Жоқарғы Кеңес Баслығы ҳәм Татарстан басшысы арасында сөйлесиўлер алып барылды

Қарақалпақстан Республикасы Жоқарғы Кеңесиниң Баслығы Аманбай Орынбаев Татарстан Республикасы басшысы Рустам Минниханов пенен ушырасты.

Айтып өтиў орынлы, Жоқарғы Кеңес Баслығы басшылығындағы Қарақалпақстан делегациясы Татарстан Республикасы пайтахты Казань қаласында өткен 2023-жыл октябрь айында өткерилген «III Өзбекстан ҳәм Россия аймақлараралық бирге ислесиў форумы» шеңберинде усы аймақта болған еди. Сондай-ақ, Татарстан басшысы Рустам Минниханов басшылығындағы Татарстан делегациясы да сол жылдың өзинде ноябрь айында Қарақалпақстанға келди. Буннан тысқары, жақында Россия Федерациясы Президентиниң Өзбекстанға рәсмий сапары шеңберинде де федерацияның бир қатар аймақлары, соның ишинде Татарстан менен де сөйлесиўлер өткерилип, парламентлер аралық байланысларды еледе беккемлеў бойынша еки тәреплеме келисимге қол қойылған еди.

Әлбетте, Қарақалпақстан ҳәм Татарстан арасындағы бул байланыслар буннан-былайда даўам еттириледи.

Дәслеп Жоқарғы Кеңес Баслығы Татарстан Республикасының ҳүрметли мийманлары китабында тилеклерин жазып қалдырды.

Буннан соң еки тәреплеме бирге ислесиў мәселелери бойынша ушырасыў өткерилди.

Ушырасыўда бүгинги күнде Өзбекстан Республикасы ҳәм аймақлары менен Татарстан арасында товар айланысы көлеми артып баратырғанлығы, сондай-ақ, мәденият, туризм, спорт, илим-пән, билимлендириў бағдарлары бойынша да байланыслар беккемленип атырғанлығы, Татарстан жоқары оқыў орынларында 2,5 мың өзбекстанлы студентер билим алып атырғанлығы атап өтилди.

Сондай-ақ, өз-ара товар алмасыў көлеми артып баратырғанлығы, өткен жылы Өзбекстан-Татарстан арасындағы товар айланбасы 370 миллион долларды қурап, 27 пайыз өсим бақланғаны, товар ҳәм хизметлерди өз-ара жеткерип бериў көлеми ҳәм түрлерин көбейтиў үстинде ислеўди даўам еттириў зәрүрлиги ҳәм буның ушын барлық имканиятлар бар екенлиги айрықша тилге алынды.

Онда бир қатар әҳмийетли бағдарлар бойынша әмелий бирге ислесиў жойбарларын биргеликте әмелге асырыў, жақын шериклик қатнасықларын еледе беккемлеў мәселелери талқыланды.

Бул бағдарда Нөкис қаласында Татарстан Республикасы менен биргеликте Технопарк қурыў мәселесинде әмелий илажларды баслаў, сондай-ақ, Нөкис қаласы аймағында таяр база тийкарында инженерлер таярлаў техникумын шөлкемлестириў бойынша сөйлесиўлер алып барылды.

Буннан тысқары, Қарақалпақстан Республикасы үлкен потенциалға ийе регион екенлигине айрықша итибар қаратылып, жаңа жойбарлар үстинде пайдалы бирге ислесиў ҳәм бир қатар жөнелислерде жақын шериклик қатнасықларын беккемлеў бойынша жақыннан пикирлесилди.

Әлбетте, бул сөйлесиўлер ҳәм ерисилген келисимлер ҳәр еки тәреп ушын да әҳмийетли есапланып, еки ел арасындағы қатнасықларды беккемлеўге, сондай-ақ, елимиз раўажланыўы жолында хызмет етери сөзсиз.
—
Ўзб


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Республикамыз делегациясы Татарстандағы ири ислеп шығарыў ҳәм хызмет көрсетиў орынлары жумысы менен жақыннан танысты

Қарақалпақстан Республикасы Жоқарғы Кеңесиниң Баслығы Аманбай Орынбаевтың басшылығындағы республикамыз делегациясы Татарстанда әмелий сапарын даўам еттирип атыр.

Делегация ағзалары дәслеп Казань синтетикалық каучук заводы Акционерлик жәмийетине барды ҳәм заводтағы ислеп шығарыў процеси менен жақыннан танысты. Завод нефт-химия санааты кәрханаларынан бири болып, Россияда полисулфид полимерлерин ислеп шығарыўшы жетекши кәрханалардан есапланады. Улыўма 100 гектарлық ислеп шығарыў майданына ийе заводта 550 ден артық жумысшы қәнигелердиң бәнтлиги тәмийинленген болып, 160 түрдеги өним 5 өз алдына ислеп шығарыў майданларында ислеп шығарылады.

Буннан соң, фармацевтика тараўында Россия Федерациясы бойынша Топ-20 компаниялары қатарына кириўши «Татхимфармпрепараты» жумысы көзден өткерилди.

Бул жерде делегация ағзалары дәри-дәрмақ ҳәм фармацевтика тараўында ислетилетуғын өнимлердиң ислеп шығарылыў процеслери менен жақыннан танысты.

Татарстан Республикасы, Казань қаласына Жоқарғы Кеңес Баслығы басшылығындағы делегация Башир Рамеев атындағы IT-парк жумыслары менен жақынан танысыў мақсетинде барды, бул жерде исленип атырған жумыслары бойынша Презентация өткерилди. Келешекте бирге ислесиўди еледе раўажландырыў, яғный, Татарстан Республикасы кәрханалары қатнасыўында ( Нефт-газ, Транспорт логистика тараўын саңластырыў бағдарында) Қарақалпақстан Республикасында қоспа кәрхана шѳлкемлестириў бойынша меморандумға қол қойылды.

Сондай-ақ, Татарстан Республикасының IT кәрханалары менен программалық ѳнимлер бойынша бирге ислесиў бағдарында келисимге ерисилди.

Татарстандағы ислеп шығарыў ҳәм хызмет көрсетиў орынлары менен танысыў даўамында жуўапкерлер ҳәм исбилерменлер менен бирге алдынғы тәжирийбелер үйренилди ҳәм алдағы ўақытта усы жөнелислер бойынша бирге ислесиўлерди жолға қойыў бағдарында режелер белгилеп алынды.
—
Ўзб


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter