ በሚሄድበት አቅጣጫ እርካታ የለንም። እርካታ ቢኖረንና ብንሳተፍበት ጥሩ ነበር ” ብሏል።

ለቀረበበት ትችት ምላሽ እንዲሰጥ ቲክቫህ ኢትዮጵያ ለኢትዮጵያ ሀገራዊ ምክክር ኮሚሽን ጥያቄ ያቀረበ ሲሆን፣ ኮሚሽኑ ለጊዜው በተደጋጋሚ ስብሰባ ላይ መሆኑን በመግለጹ ምላሹን እንደሰጠ የሚቀርብ ይሆናል።

#TikvahEthiopiaFamilyAA

@tikvahethiopia

ፎቶ፦ ዛሬ በአዲስ ከተማ ክፍለ ከተማ ወረዳ አንድ መርካቶ ጃቡላኒ ህንፃ በተለምዶ " ድንች በረንዳ " እየተባለ በሚጠራው ቦታ ላይ የእሳት ቃጠሎ አደጋ ተነስቶ ነበር።

እሳቱ ከቀኑ 6:30 ሰዓት ላይ የተነሳ ሲሆን ሳይዛመትና የከፋ ጉዳት ሳያደርስ መቆጣጠር እንደተቻለ የአዲስ አበባ እሳትና አደጋ ስጋት አመራር ኮሚሽን ገልጿል።

ስለ አደጋው ምክንያት የተባለ ነገር የለም።

ቲክቫህ ኢትዮጵያ እሳቱ በተነሳበት ወቅት የእሳትና ከደጋ ሥራ አመራር ኮሚሽንን ለማነጋገር ሞክሮ ነበር። አንድ የኮሚሽኑ አካል በቦታው ሱቆች እየተቃጠሉ እንደነበር ገልጸዋል።

እኚሁ አካል በሥራ እየተጣደፉ ስለነበር ወደ በኃላ ዝርዝር ሁነቱን እንደሚያሳውቁ ገልጸዋል። በቃላቸው ከተገኙ ቀጣይ ተጨማሪ ማብራሪያ የምናቀርብ ይሆናል።

በቅርቡ መርካቶ " ሸማ ተራ " ከፍተኛ የእሳት አደጋ ደርሶ በርካታ ዜጎች ንብረታቸውን ማጣታቸው የሚዘነጋ አይደለም። የዚሁ የአደጋው ምክንያት እና አጠቃላይ የደረሰው ውድመት " ተመርምሮና ተጣርቶና ለህዝብ ይፋ ይደረጋል " ከተባለ ሳምንታት ቢቆይም እስካሁን በይፋ የተባለ ነገር የለም።

#TikvahEthiopiaFamilyAA

የፎቶ ባለቤት ፦ የአዲስ አበባ እሳት አደጋና ስጋት ስራ አመራር ኮሚሽን

@tikvahethiopia

“ የትምህርት ጥራት ከዓመት ወደ ዓመት እየወረደ መጥቷል ” - ሰሎሞን አብርሃ (ዶ/ር)

የአሜሪካ ኤምባሲ በኢትዮጵያ ሳይንስ አካዳሚ በኩል በኢትዮጵያ ለራስ ገዝ ዩኒቨርሲቲዎች ማጠናከሪያ የሚሆን 522 ሺሕ ዶላር የድጋፍ ስምምነት አድርጓል።

የድጋፍ ስምምነቱ በኢትዮጵያ ዘጠኝ ዩኒቨርሲቲዎች በቀጣይ ራስ ገዝ እንዲሆኑ የሚያርችላቸውን ሁኔታዎች ለማመቻቸት የሚረዳ መሆኑ ተገልጿል።

ስለስምምነቱ ምንነት የጠየቅናቸው የኢትዮጵያ ሳይንስ አካዳሚ ፕሬዜዳንት በላይ ካሳ (ፕ/ር)፣ “ ዛሬ ከአሜሪካ ኤምባሲ ጋር የተፈራረምነው ስምምነት በኢትዮጵያ ዘጠኝ የመንግስት ዩኒቨርሲቲዎችን ወደ ራስ ገዝነት እንዲሸጋገሩ ቅድመ ዝግጅት የማድረጊያ የሚሰጥ ድጋፍ የሚይዝ ነው ” ብለዋል።

