​"Совет меҳнаткашларининг мурожаатлари асосида"

Шаҳар ҳокимиятининг "Реновацияга тушган ҳудудлар аҳоли мурожаатлари асосида таклиф этилган" қабилидаги оқлови ғирт совет, яъники совок штампларини эслатади.

Катта зиёли авлод "по просьбам советских трудящихся" шиори остида халқнинг номидан халқнинг бошига қандай балолар ёғдирилганини эсдан чиқармаган.

Бундай ёндашув зарарли экани, аянчли оқибатларни келтириб чиқаришини, кейин бу оқибатларни бартараф этиш учун янги, каттароқ хатоларга боришга мажбур бўлинишини яна бир марта синаб кўришимиз керакми?

Шунинг учун ҳам Қонун керак. Шунинг учун ҳокимият ва қурувчилар манфаати учун тўртта "маҳалла фаоли"нинг ташкиллаштирилган шикояти асосида қарор қабул қилмаслик зарур. Шунинг учун ҳам ҳам ҳар бир ҳудуд ва ҳар бир кўп қаватли уй бўйича мутлақ кўпчиликнинг розилигини олиш муҳим.

Dialog'нинг навбатдаги меҳмони Абдулла Абдукадиров

Эртага, соат 10:00дан бошлаб томоша қилишингиз мумкин.

Youtube каналига қўшилинг. Канал аъзоси бўлинг, шарҳланг, муҳокама қилинг.

Ўзбекистонга саноат сиёсати керакми?

Dialog'нинг навбатдаги сони меҳмони Стратегик ислоҳотлар агентлиги директорининг биринчи ўринбосари Абдулла Абдукадиров.

Абдулла ака билан иқтисодий қарорлар қабул қилишдаги ўзгаришлар, стратегиянинг узунлиги, саноат сиёсати, агар керак бўлса, у қандай бўлиши, пулнинг нархи, протекционизм ва яқин келажакда биз учун кераклиги юқори ислоҳотлар ҳақида гаплашдик.

Ўтказиб юборманг!

https://youtu.be/qIdpMAvTrIc?si=yLKw1Xo1DdAXT0p9

Ташаббусли бюджет равнақи учун 10 дақиқа

University of Birmingham магистранти Дилдора Жўраева магистрлик диссертацияси бўйича ўрганишлари доирасида "Ўзбекистонда Ташаббусли бюджет самарадорлигини баҳолаш бўйича" сўровнома ўтказмоқда.

10 дақиқа вақт топиб, Сўровнома саволларига жавоб берсангиз, бу нафақат илмий изланишлар учун, яқин келажакда Ташаббусли бюджет жараёнини такомиллаштириш учун ҳам катта ёрдам бўларди.

"100 млрд.доллардан ошган" ЯИМ ҳақида

Статагентлик 2023 йил учун Ўзбекистон Республикаси ЯИМ ҳажми АҚШ доллари эквивалентида 10,7 миллиард долларга қўшимча ҳисоб-китоб қилингани ва амалдаги 90,9 миллиард доллардан 101,6 миллиард долларга етганини эълон қилди.

Албатта, яширин иқтисодиёт ҳажмини баҳолаш биринчи марта юз берганини ва амалга оширилганини олқишланиши керак. Чунки шу пайтгача яширин иқтисодиёт ҳақида гап кетганда турли космик рақамлар (ЯИМга нисбатан 30, 40 ва ҳатто 50 фоизгача) келтирилар ва бунинг негизида бирон-бир жиддий ҳисоблар ётмасди. Демак, 2023 йил якунларига кўра, яширин иқтисодиёт улуши расмий иқтисодиётга нисбатан 9,3% (99,6 трлн.сўм), норасмий иқтисодиётнинг улуши эса 2,4%ни (26,0 трлн.сўм) ташкил этган.

Шу билан бир вақтда "ЯИМ 100 млрд.доллардан ошди" қабилидаги баёнотлардан жуда эҳтиёт бўлишга тўғри келади.

Биринчидан, умумқабул қилинган принципларга кўра, ЯИМни ҳисоблашда яширин иқтисодиёт ҳисобга олинмайди. Яширин иқтисодиёт баҳоланади (Президент фармонидаям айнан баҳолаш вазифаси қўйилган, яширин иқтисодиёт ҳажмини расмий ЯИМга қўшиб ҳисоблаш эмас). Агарки, қайсидир биз каби камбағал давлатда бундай тажриба бошланган бўлса, бу хос тажриба холос, умумқабул қилинган амалиёт эмас.

