#4_sektor
#Tomorqachilik

Tomorqa oila byudjetiga yaxshigina daromad keltiradi

Kogon tumanidagi “Bahouddin Naqshband” mahallasida istiqomat qilib kelayotgan Burhon Yodgorovning yashash sharoiti va yuqori daromad topishiga ko‘pchilik havas bilan qaraydi. Uning daromadi esa oddiygina tomorqachilikdan.

Yashirishning hojati yo‘q B.Yodgorov oila a’zolari bilan birgalikda 20 sotixga yaqin tomorqa yerida har yili erta bahordan pomidor, bodring hamda bulg‘or qalampiri yetishtirib 80 million so‘mga yaqin daromad topadi.

Bu uning yil boshidagi daromadi xolos. Ushbu ekinlar ketidan keyingi hosildan ko‘zlangan foyda ham bundan kam bo‘lmaydi. E’tiborlisi, ishbilarmon dehqon B.Yodgorov issiqxonasida mavsumiy 10 nafargacha ishchini yollab, barakali hosilidan ularga ham yaxshigina haq to‘lab kelmoqda.

Quvonarlisi, yaratilgan sharoitlar va berilgan yengilliklar tufayli 4-sektor hududida ana shunday ishbilarmon tomorqachilar ko‘payib borayapti.
Aniq raqamlar bilan aytganda, ayni kunda birgina Kogon tumanida yilning to‘rt faslida ham barakali hosil yetishtirayotgan xo‘jaliklar ekin yeri 20 gektardan ortiq maydonni tashkil etmoqda.

Mazkur issiqxonalarning aksariyati 1-4 sotixdan iborat bo‘lib, ularda yil bo‘yi pomidor, kartoshka, piyoz, bodring, karam, sarimsoqpiyoz, qolaversa, limon, apelsin kabi sitrus mevalar yetishtirilmoqda.

Bundan tashqari, hududda bugungi kunda 21 mingga yaqin aholi 2 ming 128 gektarga yaqin tomorqaga egalik qilib ulardan samarali foydalangan holda oila byudjetiga yaxshigina daromad kiritmoqdalar.

🌐Тelegram 🌐Facebook 🌐Instagram

#4_sektor
#Qorovulbozor_tumani

Buxoroda tadbirkor ayollar soni oshmoqda

Qorovulbozor tumani viloyatning eng olis hududi bo‘lishiga qaramay, keyingi yillarda ushbu hududda katta-katta o‘zgarishlar amalga oshirilmoqda.
Ayniqsa, tadbirkorlik faoliyati uchun berilayotgan yengilliklar va sektorlar ko‘magi bilan mazkur tumanda tadbirkorlik faoliyati ham keng quloch yozyapti.

Buning natijasida esa ko‘plab ishsiz aholi ham doimiy ish o‘rniga ham arzirli daromad manbaiga ega bo‘layotgani quvonarli albatta. E’tiborlisi, tuman mas’ullarining daldasi bilan tadbirkorlar safida ayol ishbilarmonlarning soni ham ortib bormoqda.

Shu yerlik tashabbuskor ayollardan biri 4 yildan beri o‘z uyida quroqchilik bilan shug‘ullanib kelayotgan Mahliyo Rahmonovaga ham “mahalla yettiligi”ning daldasi o‘z samarasini berdi. Aniqrog‘i, bundan ruhlangan M.Rahmonova tadbirkorlik faoliyatini kengaytirish maqsadida “Tinchlik” mahallasida quroqchilik sexini ishga tushirishga ahd qildi.

Buni qarangki, tez kunda uning rejasi amalga oshib, mo‘jazgina sex ishga tushdi va unda shu yerlik ishsiz 5 nafar xotin-qizlarning rasman bandligi ham ta’minlandi.
Bundan tashqari, tadbirkor ayol 10 nafar xotin-qizlarni ham kasb-hunarga o‘qitishni o‘z zimmasiga oldi.

🌐Тelegram 🌐Facebook 🌐Instagram