የከፍተኛ ትምህርት ተቋምን ወክለው በመርሃ ግብሩ የተገኙት ሶሎሞን አብርሃ (ዶ/ር) በበኩላቸው፣ የድጋፍ ስምምነቱ ከአዲስ አበባ ዩኒቨርሲቲ በመቀጠል ዘጠኝ ዩኒቨርሲቲዎች አቅማቸውን አጠናክረው በአጭር ጊዜ ውስጥ ወደ ራዝ ገዝነት ለማሸጋገር እንደሚረዳ አስረድተዋል።

ዘጠኙ ዩኒቨርሲቲዎች መቼ ራስ ገዝ እንደሚሆኑ ማብራሪያ እንዲሰጡ ሲጠየቁም፣ ዩኒቨርሲቲዎቹ እንደዬ አፈጻጸማቸው ከጊዜ ወደ ጊዜ ራስ ገዝ እንደሚሆኑ፣ የአዲስ አበባ ዩኒቨርሲቲ የሽግግር ጊዜ በዚህ አመት እንደሚጠናቀቅ፣ በ2018 ዓ/ም ከዘጠኙ ዩኒቨርቲዎች ውስጥ የተወሰኑት ወደዚሁ ጉዞ እንደሚገቡ አመላክተዋል።

ጥናት እንደሚያመለክተው፣ “ የትምህርት ጥራት ከዓመት ወደ ዓመት እየወረደ መጥቷል ” ብለው፣ “ የተሰሩት ሥራዎች አመርቂና አበረታች ቢሆንም የዩኒቨርሲቲዎች መስፋፋት እንዳለ ሆኖ ትምህርት ጥራት ላይ ግን ያለው ውጤት በጣም ስብራት ያለበት ነውና መታረም ይገባዋል ” ሲሉ ገልጸዋል።

“ በአጠቃላይ በብዙ ፋክተሮች አስተዋፅኦ ያደረጉበት ጉዳይ ነው የትምህርት ጥራት መጓደል። አንዱና ዋነኛ ተብሎ የተወሰደው ደግም የገነባናቸው ዩኒቨርሲቲዎች ብቃታቸው፣ ውጤታማነታቸው፣ ቀልጣፋነታቸው በጣም ችግር ላይ ነው ” ሲሉ ተናግረዋል።

“ ብቁና ተወዳዳሪ ትምህርት ተቋም አልፈጠርንም። ብቁ ተወዳዳሪ ተቋማትን ለመፍጠር ደግሞ ከሚደረጉ ዘርፈ ብዙ ሥራዎች ውስጥ አንዱና ዋነኛው ተቋማትን ራስ ገዝ ማድረግ ነው ” በማለት አክለዋል።

ዩኒቨርቲዎች ራስ ገዝ ሲሆኑ የትምህርት ጥራት፣ ጥሩ ምርምር እንደሚኖር ያስረዱት ሰለሞን (ዶ/ር)፣ አዲስ አበባ የመጀመሪያው ራስ ገዝ ዩኒቨርሲቲ መሆኑን በማስታወስ ዩኒቨርሲቲዎችን በአንድ ጀንበር ራስ ገዝ ማድረግ ስለማይቻል የሁሉም ርብርብ እንደሚያሻ አስገንዝበዋል።

#TikvahEthiopiaFamilyAA

@tikvahethiopia

#አፈሳ

🔵 “ ወጣቶች እየታፈሱ ነው። የሚታፈሱትም ያለ ፍላጎታቸው ወደ ግዳጅ ሊላኩ ነው ” - የኦሮሚያ ክልል ነዋሪዎች

🔴 “ ያገኘናቸው በጣም በርካታ ግኝቶች አሉ ” - ኢሰመኮ

በኦሮሚያ ክልል የተለያዩ አካባቢዎች ወጣቶች “ በመንግስት ፀጥታ አካላት ” እየታፈሱ መሆኑን፣ በዚህም እንዲህ አይነት ድርጊት በሚፈጸምባቸው ቦታዎች ወጣቶች በነጻነት የመንቀሳቀስ መብታቸው እንደተገደበ ነዋሪዎች በቲክቫህ ኢትዮጵያ በኩል አቤት ብለዋል።