Иккинчидан, ўзи яширин ёки норасмий бўлган иқтисодиётнинг ўсиш суръати қандай ўлчанади ва ЯИМга қўшилади, ахир расмий иқтисодиётдан фарқли ўлароқ норасмий ва яширин иқтисодиёт ва ундаги қўшилган қиймат ўта динамик ҳаракатда бўлади. Макроиқтисодий прогнозлар қандай шаклланади? Яширин иқтисодиётнинг ўсиши ҳам прогнозга қўшиладими? Шу маънода агар расмий ЯИМга қўшилса, балки яширин ва норасмий иқтисодиётнинг фақат оқартирилган қисми қўшилиши керакдир?

Учинчидан, статистика тўғри тўғри иқтисодий қарорларга эмас, авторитар режимнинг пиар мақсадларига хизмат қиладиган мамлакатларда турли тажрибалардан жуда эҳтиёткор бўлишга тўғри келади. Балки кимдир эслар, 2010 йилда Ислом Каримов Мустақиллик байрами билан боғлиқ табрикда Ўзбекистонда ўртача ойлик иш ҳақи 500 долларга етганини эълон қилган (статистика ва методология шунга қараб мосланган). Хавотирлар шуки, жон бошига 4 минг долларлик ЯИМга етиш бўйича том маънода эзгу, лекин эришиш оғир мақсадга шундай йўллар билан етмаймизми? Ўзбекистон 2030 йилда 160 млрд.долларлик ЯИМга эга иқтисодиётга айланадими ё 140 млрд.долларлик иқтисодиёт ва унинг ёнида 20 млрд.долларлик норасмий ва яширин иқтисодиёт мавжуд, деган баёнотларга рўпара қилинамизми?

Қимматлашаётган ва тўпланаётган олтин захираларимизни янги максимумга кўтарган

Июль ойи давомида халқаро захираларимиз қолдиғи 1 061,8 млн.долларга кўпайган ва 37 402,2 млн.долларга етган. Бу қийматда очиқ маълумотлар мавжуд даврлардаги янги максимум, лекин нисобда ўртача 12 ойлик импортни қоплаш даражаси холос (қачонлардир захираларимиз 20 ойлик импортни қоплаш даражасида эди).

Ой давомида захираларнинг валюта қисми 781,6 млн.долларга қисқарган ва 7 688,2 млн.долларни ташкил этган.

Июлда ҳам олтин сотилмаган (иккинчи ой кетма-кет), ишлаб чиқарилган ва захираларни тўлдирган олтин ҳисобига захираларнинг олтин қисмининг физик ҳажми 310 минг унцияга кўпайиб, 12,05 млн.унцияга етган. Пулдаги қиймати эса 1 837,7 млн.долларга ошган ва 29 156,7 млн.доллардан иборат бўлган. Июль ойи давомида котировкалари 2 480 долларгача кўтарилган бўлсада, олтиннинг сотилмаганини импортнинг мақбуллашаётгани, давлат банклари томонидан чиқарилган еврооблигациялар яратаётган оқим, пул ўтказмаларининг ўсиш суръатлари тиклангани кабилар билан изоҳлаш мумкин.

Захираларимизнинг бизга боғлиқ бўлмаган омиллар ва исталган пайт ўзгариши мумкин бўлган қулай конъюнктура ҳисобига ортиши янги авантюраларни ва зараркунанда лойиҳаларни кун тартибига чиқармаслиги керак.

​"Цитрус импорти" ҳақида

Dialog'нинг охирги сонида янграган, цитрус мевалар импорти бўйича рақамларга нисбатан Статагентлик ўзининг эътирозларини билдирган.

Қўшимча равишда, агентлик томонидан 2022, 2023 ва 2024 йилнинг биринчи ярмида импорт қилинган тропик мевалар ҳажми ва қиймати тўғрисида қуйидаги маълумотлар тақдим этилган.

Шу ўринда Статегентликдан импорт ва экспорт таркиби бўйича барча товар ва хизматларнинг номенклатуралари, мамлакатлар, қиймат ва ўлчов бирликларида чуқур маълумотларни ҳар ойда очиқлаб боришни яна бир бор сўраб қоламиз. Фақат шундагина ахборотсизлик оқибатида пайдо бўлаётган турли инсинуациялар, мифлар ва хато қарорларнинг олди олинган бўлади. Чуқур ва кенг статистика қарор қабул қилувчиларга ҳам, бизнесга ҳам ва умуман, барча ўзбекистонликларга ҳам доим керак.

