Көҥүл туругурарын туһугар

📙Бүгүн  Мытаахтааҕы музей-галереяҕа спорт бэтэрээнэ, историк, краевед Алексей Саввин "Көҥүл  туругурарын туһугар - "Албан ааттаах өлүүнү" талбыт конфедералистар" кинигэ сүрэхтэниитэ ыытылынна.

👏👏Николай Осипов ааптар Алексей Саввин  олоҕун, айар үлэтин сырдатта.Кинигэ  тахсааһыныгар кылааттарын киллэрсибит редактор Василий Алексеев, эдэр поэт Василий Тимофеев саха сириттэн аан бастакынан конфедералистар тустарынан саҕалаабыт кинигэ ааптарын эҕэрдэлээн туран, үтүө дьыала салгыы сырдатылла турарыгар баҕа санааларын эттилэр.

Улуус депутаттарын  Сэбиэтин  бэрэссэдээтэлэ Алквиад Тарасов  Бочуотунай Грамотаны туттарда.

Библиографическай ырытыыны  библиограф Анастасия Заровняева оҥордо. Мытаах баһылыгын солбуйааччы Евдокия Пахомова  ыалдьыттары эҕэрдэлээтэ, кинигэҕэ үлэлэспит дьоҥҥо үтүө тылларын эттилэр.

Историческай кинигэ сүрэхтэниитин түгэнигэр  Алексей  Саввиҥҥа "Мытаах нэһилиэгин Бочуоттаах  олохтооҕо" бэлиэни туттардылар.

✨Түмүккэ ааптар бар дьонугар махталын эттэ, дойдубут сайдарын туһугар истиҥ тылларын тириэртэ.

Нина Сутакова.
@silatrudagorny

Хачыгаардар үлэлэрэ күөстүү оргуйар

🥶Халлааммыт күүскэ тоҥорон, тымныытын ыһыктыбакка турар.

✊Бу маннык улахан аам-даам тымныыга дьиэ-уот коммунальнай хаһаайыстыбатын тэрилтэтигэр икки бүк эппиэтинэс сүктэриллэр. Бэрдьигэстээх киинигэр “БСШ” 2 №-дээх учаастага соҕотох чоҕунан оттуллар хочуолунай буолар. Манна аҕыс киһи түөрт сменанан солбуһа сылдьан тураллар.
Николай Леонтьев уонна Дмитрий Степанов туһааннаах тэрилтэҕэ үлэлээбиттэрэ балачча кэм ааспыт. Уопуттаах дьонунан ааҕыллаллар.

– Хаһан сылыйара буолла. Тымныыбыт дьэ уһуннук турда. Бу маннык күҥҥэ-дьылга биһиги үлэбит өссө күүһүрэр. Бу хочуолунайтан Сэмэн Данилов аатынан оскуола, элбэх хайысхалаах спортивнай комплекс о.д.а. тэрилтэлэр, ону таһынан биирдиилээн ыаллары тэҥэ, дьон олорор этээстээх дьиэлэрэ сылааһынан хааччыллаллар. Онон үлэбит олус эппиэтинэстээх.

Сууккаҕа 24 тн чоҕу оттобут. Сменабытыгар аҥарын бүтэрэбит. Барыта илии үлэтэ. Бу тымныыларга 40 мүн буола-буола биэс оһоҕу оттобут. Чохпутун 1 туонналаах вагонетканан киллэрэбит. Тырахтарыыс Василий Лукин кутан биэрэр. Оһох бүөлэммэтин, мөлтөөбөккө умайдын диэн үчүгэйдик ыраастыыбыт. Күлү таачыканан таһаарабыт, – диэн уолаттар оһоххо чохторун быраҕалларын быыһыгар кэпсииллэр.

😮Учаастак маастарынан бу күһүҥҥэттэн Михаил Сидоров ананан үлэлиир. Кини ДьУоКХ тэрилтэтигэр бастаан слесарынан киирбит. Салалта үлэтигэр эппиэтинэстээх уолу таба көрөн, кыайыа диэннэр биир улахан объект маастарынан анаабыттар. Михаил этэринэн, уолаттар бары үлэлэригэр олус кыһамньылаахтык сыһыаннаһаллар. “Тэрилтэ анал таҥаһынан толору хааччыйар, бары усулуобуйаны тэрийэр. Туттар мал-сал барыта баар. Онон үлэ көхтөөхтүк барар”, – диэн Михаил кылгастык кэпсиир.

👏Тымныылар маннык уһуннук турбуттарын аҕам саастаах дьон бу диэн өйдөөбөт. Онон хаһааҥҥытааҕар да уустук, сэрэхтээх кэмҥэ дьиэлэр сылаас буолалларыгар кыһамньыларын уурар дьоммутугар махтаныах тустаахпыт.

✍Вячеслав Алексеев.

@silatrudagorny