ነዋሪዎቹ እየተፈጸመ ነው በሚል የተማረሩበት የአፈሳ ድርጊት በይበልጥ እየተካሄደ ያለው በባሌ ሮቤ፣ በሻሽመኔ፣ በአርሲ ነገሌ፣ ባቱ፣ ወንጂ፣ ጅማ፣ በአዳማ ከተሞችና በዙሪያ ገባው መሆኑም ተመላክቷል።

ነዋሪዎቹ፣ “ ወጣቶች እየታፈሱ ነው። የሚታፈሱትም ያለ ፍላጎታቸው ወደ ግዳጅ ሊላኩ ነው ” ሲሉ ተናግረዋል።

“ ወጣቶቹ ለመዝናናትም ሆነ ለሥራ ሰብሰብ ብለው መንገድ ላይ ሲገኙ ያለምንም ጥያቄ ታፍሰው በመኪና እየተጫኑ ወደ ሌሎች አካባቢዎች እየተወሰዱ ነው ” በማለት ሁነቱን አስረድተዋል።

“ ከዚች ቀደምም አፈሳ ወጣቶች በሚሰበሰቡበት ቦታ ለምሳሌ ዴኤስቲቪ ፣ ፑል ቤት ነበር አሁኑ ግን መንገድ ላይ የሚገኙት ጭምር በገፍ እየተወሰዱ ነው ” ብለዋል።

አንዳንድ ከ15 እስከ 18 ዓመት እድሜ ያላቸው ታዳጊዎችም የተወሰዱበት ሁኔታ አለ ሲሉ ገልጸዋል።

አንድ ቃላቸውን የሰጡ የክልሉ ነዋሪ “ ከሻሸመኔ አንድ የምናውቀው የቤተሰብ ልጅ ተወስዷል። ከሻሸመኔ ተጭነው ወደ ወላይታ ሶዶ አካባቢ መሄዳቸውን ለቤተሰቦቹ ተናግሯል ” ብለዋል።

አንድ የአዳማ ከተማ ነዋሪ ደግሞ ፥ “ ሰው በተለይ ወጣቱ ፈርቷል። ያለውን ወቅታዊ ነገር በመፍራት ስራውን ትቶ በጊዜ ቤት የሚመለስ አለ። ከወጣው እታፈሳለሁ በሚል ስጋት ከቤት የማወጡም አሉ። የጊዜ ገደብ የተቀመጠ ይመስል ውጭ ያለው ሰው 12:00 ስሆን ወደ ቤቱ ለመግባት ይጣደፋል ” ሲል ገልጿል።

“ ሰዎችን ያለምክንያት ይዘው ያስራሉ ሰው ካለው እና 20,000-30,000 መክፈል ከቻለ ይለቃሉ። ያልቻለ ደግሞ ተወስዶ ይሄዳል ” ሲልም አክሏል።

ሰሞኑን አንድ ጓደኛቸው ተይዞ የባንክ ሰራተኛ ነኝ ብሎ ማስረጃ አሳይቶ መለቀቁን ጠቁሟል።

ድርጊቱ በሚፈጸምባቸው አካባቢዎችም ሰዎች ከቤት ለመውጣት፣ ሥራ ለመስራት ከፍተኛ ስጋት እንዳደረባቸው አስረድተው፣ “ የሰው ልጅ መብት ግን ለይስሙላ ነው እንዴ የተጻፈው ? መቼ ነው ይህ መብታችን እንኳ የሚከበረው ? ከዚህ ቀደምም አፈሳ ነበር። ያሁኑ ግን ብሷል ” ሲሉ ነዋሪዎች ለቲክቫህ ኢትዮጵያ ተናግረዋል።

በርካታ እናቶች ልጆቻቸው ከሚኖሩበት ሰፈር ሳይቀር ተወስደውባቸው በስንት ልመና ከተያዙበት ቦታ ያስወጧቸው አሉ።

በተለይ ወጣቶች ከተያዙ በኃላ የሚወሰዱት ወደ ማቆያ ቦታዎች ነው።

ከነዋሪዎች ዘንድ ለቀረበው ሰፊ ቅሬታ ምላሽ ለማግኘት ቲክቫህ ኢትዮጵያ ወደ ኦሮሚያ ክልል ኮሚዩኒኬሽን ቢሮ ሙከራ ቢያደርግም፣ ስልክ ሆነ የፅሑፍ መልዕክት ለመመለስ ፈቃደኛ አልሆነም።