Статистика бўйича "арзонлаган пропан" ва методология ҳақида

Статагентликнинг эътирозларида инфляцияни ҳисоблаш методологияси бўйича тушунтиришлар берилган. Методология мавжудлигини ҳеч ҳам рад этмасдан, тўлиқ тан олган ҳолда, менда доим унинг қандай ишлатилаётгани савол остида бўлган.

Масалан, июнь ойида пропан нархлари биржада 15%дан зиёд қимматлаган, чакана нархлар ёқилғи қуйиш тармоқларида 12-15%га ошган. Лекин Статагентлик июнь ойида пропаннинг 1,9%га арзонлаганини эълон қилган.

Июль ойида пропан нархлари биржада 25%дан зиёдга қимматлаган, чакана шохобчалардаги нарх эса 30%гача ошган. Айни шу ойдаги инфляция ҳисоботида Статагентлик пропан нархлари 3,8%га қимматлаганини кўрсатган.

Хўп, мутахассисларни қўя турайлик, истеъмолчи сифатида биржа ва шохобчалардаги нархларга ишонайликми ё Статагентликнинг чиройли рақамларига. Табиийки, ҳар бир ўзбекистонликда нега бундай, вазни қанақа олинди, методологияси ўзгардими деган савол эмас, яққол ишончсизлик пайдо бўлади. Гап фақат пропанда эмас, масалан, охирги ойда гўштнинг сезиларли қимматлашуви билан ҳам шундай вазият юзага келган (Иқтисодиёт ва молия вазирлиги ҳам гўшт нархлари тўғрисидаги маълумотларни ўзгартирмасдан, "маҳкам ушлаб келмоқда").

Статистика, худди эски даврдагидек, "халқни эмас, тепани алдаш учун аслида" деган қарашлар илдиз отмаслиги учун, яна қайтараман, чуқур ва кенг маълумотлар берилиши лозим. Керак бўлса, нархлари фавқулодда ҳиссиётли товарлар ва хизматлар бўйича алоҳида кузатувлар (танлама манзиллари билан) ва ҳисоб китоблар натижалари ҳар ҳафта очиқланиб борилиши зарур.

Эртага BYD Е2 расмий сотувлари бошланиши айтилмоқда

BYD Uzbekistan E2 электромобили расмий сотувларини эртага, 9 августдан бошлаши ҳақида хабарлар тарқатилмоқда.

BYD'нинг расмий дилерлигини тамсил этувчи тармоқларда "Shahar yangi elektr harakatlanish tanlovi" деган чулчитча таржимадаги ишора (танлови йўқ ўзбекистонликларга бўлаверади қабилида) билан иккита видеоролик жойлаштирилган (1, 2). Экстерьер ва салон элементларидан бу Е2 моделини илғаш қийин эмас.

Билгичлар Е2 учун Ониксдан қимматроқ нарх қўйилади, деган фикрдалар (бир аждарҳонинг икки боши келишиб олмаслиги эҳтимоли нолга қадар паст). “Tok bor” МЧЖни монополистлар қаторига қўшган Рақобат қўмитаси BYD Uzbekistan Factory ва у билан аффилланган тузилмаларни монополистлар рўйхатига ҳалигача киритгани йўқ.

Хитойда Кобаль нархидан арзон турадиган Е2 хусусий тадбиркорлар томонидан келтирилиб, модификациясига қараб 15-16 минг доллардан сотилмоқда. Лекин электромобиль бозорини бир қўлли ва бир чўнтакли қилиш мақсадларида норасмий ва расмий чекловлар киритилаётгани туфайли, импортнинг бу канали тез орада тақа тақ ёпилиши кутилмоқда.

Тошкентда уй-жой нархлари иккинчи ой кетма-кет арзонламоқда

Июль ойи давомида пойтахтда иккиламчи уй-жой нархларининг яна 1,4%лик арзонлашуви қайд этилган, бу июндаги 1,1%лик пасайиш тасодиф бўлмаганини кўрсатади.

Ўртача олганда июль якунлари билан 1 кв.метр уй-жой нархи 1 142 доллардан 1 126 долларгача тушган (доллар курси июлда пасайгани ҳисобга олинса, нархлар сўм ҳисобида янада тезроқ тушган).

