Сардаана Степанова үс бастыҥ иһигэр киирдэ

🏹Ааспыт өрөбүллэргэ “Дохсун” СК төрүт оҕунан ытыыга өрөспүүбүлүкэтээҕи турнир буолла.

🏃Бу күрэхтэһиигэ 322 охчут күөн көрүстэ. Горнай спортсменнарыттан уопсай түмүккэ Сардаана Степанова Кэбээйиттэн Анна Обутова уонна Мэҥэ Хаҥаластан Маргарита Захарова кэнниттэн боруонса мэтээли 🥉 ылары ситистэ.

👏👏Биир үөрүүлээх түгэнинэн, спорт бу көрүҥүнэн дьаныардаахтык дьарыктанар дьоҥҥо спорт маастарыгар кандидат нуорматын толорбуттарын туоһулуур дастабырыанньалары туттардылар.

Кинилэр ортолоругар биһиги улуустан Евдокия Егорова ылар чиэстэннэ.

👍Күрэхтэһии түмүгүнэн, биһиги улуус охчуттара Нюргустаана Сидорова, Саяна, Сергей Кондаковтар Саха сирин хамаандатын састаабыгар киирэннэр, Мириинэй куоракка ыытылыахтаах, “Алроса” АК бирииһигэр сыала суох оҕунан ытыыга Бүтүн Россиятааҕы турнирга өрөспүүбүлүкэ чиэһин көмүскүүр чиэстэннилэр.

✊Спортсменнарбытыгар эппиэтинэстээх күрэхтэһиигэ ситиһиилэри баҕарыаҕыҥ.

✍️Вячеслав Алексеев
@silatrudagorny

Түргэн наартаны ойдулар

🏆Олунньу 25 күнүгэр Маҕараска Баһылай Манчаары аатынан өрөспүүбүлүкэтээҕи спорт национальнай киинин бирииһигэр оҕолорго наартаны түргэнник ойууга аһаҕас турнир буолла. Маҕарас, Аһыма спортсменнарыттан ураты Аллайыахаттан, Муоматтан, Үөһээ Дьааҥыттан, Уус Майаттан, Дьокуускайтан 86 эдэр спортсмен бэйэтин күүһүн холонно.

💬– Оҕолор бары бэйэлэрин саастарыгар олох үчүгэйдик ыстаннылар. Аһара барар кыахтара суох диэххэ сөп. Кырачаан дьон долгуйар буоланнар сыыһаллара баар бөҕө буоллаҕа. Биһиги барытын көрөммүт, туоратарга үлэлэһиэхтээхпит. Аһыма оҕолоро бэркэ кытыннылар. Онно тренер Василий Ефремов үлэтин бэлиэтиэх тустаахпыт.

👍Күрэхтэһиигэ өрөспүүбүлүкэ лидердара Нерюнгри, Үөһээ Бүлүү, Анаабыр, Чурапчы спортсменнара кэлбэтилэр. Кинилэр оҕолоро хайдах турукка сылдьалларын көрбөтүбүт. Тааттаҕа Саха сирин үөрэнээччилэрин спартакиадатын сочуотугар киирэр хотугу многоборье күрэхтэһиитигэр бэлэмнэнэбит. Ол кэннэ кулун тутар ый бастакы күннэригэр “түргэн наартаҕа” өрөспүүбүлүкэ чемпионатыгар кыттыахпыт, – диэн тренер Иван Горохов санаатын үллэстэр.

👏👏Күрэхтэһии түмүгүнэн биһиги улуустан бэйэлэрин саастыылаахтарыгар үс бастыҥ иһигэр киирдилэр:

I миэстэ Алиса Семенова (238), Доминика Григорьева (234), Даниела Степанова (218), Эдуард Ксенофонтов (404), Дайаана Тарасова (271), Алгыс Михайлов (324). II – Айаана Садовникова (231), Мирон Оленов (264), Лера Саввинова (237), III – Эрхан Султашов (280), Юлиана Максимова (220), Лилиана Павлова (191), Максим Дунаев(261) буолла.

✊Спортсменнар, тренердэр күрэхтэһиигэ спонсордаабыт “Одуну нэһилиэгэ” МТ дьаһалтатыгар (баһылык В.М.Текеянов), Лука Харитонов аатынан орто оскуола кэллэктиибигэр (дириэктэр М.В.Максимов) уонна хотугу многоборье сайдыытыгар мэлдьи күүс-көмө буолар Мария Ноговицынаҕа истиҥ махталларын тириэрдэллэр.

✍️Вячеслав Алексеев
@silatrudagorny