ከቀናት በፊት የክልሉ መንግሥት “ በክልሉ የጅምላ አፈሳ አለ በሚል የሚሰራጨው መረጃ ሀሰት ነው ” ሲል በፋና ብሮድካስት ኮርፖሬት በኩል ገልጾ ነበር።

እየተፈጸመ ነው የተባለውን የአፈሳ ድርጊት ሰምቶ እንደሆን በሚል የጠየቅነው የኢትዮጵያ ሰብዓዊ መብቶች ኮሚሽን (ኢሰመኮ) ግን አፈሳ እየተፈጸመ ነው የሚለው ቅሬታው ትክክል መሆኑን ነግሮናል።

ወጣቶችን ወደ ‘ግዳጅ ትሄዳላችሁ’ በሚል በኦሮሚያ ክልል የተለያዩ አካባቢዎች እየተፈጸመ ነው የተባለውን አፈሰ ኮሚሽኑ ሰምቶ ነበር ? ስንል የጠየቅነው ኢሰመኮ በምላሹ፣ “ አፈሳውን በተመለከተ የሰራነው ብዙ ሥራ አለ።  ፐብሊክ ስቴትመንት ይሰጣል ” ብሏል።

“ ምንድን ነው የሚለውን በሂደት የምናያቸው ይሆናል። ግን ጉዳዩ ኦረዲ ብዙ ሥራ ተሰርቶበታል። መግለጫው ሲወጣ ይደርሳችኋል ” ነው ያለው።

አፈሳው ትክክል ነው ? እንዲህ አይነት ድርጊት እየተፈጸመ ነው? ለሚለው የቲክቫህ ጥያቄ ኮሚሽኑ፣ “ በጣም ብዙ የኦሮሚያ አካባቢዎች ላይ ገብተን የሰዎች ማቆያዎችን አይተናል ” የሚል ምላሽ ሰጥቷል።

“ ስለዚህ የማኀበራዊ ሚዲያው አሊጌሽን ምንድን ነው? የሚለው እንዳለ ሆኖ በእኛ በኩል ግን ያገኘናቸው በጣም በርካታ ግኝቶች አሉ ” ሲል አረጋግጧል።

“ ከክልሉ ጋር የተየጋገርንባቸው፣ እያደረግን ያለናቸው ጉዳዮችም አሉ ” ሲል ኮሚሽኑ ለቲክቫህ ኢትዮጵያ ገልጿል።

#TikvahEthiopiaFamilyAA

@tikvahethiopia

#Update🚨

“ በሠራተኛዋ እጅ ላይ የተገኘውን ነው እንጂ ያጋራነው ከየት ነው ? የሚል ዝርዝር መረጃ የለውም ፤ እርሱ የሚቀጥል ይሆናል ”  - የአዲስ አበባ ፓሊስ

በለሚ ኩራ ክፍለ ከተማ ፤ ወረዳ 2 አያት ዞን 1 አካባቢ ተቀጥራ ትሰራበት ከነበረው ቤት 18 ሺሕ የአሜሪካን ዶላርና የህንድ ሩፒን ጨምሮ የተለያዩ የወርቅ ጌጣጌጦች በአጠቃላይ ከ2 ሚሊዮን ብር በላይ የሚገመት ንብረት በመስረቅ የተጠረጠችን የቤት ሠራተኛ በቁጥጥር ስር ማዋሉን የአዲስ አበባ ፓሊስ ከሰዓታት በፊት መረጃ አጋርቶ ነበር።

ፓሊስ ማህበረሰቡ የቤት ሠራተኛ ሲቀጥር ጥንቃቄ በተሞላበት ሁኔታ መሆን እንዳበት ያሳሰበ ሲሆን፣ መረጃው ከተጋራ በኋላ " ይህን ያህል ዶላር በአንድ ቤት እንዴት ተነኘ ? ይህስ ሌላ ምርመራ አያስፈልገውም ? የሠራተኛዋን መታወቂያ የሰጣት አካልስ ማነው ? " የሚሉ በርካታ ጥያቄዎች ሲንሸራሸሩ ተስተውለዋል።

ቲክቫህ ኢትዮጵያ በበኩሉ፣ የዶላሩን ምንጭና ማንነትን በደንብ አያሳይም የተባለውን የቤት ሠራተኛዋን መታወቂያ በተመለከተ ማብራሪያ እንዲሰጡ የአዲስ አበባ ከተማ ፓሊስ ኮሚሽን የህዝብ ግንኙነት ዳይሬክተር ኮማንደር ማርቆስ ታደሰን ጠይቋል።

ኮማንደር ማርቆስ ታደሰ ምን ምላሽ ሰጡ ?