Иқтисодий тадқиқотлар ва ислоҳотлар марказига кўра, Учтепа туманида - 3,6%, Миробод туманида - 2,6%, Яшнабод туманида - 2% ва Олмазар туманида - 2% нархларнинг нисбатан катта пасайиши кузатилган.

Йиллик ҳисобда нархларнинг атига 6%лик ўсиши юз бергани ҳисобга олинса, 2023 йилнинг шу даврида сотиб олинган кўчмас мулкларнинг инвестициявий даромадлилиги валютадаги банк омонатларига ютқаза бошлаганидан дарак беради.

Бозорнинг совуши давом этаётганлигини Республика бўйича олди-сотди битимлари сони ўтган йилнинг тегишли ойлари билан солиштирганда олтинчи ой кетма кет қисқараётганидан кўриш мумкин.

242 млн.сўм (19 300 доллар). Бу танловсизлик товони

BYD Uzbekistan расмий сотувларга чиқарган E2 электромобилининг нархи нақ 242 млн.сўм ёки 19 300 доллардан бошланиши маълум бўлди.

Кутилганидек, Хитойда 12 200 доллар турадиган, хусусий тадбиркорларда (Luxury комплектацияси) 15 600 доллардан сотилаётган E2 (Comfort) учун танаси ва чўнтаги бир аждарҳони турли бошлари таклиф этаётган Ониксдан, Треккердан ҳам, Сонетдан ҳам қимматроқ нарх белгиланган.

Қизиғи, танаси бир, чўнтаги бир Аждарҳонинг иккинчи ва учинчи бошлари шу кунгача монополист деб тан олинмаган. Ваҳоланки, улар ўзбек истеъмолчисини қоқиштириш учун биргаликда, тил бириктириб, келишиб ҳаракат қилаётганини фақат кўрлар кўрмаслиги мумкин. Рақобат қўмитасига Tok bor'ни монополистлар қаторига қўшиш осонроқ ва хавфсизроқ.

Хуллас, ёмон кутилмалар энг ёмон вариантда амалга ошди. Ҳали бу бошланиши холос. Ҳозирча электромобиль олиб-сотар чайқовчилар эртага ишлаб чиқариш тамғаси остида "йиғишни" бошласа, чиновниклар орзу қилганидек, электромобиллар учун нотариф чекловларга қўшимча яна божлар ҳам киритилса, Е2 нархи 2,5 йил аввал хавотир олиб ёзганимиздек, 25 минг долларга ҳам боради.

​Июлда инфляцион кутилмалар тарихий минимумгача туширилган

Июль ойида аҳолининг инфляцион кутилмалари 12,0%гача (-0,8%), тадбиркорларнинг кутилмалари эса 11,2%гача (-0,7%) пасайган. Бу курсаткичлар кутилмалар бўйича сўровлар ўтказилаётган янги давр учун тарихий минимум ҳисобланади. Кутилмалар ўтган июнь ойида ҳам кескин пасайганди (маълумотлар чеканкаланган ҳолда).

Сўровларда валюта курсининг ўзгариши хавотири тўртинчи ой кетма-кет пасайиб бораётган эътиборни тортади. Коммунал хизматларнинг қимматлашиши ва ёқилғи, энергия қимматлашиши хавотирларини билдираётганлар улуши камайгани таажжубли кўринади.

Энг юқори инфляцион кутилмалар Тошкентда. Пойтахтлик аҳоли 13,7%лик, бизнес эса 12,6%лик инфляция кутмоқда.

Даромадлар қирқимида юқори даромад эгаларининг инфляцион кутилмалари тезроқ яхшиланаётгани кузатилмоқда.

8%дан кам инфляция кутаётган тошкентликлар улуши ҳудудлар орасида энг паст, 32%га тушгани, 21%дан юқори инфляция кутаётганлар сурхондарёликлар улуши 22%га етгани сўровларда қанақадир нотабиий ёки сунъий шовқинлар борлигидан далолат беради (икки ойлик наридаги маълумотлар билан солиштирганда айниқса).

Ўзбекистон Президенти Марказий Осиёда биринчи таълим форумини ўтказишни таклиф қилди

Бу ҳақида бугун Давлат раҳбари Козоғистонда бўлиб ўтаётган Марказий Осиё давлат раҳбарларининг Маслаҳатлашув учрашувида маълум қилди.

Шунингдек, Президент минтақа давлатларининг иқтидорли талабалари учун ўзаро келишув асосида стипендиялар ажратишни таклиф қилди.

Минтақада интеграция жараёнлари бошланиб, халқларимиз бир-бирига яқинлашябди. Бу ўринда эса минтақа давлатлари бир бўлиб, таълимга инвестиция киритиши фақат фойда келтиради. Чунки бу барибир кун келиб ўз мевасини беради ва минтақани иқтисодий жиҳатдан ҳам кучайтиради.

📶 TBC Uzbekistan шу кунгача бўлган фолияти ҳақидаги маълумотларни очиқлади.

TBC Uzbekistan — Марказий Осиёдаги рақамли банкинг экотизими бўлиб, унинг таркибига TBC Uzbekistan мобил банки ва payme рақамли тўлов иловаси, шунингдек payme nasiya бўлиб тўлаш хизмати киради.

⬆️ Натижалардан банкнинг фаол ўсиб бораётганини кўриш мумкин. Масалан, TBC Bank’нинг кредит портфели ўтган йилнинг шу даврига нисбатан 117%га ўсиб, 5 триллион сўмга етган ва 2024 йилнинг биринчи ярмидаги соф фойда 110 млрд. сўмни ташкил этди

2024 йилнинг иккинчи чораги ва биринчи ярим йиллиги учун МҲХС (Молиявий ҳисоботнинг халқаро стандартлари) бўйича молиявий натижаларга кўра эса TBC’нинг Ўзбекистондаги асосий кўрсаткичлари қуйидагича:

— Кредит портфели 117%га ошиб, 5 триллион сўмга етган
— Депозитлар 61%га ўсиб, 3,2 триллион сўмга етган
— Рўйхатдан ўтган фойдаланувчилар сони 41%га ошиб, 15,7 миллионга етди ва бу TBC’ни Марказий Осиёдаги энг йирик онлайн банк экотизимларидан бирига айлантирди.
— Ойлик фаол фойдаланувчилар сони (MAU) эса 38%га ошиб, 4,7 миллионга етди
— 2024 йилнинг биринчи ярмида соф фойда 81%га ўсиб, 196 млрд сўмга етди
— Соф фоизли маржа 24%ни ташкил этди
— Банкда 25 хил миллат вакилларидан иборат 2100 нафар мутахассис фаолият юритади.

Манба

Сезилган инфляция маълумоти нархлари юқори даражада ўсган товар ва хизматларсиз тақдим этилган

Марказий банк сезилган инфляция бўйича июль ойи маълумотларини яна тўлиқ бўлмаган, чеканкаланган кўринишда очиқлаган. Июнь ойидаги ахборотда умумий маълумот билан кифояланилганди.

Бу сафар аҳоли томонидан нархларида юқори ўсиш кузатилган асосий турдаги товар ва хизматлар тақдим этилмаган (охирги марта май ойи бўйича берилган). Ўзи умуман июль ойида гўёки дефляция юз бергани бўйича статистик маълоумотлар қайта текширилиши лозим бўлади.

Чеканкаланган ахборот сезилган инфляциянинг бир фоиз бандига, 12,4%гача пасайгани бўйича маълумотларнинг ишончлилигига саволлар пайдо қилади.

Пойтахт Тошкентда сезилгна инфляция юқорилигича қолмоқда (14,7%).

Қизиқ тарафи, охирги марта кенг маълумотлар берилган май ойи билан солиштирилганда 2 млн.сўмгача даромад олувчиларнинг сезган инфляцияси 12,4%дан, 13,6%гача ўсган.

Жиззах вилоятида 21% ва ундан юқори инфляция сезганлар улуши 10%дан 22%гача кўтарилган.

Навбат қишлоқ хўжалигига

Президент ва тадбиркорлар ўртасидаги очиқ мулоқот олдидан ташкил этилаётган давра суҳбатлари давом этмоқда. Бугун қишлоқ хўжалигида мавжуд муаммолар ва уларнинг ечими бўйича таклифларни шакллантириш мақсадида давра суҳбати бўлиб ўтмоқда.

Унда Савдо-саноат палатаси, Бизнес-омбудсман, Солиқ қўмитаси, Қишлоқ хўжалиги вазирлиги ва бошқа тегишли вазирлик ҳамда идоралар раҳбарияти иштирок этяпти.

Учрашувни YouTube’да жонли эфирда кузатиб бориш мумкин.

Мулоқотларда очиқлик сиёсати кўринаяпти

Президент ва тадбиркорлар ўртасидаги очиқ мулоқот олдидан ташкил этилаётган давра суҳбатлари ҳар сафар жонли эфир орқали узатиляпти. Эфирни минглаб одам кузатяпти. 