“ ጥሩ ነው እንደዚህ አይነት መነጋገሪያ መሆኑ ሰው በደንብ እንዲያነበውና ጥንቃቄ እንዲያደርግም ይጋብዛል። ዞሮ ዞሮ አሁን ጥሬ ምርመራ ላይ ያለን ጉዳይ መረጃ ነው ለህብረተሰቡ ያጋራነው።

በጣም በርካታው የከተማው ነዋሪ ሠራተኛ ስለሆነ ሥራውን የሚያቀለው አብዛኛው በሠራተኛ ነው፤ ብዙው ሰው ተሯሯጭ ስለሆነ። ስለዚህ ዞር ብሎ ሠራተኞቻቸውን የሚያዩ፣ ያስያዙትን መታወቂያ ቼክ የሚያደርጉ፣ ፎርጅድ ከሆነም ለምን? ብለው የሚያስይዙ አናሳ ናቸው።

ዞሮ ዞሮ ሠራተኛዋ ላይ ይሄን ያህል ብር እጇ ላይ መገኘቱን ነው ለመግለጽ የሞከርነው። ከሁለት ሚሊዮን ብር በላይ የተባለው ገንዘቡም ንብረቱም ተሰልቶ ነው።

ሠራተኛዋ በተለያዩ ቤቶች ላይ እየዞረች ስትሰራ ነበርና ስለዚህ ተጠርጣሪዋ ከተለያዩ ቦታዎች ሊሆን ይችላል ገንዘብ ያሰባሰበችው፤ ስለዚህ ፈርዘር ነገሮች ገና በምርመራ የሚገኝ ውጤት ነው የሚሆነው።

በአንድ ሰው እጅ ላይ ምን ያህል የአሜሪካን ገንዘብ መኖር አለበት የሚለው በሕግ የተቀመጠ ነገር ነው። ሠራተኛዋ ምናልባት ከእገሌ ቤት ነው ያገኘሁት የምትል ከሆነ ሌላ ፈርዘር ምርመራ ይኖራል።

ዛሬ ያጋራነው ጥሬውን ሀቅ፤ ንብረትና ገንዘብ ተቆጥሮ በእጇ ላይ የተገኘውን ነው። በእጇ ላይ የተገኘውን ነው እንጂ ያጋራነው ከየት ነው? የሚል ዝርዝር መረጃ የለውም፤ እርሱ የሚቀጥል ይሆናል ማለት ነው ” ብለዋል።

የተጠርጣሪዋን መታወቂያ በተመለከተ ጉዳዩ በሂደት እንደሚጠራ ገልጸው፣ “ ይሄ የቀጣሪዎቹም ክፍተት ነው። ሠራተኛዋ ተያዥ ስታመጣ የራሷን ፎቶ እንዳይታይ፣ ድብዝዝ አድርጋ፣ የሌላ ሰው አስመስላ ነው ያመጣችው ” ብለዋል።

“ የመጨረሻ ኮንሰርናችን በለሚ ኩራ የተፈጸመውን ነገር ህብረተሰቡ አንብቦ ዘወር ብሎ ሠራተኛውን እንዲያይ ነው ” ያሉት ኮማንደሩ፣ “ ይሄኔኮ እየተበዘበዘ ያለ አለ ” ብለዋል።

እንዲህ አይነት ድርጊት የሚፈጽመው “ የቤት ሠራተኛ ብቻ አይደሉም፤ የጥበቃ ሠራተኛ፣ በሌላም ሥራ ላይ ያለም ሊሆን ይችላል ” ብለው፣ የተጠርጣሪ ሠራተኛዋን ተጨማሪ ጉዳይ በቀጣይ ግልጽ እንደሚያደርጉ ጠቁመዋል።

በሌላ በኩል ፤ ኮማንደር በአጠቃላይ ስርቆት የሚፈጸምበት መንገድ ሿሿን ጨምሮ በተለያዬ መልኩ እንደሆነ አስረድተው፣ አንድ ቦታ ላይ የሚያዙት የሿሿ ወንጀል ፈጻሚዎች በድጋሚ በተለያዬ ቦታዎች ላይ እንቅስቃሴ እያደረጉ ስለሆነ የተጠርጣሪዎችን ፎቶ እያጋሩ መሆኑን ተናግረዋል።

ሳይታመሙ የታመሙ መስለው በመለመን ሰዎችን በየዋህነታቸው ፣ በሰጪነታቸው የሚሸውዱ ወንጀለኞች እንዳሉም ሰው መስጠትም ካለበት ሳይጭበረበር ሁነቱን በማጤን ደስ ብሎት መስጠት እንዳለበት ለቲክቫህ ኢትዮጵያ በሰጡት ቃል አስገንዝበዋል።

#TikvahEthiopiaFamilyAA

@tikvahethiopia

#የሹፌሮችድምጽ

" የታገቱትን ሊፈልግ የሚወጣ የጸጥታ ሃይል የለም ሄዱበት በተባለው መንገድ የሚገባ የለም " - ጣና የከባድ መኪና ሹፌሮች ማህበር

በኢትዮጵያ በርካታ አካባቢዎች የከተማ አቋራጭ እና ሃገር አቋራጭ አሽከርካሪዎች ለእገታ እና ግድያ እየተጋለጡ መሆናቸውን በተደጋጋሚ ሲነገር ይደመጣል።

የጣና የከባድ መኪና ሹፌሮች ማህበር በአራት አመት ጊዜ ውስጥ ከ200 የሚበልጡ አሽከርካሪዎች ቢገደሉም ችግሩን ለመቅረፍ ግን ምንም እንቅስቃሴ እየተደረገ አለመሆኑን ለቲክቫህ ኢትዮጵያ  ገልጿል።

" ሰው ታፈነ ሲባል ሰውን ያህል ነገር ታፍኖ የአካባቢው የጸጥታ ሃይል የት፣እንዴት ታፈነ የሚለውን ጠይቆ እና አነፍንፎ የሚንቀሳቀስ መንግስት አጥተናል" ሲሉ ስሜ አይጠቀስ ያሉ የማህበሩ አመራር ለቲክቫህ ኢትዮጵያ ተናግረዋል።

አክለውም " መታገትህን ትናገራለህ ምንም እንዳልተፈጠረ ዝም ይባላል የታገቱትን ሊፈልግ የሚወጣ ሃይል የለም ሄዱበት በተባለው መንገድ የሚገባ የለም " ነው ያሉት።

አጋቾች የሚደራደሩት በስልክ ነው ገንዘብም የሚገባው በባንክ ነው ያሉ ሲሆን እገታን እዚህ ደረጃ ያደረሰው መንግስት ለሚታገቱ እና ለሚገደሉ ሰዎች የሰጠው ትኩረት በማነሱ ምክንያት ነው ብለዋል።

እንደ ማህበሩ አመራር ገለጻ ህዳር አንድ ላይ አራት አሽከርካሪዎች መተሃራ እና አዋሽ ሰባት መሃል ታፍነው በታጣቂዎች ተወስደዋል።

በተደጋጋሚ የሹፌሮች መታገት እና መገደል የነበረባቸው አንደ ታች አርማጭሆ ያሉ አካባቢዎች ሚሊሻዎችን በየመንገዱ የማሰማራት እና መንገዱን የመጠበቅ እንቅስቃሴዎች መኖራቸውን የጠቀሱ ሲሆን በተጠቀሰው አካባቢ መሻሻል አለ ብለዋል።

" ከአይከል -ጭልጋ- ገንዳውሃ " ያለው መንገድ ግን አሁንም ለሹፌሮች እጅግ አስቸጋሪ ሆኖ መቀጠሉን ገልጸው ከመንግሥት ውጪ የሆነ እና በየመንገዱ የሚሰበሰብ እስከ 20 ሺ ብር የሚደርስ ህገወጥ ቀረጥ ሹፌሮችን እያማረረ ነው ብለውናል።