Эфир остида кузатувчилар ҳам изоҳлар ёзиб қолдиряпти, муаммолар айтиляпти, танқидий муҳокамалар авж оляпти. Ўзи бу йилги мулоқот олдидан ташкил этилаётган учрашувларнинг жонли эфирда, очиқ майдонда узатилиши янгича ёндашув бўлди. Бизнес ва давлат органларининг очиқ мунозараларидан ҳамма ютади.

Шоли экиш бўйича фермерларга чеклов жорий қилиш таклиф этилди: бу зарарли чақириқ

Қорақалпоғистонлик тадбиркор ҳудудда шоли экишга бўлган таъқиқ ҳақида гапириб, Сурхондарё, Бухоро, Хоразм вилоятлари билан бир қаторда Қорақалпоғистоннинг ҳам барча туманларига чеклов жорий қилишни таклиф этди.

«Фермернинг, масалан, 10 фоизи ерига шоли экиш белгилансин. Ундан ортиқ эккан фермер жазоланиши жорий қилинсин. Нега Сурхондарё, Бухоро каби вилоятларда сув тежалмайди, лекин Қорақалпоғистонда тежалиши керак?», — дейди тадбиркор.

Фермерларнинг нима экиш экмаслиги, қанақадир чекловлар ва маъмурий тақиқлар билан эмас, сув нархи ва ер солиғи билан тартибга солиниши зарур. Бизнинг реалликларда бу кўпроқ сув нархи билан амалга оширилиши тўғри бўлади.

Фалончи ёки фалон жойда сув тежалмайди, шунинг учун шоли экиш тақиқланиши керак каби бюрократик штамплар билан сув тежалиб қолмаслигини тушуниш, сувнинг бозор нархини шакллантириш орқали фермерларни иқтисодий самарадорлик ва нисбий афзалликка йўналтириш керак.

ҚҚСни қишлоқ хўжалиги учун алоҳида жорий қилиш таклиф этилди

Президент ва тадбиркорлар ўртасидаги очиқ мулоқотга тайёргарлик доирасида қишлоқ хўжалиги соҳасидаги тадбиркорлар билан ўтказилган учрашувда Президент ҳузуридаги тадбиркорликни қўллаб-қувватлаш бўйича жамоатчилик кенгаши аъзоси Фахриддин Илёсов Жаҳон савдо ташкилотига аъзо бўлган мамлакатларда қишлоқ хўжалиги маҳсулотлари учун алоҳида қўшилган қиймат солиғи жорий қилинганини таъкидлади.

Унга кўра, Германияда қишлоқ хўжалиги маҳсулотларига ҚҚС 7 фоиз, Туркияда 1 фоиз, Хитойда 0,01 фоизни ташкил этади.

Келиб чиқадики, қишлоқ хўжалиги соҳасига ҚҚСни татбиқ қилишда жаҳон тажрибасини ўрганиш жуда муҳим. Тадбиркорликни қўллаб-қувватлаш бўйича жамоатчилик кенгаши бу борада ўрганишлар олиб бораётгани албатта манфаатли бўлибди.

Жамоатчилик кенгаши тадбиркорларни қўллаб-қувватлаш бўйича фаол ишлаётганини кузата туриб, тадбиркорларга қайси соҳада, қайси жаҳон бозорида ишлаш яхшилигини тушунтириб берадиган ташкилот ҳам бўлса, фойдадан холи эмас деб ўйлайман. Ва ЖСТга аъзо бўлишдан аввал тадбиркорларимиз орасида тушунтириш ишлари олиб борадиган ташкилот ҳам жуда зарур.

​Мақсад, Имконият ва Натижа

3 йил аввал, Токио олимпиадасидан кейин Давлат раҳбари медаллар бўйича етакчи 15 та мамлакат қаторидан жой олиш учун ҳамма имкониятларимиз борлиги ҳақида айтган эди.

Қарангки, Ўзбекистон Париж олимпиадасида кучли 15 таликдан жой олди.

Мақсад тўғри қўйилса, натижа бўлади. Имкониятлардан фойдаланилса кифоя.

Ботир Қобилов Ўзбекистонни энг кўп медалларни қўлга киритган бой давлатлар рўйхатида ажралиб турган мамлакатлигига эътибор қилган. Агар мақсадлар тўғри қўйилса, имкониятлардан оқилона фойдалансак, бой ва фаровон давлатга ҳам айланамиз.

Иқтисодиётда ҳам шундай бўлади.