#TikvahEthiopiaFamilyAA

@tikvahethiopia

🔴 "... አጭበርባሪዎቹ ከቦታው ዘወር ሲሉ በአካውንቱ ላይ ምንም ገንዘብ አይገኝምና እንደ አገር ታንቀው የሞቱ ወገኖች ጭምር እንዳሉ እናውቃለን " - የተወካዮች ምክር ቤት አባል

🔵 " ከማጭበርበር ጋር በተያያዘ ከፍተኛ ሥራ እየደሰራን ነው "  - ሳፋሪኮም ኢትዮጵያ

የተወካዮች ምክር ቤት የዴሞክራሲ ጉዳዮች ቋሚ ኮሚቴ በታሪክ ለመጀመሪያ በመስሪያ ቤቱ በአካል በመገኘት የሳፋሪኮም  ኢትዮጵያን የሥራ አፈጻጸምን ገምግሟል።

ኮሚቴው እስከዛሬ ድረስ ድርጅቶችን ሲገመግም የነበረው በሚላክለት ሪፖርት ብቻ የነበረ ከመሆኑ አንጻር የአሁኑ ግምገማ በአካል በመገኘት መሆኑ ግምገማውን ለየት ያለ አድርጎታል።

ድርጅቱ በግምገማው ወቅት፣ የሳፋሪኮም ደንበኞች ወደ ኢትዮ ቴሌኮም ተጠቃሚዎች በሚደውሉበት ወቅት ተጨማሪ ክፍያ እየከፈሉ መሆኑን ጠቅሶ፣ ይኼው ክፍያ እንዲቀርላቸው፣ የታወር ማስፋፊያ ፈቃድ በቅድመ ሁኔታ እንዲሰጥ ኮሚቴው ለመንግስት እንዲያሳስብለት ጠይቋል፡፡

ኮሚቴው በበኩላቸው፣ በቀረበው ጥያቄ ላይ ተወያይቶ ለተጠየቀው የድጋፍም ሆነ የፈቃድ ጥያቄ ምላሽ እንደሚሰጡ ቃል ገብቷል።

ሳፋሪኮም ኢትዮጵያ፣ በሦስት አመታት ውስጥ ከ6 ሚሊዮን በላይ ደንበኞችን እንዳፈራ፣ ከ12 ባንኮች ጋር እየሰራ መሆኑን፣ በዘጠኝ የክልል ከተሞች የኔቶርክ አገልግሎት ተደራሽ ማድረጉን የሳፋሪኮም ኢትዮጵያ ዋና ሥራ አስፈጻሚ ዊም ቫንሄልፑት ገልጸዋል፡፡

በግምገማው የተገኙት የምክር ቤት አባላት ስለሳፋሪኮም የሥራ ሁኔታ የቀረበላቸውን ገለጻ ካዳመጡ በኋላ በአጭር አመት ውስጥ ድርጅቱ ያሳየው ውጤት ከፍተኛ መሆኑን በአንክሮ ገልጸው፣ በአንጻሩ ደግሞ የተለያዩ ጥያቄዎችን አንሸራሽረዋል፡፡

የምክር ቤት አባላት ያነሷቸው ጥያቄዎች ምንድን ናቸው ?

➡️ ወ/ሮ ሙሉነሽ የተባሉ የም/ቤት አባል፣ “ ድጅታል ካሽ ፓይመንት ከፋይናንሻል ሰርቪስ አንፃር ለከስተመሩ ምን ያህል ሴኩይር ነው ?

ለምሳሌ በአሁኑ ወቅት ከፍተኛ ማጭበርበሮች ይከናወናሉ፤ አንዳንድ የንግድ / የሽያጨ ተቋማት ኦንላይን ላይ ሽያጭ ተሽጧል ይባልና ገንዘቡ በአካውንት እንደተላከ የሚያሳይ ጊዜያዊ መልዕክት ይገባል ፤ ከዚያ በኋላ አጭበርባሪዎቹ ከቦታው ዘወር ሲሉ በአካውንቱ ላይ ምን ገንዘብ የማይገኝበት ሁኔታ በመኖሩ እንደ አገር ታንቀው የሞቱ ወገኖች ጭምር እንዳሉ እናውቃለን፡፡

በአዲስ አበባ ከተማ የተጭበረበሩ እንዳሉም እናያለንና ይህን ጉዳይ ምን ያህል አስተማማኝ ነው ?

ድርጅቱ የሚሰራው ከ12 ባንኮች ብቻ ጋር እንደሆነ ተነግሯል፡፡ ለምን ከቀሪ ባንኮች ጋር አብሮ አልሰራም ? ከሌሎች ባንኮችም ጋር በመስራት ሰርቪሱ ሰፋ እንዳይል ያደረገው ቻሌንጅ ምንድን ነው ? ” ሲሉ ጠይቀዋል፡፡

➡️ አቶ ከድር የተባሉ የምክት ቤት አባል ደግሞ ፥ " ከኢትዮ ቴሌኮም ጋር የምትሰሯቸው ሥራዎች ውጤታማ ናቸው ውይ ? ድርጅቱ ከመንግስት ጋር በገባው ውል አንጻር ተጽዕኖ አለበት ወይ ? ድርጅቱስ በውሉ መሠረት እየሰራ ነው " ሲሉ ጠይቀዋል፡፡

➡️ ሌላኛው የምክር ቤት አባል ፥ " የድርጅቱ ዓላማ ኢትዮ ቴሌኮም ተደራሽ ባላደረጋቸው አካባቢዎች አገልግሎቱን ተደራሻ ማድረግ ከመሆኑ አንጻር፣ የመሠረተ ልማት ተደራሽነት በሌለባቸው አካባቢዎች በቂና የተለዬ ቴክኖሎጅ ከመጠቀም አንጻር ምን አድርገችኋል?

የኔቶርክ ጥራቱ ከኢትዮ ቴሌኮም የተሻለ ተብሎ ነው የቀረበቀው ነገር ግን አዲስ አበባ ራሱ የኔቶርክ ጥራት አለ ወይ ? " ሲሉ ጠይቀዋል፡፡

የሳፋሪኮም በበኩሉ፣ " ከማጭበርበር ጋር በተያያዘ ከፍተኛ ሥራ እየደሰራን ነው " ሲል የኮሚቴ አባል ላነሱት ጥያቄ ምላሽ ሰጥቷል፡፡

'ተጭበረበርን' የሚሉ ሰዎች ሪፖርት እንዳደረጉ ገንዘቡ ሆልድ እንዲሆን እንደሚያደርግ፣ ከዚያ ጉዳዩ በሕግ ታይቶ እርምጃ እንዲወሰድ እንደሚያደርግ ድርጅቱ አስረድቷል፡፡

ከ12 ባንኮች ባለፈ ከሌሎች ባንኮች ጋር ለምን እንዳልተሰራ ለቀረበው ጥያቄ ፥ የባንኮቹ ዝግጅትና የድርጅቱ ዝግጅት የተጣጣመ አለመሆኑን በምክንያት ጠቅሶ፣ ይህ ሲስተካከል ከሁሉም ባንኮች ጋር አብሮ መስራቱ የማይቀር እንደሆነ ጠቁሟል፡፡

ቴሌ ተደራሽ ባላደረጋቸው፣ የመሰረተ ልማት ችግር ባለባቸው አካባቢዎች አገልግሎቱን ተደራሽ ከማድረግ አንጻር ምን እየሰራ እንደሆነ መጠይቅ የቀረበለት ድርጅቱ፣ የተቻለውን ያክል እየሰራ እንደሆነ፣ የጸጥታ ችግር ግን ፈተና እንደሆነበት ተናግሯል።

ከኢትዮ ቴሌኮም ጋር ያለው ሥራና ውድድር ከባድ ቻሌንጅ እንዳለው የገለጸው ድርጅቱ ከውል ጋር በተያያዘ ለቀረበለት ጥያቄ በእርግጥ በውሉ መሠረት እየሰራ እንደሆነ ገልጿል።

የኔቶርክ ጥራት በተመለከተ ለቀረበለት ጥያቄም፣ የኔቶርክ ጥራቱ የተሻለ እንደሆነ በመጥቀስ ምላሽ ሰጥቷል፡፡

#TikvahEthiopiaFamilyAA

@tikvahethiopia